Igo nga Kahimayaan

Imahe

Nagtan-aw ang mga kababayen-an samtang nagmartsa palayo ang mga kalalakin-an

Samtang ang mga Santos nga kauban ni Brigham Young mibiya sa Sugar Creek, ang kwarenta y tres anyos ang panuigon nga si Louisa Pratt mipabilin sa Nauvoo, nag-andam sa pagbiya sa siyudad uban sa iyang upat ka batan-ong mga anak nga babaye. Sa milabayng tulo ka tuig, gitawag sa Ginoo ang iyang bana, si Addison, sa usa ka misyon ngadto sa mga Isla sa Pasipiko. Sukad niana, ang dili kasaligan nga serbisyo sa koreyo tali sa Nauvoo ug Tubuai, ang isla sa French Polynesia diin nagserbisyo si Addison, mihimo niini nga lisud sa kanunay nga pagsulat ngadto kaniya. Kasagaran sa iyang mga sulat daghang mga bulan na ang milabay kon kini moabut, ug ang pipila mas dugay pa sa usa ka tuig.

Ang kinaulahian nga sulat ni Addison miklaro nga siya dili makapauli sa tukmang panahon aron nga moadto sa kasadpan uban kaniya. Ang Napulog Duha misugo kaniya sa pagpabilin diha sa mga Isla sa Pasipiko hangtud sila motawag kaniya sa pagpauli o mopadala og mga misyonaryo nga mopuli kaniya. Sa usa ka higayon, milaum si Brigham nga makapadala og dugang nga mga misyonaryo ngadto sa mga isla human nadawat sa mga Santos ang pagtuga, apan ang pagbiya gikan sa Nauvoo milangan niana nga plano.¹

Andam si Louisa sa paghimo sa panaw nga wala ang iyang bana, apan ang paghunahuna mahitungod niini nakapanerbyos kaniya. Dili siya gusto nga mobiya sa Nauvoo ug sa templo ug wala ganahi sa ideya nga magbiyahe pinaagi sa karomata agi sa Rocky Mountains. Gusto usab siya nga makakita sa iyang nagkatigulang nga mga ginikanan sa Canada—tingali sa katapusan nga higayon—sa dili pa moadto sa kasadpan.

Kon ibaligya niya ang iyang panon sa mga toro, makakuha siya og igo nga kwarta aron sa pagbisita sa iyang mga ginikanan ug nagpareserba og pasahe alang sa iyang pamilya sa usa ka bapor padulong sa baybayon sa California, sa ingon hingpit nga naglikay og biyahe sa yuta.

Hapit na unta makahukom si Louisa sa pag-adto sa Canada, apan usa ka butang ang ingon og dili maayo. Mihukom siya sa pagsulat ni Brigham Young mahitungod sa iyang mga kabalaka sa pagbiyahe sa yuta ug ang iyang tinguha nga mobisita sa iyang mga ginikanan.

“Kon moingon ka nga ang panaw sa panon sa mga toro mao ang labing maayo nga paagi alang sa kaluwasan, nan moapil ako niini sa tuyo ug buhat,” misulat siya, “ug nagtuo ako nga makaantus niini ug dugay sa walay pagbagulbol sama sa ubang mga babaye.”²

Taud-taod, usa ka mensahero miabut dala ang tubag ni Brigham. “Dali na. Ang pundok sa mga toro nga kaluwasan mao ang labing luwas nga paagi,” iyang gisultihan siya. “Mosugat kanato si Igsoong Pratt didto sa kamingawan diin kita mopahiluna, ug dako ang iyang kaguol kon ang iyang pamilya dili uban kanamo.”

Gihunahuna ni Louisa ang tambag, gipagahi ang iyang kasingkasing batok sa lisud nga dalan sa unahan, ug mihukom sa pagsunod sa kinadak-ang pundok sa mga Santos, mabuhi o mamatay.³

Nianang tingpamulak, ang mga trabahador nagdali sa paghuman sa templo sa dili pa ang publikong pagpahinungod niini sa Mayo 1. Ilang gitauran og tisa nga salog liyok sa bunyaganan, gipahimutang ang dekorasyon nga hinimo sa kahoy sa iyang dapit, ug gipintalan ang mga bungbong. Ang trabaho nagpadayon sa tibuok adlaw ug kasagaran hangtud sa gabii. Tungod kay ang Simbahan gamay ra og kwarta nga ikabayad sa mga trabahador, daghan kanila misakripisyo og bahin sa ilang mga suhol aron sa pagsiguro nga ang templo andam na nga ipahinungod ngadto sa Ginoo.⁴

Duha ka adlaw sa wala pa ang pagpahinungod, gihuman sa mga trabahador pagpintal ang unang andana nga lawak tigumanan. Sa sunod nga adlaw, ilang gisilhigan sa mga abug ug sa gagmay nga mga kahoy ang dako nga lawak ug giandam alang sa serbisyo. Ang mga trabahador wala makahimo sa pagretoke sa matag lawak, apan nahibalo sila nga dili kana magpugong sa Ginoo sa pagdawat sa templo. Masaligon nga ilang natuman ang sugo sa Ginoo, ilang gipintal ang mga pulong “Ang Ginoo nakakita sa atong sakripisyo” ibabaw sa mga pulpito subay sa silangang bungbong sa pundukanang lawak.⁵

Nasayud sa ilang utang sa mga trabahador, ang mga pangulo sa Simbahan mipahibalo nga ang unang sesyon sa pagpahinungod maoy usa ka halad-gugma sa isigkatawo nga higayon. Kadtong kinsa mitambong gihangyo sa paghatag og usa ka dolyar aron sa pagtabang og bayad sa nagkalisud nga mga trabahador.

Pagka buntag sa Mayo 1, ang 14 anyos nga si Elvira Stevens mibiya sa iyang kampo sa kasadpan sa Suba sa Mississippi ug mitabok sa suba aron pagtambong sa pagpahinungod. Usa ka ilo kansang mga ginikanan namatay human gayud ang pamilya mibalhin ngadto sa Nauvoo, karon si Elvira mipuyo diha sa iyang minyo nga igsoong babaye. Tungod kay walay lain sa iyang kampo ang makakuyog niya alang sa pagpahinungod, miadto siya nga nag-inusara.

Nahibalo nga tingali mga katuigan pa sa dili pa ang lain nga templo ang tukuron diha sa Kasadpan, gipahigayon sa mga apostoles ang pagtuga ngadto sa pipila ka batan-ong dili minyo nga mga tawo, lakip ni Elvira. Karon, tulo ka mga bulan ang milabay, misaka siya sa mga hagdanan ngadto sa mga pultahan sa templo sa makausa pa, mihatag sa iyang dolyar, ug nakakita og kalingkuran diha sa tigumanan nga lawak.⁶

Ang sesyon gisugdan og pag-awit gikan sa choir. Gihatag dayon ni Orson Hyde ang pagpahinungod nga pag-ampo. “Itugot nga ang Imong Espiritu mopuyo dinhi,” nangamuyo siya, “ug hinaut nga ang tanan mobati og usa ka sagrado nga impluwensya diha sa ilang mga kasingkasing nga ang Iyang mga kamot nakatabang niini nga buhat.”⁷

Gibati ni Elvira ang langitnong gahum diha sa lawak. Human sa sesyon, mipauli siya ngadto sa iyang kampo, apan mibalik siya alang sa sunod nga sesyon human sa duha ka adlaw, naglaum nga mobati pag-usab sa samang gahum. Mihatag og mga sermon si Orson Hyde ug Wilford Woodruff kabahin sa buhat sa templo, pagkapari, ug sa pagkabanhaw. Sa wala pa tapusa ang miting, gidayeg ni Wilford ang mga Santos alang sa paghuman sa templo bisan tuod og sila kinahanglan nga mobiya niini.

“Liboan ka mga Santos ang nakadawat sa ilang pagtuga diha niini, ug ang kahayag dili mapalong,”miingon siya. “Kini igo nga kahimayaan alang sa pagtukod sa templo.”

Human sa sesyon, mibalik si Elvira ngadto sa iyang kampo, mitabok sa suba sa katapusan nga higayon.⁸ Ang mga Santos sa Nauvoo, sa laing bahin, migahin sa nahibiling adlaw ug gabii sa pagpamutos ug pagkuha sa mga lingkuranan, mga lamesa, ug ubang mga kasangkapan hangtud ang templo walay sulod ug gibilin diha sa mga kamot sa Ginoo.⁹

Layo pa sa unahan diha sa dalan, si Brigham ug ang Kampo sa Israel mihunong sa usa ka dapit nga gitawag og Mosquito Creek, dili layo gikan sa Suba sa Missouri. Gigutom sila, duha ka bulan nga awahi sa tagal, ug hilabihan sa kakabus.¹⁰ Apan namugos gihapon si Brigham sa pagpadala og mag-una nga panon agi sa Rocky Mountains. Mituo siya nga usa ka grupo sa mga Santos nagkinahanglan nga mohuman sa panaw niana nga panahon, tungod kay samtang ang Simbahan maglibud-libod nga walay panimalay, ang mga kaaway niini mosulay sa pagtibulaag niini o pag-ali sa dalan niini.¹¹

Nahibalo si Brigham, hinoon, nga ang pagsangkap sa ingon nga grupo makapakunhod sa mga kapanguhaan sa mga Santos. Gamay ra ang may kwarta o mga tagana nga ikahatag, ug ang Iowa adunay limitado nga mga oportunidad alang sa binayran nga trabaho. Aron mabuhi diha sa kasagbutan, daghang mga Santos ang mibaligya og gihambin nga mga katigayunan samtang nagsubay sa dalan o mitrabaho og salin nga mga trabahuonon alang sa mga pagkaon ug mga tagana. Samtang mipadulong ang kampo sa kasadpan ug ang mga pamuy-anan nagkagamay, kini nga mga oportunidad mahimo lamang nga mas lisud nga pangitaon.¹²

Ang ubang mga butang nakapabug-at usab diha ni Brigham. Ang mga Santos kinsa dili sakop sa nag-unang panon nagkinahanglan og dapit nga pundohan sa tingtugnaw. Ang mga Omaha ug ang ubang Lumad nga mga katawhan kinsa nanimuyo sa yuta sa kasadpan sa Suba sa Missouri andam sa pagtugot sa mga Santos sa pagkampo didto sa tibuok tingtugnaw, apan ang mga ahente sa gobyerno nagdumili sa pagtugot kanila sa pagpuyo sa gipanalipdan nga mga yuta sa mga Indian sulod sa dugay na nga panahon.¹³

Nahibalo usab si Brigham nga ang masakiton ug kabus nga mga Santos sa Nauvoo nagsalig sa Simbahan sa pagdala kanila ngadto sa kasadpan. Sa pipila ka panahon, naglaum siya sa pagtabang kanila pinaagi sa pagbaligya og bililhon nga mga kabtangan sa Nauvoo, lakip ang templo. Apan hangtud karon kini nga paningkamot wala molampus.¹⁴

Pagka Hunyo 29, nahibaloan ni Brigham nga tulo ka mga opisyales gikan sa Kasundalohan sa Estados Unidos moabut sa Mosquito Creek. Ang Estados Unidos mipahayag sa pakiggubat sa Mexico, ug si Presidente James Polk mihatag og katungod sa mga tawo sa pagtawag og batalyon sa 500 ka mga Santos nga militar aron sa pagpakiggubat didto sa kabaybayunan sa California.¹⁵