Unsaon Pagpalig-on sa Pagsalig ug Paghatag og Bili sa Kaugalingon

Pinaagi sa Mga Serbisyo sa Welfare ug Pagpaningkamot sa Kaugalingon

Agig dugang sa pagpalig-on sa atong pagtuo, nagkinahanglan kita nga makakat-on og mga kahanas nga makatabang kanato nga mabuntog ang ubos nga paghatag og bili sa kaugalingon.

Ang pagsabut sa atong kaugalingon mao ang yawe sa pagpalambo sa atong kahimtang sa kinabuhi ug sa atong panglantaw—sa kasagaran gipasabut isip resulta atong tipik sa hunahuna bahin sa kalipay. Busa samtang nagkat-on kita og bag-ong kahanas sa patigayon ug makaangkon og edukasyon, kinahanglan usab kitang magkat-on mahitungod sa atong panghunahuna ug pagbati. Ang unang butang nga kinahanglan natong mahibaloan mao nga kita ania sa kalibutan aron makat-on ug molambo. Wala na kanang butang nga giingon nga natanggong diha sa atong pagkatawo. Mahimo kitang mag-usab. Wala kita gilalang aron moungot.

Unsaon Nato sa Pagbuntog ang Ubos nga Paghatag og Bili sa Kaugalingon?

Kinahanglan una natong sabton kon asa naggikan ang ubos nga paghatag og bili sa kaugalingon. Mahimong sukad pa kini sa mga kasinatian sa pagkabata nga makapatruma, pintas, o makapasagmuyo. Diborsyo, diskriminasyon, ug sekswal o pisikal nga pag-abuso ang tanan magbilin og malungtarong epekto ngari kanato sa atong hamtong nga mga katuigan kon kita dili makakuha og tabang nga atong gikinahanglan. Daghan kanato ang wala gayud makaangkon og oportunidad sa pag-ugmad og pagsalig sa kaugalingon pinaagi sa husto nga mga kasinatian sa pagkat-on. Gawas sa propesyonal nga tabang, adunay mga paagi sa pagpasaka sa atong paghatag og bili ug pagsalig sa kaugalingon aron nga kita mas maandam nga magmalampuson sa pag-atubang og bag-ong mga hagit, sa mga kawalay kasiguroan, o mga kabalaka.

10 ka mga paagi nga Makapasaka sa Inyong Pagsalig

Pag-ampo aron makat-on kon unsaon sa pagbuntog. Imbis mag-ampo nga masulbad ang mga problema o matangtang ang mga babag, pag-ampo aron masabtan ang inyong kaugalingon ug unsay kinahanglan ninyong makat-unan aron makabuntog. Pag-ampo aron mahinumdom unsay inyong nakat-unan ug isulat ang inyong mga impresyon. Pagtamud niini sa kanunay.
Magpositibo sa Panghunahuna. Hinumdumi nga ikaw anak sa Dios. Wala Siya mobutang kaninyo dinhi aron mapakyas. Dili mo hingpit, apan kamo nagpadulong sa hustong direksyon. Tuohi ang inyong kaugalingon. Hibaloi nga bisan unsa pay moabut, makasagubang kamo niini inubanan sa tabang sa Ginoo.
Atimana ang inyong hitsura. Kinahanglang hapsay ka ug limpyo. Limpyuhi kanunay ang inyong buhok, ang inyong sinina inutaw, pag-brush kanunay sa inyong ngipon, ug siguroa nga mopahiyom. Ang personal nga panglimpyo makapahimo nimo nga mobati og kaayo kabahin sa inyong kaugalingon.
Kaon og husto ug pag-ehersisyo. Nasayud nga kamo nag-atiman sa inyong panglawas makahatag kaninyo og hunahuna sa pagdumala. Ug ang pag-ehersisyo makahatag kaninyo og pagsaka sa endorphins nga makapahimo ninyo nga mobati og kaayo.
Katulog og sakto. Pangandami ang pagtapos sa adlaw pinaagi sa pagbuhat og butang nga makaparelaks—pagbasa og basahon, basaha ang inyong mga kasulatan, o pagsulat sa inyong journal. Katulog nga maayo ang inyong gipanghunahuna, nasayud nga pagkaugma lain na usab nga adlaw, laing bag-o nga pagsugod.
Pagbinuotan. Motan-aw sa uban diha sa mata ug pahiyom, mosulti og mabination nga pulong, o mohimo og gamayng buhat sa kamabination. “Higugmaa ang imong silingan sama sa imong kaugalingon” (Mateo 22:39).
Pagmapasalamaton. Hunong taliwala sa makaugtas nga panahon sa adlaw ug ipha ang inyong mga panalangin. Ang pagkamapasalamaton adunay kusog nga impluwensya sa atong pagbati og kalipay.
Hatagi og pagdayeg ang inyong kaugalingon. Buhata ang butang nga inyong gilangay-langay, ug kon mahuman kamo, hatagi og pagdayeg ang inyong kaugalingon alang sa inyong buhat. Makabuhat kamo og butang nga sama ka yano sa pagtapos og libro nga kanunay ninyong gustong basahon o mag-ayo sa lababo.
Panghipos sa inyong lugar. Diha sa panimalay ug sa trabaho, han-aya ang mga butang. Masurprisa ka kon unsa ka nindot nga bation nga mapahimutang ang tanang butang.
Maghimo og lista sa imong mga kusog ug mga talento. Tingali makahangyo kamo nga magpatabang sa inyong suod nga mga higala ug pamilya. Paglakip og dugang pang mga hiyas sa personalidad—lakip sa mga nakab-ot ug mga butang nga hanas kamo. Karon ibutang ang lista diin inyong makita kini kada buntag. Ug sa dili pa kamo mobiya sa panimalay nianang adlawa, moluhod ug ipahayag ang pasalamat sa tanang butang nga anaa niana nga lista.