150 ka Pahina inig ka Huwebes?
Paghulagway ni Anna Godeassi
Ako diha sa pinaka subo nga bahin sa akong kinabuhi. Ang akong asawa mihangyo og diborsyo human mobiya tungod sa laing lalaki. Ako nag-edad og 30 anyos ug nagpuyo uban sa akong inahan. Hapit usab ako mawagtangi sa akong trabaho.
Ang senior nga editor sa pamantalaan nga akong gitrabahoan mipasidaan nako, “Kon ikaw motrabaho nga hubog na usab, ikaw diha-diha taktakon.” Sa akong pagpauli, naghunahuna ko kon unsaon nga makahunong ko sa pag-inom.
Dayon, duha ka misyonaryo mihunong ug nakigsulti nako mahitungod sa Ang Simbahan ni Jesukristo sa mga Santos sa Ulahing mga Adlaw. Gisultihan nako sila nga ako dili interesado. Apan tungod kay ako usa ka tigbalita, gibati nako nga kinahanglan kong mohatag sa akong kard.
Paglabay sa daghang mga adlaw, ang akong mama misulti nako nga duha ka Amerikano didto aron makigkita nako.
Sila aduna sa usa sa imong mga kard,” miingon siya.
Sila mao ang samang mga misyonaryo pipila ka adlaw na ang milabay. Usa kanila mihatag nako og usa ka pamphlet ug naghisgot mahitungod ni Propeta Joseph Smith. Dayon ang iyang kompanyon mihatag nako sa Basahon ni Mormon. Siya mihangyo nga ako mobasa og pipila ka mga kapitulo niini. Sa dihang ako miuyon nga mobuhat sa ingon, siya mitan-aw nako pag-ayo ug mihangyo nga ako mobasa og 150 ka pahina.
“Imposible!” Miingon ko.
“Nan, mobalik mi sa Huwebes,” miingon siya. Kana pipila na lang ka adlaw ang gidugayon. Wala ko maghunahuna nga ako makabasa niadtong mga pahina nianang higayuna.
Human sa trabaho pagkasunod adlaw, gibati nako ang kusog nga pag-aghat sa pagpangita sa akong mga higala ug mag-inom. Dayon nahinumdom ko sa pasidaan sa editor ug sa 150 ka pahina nga gihangyo nga akong basahon. Mipauli ko ug nagsugod sa pagbasa sa Basahon ni Mormon. Gibasa usab nako ang pamphlet mahitungod ni Joseph Smith.
Ang Espiritu mitandog sa akong kasingkasing samtang nagbasa ko mahitungod ni Joseph Smith. Gibati usab nako ang pagkatinuod sa Basahon ni Mormon samtang ako nagbasa ug nakat-on og dugang mahitungod sa Manluluwas. Sa wala madugay ako nakabasa og 150 ka pahina. Pagka Huwebes, ang mga misyonaryo mibalik ug nangutana kon ako ba nakabasa.
“Oo!” Miingon ko. “Ang tanang 150 ka pahina!”
Gusto kong masayud pa og daghan. Sa dihang gitudloan ko nila mahitungod sa Pulong sa Kaalam, giingnan nako sila nga ako andam nga mobiya sa alkohol.
Pagkasunod Dominggo, miadto ko sa akong unang miting sa pagpuasa ug pagpamatuod. Akong gipakigbahin ang akong bag-ong nakaplagan nga pagpamatuod ni Joseph Smith ug sa Basahon ni Mormon. Sa wala madugay, ako nabunyagan ug nakumpirmahan nga usa ka miyembro sa Simbahan.
Sa 48 ka tuig sukad sa akong bunyag, ako naningkamot sa pagtuman sa mga sugo ug pagpabilin nga duol sa Simbahan. Nagminyo ko pag-usab ug nag-alagad og misyon uban sa akong asawa. Sa milabay nga mga katuigan, midawat ko og daghang balaang mga tawag [calling]. Karon nagserbisyo ako sa templo. Matag higayon nga ako tua didto, ako nagpasalamat sa Ginoo sa pagbira nako gikan sa kangitngit ug pagdala nako ngadto sa kahayag.