Ang Lasagna alang sa Adlaw nga Natawhan
Paghulagway ni Allen Garns
Sulod sa taas nga panahon, gibati nako ang tinguha sa pagluto og pan o paghimo og dugang pagkaon ug ihatag lang kini sa pipila sa among ward aron sa pagpakigbahin sa akong gugma ug sa gugma sa Ginoo kanila, apan wala gayud nako mahimo kini.
Ganahan ko magluto, apan ang akong bana ug ako lang ang naa sa among balay. Mao nga magluto lang ko og gamay tungod kay kon daghang pagkaon sa kasagaran molungtad og daghang semana sa paghurot.
Usa ka gabii nakahukom ko nga magluto og lasagna. Imbis maghimo og usa ka dako nga kaserola, naghimo ko og duha ka gagmay nga kaserola. Nianang paagiha kan-on namo ang usa alang sa panihapon, ug akong ihatag ang laing kaserola ngadto sa usa ka tawo nga nagkinahanglan niini.
Gitawag nako ang presidente sa Relief Society aron makahibalo kon aduna bay nagkinahanglan og pagkaon nga dad-on ngadto kanila. Mihisgot siya sa usa ka inahan nga dili minyo kinsa nagtrabaho ug adunay duha anak. Nianang hapona, akong gi-text ang mama ug misulti kaniya nga naghimo ko og sobra nga lasagna ug gustong dad-on kini ngadto kaniya ug sa iyang pamilya.
Mibalos siya pag-text nako ug miingon, “Kahibulongan kaayo! Sige, nindot kaayo kana!” Didto pa siya sa trabaho, apan ang iyang mga anak mauli na, mao nga mahimo nakong dad-on kini bisan unsang orasa.
Pagkataud-taod, siya mi-text nako pag-usab ug nangutana, “Nakahibalo ba ikaw nga karon akong adlaw nga natawhan?” Gipaniguro nako niya nga wala koy ideya. Mitubag siya, “Maayo, malipayong adlaw nga natawhan kanako!”
Sa dihang gidala nako ang pagkaon, bag-o lang siya nga migawas sa trabaho. Nalipay kaayo siya, ug ang iyang mga anak.
Sa Dominggo, nakit-an ko niya sa simbahan, ug naghilak, giingnan ko niya nga matag tuig sa iyang adlaw nga natawhan, ang iyang lola magluto og panihapon alang kaniya—ug kini lasagna kanunay. Ang iyang lola namatay na sa miaging tuig, ug kadto mao ang unang adlaw nga natawhan nga ang iyang lola wala na makaluto kaniya og lasagna.
Sa dihang gidala nako ang lasagna sa iyang adlaw nga natawhan, nakapalig-on kini sa iyang pagpamatuod nga ang Ginoo nakahibalo kaniya ug nahigugma kaniya. Ug kini nakapalig-on sa akong pagpamatuod nga kon kita mohimo sa atong mga kaugalingon nga mahimong instrumento sa mga kamot sa Ginoo, Siya mopakita nato asa kita makaalagad.