Ang Katapusang Pulong
Pagtahud sa Gasa sa Atong mga Lawas
Ni Elder D. Todd Christofferson
Sa Korum sa Napulog Duha ka mga Apostoles
Gikan sa Oktubre 2010 nga pakigpulong sa kinatibuk-ang komperensya.
Ang tinuod nga kalampusan sa kinabuhi moabut sa pagpahinungod sa atong kinabuhi—kana mao, ang atong panahon ug mga pagpili—ngadto sa mga katuyoan sa Dios (tan-awa sa Juan 17:1, 4; Doktrina ug mga Pakigsaad 19:19). Sa pagbuhat niini, gitugutan nato Siya sa pagdala nato ngadto sa atong kinatas-ang kapaingnan.
Ang usa ka gipahinungod nga kinabuhi motahud sa dili matupngan nga gasa sa pisikal nga lawas sa usa ka tawo, usa ka balaan nga nilalang subay sa panagway gayud sa Dios. Usa sa mahinungdanong katuyoan sa mortal nga kasinatian mao nga ang matag espiritu kinahanglang makadawat og pisikal nga lawas ug makat-on sa pagbansay sa moral nga kabubut-on isip duha ka binuhat ang lawas ug espiritu. Ang usa ka pisikal nga lawas mahinungdanon usab alang sa kahimayaan, nga moabut lamang sa hingpit nga kombinasyon sa pisikal ug sa espirituhanon, sama sa atong makita diha sa atong minahal, nabanhaw nga Ginoo. Niining napukan nga kalibutan, ang ubang mga kinabuhi puno sa kasakit nga kadiyot lang, ang pipila sa mga lawas wala maporma og husto, nabali, o dili kaayo paigo sa pagpatunhay sa kinabuhi; apan ang gidugayon sa kinabuhi paigo alang sa matag espiritu, ug ang matag lawas nga mahimong takus sa pagkabanhaw.
Kadtong nagtuo nga ang atong mga lawas resulta lang sa usa ka sulagma nga ebolusyon mobati nga walay tulubagon ngadto sa Dios o ni bisan kinsa sa unsay ilang gibuhat o sa ilang lawas. Kita kinsa adunay mahangturong panglantaw, bisan pa, kinahanglan gayud nga moila nga kita adunay katungdanan ngadto sa Dios kalabut kon giunsa nato pagdala ang atong mga lawas. Sa mga pulong ni Pablo:
“Unsa? wala ba kamo masayud nga ang inyong lawas templo sa Espiritu Santo nga nagapuyo sa sulod ninyo, ug nga kini inyong nabatonan gikan sa Dios, kamo dili na inyo sa inyong kaugalingon?
“Kay gipalit na kamo sa usa ka bili: busa himayaa ninyo ang Dios diha sa inyong lawas, ug sa inyong espiritu, nga ang tag-iya ang Dios” (1 Mga Taga-Corinto 6:19–20).
Sa pag-ila niini nga mga kamatuoran ug sa direksyon sa moderno nga mga propeta, siguradong dili nato hugawan ang atong lawas, sama sa mga patik; o mopaluya niini, sama sa drugas; o hugawan kini, sama sa pakighilawas nga dili pa minyo, o pagkadili maligdong. Ingon nga ang atong lawas instrumento sa atong espiritu, mahinungdanon kaayo nga atong ampingan kini kutob sa atong mahimo. Kinahanglan nga atong ipahinungod ang mga gahum niini sa pagserbisyo ug sa pagpadayon sa buhat ni Kristo. Si Pablo miingon, “Busa hangyoon ko kamo mga igsoon, tungod sa mga kalooy sa Dios, sa pagtugyan sa inyong mga lawas ingon nga halad nga buhi, balaan, hinangponon sa Dios” (Mga Taga-Roman 12:1).