Paghunahuna sa Inyong Tinuod nga Pagkatawo

Imahe

young adult woman looking at her reflection

Unsay imong makita kon ikaw motan-aw sa salamin?

Motutok ba ikaw sa mga butang nga wala nimo ganahi sa imong panagway? Kastiguhon ba nimo ang imong kaugalingon tungod sa imong mga sayop o mga kahuyang? Nakita ba nimo ang nawong sa usa ka tawo kinsa nanaway kanimo nga nagtan-aw og balik?

O nakita ba nimo ang imong kaugalingon isip usa ka anak sa Dios? Nakita ba nimo ang usa ka tawo nga naghunahuna og positibo ug nagpadayag og pasalamat bisan unsa pa ang sirkumstansya? Nakita ba nimo ang nawong sa usa ka tawo kinsa nagtagad nimo uban sa kapuangod?

Kon kita makasabut kinsa gayud kita, makabuntog kita sa pagpanaway sa kaugalingon, sa pagkaperpeksyonista, ug sa mga kinaiya nga makadaot sa kultura. Kita makahunong sa pagtutok pag-ayo sa atong pisikal nga panagway diha sa salamin ug hinoon magtinguha sa pagdan-ag sa Kahayag ni Kristo. Niini nga isyu, kamo makabasa mahitungod sa imahe sa lawas ug mas makasabut og dako sa inyong kaugalingong bili. Ako mopakigbahin og mga panabut sa imahe sa lawas gikan sa mga kamatuoran nga makita diha sa mga kasulatan ug sa templo (tan-awa sa pahina 44). Sa usa ka digital lamang nga artikulo, si Sandra Vanessa mipadayag og pasalamat sa iyang lawas tungod sa masakit apan makapausab sa kinabuhi nga kasinatian sa pagbaton og anak.

Sa pahina 48, si Marcus mipakigbahin sa iyang istorya kon sa unsa nga paagi siya mibuntog sa negatibo nga pagtan-aw sa kaugalingon ug sa unsa nga paagi kitang tanan makaila nga kita sa pagkatinuod “eksakto ra gyud”—nga pinaagi sa Pag-ula ni Jesukristo, kita makabuntog sa tanang mga butang.

Isip disipulo ni Kristo, kita dili mahimong motutok sa nag-usab-usab nga mga pilosopiya sa kalibutan kabahin sa panglawas ug panagway, ni kita mohimo og pasalig ngadto sa maayong panglawas sa hilabihan. Hinumdumi, ang inyong bili dili mag-agad sa gidak-on o porma sa inyong lawas. Ang inyong bili walay kinutuban, ug kini gikan sa Dios.

Matinuoron,

Aspen Stander

Labing Maayo nga Tambag …

Ang batan-ong mga hamtong mopakigbahin sa ilang labing maayong tambag mahitungod sa pagpalambo sa imahe sa inyong lawas:

“Ayaw kabalaka unsa ang gihunahuna sa uban kaninyo gawas sa Ginoo! Naningkamot ko nga mahinumdom nga kadto nga mga ideya gikan ni Satanas tungod kay siya walay lawas.”

—Lauren Appleby, Queensland, Australia

“Paggahin og panahon sa pagpalambo og makahuluganon nga relasyon uban ni Kristo. Mihunong ko sa paghunahuna mahitungod sa akong kaugalingon. Tutok sa uban ug unsaon nimo nga makahimo ka og kalainan sa kalibutan.”

—Emily Speth, Utah, USA

“Gihunahuna nako ang tanan nga mga butang nga mahimo sa akong lawas: pagkugos og bata, paglakaw, pagdagan, pagdula, pagkanta, ug pagtabang sa uban.”

—Blythe Brady, Utah, USA

Unsa ang labing maayong tambag ang inyong nadawat mahitungod sa pagbuntog sa adiksyon, bisan sa mga butang sama sa mga smartphone ug mga dula sa video? Ipadala ang inyong tubag sa liahona.lds.org inig Agosto 31, 2019.