Alma nga Batan-on nagtudlo sa mga Zoramite

Hunyo 10–16: “Kamo Nakasinati ba Niining Dako nga Kausaban diha sa Inyong mga Kasingkasing?”

Alma 5–7

Si Alma wala mahibalo mahitungod sa makaluwas og kinabuhi karon nga mga pag-opera sa pag-ilis og kasingkasing, nga pulihan ang nadaot o masakitong kasingkasing og usa ka maayong kasingkasing. Apan siya nasayod mahitungod sa mas milagroso nga “kausaban sa kasingkasing” (Alma 5:26)—ang usa diin ang Manluluwas naghatag kanato og usa ka pagkabag-o sa espirituhanon nga kinabuhi, sama sa “pagkatawo pag-usab” (tan-awa diha sa Alma 5:14, 49). Nakita ni Alma nga kining kausaban sa kasingkasing mao ang eksaktong gikinahanglan sa daghan nga mga Nephite. Ang uban mga adunahan ug ang uban kabos, ang uban mapahitas-on ug ang uban mapainubsanon, ang uban tigpanglutos ug ang uban gisakit pinaagi sa pagpanglutos (tan-awa sa Alma 4:6–15). Apan silang tanan kinahanglan nga moduol ngadto kang Jesukristo aron mamaayo—sama lamang nga kitang tanan kinahanglan mobuhat. Nagtinguha man kita sa pagbuntog sa garbo o sa paglahutay sa mga kasakit, ang mensahe ni Alma managsama: “Duol ug ayaw kahadlok” (Alma 7:15). Tugoti nga ang Manluluwas mousab sa gipatig-a, o makasasala, o samaran nga kasingkasing ngadto sa usa ka kasingkasing nga mapainubsanon, putli, ug bag-o.

Mga Ideya alang sa Pagkat-on diha sa Panimalay ug sa Simbahan

Alma 5:14–33

Kinahanglan gayod akong masinati—ug magpadayon sa pagbati—og dako nga kausaban sa kasingkasing.

Si Presidente M. Russell Ballard miingon: “Kinahanglan kong kanunayng mangutana sa akong kaugalingon, ‘Kumusta na man ko?’ … Isip giya alang nako atol niining pribado, personal nga pagrebyo, gusto nakong basahon ug pamalandongon ang makapahinuklog nga mga pulong nga makita diha sa ikalimang kapitulo sa Alma” (“Mobalik ug Modawat,” Liahona, Mayo 2017, 64).

Ikonsiderar ang pagbasa sa Alma 5:14–33 nga daw kamo ang nag-interbyu sa inyong kaugalingon ug nag-eksamen sa inyong kasingkasing. Mahimo ninyong irekord ang inyong mga tubag sa mga pangutana. Unsay inyong nakat-onan mahitungod sa inyong kaugalingon? Unsa ang inyong gibati nga nadasig nga buhaton isip resulta sa inyong interbyu?

Tan-awa usab sa Dale G. Renlund, “Pagpatunhay sa Dako og Kausaban nga Kasingkasing,” Liahona, Nob. 2009, 97–99.

Sa atong pagdangop ngadto sa Dios, makasinati kita og “kausaban sa kasingkasing.”

Alma 5:44–51

Ako makaangkon ug akong kaugalingong pagsaksi sa Manluluwas ug sa Iyang ebanghelyo pinaagi sa Espiritu Santo.

Diha sa Alma 5, sa dihang si Alma mipasabot kon giunsa niya pag-angkon sa iyang pagpamatuod sa Manluluwas, siya wala mohisgot sa iyang kasinatian nga nakakita og usa ka anghel (tan-awa sa Mosiah 27:10–17). Sa unsang paagi si Alma nasayod sa kamatuoran alang sa iyang kaugalingon? Tingali inyong magamit ang unsay inyong makit-an diha sa Alma 5:44–51 sa pagsulat og usa ka “resipe” alang sa pag-angkon og papamatuod ni Jesukristo ug sa Iyang mga pagtulon-an. Unsa ang mga “sagol” (mga kamatuoran sa ebanghelyo) ug mga “instruksiyon” (mga butang nga atong mabuhat sa pagpangita sa kamatuoran) nga gilakip ni Alma? Unsa nga “mga sagol” ug “mga instruksiyon” ang inyong madugang ngadto sa inyong resipe gikan sa kaugalingon ninyong mga kasinatian o uban pang mga kasinatian diha sa mga kasulatan?

Alma 7

“Ako nakasabot nga kamo anaa sa mga dalan sa pagkamatarong.”

Usahay kita mahisama sa mga tawo didto sa Zarahemla, kinsa gikinahanglang pagatawagon ngadto sa paghinulsol (tan-awa sa Alma 5:32). Sa laing higayon kita mas sama sa katawhan ni Gideon, kinsa naningkamot sa paglakaw “[diha] sa mga dalan sa pagkamatarong” (Alma 7:19). Unsa ang inyong nakit-an diha sa mensahe ni Alma ngadto ni Gideon (sa Alma 7) nga susama ngadto sa unsay iyang gisulti sa Zarahemla (sa Alma 5)? Unsa nga mga kalainan ang inyong namatikdan? Pangitaa ang mga butang nga gitudlo ni Alma nga makatabang kaninyo nga magpabilin diha “sa dalan nga padulong sa gingharian sa Dios” (Alma 7:19).

Alma 7:7–16

Gidala sa Manluluwas diha sa Iyang Kaugalingon ang akong mga sala, mga sakit, ug mga kasakitan.

Mibati ba kamo sukad nga walay usa nga nakasabot sa inyong mga pakigbisog o mga hagit? Kon mao, ang mga kamatuoran nga gitudlo ni Alma makatabang. Samtang magbasa ka, pamalandong kon unsa ang gitudlo niining mga bersikulo mahitungod sa mga katuyoan sa sakripisyo sa Manluluwas. Tingali makahimo ka og usa ka tsart nga adunay mga ulohan nga Unsa ang giantos sa Manluluwas ug Nganong Siya nag-antos ug ilista ang unsay inyong nakit-an diha sa Alma 7:7–16 (tan-awa usab sa Isaias 53:3–5). Makahunahuna ka ba og piho nga mga higayon nga Siya miantos og pipila niining mga butanga? Ania ang pipila ka mga ehemplo gikan sa mga kasulatan: Mateo 4:1–13; 26:55–56; 27:39–44; Marcos 14:43–46; Lucas 9:58. Makadugang ka ba og bisan unsa nga butang sa inyong lista gikan niini nga mga bersikulo?

Usa ka butang ang motuo nga ang Manluluwas nag-antos alang kaninyo. Apan sa unsang paagi ang Iyang pag-antos nakahimo og kalainan sa inyong inadlaw-adlaw nga kinabuhi? Ania ang pipila ka kasulatan nga nagpakita kon sa unsang paagi si Jesukristo makatabang o “motabang” kaninyo: Enos 1:5–6; Mosiah 16:7–8; 21:15; 24:14–15; 3 Nephi 17:6–7; Ether 12:27–29; Doktrina ug mga Pakigsaad 121:7–10. Unsay inyong nakat-onan gikan niini nga mga bersikulo? Unsa pa ang pipila ka paagi nga Siya maabot sa pagtabang kaninyo? Kanus-a man ninyo nasinati ang Iyang tabang?

Usa ka himno sama sa “Nagkinahanglan Ko ninyo sa Matag Takna” o “Buhi ang Manunubos Ko” (Mga Himno, mga nu. 54, 80) makapalawom sa inyong pagpasalamat alang sa pagtabang sa Manluluwas. Unsa nga hugpong sa mga pulong niining mga himno ang makapahayag sa inyong mga pagbati ngadto Kaniya?

Pagpamatuod bahin ni Jesukristo. Ikonsiderar ang mga paagi nga inyong ikapakigbahin ang inyong pagpamatuod bahin sa Manluluwas ug sa Iyang kabalaan, grasya, ug gugma. Ikaw makaawhag sa mga tawo nga inyong gitudloan sa pagpamatuod bahin Kaniya pinaagi sa pagpangutana nga makaaghat kanila sa pagpakigbahin kon unsa ang ilang gibati mahitungod Kaniya.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Alma 5:44–48

Makaangkon ko og akong kaugalingong pagpamatuod pinaagi sa Espiritu Santo.

• Aron matabangan ang inyong mga anak nga makakat-on sa pagpalambo sa ilang kaugalingon nga pagpamatuod, mahimo ninyo silang pakit-on sa mga litrato sa ubos ug pangutana nila kon unsaon nato sa pagtabang sa mga gagmayng mga hayop nga motubo. Mahimo na dayon ninyo kining ikatandi ngadto sa pag-alima sa atong mga pagpamatuod. Unsa nga pag-alima ang gikinahanglan sa atong mga pagpamatuod? Unsaon nato pagkahibalo nga kini nagtubo?

  

  Kon modawat kita sa ebanghelyo, susama kini sa pagsugod og bag-ong kinabuhi.

• Giunsa pagbaton ni Alma og iyang lig-on nga pagpamatuod ni Jesukristo? Makabasa kamo sa Alma 5:44–46 uban sa inyong mga anak sa pagpangita sa mga tubag ngadto niining mga pangutana. Tingali makasulat ang inyong mga anak og usa ka plano sa pagbuhat og usa ka butang niining semanaha aron mapalig-on ang ilang mga pagpamatuod.

Mga Gilis ug mga Bidlisiw sa Kahayag

Si Elder Dushku nagtudlo kanato nga ang maanindot nga espirituhanong mga kasinatian talagsaon ug nga ang Ginoo sagad maghatag kanato og usa ka bidlisiw sa kahayag sa usa ka higayon.

Alma 7:10–13

Gidala sa Manluluwas diha sa Iyang Kaugalingon ang akong mga sala, mga sakit, ug mga kasakitan.

• Unsaon ninyo sa pagtabang ang inyong mga anak sa pagsabot sa Alma 7:10–13 aron sila masayod nga si Jesukristo nagpakabana kanila ug makatabang kanila? Tingali makahangyo ka nila sa pagpakigbahin og usa ka kasinatian sa dihang sila nasakit ug diha sa kasakit o adunay problema nga nakapaguol kanila. Sa unsang paagi nga nakatabang nila ang uban nga mobati og mas maayo? Ipakigbahin ang inyong pagpamatuod nga ang Manluluwas miantos usab niadtong mga butanga, ug hisgoti ang usa ka higayon sa dihang Siya mihupay ug mitabang kaninyo.

• Samtang kamo ug ang inyong mga anak mobasa sa Alma 7:11–13, pangita sa mga butang nga giantos ni Jesukristo alang kanato. Dapita ang inyong mga anak sa paggamit sa mga pulong ug hugpong sa mga pulong nga ilang makit-an aron makompleto kini nga kapahayag: “si Jesus nag-antos aron Siya makatabang kanako.” Sa unsang paagi makatabang ang pagkahibalo nga si Jesus nakasabot sa atong mga kalisdanan? Unsaon nato sa pagdawat ang Iyang tabang? Ipakigbahin ang inyong pagpamatuod ni Jesukristo.

Alma 5:14; 7:19–20

Ang pagsunod ni Jesukristo makapabilin kanako diha sa tul-id nga dalan balik ngadto sa Langitnong Amahan.

• Patan-awa ang inyong mga anak diha sa usa ka samin samtang magbasa kamo sa Alma 5:14 (tan-awa usab ang pahina sa kalihokan niining semanaha). Unsa ang gipasabot sa pagbaton sa hitsura sa Manluluwas diha sa atong panagway?

• Unsaon ninyo paggamit ang paghulagway ni Alma sa dalan pabalik ngadto sa Langitnong Amahan aron matabangan ang inyong mga anak nga makat-on sa paghimo og maayo nga mga pagpili? Mahimo ninyong basahon ang Alma 7:19–20 ngadto kanila ug palakawa sila diha sa “hiwi nga mga dalan” ug sa paglakaw diha sa tul-id nga dalan. Tabangi sila sa paghunahuna og mga pagpili nga makatabang kanato nga magpabilin diha sa dalan ug sa uban pa nga mga pagpili nga makatipas kanato sa dalan. Mahimo usab kamo nga mag-uban sa pagtan-aw sa mga hulagway ni Jesus ug maghisgot mahitungod sa mga butang nga Iyang gibuhat aron ipakita kanato ang dalan pabalik sa Langitnong Amahan. Ang awit sama sa “Maninguha Kong Mahimong Mahisama Kang Jesus” (Songbook sa mga Bata, 40–41) mahimong makahatag og pipila ka ideya.

Alang sa dugang nga mga ideya, tan-awa ang isyu karong bulana sa Higala nga magasin.

Our Advocate [Atong Manlalaban], ni Jay Bryant Ward