Mga Panalangin sa Pagbarug sa Kinaugalingong Paningkamot [Self-Reliance]
Ang Pinakamaayo nga Puhunan
Human mataktak sa trabaho, si Blanca Gregory nahingawa pag-ayo sa pagpangita og bag-ong trabaho. Apan miapil dayon siya sa grupo sa pagbarug sa kinaugalingong paningkamot sa Pagpangita og Mas Maayong Trabaho.
Paper collage ni Sister Gregory ni David Green
Si Blanca Gregory nakatrabaho na sa bangko sulod sa 27 ka tuig, lakip sa 12 ka tuig isip kaabag nga manedyer—mao nga ang pagkataktak makapakurat. Ang iyang kasurprisa, bisan pa niana, dali nga napulihan sa kabalaka ug kahingawa.
Salamat, kay ang bana ni Blanca, nga si Eric, nagtrabaho, ug ang pamilya adunay mga tinigum nga sila mabuhi pa. Human maayo gikan sa usa ka sakit ug sa pagkawalay trabaho sulod sa labaw na sa usa ka tuig, si Sister Gregory nagsugod sa pagpangita og bag-ong trabaho.
Iyang gibag-o ang iyang resume, mieskwela sa mga klase sa computer, mitambong og mga job fair, ug nagsugod sa paghimo og mga aplikasyon sa panarbaho. Isip resulta, nakakuha siya og ubay-ubay nga interbyu. Uban sa iyang kasinatian sa panarbaho, nagtuo siya nga ang pagpangita og bag-ong trabaho sayon ra.
“Nabalaka ko sa dihang walay mitawag nako,” miingon si Sister Gregory. “Naghunahuna ko, ‘Unsay nahitabo?’”
Milabay ang mga bulan walay usa nga mitanyag og trabaho. Sa katapusan, ang iyang bana, kinsa nag-alagad isip bishop sa ilang ward sa Newport Beach, California, USA, misugyot ni Blanca sa pagsusi sa inisyatibo sa Simbahan bahin sa pagbarug sa kinaugalingong paningkamot ug dayon miapil sa grupo nga Pagpangita og Mas Maayo nga Trabaho.
“Bation Nimo ang Espiritu”
Isip kabahin sa grupo sa Pagpangita og Mas Maayo nga Trabaho, si Sister Gregory nagsugod sa 12 ka semana nga kurso nga nakatabang niya sa pagkat-on sa paghimo og personal nga koneksyon, pag-ila og mga oportunidad, pagbag-o sa iyang resume, pagpresentar sa iyang kaugalingon sa propesyonal nga paagi, ug sa pagpangandam alang sa mga interbyu sa panarbaho. Naghimo usab siya og inadlaw-adlaw nga mga tumong kalabut sa pag-ila og mga kapanguhaan, sa pagkontak og mga tawo, ug pagpakig-atubang sa mga employer.
“Ang klase sa pagbarug sa kinaugalingong paningkamot dili sama sa bisan unsa nga klase. Usa kini ka inspirasyon. Mabati nimo ang Espiritu didto,” miingon siya. “Ang among klase nagtudlo namo sa paggamit og hugot nga pagtuo, pagmakugihon, pagtrabaho og maayo, ug pagpangamuyo sa Ginoo—pagsalig dili lamang sa among kaugalingong mga kahanas ug abilidad sa pagpangita og trabaho apan usab sa tabang sa Langitnong Amahan.”
Salamat sa iyang grupo nga Pagpangita og Mas Maayo nga Trabaho, si Sister Gregory nakaangkon og malukpanon nga pagbansay sa pagpakigbahin sa iyang mga kwalipikasyon ug pagkontak og mga tawo ug mga negosyo gamit ang himan sa personal nga koneksyon nga gitawag og “Me in 30 Seconds.” Ang pamahayag sa Me in 30 Seconds makatabang sa mga employer nga makasabut sa matang sa trabaho nga gipangita sa potensyal nga empleyado, sa kasinatian sa tawo, ug sa unsa nga paagi nga ang tawo makatabang sa negosyo nga magmalampuson.
Mga walo ka semana na sa iyang kurso, si Sister Gregory usa ka adlaw mibati nga moluhod ug mag-ampo sa tibuok adlaw alang sa panabang.
“Gipaubos nako ang akong kaugalingon,” miingon siya. “Nagkinahanglan kaayo ko sa Langitnong Amahan sa pagtabang nako sa pagpangita og trabaho. Wala ko mag-ingon nga gusto ko nga mahimong manedyer o gusto nga makakwarta og dako. Nagkinahanglan lang ko og trabaho. Akong gibu-bu ang akong kasingkasing ngadto sa Ginoo.”
Isip kabahin sa iyang “homework” nianang adlawa, miaplay siya sa elektronic nga paagi og lima ka posisyon. Pagkasunod gyud nga adlaw, ang potensyal nga employer mitawag nga interbyuhon siya alang sa usa ka katungdanan isip opisyal sa sanga sa bangko. Nalipay siya nga ang iyang mga pag-ampo dali kaayong natubag.
“Wala ko kulbai mahitungod sa interbyu, tungod kay dugay na akong nagbansay diha sa klase,” miingon si Sister Gregory. Bisa pa niana, mainiton siyang nag-ampo sa wala pa ang interbyu. “Langitnong Amahan,” nangamuyo siya, “palihug ihatag kanako ang mga pulong nga isulti aron ako makatubag sa saktong paagi ug aron kadtong mointerbyu kanako makakita sa bili sa unsay akong ikatanyag.”
“Kini Makausab sa Inyong Kinabuhi”
Niadtong Marso 2018, pipila ka adlaw human sa interbyu ni Sister Gregory, Sila si Mickey ug Margaret Foster misulod ngadto sa parkinganan sa chapel sa Beach Stake aron mobisita nianang gabhiona sa grupo sa Pagpangita og Mas Maayong Trabaho. Ang mga Foster, nga nag-alagad isip full-time Self-Reliance Services nga senior nga mga misyonaryo, miabut og sayo ug nasurprisa nga nakakita ni Blanca nga nakaparking na.
“Nalipay siya pag-ayo nga siya misulod sa among sakyanan aron sultihan kami nga siya nakakita na og trabaho,” miingon si Elder Foster. “Gihulagway niya kon unsa ka dako ang iyang paghigugma sa iyang Langitnong Amahan ug unsa ka importante alang kaniya ang inisyatibo sa pagbarug sa kinaugalingong paningkamot ug sa iyang grupo sa pagbarug sa kinaugalingong paningkamot sa iyang pagpangita og trabaho.”
Si Sister Gregory mipamatuod usab ngadto sa mga Foster nga wala gayud siya sukad mibati nga mas nasuod ngadto sa Manluluwas o mas mibati sa Iyang personal nga pag-apil sa iyang kinabuhi. Gisanapan sa pasalamat ug emosyon, ang tulo nakahilak. Paglabay sa usa ka tuig, si Sister Gregory nagpabilin nga mapasalamaton sa iyang grupo sa pagbarug sa kinaugalingong paningkamot, sa langitnong tabang, ug sa iyang trabaho isip opisyal sa bangko.
“Ang suweldo maayo. Ang iskedyul maayo. Ang mga benepisyo maayo,” miingon siya. Gigamit niya ang iyang mga kahanas, nagpalambo og bag-ong mga talento, ug “naglambo diha sa kompaniya.”
“Ang pag-apil sa 12 ka semana sa grupo nga Pagpangita og Mas Maayong Trabaho mao ang labing maayong puhunan nga imong mahimo,” miingon siya ngadto ni bisan kinsa nga nangita og trabaho o nangita og laing trabaho. “Dili lang kini makatabang ninyo sa pagbag-o sa inyong resume ug pagpakigbahin sa inyong mga kahanas, apan makatabang usab kini kaninyo nga makat-on sa paggamit sa inyong hugot nga pagtuo ug molambo ang inyong pagpamatuod. Kana ang makahimo sa kalainan. Ang klase duha ra ka oras matag semana, apan kini makatabang gayud. Makausab kini sa inyong kinabuhi.”