Anti-Nephi-Lehies Bury Their Weapons of War [Mga Anti-Nephi-Lehi Naglubong sa Ilang mga Hinagiban sa Gubat], ni Jody Livingston

Hulyo 8–14: Sila “Wala Gayod Mobiya”

Alma 23–29

Makahunahuna ka ba usahay kon ang mga tawo mausab ba gayod? Tingali maguol ka kon imo bang mabuntog ang dili maayong mga pagpili nga imong nahimo o sa dili maayong mga pamatasan nga imong naugmad, o tingali ikaw adunay susamang mga kabalaka mahitungod sa imong mga minahal. Kon mao, ang istorya mahitungod sa mga Anti-Nephi-Lehi makatabang kanimo. Kini nga katawhan mao ang gipanumpaan nga mga kaaway sa mga Nephite. Sa dihang ang anak nga mga lalaki ni Mosiah mihukom sa pagsangyaw sa ebanghelyo ngadto kanila, ang mga Nephite “nangatawa [kanila] aron pagbugal-bugal.” Ang pagpatay sa mga Lamanite daw ingon og mas makataronganong solusyon kay sa pagkabig kanila. (Tan-awa sa Alma 26:23–25.)

Apan ang mga Lamanite nausab gayod—pinaagi sa makakabig nga gahom ni Jesukristo. Sila makausa kaniadto nailhan isip “magahi ug usa ka mabangis nga mga katawhan” (Alma 17:14), apan sila nahimong “nailhan tungod sa ilang kasibot ngadto sa Dios” (Alma 27:27). Sa pagkatinuod, sila “wala gayod mobiya” (Alma 23:6).

Tingali ikaw adunay pipila ka hunahuna o mga buhat nga usbon o “mga hinagiban sa … pagsukol” nga dili na gamiton (Alma 23:7). O tingali ikaw nagkinahanglan lamang nga mahimong mas madasigon og gamay ngadto sa Dios. Bisan unsa nga mga kausaban ang imong gikihanahanglan, ang Alma 23–29 makahatag kanimo og paglaom nga pinaagi sa maulaong gahom ni Jesukristo, ang malungtaron nga kausaban mahimo.

Ang Ginoo Miluwas sa Katawhan ni Ammon | Alma 23-27

Ang katawhan ni Ammon misaad sa Dios nga dili na mopaagas pa og dugo ug milubong sa ilang mga hinagiban sa gubat. Tungod sa hingpit nilang pagkakabig ug pagtuo napanalanginan sila.

Mga Ideya alang sa Pagkat-on diha sa Panimalay ug sa Simbahan

Alma 23–25; 27

Ang akong pagkakabig ngadto kang Jesukristo ug sa Iyang ebanghelyo mousab sa akong kinabuhi.

Ang mga Lamanite ingon og walay kalagmitan nga mahimong mga kandidato alang sa pagkakabig, apan daghan kanila ang nakasinati sa milagroso nga mga kausaban tungod ni Jesukristo. Kining nakabig nga mga Lamanite mitawag sa ilang mga kaugalingon og mga Anti-Nephi-Lehi.

Ang pagbasa sa Alma 23–25; 27 mahimong moaghat kanimo sa pagpamalandong sa imong kaugalingong pagkakabig. Pangitaa kon sa unsang paagi ang mga Anti-Nephi-Lehi nausab—sa unsang paagi sila nakabig “ngadto sa Ginoo” (Alma 23:6). Ang mosunod nga mga bersikulo makapasugod kanimo:

• Alma 23:6–7

• Alma 23:17–18

• Alma 24:15–21

• Alma 25:13–16

• Alma 27:26–30

Sa unsa nga mga paagi si Jesukristo ug ang Iyang ebanghelyo nakapausab kanimo? Kanus-a ka mibati nga duol Kaniya? Unsaon nimo pagkahibalo nga ikaw nahimong nakabig ngadto ni Jesukristo? Unsa ang giaghat sa Espiritu nga imong buhaton sunod?

Tan-awa usab sa David A. Bednar, “Nakabig ngadto sa Ginoo,” Liahona, Nob. 2012, 106–9; Dale G. Renlund, “Walay Pagkapaling nga Pasalig ngadto kang Jesukristo,” Liahona, Nob. 2019, 22–25.

Alma 24:7–19; 26:17–22

Tungod kay ang Dios maloloy-on, Siya mopasaylo kon ako maghinulsol.

Ang kausaban nga nasinati sa mga Anti-Nephi-Lehi labaw pa gayod sa usa ka kausaban sa kinaiya—kini usa ka kausaban sa kasingkasing isip resulta sa hugot nga pagtuo kang Jesukristo ug sa sinsero nga paghinulsol. Tingali makapangita ka og usa ka kamatuoran mahitungod sa paghinulsol diha sa matag bersikulo sa Alma 24:7–19. Unsa ang gitudlo niini nga mga bersikulo mahitungod sa kaluoy sa Dios ngadto niadtong kinsa maghinulsol? Unsa nga dugang nga mga kamatuoran ang imong makat-onan gikan sa Alma 26:17–22?

Pamalandongi kon sa unsang paagi ang Dios mipakita sa Iyang kaluoy diha sa imong kinabuhi. Unsaon nimo sa pagpahayag sa imong pasalamat ngadto Kaniya?

Alma 26; 29

Ang pagpakigbahin sa ebanghelyo magdala kanako og hingpit nga kalipay.

Ang pulong nga hingpit nga kalipay makita 24 ka higayon diha sa Alma 23–29, naghimo niini nga mga kapitulo nga usa ka maayo nga dapit sa pagkat-on kon unsaon nga makadawat og hingpit nga kalipay sa pagsunod—ug pagpakigbahin—sa ebanghelyo sa Manluluwas. Ikonsiderar ang pagtuon sa Alma 26:12–22, 35–37; ug sa 29:1–17, mangita alang sa mga rason kon ngano nga si Ammon, ang anak nga mga lalaki ni Mosiah, ug si Alma nagmaya. Unsay imong nakat-onan gikan niini nga mga tudling nga mahimong mosangpot ngadto sa dugang nga hingpit nga kalipay diha sa imong kinabuhi?

Si Elder Marcus B. Nash mitudlo: “Ang pagpakigbahin sa ebanghelyo mopukaw sa hingpit nga kalipay ug paglaom sa mga kalag sa tighatag ug sa tigdawat. … Ang pagpakigbahin sa ebanghelyo modugang og hingpit nga kalipay ngadto sa hingpit nga kalipay, paglaom ngadto sa paglaom” (“Ipakita Ninyo ang Inyong Kahayag,” Liahona, Nob. 2021, 72). Unsa ang imong mga kasinatian sa pagpakigbahin sa ebanghelyo ngadto sa uban? Unsa ang mga hagit nga giatubang kon magtinguha sa pagpakigbahin sa ebanghelyo? Sa unsang paagi ang Langitnong Amahan motabang kanimo sa pagbuntog niini nga mga hagit?

Alang sa propetikanhon nga panudlo bahin unsaon sa pagpakigbahin sa ebanghelyo—ug makakaplag og hingpit nga kalipay sa pagbuhat niini—ikonsiderar ang pagtuon sa mensahe ni Presidente Dallin H. Oaks nga “Pagpakigbahin sa Gipahiuli nga Ebanghelyo,” (Liahona, Nob. 2016, 57–60). Unsa nga mga sugyot ang imong nakita sa iyang mensahe?

Ikonsiderar ang paghimo og lista sa mga butang nga inyong ipakigbahin uban sa usa ka higala mahitungod sa Basahon ni Mormon. Sulayi sa pagpakigbahin ang Basahon ni Mormon gamit ang Basahon ni Mormon nga app.

Pangita og mga sundanan [patterns] ug mga tema. Kon magtuon sa mga kasulatan, makakaplag kita og bililhon nga mga kamatuoran pinaagi sa pagpangita og gibalik-balik nga mga pulong, mga hugpong sa mga pulong, o mga ideya. Kadtong gibalik-balik nga mga ideya mahimong i-cross-reference o i-link diha sa inyong mga kasulatan aron mahimo kining mas sayon nga makita.

Alma 26:5–7

Ako makakaplag og kapasilongan diha ni Jesukristo ug sa Iyang ebanghelyo.

Sa panahon sa pag-ani, ang lugas sa kasagaran pundokon ngadto sa mga binugkos nga gitawag og mga binugkos ug ibutang sa mga balay tipiganan, nga usahay tawagon og mga kamalig. Diha sa Alma 26:5–7 pamalandongi kon unsay mahimong girepresentar sa mga binugkos, sa mga kamalig, ug sa unos diha sa imong kinabuhi. Sa unsang paagi ikaw makakaplag og kapasilongan diha kang Jesukristo?

Tan-awa usab sa Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 93–96; David A. Bednar, “Madungganon nga Paghupot og usa ka Pangalan ug Katungdanan,” Liahona, Mayo 2009, 97–100; “Jesus, Mahigugmaon sa Kalag Ko,” Mga Himno, nu. 56.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Alma 24:6–24

Ang Ginoo mopanalangin kanako samtang maningkamot ko sa pagtuman sa akong mga saad ngadto Kaniya.

• Tingali ang inyong mga anak malingaw sa paglubong sa ilang “mga hinagiban” sama sa mga Anti-Nephi-Lehi. Makabasa ka og pipila ka bersikulo gikan sa Alma 24:6–24 aron sa pagtudlo sa mga anak bahin sa mga saad nga gihimo sa mga Anti-Nephi-Lehi sa pagsunod sa Manluluwas. Sila makahunahuna dayon og usa ka butang nga ilang usbon aron mosunod Kaniya, isulat kini diha sa pahina sa kalihokan niining semanaha, ug magpakaaron-ingnon nga magkalot og lungang ug ilubong ang ilang hinagiban.

• Ang inyong mga anak mahimong mobasa sa Alma 24:15–19, mangita sa unsay gibuhat sa mga Anti-Nephi-Lehi isip “pagpamatuod ngadto sa Dios.” Dayon mahimo kang maghisgot ngadto kanila bahin sa unsang paagi ang atong mga pakigsaad mahimong “pagpamatuod ngadto sa Dios” (bersikulo 18). Tugoti ang inyong mga anak nga maghisgot bahin unsaon nila sa pagpakita sa Dios nga sila gusto nga mosunod Kaniya. Ang pagkanta sa usa ka awit sama sa “Gusto Ko nga Mosunod sa Ebanghelyo” (Songbook sa mga Bata, 72) mahimong makatabang sa pagdasig kanila.

Alma 24:7–10; 26:23–34; 27:27–30

Mahimo akong maghinulsol.

• Aron sa pagtabang sa inyong mga anak nga makakita kon sa unsang paagi si Jesukristo makatabang nato nga mag-usab kon kita maghinulsol, mahimo kang motudlo nila bahin sa mga Anti-Nephi-Lehi. Aron sa pagbuhat niini, mahimo nimong butangan og marka ang duha ka panaksan og “sa wala pa” ug “pagkahuman.” Dayon ang inyong mga anak mahimong mobasa sa Alma 17:14–15 ug sa 27:27–30, isulat kon unsa sama ang mga Lamanite sa wala pa ug sa pagkahuman sa paghinulsol, ug ibutang kini sa husto nga panaksan. Sumala sa Alma 24:7–10, unsa ang nakatabang nila nga mag-usab? Unsaon nato sa pagpakita ang atong pagpasalamat ngadto sa Dios alang sa Iyang kaluoy?

Alma 26; 29

Si Jesukristo nagdala kanako og hingpit nga kalipay, ug ako mahimong mopakigbahin niini nga kalipay.

• Tingali ikaw ug ang inyong mga anak malingaw sa pagdrowing og mga hulagway sa mga butang diha sa ebanghelyo ni Jesukristo nga magdala kaninyo og hingpit nga kalipay. Ipakigbahin ang imong hulagway ngadto sa inyong mga anak, ug awhaga sila sa pagpakigbahin sa ilang hulagway ngadto sa usa ka tawo aron sa pagtabang niana nga tawo nga mobati og hingpit nga kalipay usab.

• Tabangi ang inyong mga anak sa pagpangita sa mga pulong nga hingpit nga kalipay ug pagmaya diha sa Alma 26 ug 29. Unsay nakahatag og kalipay ni Ammon ug ni Alma o maoy hinungdan nga nagmaya sila? Kini nga pangutana mahimong mosangpot sa usa ka panaghisgotan mahitungod sa hingpit nga kalipay nga moabot gikan sa pagsunod ug pagpakigbahin sa ebanghelyo ni Jesukristo.

Alma 27:20–30

Makatabang ko sa akong mga higala nga mosunod sa ebanghelyo ni Jesukristo.

• Ang inyong mga anak mahimong mobasa sa Alma 27:22–23, mangita alang sa unsay gibuhat sa mga Nephite aron sa pagtabang sa mga Anti-Nephi-Lehi sa pagtuman sa ilang saad nga dili na gayod makig-away. Unsaon nato pagtabang sa atong mga higala sa pagtuman sa ilang mga saad? Ang inyong mga anak mahimong modrama-drama og mga sitwasyon. Sama pananglit, unsay atong ikasulti ngadto sa usa ka higala nga gustong mamakak o magminaldito?

Alang sa dugang nga mga ideya, tan-awa ang isyu karong bulana sa Higala nga magasin.

Illustration of the Anti-Nephi-Lehies burying their weapons [Paghulagway sa mga Anti-Nephi-Lehi nga naglubong sa ilang mga hinagiban], ni Dan Burr