Pagkaplag og Kalipay sa Imong Kaugalingon

Aubrey Johnson

Unsaon man kaha nato pagkat-on sa paghigugma sa atong kaugalingon ug sa tanang ginagmayng kinaiya nga makapahimo sa atong, pagkakita?

Ang tagsulat nagpuyo sa Idaho, USA.

Isip batan-ong hamtong, sa akong paminaw ang kadaghanan nato nanglimbasug sa paghigugma sa atong mga kaugalingon ug sa pagkaplag og kalipay diha sa atong kaugalingon. Magsugod kini sa dili kaayo paghunahuna og positibo mahitungod sa atong mga lawas, sa atong mga personalidad, o sa atong mga abilidad. Sa higayon nga ato nang mahibaloan kon unsa gayud ang dili nato gusto (diin, subo kaayo, nga sayon ra gayud), maningkamot kita sa pag-usab niadtong mga butanga. Apan tingali kanang kausaban dili ingon ka paspas nga mahitabo o sa paagi nga atong gilauman. O magsugod kita sa pagtandi sa atong kaugalingon ngadto sa uban diha sa social media, ug dayon mobati na usab kita og kaguol. Makaguol kaayo, nga daghan kanato ang magpalabi sa pagkabalaka mahitungod sa atong “pagka dili malipayon” imbis maningkamot sa pagkaplag og kalipay sa atong kaugalingon.

Dili ingon niana ang pagpakabuhi. Apan tungod kay gilibutan kita sa media ug sa mga tawo nga moimpluwensya sa atong mga ideya bahin sa unsay “angay” natong hitsura, linihokan, binuhatan, ug pagbati, mao nga dili ikahibulong nga maglisud kita sa pagkaplag og kalipay sa atong pagka-indibidwal! Kanunay kong naghunahuna: Unsaon nato nga makat-on sa paghigugma sa atong kaugalingon ug sa tanang ginagmay nga mga kinaiya nga makapahimo sa atong, pagka-kita, kon ang katilingban kanunayng naningkamot sa pagpugos kanato nga mohaum sa dili makanunayon nga sumbanan?

Nan, magsugod kita sa pagkaplag og kalipay sa atong kaugalingon, sa atong pagka-indibidwal, ug sa atong patuo ug mga sumbanan.

Apan ang pangutana mao, unsaon man nato kana sa pagbuhat?

Sa akong paminaw managlahi kining tanan alang kanato. Apan sa akong hunahuna adunay pipila ka mga aksyon nga atong mahimo nga mahimo sa tanang tawo.

Una, buhata ang unsay makalipay kaninyo! Pananglitan, sa una dili ko ganahan mag-ehersisyo—ug dili gyud ko ganahan. Apan bag-ohay lang sa pagkatinuod nagsugod ko nga malingaw nga mag-ehersisyo. Ang pag-ehersisyo makahatag og panahon sa akong kaugalingon (mahimong pinaagi sa paglakaw o moadto sa gym). Makapahimo kini nako nga mobati og kaayo, dili tungod kay naningkamot ko nga moubos ang timbang o nindot nga tan-awon sa piho nga paagi, apan tungod kay mas maayo lang ang akong gibati mahitungod sa akong kaugalingon. Aduna koy dugang nga kusog ug dugang nga pagsalig, ug kana nakapabati nako og dakong kalipay.

Dili lang ang pag-ehersisyo ang gikinahanglan aron molambo ang inyong pagbati og kaayo—tingali ang pagkaon og mas himsog, pagpamalandong, pagkatulog og mas sayo, o bisan ang pagbuhat og yanong butang sama sa pagginhawa og lawom ug pag-unat-unat makatabang ninyo nga mobati og maayo.

Ikaduha, sayri kon si kinsa kamo! Kini magkinahanglan og taas nga panahon, apan kon makaamgo kamo kon si kinsa kamo, makapahimo kini sa tanang kalainan! Nasayud ko nga ako anak nga babaye sa Dios. Siya—usa ka hingpit nga nilalang—milalang kanako! Giunsa nako sa pagkahibalo niini? Nag-ampo ko, nagbasa ko sa akong mga kasulatan, ug gilibutan nako ang akong kaugalingon sa mga tawo kinsa nagtuo sa samang mga butang nga akong buhaton! Gani nangutana ko, “Unsa kaha ang hunahuna sa Dios kanako?” sa akong pagbasa sa mga kasulatan, ug nakaamgo ko nga kon Siya nagpakabana sa Iyang mga katawhan sa unang panahon, mao gihapon ang Iyang gibati ngari kanato karon.

Ang Langitnong Amahan wala masayop sa paglalang kanato. Sa daghang kahimtang, ang unsay atong giisip nga mamahimong sayop sa pagkatinuod mga oportunidad sa pagbalik ngadto kang Kristo ug mahimong hingpit diha Kaniya. Karon, layo ra kaayo ko sa pagkahingpit! Apan ang Dios nagtan-aw kanako isip Iyang anak nga babaye, ug Siya nahigugma kanako sama sa Iyang paglalang kanako. Nasayud nga Siya milalang sa mga langit ug sa yuta mihukom nga ang kalibutan nagkinahanglan og usa sama usab nako nga makatabang ni bisan kinsa nga mobati og kalipay sa ilang kaugalingon.

Ikatulo, tutuki ang inyong mga kalig-on! Kitang tanan adunay daghan kaayong nagkalain-laing abilidad, apan usahay lisud nga mailhan kon sa unsa nga dapit kita maayo. Hunahunaa ang inyong mga kalingawan—nagpakita kini sa lain-laing mga talento ug mga kalig-on nga wala kamo makaalinggat. Makapangutana ka sa imong mga minahal sa pagsulti nimo kon unsa ang imong mga kalig-on. Mas makit-an nila ang imong mga talento nga mas klaro kay kanimo. Tun-i ang imong patriyarkal nga panalangin aron masayud sa pipila sa mga gasa ug mga abilidad nga gipanalangin sa ios diha kanimo.

Ug kon gusto ka nga masayud pa og dugang, pag-ampo mahitungod niini! Ang Langitnong Amahan andam motabang nimo sa pag-ila sa imong balaan nga gasa. Usab, makahangyo ka Kaniya nga ipakita diha nimo unsa pay imong mapalambo. Ang masayud sa atong mga kahuyang ug pagtinguha sa kalig-on sa Ginoo makatabang kanato nga molambo—busa ayaw pagpakawala og kadasig niini. Ang Dios dili basta lang nga mitugot nga makabaton og mga kahuyang apan mipanalangin usab kanimo og mga kalig-on. Kon inyo kining atubangon diha sa pagkamapaubsanon, magtinguha sa giya sa Ginoo, mahimo kamong molambo ug makakaplag og kalipay kon si kinsa kamo!

Gusto sa Dios nga kita mobati og kalipay niining kinabuhia. Motuo ako nga kon kita mobuhat niining tulo ka mga butang, makakaplag kita og dugang nga kalipay sa atong mga kaugalingon. Nasayud ko nga nabati nako ang kalipay ug padayon nga mobati og kalipay kon kining mga butanga akong buhaton sa kada adlaw.