Alma the Younger Preaching [Alma nga Batan-on Nagsangyaw], ni Gary L. Kapp

Hunyo 3–9: “Sila Makanunayon ug Dili Matarog”

Mosiah 29–Alma 4

Ang pipila tingali nagtan-aw sa sugyot ni Haring Mosiah nga pulihan ang mga hari og pinili nga mga maghuhukom isip maalamon nga politikanhong reporma lamang. Apan ngadto sa mga Nephite, ilabi na niadtong kinsa mipuyo ubos sa daotan nga Haring Noah, kini nga kausaban adunay espirituhanong kahulogan usab. Nakita nila kon sa unsa nga paagi nga ang dili matarong nga hari miimpluwensiya sa iyang katawhan, ug sila “hilabihan ka mahingawaon” nga mahimong gawasnon gikan sa maong impluwensiya. Kini nga kausaban makatugot nila nga mahimong responsable alang sa ilang kaugalingong pagkamatarong ug “pagtubag sa [ilang] kaugalingon nga mga sala” (Mosiah 29:38).

Syempre, ang kataposan sa paghari sa mga hari wala magpasabot nga matapos na ang mga problema sa katilingban nga Nephite. Ang malimbongon nga mga tawo sama nila ni Nehor ug Amlici mipasiugda og mini nga mga ideya, ang dili mga tumutuo migukod sa mga Santos, ug daghang mga miyembro sa Simbahan nahimong mapagarbohon ug nahimulag. Apan ang “mapainubsanon nga mga sumusunod sa Dios” mipabilin nga “makanunayon ug dili matarog” bisan unsa pay nahitabo sa ilang palibot (Alma 4:15; 1:25).

Mga Ideya alang sa Pagkat-on diha sa Panimalay ug sa Simbahan

Mosiah 29:26–27; Alma 2:1–7

Ako mamahimo nga usa ka positibo nga impluwensiya sa akong komunidad.

Mga lima lamang ka tuig sa paghari sa mga maghuhukom, usa ka krisis ang miabot nga mosulay sa pamahayag ni Mosiah nga ang tingog sa katawhan sa kasagaran mopili unsa ang matarong (tan-awa diha sa Mosiah 29:26). Pagtuon sa Alma 2:1–7 aron pagsuta kon unsa ang problema ug unsa ang gibuhat sa mga Nephite mahitungod niini. Unsa kaha unta ang nahitabo kon wala pa buhata “[sa] katawhan sa simbahan” nga madungog ang ilang mga tingog? Unsa pa ang inyong makat-onan gikan niini nga asoy mahitungod sa kagustohan sa Ginoo nga kamo adunay kalambigitan sa inyong komunidad? (tan-awa usab sa Mosiah 29:26–27).

Unsa man ang importante nga mga isyu nga giatubang sa inyong komunidad? Ikonsiderar kon sa unsang paagi nga kamo, sama sa mga Nephite, makaseguro nga ang inyong tingog malakip diha sa “mga tingog sa katawhan.” Unsa pa man ang laing paagi nga kamo makahimo, isip usa ka sumusunod ni Jesukristo, sa pag-impluwensiya sa inyong komunidad alang sa maayo?

Tan-awa usab sa Dallin H. Oaks, “Higugmaa ang Inyong mga Kaaway,” Liahona, Nob. 2020, 26–29.

Alma 1

Ang pulong sa Dios makatabang nako nga mailhan ang mini nga doktrina.

Bisan og si Nehor sa kataposan mikompisal nga unsay iyang gitudlo dili tinuod, ang iyang mga pagtulon-an mipadayon sa pag-impluwensiya sa mga Nephite sulod sa daghang katuigan. Sa inyong hunahuna ngano kaha nga nagustohan sa katawhan ang unsay gitudlo ni Nehor? Sa Alma 1:2–6, pangita sa mga bakak sa mga pagtulon-an ni Nehor—ug ang mga kamatuoran nga iyang gigamit sa pagtago niadtong mga bakak.

Si Gideon mibatok ni Nehor “[gamit] sa mga pulong sa Dios” (Alma 1:7, 9). Ania ang pipila ka kasulatan nga nagsupak sa mga pagpanghimakak ni Nehor: Mateo 7:21–23; 2 Nephi 26:29–31; Mosiah 18:24–26; ug Helaman 12:25–26. Sulayi sa pag-summarize ang matag tudling sa kasulatan. Unsa ang inyong nakat-onan gikan sa buhi nga mga propeta nga magsupak sa mga bakak nga mga pagtulon-an sa atong panahon?

Alma 1:19–31; 4:6–15

Ang tinuod nga mga disipulo ni Jesukristo mga “mapainubsanong mga sumusunod sa Dios.”

Ang Mga Kapitulo 1 ug 4 sa Alma naghulagway sa mga panahon sa dihang ang Simbahan miuswag, apan ang mga miyembro sa Simbahan mitubag niana nga pag-uswag sa lahi nga paagi. Pananglitan, itandi ang Alma 1:19–30 sa Alma 4:6–15 aron makita kon sa unsang paagi ang mga miyembro sa Simbahan nausab sulod lang sa pipila ka tuig. Base sa unsa ang inyong nabasahan, unsa ang gibati sa tinuod nga mga sumusunod ni Jesukristo mahitungod sa mga tawo nga adunay lain nga mga tinuohan? Unsa ang kinaiya nga anaa sa tinuod nga mga sumusunod ni Kristo ngadto sa mga bahandi ug sa pag-uswag? Unsay inyong gibati nga nadasig nga usbon mahitungod sa inyong kaugalingong kinaiya?

Ipahisama ang mga kasulatan nganha sa inyong kaugalingon. Hunahunaa kon sa unsang paagi ang mga istorya ug mga pagtulon-an sa mga kasulatan magamit nganha sa inyong kinabuhi. Pananglitan, mahimong makakita ka og mga pagkasusama tali sa mga problema nga inyong nabantayan karon ug sa mga problema nga giatubang sa mga Nephite diha sa Alma 1–4.

Alma 4:6–20

Ang akong ehemplo ug pagpamatuod makausab sa mga kasingkasing.

Tingali makasabot ka sa kagul-anan nga gibati ni Alma sa dihang iyang nakita kon unsa ang nahitabo taliwala sa iyang katawhan. Pangitaa ang mga problema nga iyang nakita diha sa Alma 4:6–15. Nakamatikod ka ba og bisan unsang susama nga mga problema? Tingali nabalaka ka mahitungod sa usa ka minahal nga nanglimbasog niining mga problemaha. Naghunahuna ba kamo unsa kaha ang posible ninyong buhaton aron makatabang?

Ang uban tingali makaingon nga si Alma, isip punoan nga maghuhukom, mao ang labing maayo nga tawo nga makasulbad niini nga mga problema. Apan si Alma mibati nga adunay mas maayong paagi. Samtang magbasa kamo sa mga bersikulo 16–20, unsa ang nagustohan ninyo mahitungod niining paagiha sa pagtabang sa iyang katawhan?

Si Alma adunay talagsaon nga hugot nga pagtuo diha sa pulong sa Dios ug “lunsay nga pagpamatuod” (bersikulo 19). Unsa nga mga ehemplo ang inyong nakita sa gahom sa “lunsay nga pagpamatuod”? Samtang inyong pamalandongan ang lainlaing mga paagi nga inyong ipakigbahin ang inyong pagpamatuod bahin ni Jesukristo ug sa Iyang ebanghelyo, tingali kamo mobasa pag-usab sa Alma 4:6–14. Unsa ang gipadayag sa mga binuhatan sa mga miyembro sa Simbahan niini nga mga bersikulo mahitungod sa ilang mga pagpamatuod ni Jesukristo ug sa Iyang mga pagtulon-an? Unsa ang inyong nabatyagan mahitungod sa epekto sa ilang mga binuhatan—diha sa ilang kaugalingon ug sa uban? Tingali maghunahuna usab ka mahitungod sa mga paagi nga kamo napanalanginan pinaagi sa lunsay nga pagpamatuod sa uban nga mga tawo, mahimong kini gipakigbahin pinaagi sa mga pulong o mga buhat.

Paghunahuna og mga paagi nga inyong ikapakigbahin ang inyong pagpamatuod kabahin ni Jesukristo—diha sa mga pulong o mga binuhatan. Kinsa ang makabenepisyo gikan sa inyong pagsaksi?

Tan-awa usab sa Gary E. Stevenson, “Pag-alim ug Paghatag sa Inyong Pagpamatuod,” Liahona, Nob. 2022, 111–14; “Pagpamatuod,” Mga Himno, nu. 81; “Si Alma Mikanaog Isip Labaw nga Maghuhukom” (bidyo), Gospel Library.

Si Alma Mikanaog isip Labaw nga Maghuhukom | Mosiah 29; Alma 4

Daghan sa katawhan sa Simbahan sa Dios nagmapahitas-on. Si Alma nga Batan-on mikanaog isip labaw nga maghuhukom aron mosangyaw og pagtuo diha kang Jesukristo ug paghinulsol ngadto sa katawhan. Si Nephihah mipuli ni Alma isip labaw nga maghuhukom.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Alma 1:2–9

Ang Ginoo makatabang kanako nga moila sa sayop nga mga pagtulon-an.

• Usa sa paagi sa pagtuon sa Alma 1:2–4 uban sa inyong mga anak mao ang pagtabang kanila nga makahimo og usa ka tinuod o dili tinuod [true-or-false] nga pasulit gamit ang mga pamahayag nga gitudlo ni Nehor, usa ka mini nga magtutudlo. Dayon mahimo ka nga makig-istorya kanila mahitungod nganong si Satanas sa kasagaran mosagol sa kamatuoran sa pagpamakak. Tabangi ang inyong mga anak sa paghunahuna og pipila ka mga ehemplo. Sa mga bersikulo 7–9, giunsa pag-atubang ni Gideon ang mga bakak ni Nehor? (Tan-awa usab sa “Kapitulo 20: Alma ug Nehor,” Mga Sugilanon sa Basahon ni Mormon, 54–55.)

Alma 1:19–25

Isip miyembro sa Simbahan ni Jesukristo, ako mohigugma ug moserbisyo sa uban.

• Ang pipila ka mga miyembro sa Simbahan sa Ginoo sa panahon ni Alma mga madagayaon ug manggihatagon, ug ang uban nga mga miyembro dili mabination ug mapasigarbohon. Aron matabangan ang inyong mga anak nga makat-on gikan niining mga kasinatian, mahimo kamong mag-uban sa pagbasa sa Alma 1:27, 30 ug maglista og mga matang sa mga two nga gitabangan sa mga miyembro sa Simbahan sa Ginoo. Kinsa kaha ang atong kaila nga tingali “nagkinahanglan” (Alma 1:30) sa atong gugma ug tabang? Mahimo usab kamong magdungan sa pagkanta og kanta mahitungod sa gugma ug pagserbisyo, sama sa “Pagkamabination Magsugod Kanako” (Songbook sa mga Bata, 83), ug tabangi ang mga bata sa paghunahuna og mga aksiyon nga mohaom sa kanta.

• Unsay atong bation kon ang mga tawo dili magmabination ngari kanato? Ikonsiderar ang pagbasa uban sa inyong mga anak kon sa unsang paagi ang sumusunod ni Kristo gitratar diha sa Alma 1:19–20. Hisgoti ang mahitungod kon giunsa nila sa pagtubag diha sa mga bersikulo 22 ug 25. Tingali makapraktis ka og mga paagi sa pagtubag kon ang uban dili magmabination.

Alma 4:8–20

Ang akong pagpamatuod makalig-on sa uban.

• Kasagaran ang “lunsay nga pagpamatuod” (Alma 4:19) sa usa ka bata mahimong adunay kusog nga impluwensiya sa uban. Aron matabangan ang inyong mga anak sa pagdiskobre niini, mahimo kamo nga makigbasa uban kanila sa Alma 4:8–12, 15, tabangan sila nga makaila sa mga problema nga nahitabo diha sa Simbahan. Unsa ang mabuhat ni Alma aron masulbad kini nga mga problema? Tabangi sila sa pagsuta kon unsa ang nadesisyonan ni Alma nga buhaton diha sa Alma 4:16–20. Tingali mahimo kamong mopakigbahin sa usag usa kon sa unsang paagi ang pagpamatuod sa laing tawo kabahin ni Kristo nakapalig-on kaninyo.

• Kon ang inyong mga anak nagkinahanglan og mga ehemplo bahin sa unsa ang pagpamatuod, ikonsiderar ang pagpakita sa usa ka clip sa bidyo bahin sa usa ka mamumulong sa kinatibuk-an nga komperensiya nga naghatag og pagpamatuod. Mahimo usab ka nga makagamit niining pahina sa kalihokan niining semanaha o mag-uban sa pagpanganta og usa ka kanta sama sa “Pagpamatuod” (Mga Himno, nu. 81). Unsa ang atong makat-onan mahitungod sa mga pagpamatuod gikan niini nga mga kapanguhaan? Tugoti ang inyong mga anak nga magpraktis sa pagpakigbahin sa ilang mga pagpamatuod.

Alang sa dugang nga mga ideya, tan-awa ang isyu karong bulana sa Higala nga magasin.

Alma ug Amlici, ni Scott M. Snow