Pagbansay sa Pagtuo
“Pinaagi sa akong binuhatan pakitaan ko ikaw sa akong pagtoo” (Santiago 2:18).
Si Klarie midribol pag-ayo ug nagpadulong sa tumoy sa basketbolan. Mao na kini, naghunahuna siya. Ang pinakataas, pinakapaspas nga babaye sa team ang naggwardya ni Klarie sa tibuok dula. Apan karon lain na ang iyang gigwardyahan. Kini mao na ang kahigayunan ni Klarie!
Dali siyang nakapalayo gikan sa laing magdudula ug mipahimutang sa iyang mga tiil. Dayon siya milukso ug miitsa sa bola. Ang bola naglayag sa kahanginan samtang gipugngan ni Klaire ang iyang gininhawa. Palihug sulod.
Ang bola miagi sa net.
Ang mga sakop sa team ni Klaire mihatag niya og mga high five. Dayon si Coach Garcia mitan-aw sa orasan ug mipatingog sa iyang sirbato. “Ug kadto mao ang katapusan sa pagbansay! Maayong pagkatrabaho, ninyong tanan! Magkita ta ninyong tanan ugma. Siguroha nga makapahulay kamo tungod kay daghan kitang himoon nga mga pagdagan og kusog.”
Si Klarie nangagho ug milakaw aron sa pagkuha sa iyang mga butang. Dayon iyang nakita si Coach Garcia nga miwara-wara kaniya.
“Uy, Klarie,” miingon siya. Maayong pagkatrabaho karong adlawa. Nakahibalo ko nga nagbansay ka pag-ayo, ug mapasigarbuhon ko nimo.”
“Salamat,” tubag ni Klarie uban sa dakong pahiyom.
Nagpahiyom gihapon siya samtang siya nagpaingon ngadto sa sakyanan sa iyang mama. Ug samtang sila nagdrayb pauli, naghunahuna siya sa iyang katapusan nga pag-itsa. Ilabi na ang paglusot sa bola agi sa net. Wala gani siya makamatikod sa pakigpulong sa komperensya nga gipaminaw sa iyang Mama.
Apan dayon adunay nakakuha sa iyang pagtagad. Ang mamumulong miingon, “Kinahanglan kitang mogahin og panahon nga aktibong magbansay sa atong hugot nga pagtuo.”* Ang mga pulong “aktibong magbansay” ingon og butang nga iyang madungog sa pagbansay sa basketball. Unsaon ninyo sa pagbansay sa pagtuo? Naghunahuna siya. Modagan ba ikaw pinaagi sa hugot nga pagtuo? O modribol sa hugot nga pagtuo sama sa bola?
Mitan-aw si Klarie sa iyang Mama. “Unsaon nimo sa pagbansay sa hugot nga pagtuo?” nangutana siya.
Mipahiyom si Mama. “Unsaon nimo nga mas mamaayo sa basketball?”
“Nagbansay ko,” miingon si Klaire. “Ang akong coach nagsulti nako unsaon nga mahimong mas maayo. Ug kon kami magbansay, maningkamot ko pag-ayo nga mahimo kini sa sakto.”
“Sayon ba kini?”
“Dili!” Miingon si Klarie, nahinumdom kon unsa kakapoy sa iyang mga bitiis human sa pagdagan og kusog. “Kinahanglan kong magbansay pag-ayo.”
Mitando si Mama. “Ang Langitnong Amahan gusto nga kita magbaton og hugot nga pagtuo Kaniya, apan kinahanglan kitang molihok. Mihatag siya nato og mga paagi sa pagbansay ug mahimong mas maayo.”
“Sama sa unsa?”
“Siya nagsugo nato nga makigsulti Kaniya pinaagi sa pag-ampo. Siya ingon og sama sa atong coach. Siya mihatag nato sa mga kasulatan. Kini sama sa Iyang basahon sa pagdula. Ug Siya modasig sa mga propeta sa pag-awhag nato nga makat-on isip mga pamilya. Ang atong pamilya sama sa—”
“Sama sa among team!” Misalga ni Klarie.
“Sakto! Ang atong team sa pamilya magtrabaho ug magbansay,” miingon si Mama. “Mao nga unsay mahitabo kon magbansay ka, Klarie?”
“Mahimo kong mas maayo,” miingon siya. Siya naghunahuna sa ka nindot sa bation sa paghimo sa iyang katapusan nga pag-itsa human maningkamot pag-ayo sa pagbansay sulod sa daghang semana.
“Husto kana. Kon kita magbansay, kita nagpakita sa atong hugot nga pagtuo. Kana makatabang sa atong mga pagpamatuod nga mas molig-on. Ug kini makahimo nato nga mas malipayon.”
Si Klarie wala gayud maghunahuna sa hugot nga pagtuo nga sama niana. Siya nakadungog nga ang hugot nga pagtuo sama sa usa ka binhi. Apan wala gayud siya makahibalo nga kini sama sa pagdula og basketball! Naghunahuna siya mahitungod kon giunsa sa iyang coach sa paghimo og mga plano sa pagbansay alang sa ilang team. Tingali ako makahimo usab og plano sa pagbansay, naghunahuna siya, apan alang sa hugot nga pagtuo! Pag-abut gayud niya sa balay, nakakita siya og papel ug nagsugod sa pagsulat:
-
Pag-ampo—buntag ug gabii
-
Pagtuon sa kasulatan—matag adlaw
-
Simbahan—matag Dominggo
Tingali ang pagbansay og hugot nga pagtuo dili gayud sama sa pagbansay og basketball. Apan ang pagbansay mao ang pagbansay. Siya mibati og kainit ug kalipay samtang nagtan-aw siya sa iyang plano. Siya misalig sa Langitnong Amahan ug nasayud nga Siya motabang kaniya!