Unsa ang Balaod sa Kaputli?
Atong klarohon ang mahitungod niining sagrado kaayo nga sugo.
Kon kamo makadungog sa mga pulong “ang balaod sa kaputli,” nasayud ba kamo unsa ang gipasabut niini? Tingali kamo makakuha og lain-laing mga mensahe mahitungod niini. Ang tanang matang sa media, ug usahay bisan ang mga higala ug pamilya, adunay lain-laing mga opinyon mahitungod niini. Ug ang kalibutan aktibong nagtudlo sa mga butang nga supak sa unsay gitudlo sa Ginoo.
Mao nga unsa man gayud ang gipasabut sa balaod sa kaputli?
Ang balaod sa kaputli mao ang pulong sa Ginoo alang sa Iyang sugo nga magpuyo og kinabuhi nga putli ug mahiyason sa sekswal nga paagi.
Dili ba gihapon hingpit nga klaro? Nan, mas klarohon pa nato og gamay uban sa tabang sa Alang sa Kalig-on sa Kabatan-onan.
Ang Kaputli Mao ang Sekswal nga Kalunsay
Sa pinakayano nga mga pulong, ang pagsunod sa balaod sa kaputli nagpasabut nga kamo “dili maghimo og bisan unsang sekswal nga mga relasyon sa wala pa ang kaminyoon, ug magmatinud-anon [kamo] sa hingpit ngadto sa inyong kapikas human sa kaminyoon.”1
Ang pagkamahiyason ug pagkaputli mas labaw pa kay sa pakighilawas lamang. “Tagda kanunay ang uban nga adunay pagtahud, dili mga butang nga pagagamiton aron pagtagbaw sa mahigalon ug hinakog nga mga tinguha. Sa dili pa ang kaminyoon, ayaw pag-apil nianang lawom nga pagbati sa paghinagkanay, pagpatong ibabaw sa lain nga tawo, o paghikap sa pribado, sagrado nga mga bahin sa lawas sa lain nga tawo, aduna o walay saput. Ayaw paghimo og bisan unsang butang nga makapukaw sa sekswal nga mga pagbati. Ayaw pukawa kana nga mga emosyon sa inyong kaugalingong lawas.”2
Hibaloi nga ang mga sumbanan sa Ginoo dili mausab tungod lang kay duha ka tawo ganahan kaayo sa usag usa ug ang duha uyon ngadto niana nga kinaiya. Kon kamo motahud sa ubang mga tawo, ang Ginoo, ug ang inyong kaugalingon, motuman ka sa mga sugo—ug kana nagpasabut nga walay sekswal nga mga relasyon o pagpukaw sa sekswal nga mga pagbati nga gawas sa kaminyoon.
Ang Ginoo seryoso gayud mahitungod niini. “Si propeta Alma nagtudlo nga ang sekswal nga mga sala mas seryoso kaysa ubang mga sala gawas sa pagpatay ug pagsalikway sa Espiritu Santo (tan-awa sa Alma 39:3–5).”3
Kon kamo wala gihapon makasiguro kon unsa ang gipasabut sa “mainiton nga panaghalok,” o unsay gipasabut sa pagpukaw sa sekswal nga mga pagbati,” pakigsulti sa inyong mga ginikanan, bishop, o laing gisaligan nga hamtong. Ang pagpakig-istorya kanila makatabang kaninyo nga makasabut sa sakto ug dili sakto nga kinaiya ug makatabang ninyo nga magpuyo og kinabuhi sa sekswal nga kaputli.
Kon kinahanglan nga maghimo og mga desisyon, tinguhaa ang Espiritu. Pag-ampo kanunay sa Langitnong Amahan. Kon anaa kaninyo ang espiritu, mas sayon kaayo ang paghimo sa matarung nga mga pagpili.
Kon kamo nakahimo og bisan unsa nga sekswal nga kalapasan, tinguhaa ang tabang gikan sa inyong bishop ug sa inyong mga ginikanan, kinsa motabang kaninyo nga makaangkon og kalig-on ug kalinaw samtang kamo maghinulsol. Dili kini sayon nga proseso, apan kini bililhon gayud kaayo!
Ang Pagbati sa Kaibug OK Ra
Tingali kamo nagtuo nga sayop ang paghunahuna nga ang usa ka tawo madanihon. Ayaw kaayo kabalaka mahitungod niini. Normal ra kana. Seryoso ko!
Apan kinahanglan kamong magbantay sa inyong mga hunahuna. Ang Manluluwas mipasidaan kanato, “Bisan kadtong magatan-awg babaye [o lalaki] uban sa pagkaibog [kaniya], nakapanapaw na diha sa sulod sa [iyang] kaugalingong kasingkasing” (Mateo 5:28). Nagpasabut kana nga kamo kinahanglan nga mokontrol sa inyong mga hunahuna ug mga pagbati ug dili motugot nga madala sa mga tinguha.
Aniay paagi sa pagtabang kaninyo: paningkamot nga dili maghinakog. Ayaw pagbati og kahigal sa usa ka tawo, ayaw paghunahuna kanila sa dili angay nga paagi, o mobuhat og mga butang nga makapapukaw sa sekswal nga mga pagbati sa inyong kaugalingon o sa uban.4
Mao usab ngano nga importante nga dili moapil sa pornograpiya o ubang makadaot nga media. Kadtong mga butang hinakog kanunay, nag-abug kanunay sa Espiritu, ug kanunay nga motintal kaninyo sa mga butang nga dili angay nga buhaton.
Apan wala kini magpasabut nga ang pagbaton og pagbati ngadto sa usa ka tawo o mobati nga naibog sa usa ka tawo makapahimo ninyo nga dili maayong tawo. Gani, ang pagbati nga naibog kabahin sa plano sa Dios ug kabahin sa kaminyoon. Ang mga bana ug mga asawa kinsa adunay maayong mga relasyon mobati og lig-on nga kaibug sa usag usa ug tinguha sa pag-alagad ug pagpanalangin sa usag usa.
“Ang pisikal nga kasuod tali sa bana ug asawa maanindot ug sagrado. Kini gi-orden sa Dios aron malalang ang mga anak ug alang sa pagpadayag sa gugma tali sa bana ug asawa.”5
Pisikal nga Kasuod—sa Saktong Lugar ug Panahon
Ang pisikal nga kasuod butang nga angay paabuton sa inyong umaabut nga kaminyoon. Sagrado ug matahum kini.
Samtang kamo maningkamot nga magpuyo nga putli ug mahiyason nga kinabuhi, kamo mobati nga mas suod ngadto sa impluwensya sa Espiritu Santo, kamo mas mobati og maayo sa inyong kaugalingon, ug kamo makaandam alang sa talagsaong mga panalangin sa umaabut.