Gamay nga mga Pagpili, Dako og mga Sangputanan

Ni Elder Massimo De Feo

Sa Seventy

Unsaon nato sa pagtubag kon ang kalibutan mangutana, “Dili ba usab ikaw moadto?”

Sukad pa sa akong pagkagamay nga bata, ganahan na ko kaayo sa Bag-ong Tugon. Ganahan ko mobasa mahitungod sa pagtudlo sa Manluluwas sa Iyang mga disipulo og mahangturong mga baruganan nga nakapausab sa ilang kinabuhi sa kahangturan.

Nakita usab nako kini nga madanihon kon sa unsa nga paagi kadto nga mga baruganan nakapausab sa akong personal nga kinabuhi sa daghan kaayong mga paagi. Balik-balik, nakong nakita nga kon gamiton nato ang mga pagtulun-an sa Manluluwas, ang atong kaugalingong mga desisyon, bisan gamay, sa kasagaran mosangpot ngadto sa dako nga mga sangputanan.

Ang Akong “Gamay” nga Pagpili

Daghang mga tuig na ang milabay, isip usa ka bag-o kaayo nga manedyer, mibiyahe ko ngadto sa South America aron motambong og usa ka importante nga seminar sa trabaho nga gihimo sa taas og ranggo nga mga opisyales sa ahensya sa gobyerno nga akong gitrabahoan.

Ang una gayud nga gabii pagkahuman sa komperensya, ang “big boss” sa ahensya mipahibalo og espesyal nga kalihokan alang ninang gabhiona. Sigurado nga ang tanan malipay sa iyang sugyot, siya mapasigarbuhon nga mipahibalo: “Sa pagpakita kaninyo unsa kami ka mapasalamaton kaninyo, karong gabii gidapit namo ang tanan sa usa ka espesyal nga gabii, moadto ta sa mga bar sa siyudad, inila alang sa espesyal nga cocktail nga ilimnon. Tilawan nato ang lain-laing matang niana nga ilimnon ug mobotar unsa nga bar ang labing maayo. Adunay sangka ug mananaog. Ug ayaw kabalaka, ako ang mobayad sa tanan, akong espesyal nga bangka kaninyo.”

Samtang ang tanan namakpak sa iyang plano, siya midugang og mapagarbuhon nga pangutana: “Duna bay dili mokuyog? Isulti karon o di na lang!”

Samtang ang tanan namakpak pag-usab, naghunahuna ko kon unsa ka ulaw ang pagsulti og bisan unsa atubangan sa tanang mga tawo, sa pagsupak sa gipaabut sa boss nga kini usa ka talagsaon nga tanyag.

Bisan pa niana,sulod lang sa mga segundo nakahukom ko unsay buhaton. Gipataas nako ang akong kamot, ang nag-inusara sa pagpataas. Dayon, sa makahadlok nga paagi, nangutana siya unsay akong isulti. Wala ako sukad makasinati og tumang kahilom sa akong kinabuhi!

Miingon ko: “Sir, Salamat kaayo sa imong tanyag, apan ako dili makahimo sa pag-apil ninyong tanan karong gabii.”

Human sa laing kahilom, nga mas hilom pa kay sa akong posibling mahunahuna, siya nangutana, “Ngano?” Nianang higayona, makahunahuna unta ko og nindot nga mga pamalibad—nga ako nasakit o adunay importante nga himoon nga tawag sa telepono sa pikas bahin sa kalibutan o bisan unsa nga laing rason nga moluwas nako sa klaro nga kaulawan. Apan misulti ko sa yanong kamatuoran, nga ako usa ka miyembro sa Ang Simbahan ni Jesukristo sa mga Santos sa Ulahing mga Adlaw, ako dili moinom og alcohol.

“Kon Mao Maglingaw-lingaw Mi nga Wala Ka”

Human maghunahuna og kadiyot, sa katapusan siya miingon, “Kon mao maglingaw-lingaw mi nga wala ka.” Ug ngadto sa uban, siya miingon, “Sunod kanako. Maglingaw-lingaw ta! Biyaan nato siya nga mag-inusara.”

Nakahinumdom gihapon ko sa tingog sa ilang mga katawa samtang mibiya sila sa kwarto sa komperensya ug ako nagpabilin nga nag-inusara. Nakaamgo ko nga daghang mga higayon, ang pagpili sa Ginoo, sama sa gitudlo ni Presidente Thomas S. Monson (1927–2018), ang tanan mahitungod sa pagpili sa “Lisud nga sakto kay sa mas sayon nga sayop,”¹ bisan sa risgo nga mabiyaan nga mag-inusara.

Samtang naglakaw ko padulong sa akong kwarto, nakahinumdom ko nga nakadungog og klaro nga tingog sa akong hunahuna: “Dili ba usab ikaw moadto?” Nakugang ko sa makadiyot, apan sa kalit lang, ang mga pulong ni Simon Pedro ngadto sa Manluluwas miabut sa akong hunahuna. Nianang sama nga pangutana, siya mitubag, “Ginoo, kang kinsa man kami moadto? ikaw mao ang may mga pulong mahitungod sa kinabuhing dayon” (Juan 6:68).

Uban sa mga pagbati sa bag-ong kalinaw, gibati nako ingon og ako gilibutan sa mga anghel nga nagsuporta kanako. Bisan og ako nag-inusara, wala ko mobati nga nag-inusara. Samtang ako mipili sa Ginoo ug mibarug alang sa akong mga baruganan, nakita nako nga kon kita mopili sa Ginoo, tingali mobati kita nga nag-inusara sa kalibutan, apan ang Manluluwas dili gayud mobiya kanato.

Gamay apan Dako

Ang mga desisyon nga atong himoon matag adlaw tingali ingon og gamay, apan kini sa kanunay adunay tinuod nga mga implikasyon ug dako nga mga sangputanan, alang sa maayo ug dautan.

Gani, pipila ka tuig ang milabay human nianang talagsaon nga adlaw, ang mao nga boss mibisita sa among opisina sa Rome. Siya mao gihapon nga tawo, puno sa gahum ug awtoridad. Mao gihapon, kaming tanan mahadlok kaniya.

Niining higayuna, human sa tanang mga miting, siya miduol nako sa lahi nga paagi. Makapatingala nga siya buotan. Siya miingon nako nga nakahinumdom gihapon siya sa adlaw nga ako mibarug sa akong mga pagtuo. Dayon, sa akong kasurprisa, nangutana siya kon dawaton ba nako nga mahimong manedyer sa ahensya alang sa tibuok Europe, nga dako kaayo nga oportunidad alang sa akong panarbaho. Samtang siya naningkamot sa pakombinser nako nga ang bag-ong trabaho nindot og suweldo, biyahe, ug benepisyo, unsa ang nakahimo sa kalainan mao nga sa dihang miingon siya: “Gitan-aw namo dili lang ang mga kwalipikasyon. Nagkinahanglan mi og tawo nga adunay kaligdong, kinsa mobarug alang sa ilang mga baruganan. Nagkinahanglan mi og tawo nga sama kanimo.”

Nasurprisa ko nga nakadungog niadto nga mga pulong, nga nakaamgo nga ang gamay nga desisyon sa pagbarug sa akong mga pagtuo sa milabay nga mga katuigan sa katapusan adunay dako nga epekto kaniya. Ang akong gamay nga desisyon sa katapusan miresulta sa dako nga panalangin alang kanako, sa temporal ug sa espiritwal nga paagi. Sa binali, isip kabahin sa akong bag-ong katungdanan, ako usab nahimong supervisor sa kadaghanan nga mga manedyer kinsa mikatawa kanako sa milabayng katuigan.

Ang Sakto nga Pagpili

Si Presidente Monson miingon, “Sa atong pagpamalandong sa mga desisyon nga atong himoon sa atong kinabuhi kada adlaw—bisan sa paghimo niini nga pagpili o niana nga pagpili—kon mopili kita ni Kristo, nakahimo kita og sakto nga pagpili. ”²

Si Apostol Pablo mitudlo usab nga ang pagpili sa Ginoo mao kanunay ang labing maayo nga posible nga pagpili, bisan pa kon unsa ka lisud niana nga pagpili: “Ug kita nasayud nga diha sa matag usa ka butang ang Dios nagabuhat og maayo uban kanila nga mga nahigugma sa Dios” (Mga Taga-Roma 8:28).

Matag adlaw, ang mga pagpili nga atong gibuhat sa pagkatinuod nagtino kon unsay atong dangatan. Kon kita mopili sa Ginoo, sama sa gisulti ni Presidente Monson, “nakahimo kita og sakto nga pagpili,” tungod kay, sama sa gipahayag ni Pablo “matag usa ka butang ang Dios nagabuhat og maayo uban kanila nga mga nahigugma sa Dios.”

Daghang mga higayon nga kita nagduha-duha sa paghimo og sakto nga mga pagpili tungod kay kita maningkamot sa pagpahimuot sa Ginoo nga dili makapasilo ni Satanas. Apan kita dili makapahimuot sa Dios nga dili makapasuko ni Satanas. Kita dili gayud makaalagad og duha ka ginoo. Ang atong katapusan nga desisyon kanunay mao ang pagsunod sa unang duha ka sugo sa sakto nga prayoridad: Sa pag-alagad sa Dios pag-una ug dayon sa atong silingan, o ibutang ang ikaduha nga sugo pag-una pinaagi sa pagsulay sa pagpahimuot sa uban sa dili pa kita mopahimuot sa Dios (tan-awa sa Mateo 22:37-39).

Mobarug isip mga Saksi

Ang labing dako nga pakigsaad nga atong himoon sa bunyag mao nga “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga [kita] mahimo nga maanaa” (Mosiah 18:9). Kana nga pakigsaad mao ang desisyon nga atong himoon makausa ug sa kahangturan, sa pagbarug alang sa atong mga pagtuo isip mga saksi sa Dios sa matag gutlo sa atong kinabuhi. Ang gisaad nga panalangin mao nga buhong kita nga makabaton sa Espiritu (tan-awa sa Mosiah 18:10).

Ang kalibutan, ang atong mga ka-edad, ug ang mga tawo nga dili sama nato og mga hiyas sa kanunay mohatag nato og kabug-at, kabug-at nga moabut kon kita maningkamot sa pagpuyo sa celestial nga balaod dinhi sa telestial nga kalibutan. Sa pagkatinuod, ang pagpuyo sa matarung nga paagi sa dautan nga kalibutan dili sayon nga buluhaton. Usahay ingon og kini sama sa dako nga hagit. Usahay ingon og kini sama sa matag adlaw nga panagbingkil. Apan kita gisaaran nga kita makadawat sa Espiritu nga mas buhong kon kita mobarug isip tinuod nga mga saksi sa Dios. Kon kita mag-ampo sa Langitnong Amahan, Siya mopanalangin kanato uban sa gahum sa Espiritu Santo, naghatag nianang importante nga dugang nga tabang nga atong gikinahanglan. Balaan nga grasya mopuno sa dili kalikayan nga espirituhanon nga kapakyasan nga masinati natong tanan isip dili perpekto nga mga binuhat nga naningkamot sa pagkab-ot sa mas taas ug mas balaan nga dapit.

Mahangturong mga Sangputanan

Ang mga pagpili nga ingon og gamay nianang panahona gani adunay mahangturong mga sangputanan. Apan tungod kay kita mihimo og pakigsaad, kita adunay saad. Kon kita mopili sa Ginoo—kon kita mobarug isip mga saksi sa tanang higayon, sa tanang mga butang, ug sa tanang mga dapit—nan ang tanan nga mga butang nagabuhat og maayo uban kanila nga mga nahigugma sa Dios. Samtang kita mopili sa Ginoo, bisan og kita magpabilin nga mag-inusara, ang mga anghel anaa libut kaninyo, aron sa pagtabang kaninyo ug kita dili na mobati nga nag-inusara (tan-awa sa Doktrina ug mga Pakigsaad 84:88).

Ligdong akong mopamatuod nga kadtong sagrado nga mga gutlo sa gamay nga mga desisyon apan dako og mga sangputanan, pinaagi lamang sa Langitnong Amahan ug sa Iyang Anak, si Jesukristo, nga kita makakaplag og kalinaw ug kapahulayan. Daghang mga higayon, kita hangyoon sa pag-uban sa kalibutan o sa pagbarug alang sa atong mga baruganan. Unsaon nato sa pagtubag kon kita pangutan-on: “Dili ba usab ikaw moadto?” Mouban ba kita sa kalibutan o kita magpabilin uban sa Ginoo? Kita magpabilin ba nga hilom ug pagaaghaton, o kita mobarug alang sa atong mga pagtuo ug molihok?

Hinaut nga kita sa kanunay mopili sa Ginoo ug andam nga motubag: “Kang kinsa kami mouban? Ikaw aduna sa mga pulong sa kinabuhing dayon.” Dayon kita makatagamtam sa mga panalangin sa atong matarung nga mga desisyon, sa temporal ug espiritwal nga paagi, niini nga kinabuhi ug alang sa kahangturan.