22–28 Iulai: “Totō Lenei Afioga i o Outou Loto”

Alema 32–35

Mo sa Sorama, o le tatalo e aofia ai le tu i le mea e vaai uma atu i ai tagata ma le fai soo o faaupuga le aoga, ma e faamalie ai le tagata lava ia. Sa leai se faatuatua o sa Sorama ia Iesu Keriso—sa faapea foi ona teenaina Lona i ai—ma sauaina e matitiva (tagai Alema 31:9–25). O se faatusatusaga, sa aoao atu e Alema ma Amoleka e faapea, o le tatalo e tele lava i mea e faatatau i mea e tutupu i totonu o o tatou loto nai lo o luga o se tulaga ia iloa mai e tagata lautele. Ma afai e le faaalia atu le agaalofa ia i latou e le tagolima, o a tatou tatalo ua “le aoga, … ma ua leai se mea e te maua mai ai” (Alema 34:28). O le mea aupito taua, tatou te tatalo ona e i ai lo tatou faatuatua ia Iesu Keriso, o le ofoina mai le togiola e ala i Lana “taulaga … le gata ma faavavau” (Alema 34:10). O se faatuatua faapena, na faamalamalama mai e Alema, e fanau mai i le lotomaualalo ma se “fia talitonu” (Alema 32:27). I le aluga o taimi, faatasi ai ma le fafagaina e le aunoa, e mauaa ai le afioga a le Atua i o tatou loto seia oo ina avea ma “laau e puna a’e i le ola tumau-faavavau” (Alema 32:41).

Manatu mo le Aoaoina i le Aiga ma i le Lotu

Alema 32:17–43

Ou te faaalia le faatuatua ia Iesu Keriso e ala i le totōina ma le tausia o Lana afioga i lo’u loto.

A o e faitau i le Alema 32:17–43, ia maitau upu ma fasifuaitau e fesoasoani ia e malamalama ai i auala e faaaoga ai le faatuatua ia Iesu Keriso. O le a se mea ua e aoaoina i le faatuatua ae o le a foi le mea e le faatatau i le faatuatua?

O le isi auala e suesue ai le Alema 32 o le tusi o ni ata e faatusa i ai vaega eseese o le tuputupu a’e o se fatu. Ona faaigoa lea o ata taitasi i upu mai le Alema 32:28–43 e fesoasoani e te malamalama ai i le auala e totō ma tausi ai le afioga a le Atua i lou loto.

Tagai foi i le Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 101–4.

Alema 32:26–43

E mafai ona ou iloa mo au lava ia.

I sa Sorama o e sa lei mautinoa e uiga i le molimau a Alema ia Keriso, sa fautuaina atu e Alema “se faataitaiga” (tagai Alema 32:26). O faataitaiga e manaomia ai le manao, fiailoa, faatinoga, ma sina faatuatua itiiti—ma e mafai ona taitai atu ai i le mauaina o mea matagofie! Mafaufau i faataitaiga na e vaai i ai pe na auai. E tusa ai ma le Alema 32:26–36, o le a le ituaiga o faataitaiga e mafai ona taitai atu ai i le faatuatua ia Iesu Keriso?

Na faapefea ona e “faataitaia” i luga o le afioga a le Atua ma iloa ai “o le afioga e lelei”? (Alema 32:28).

Ao Faaniutu ma Avesusulu

Ua aoao mai i tatou e Elder Dushku o aafiaga faaleagaga ofoofogia e seasea tupu ma e masani ona tuuina mai e le Alii ia i tatou se avesusulu se tasi o le malamalama i le taimi e tasi.

Alema 33:2–11; 34:17–29

E mafai ona ou tapuai i le Atua i le tatalo, i soo se taimi ma i soo se mea.

O le fautuaga a Alema ma Amoleka e faatatau i le tapuai ma le tatalo, sa faamoemoe e faasa’o ai ni feeseeseaiga faapitoa sa i ai o sa Sorama. Mafaufau e lisi i lalo (tagai Alema 31:13–23). E sosoo ai ma lena lisi, atonu e mafai ona e faia se lisi o upumoni e uiga i le tatalo i le Alema 33:2–11 ma le 34:17–29. O le a faapefea ona aafia le ala e te tatalo ma tapuai ai i mea e te aoaoina mai nei fuaiupu?

E mafai foi ona e maua malamalamaaga mai se viiga e uiga i le tatalo, e pei o le “Le Itula o Talosaga” (Viiga, nu. 77).

Alema 34:9-16

Ou te manaomia Iesu Keriso ma Lana Togiola.

Matau pe faafia ona faaaoga e Amoleka ia upu e le gata ma le faavavau e faamatala ai le taulaga togiola a le Faaola i le Alema 34:9–14. Aisea e taua ai le iloa o le Togiola a le Faaola e le gata ma e faavavau? Vaavaai mo upu ma fasifuaitau i fuaiupu nei o loo faamatala ai foi le Togiola a le Faaola: Eperu 10:10; 2 Nifae 9:21; Mosaea 3:13.

E tusa lava pe tatou te iloa o le mana o Iesu e laveai ai e le gata ma e faavavau, atonu o nisi taimi tatou te masalosalo ai e faatatau ia i tatou—po o se tasi ua agasala mai ia i tatou. Na ta’ua e Elder David A. Bednar ia tagata “e foliga mai e faatuatua i le Faaola, ae latou te le talitonu o loo avanoa Ana faamanuiaga folafolaina mo i latou” (“Ana Iloa e Outou o Au,” Liahona, Nov. 2016, 104). O le a se mea e ono taofia ai i tatou mai le mauaina atoatoa o le mana o le Faaola? Mafaufau pe faapefea ona e iloaina faapea o le Togiola a Iesu Keriso e le gata ma e faavavau.

Ina ia mafaufau loloto i le tele o lou manaomia o le Togiola a le Faaola, atonu e fesoasoani le mafaufau i se mea e te manaomia i aso uma. Fesili ifo ia te oe lava, “Faamata e faape’i lo’u olaga e aunoa ma lenei mea?” Ma, a o e suesue i le Alema 34:9–16, mafaufau loloto pe faape’i lou olaga e aunoa ma Iesu Keriso. E mafai ona e maua isi malamalamaaga i le 2 Nifae 9:7–9. E faapefea ona e aoteleina le Alema 34:9–10 i se fuaiupu se tasi?

Tagai foi Michael John U. Teh, “O Lo Tatou Faaola Patino,” Liahona, Me 2021, 99–101; Autu o le Talalelei, “Togiola a Iesu Keriso,” Potutusi o le Talalelei; “Toe Maua Mai” (vitio), Potutusi o le Talalelei.

Toe Maua Mai

Ua aoao mai Elder Shayne M. Bowen: “O le Togiola a Iesu Keriso e avanoa ia i tatou uma taitoatasi. E mafai ona faamama, toe maua, ma faapaiaina ai foi oe.”

Alema 34:30–41

“O le taimi ma le aso lenei o lo outou olataga.”

Manatu faapea e te manao e auai i se malafoni po o se faafiafiaga faamusika. O le a le mea e tupu pe afai e te faatalitali seia oo i le aso o le gaoioiga e saunia ai? E faapefea ona fesootai lenei faataitaiga i lapataiga a Amoleka i le Alema 34:32–35? O le a le tulaga matautia o le tolopoina o a tatou taumafaiga e salamo ma suia?

O lefuaiupu 31 o loo i ai foi se savali mo tagata o e atonu ua leva ona latou faatuai ma ua tuai tele ona salamo. O le a sau tala o le a le savali lea?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

Alema 32:1–16

E mafai e le Alii ona aoaoina au a o ou filifili ia lotomaualalo.

• Na faamanuiaina Alema ma Amoleka i le aoaoina o sa Sorama o e sa lotomaualalo. O le a le uiga ia lotomaualalo? Fesoasoani i lau fanau e sue se faauigaga o le lotomaualalo i le O le Taiala i Tusitusiga Paia. O a nisi faamatalaga e faatatau i le uiga o nei upu e mafai ona latou maua i totonu o le Alema 32:13–16? Valaaulia lau fanau e faauma se fuaiupu e pei o le “Ou te lotomaualalo pe a ou .”

Alema 32:28–43

E tuputupu ae la’u molimau ia Iesu Keriso ao o’u faafaileleina.

• O fatu, laau, ma fua o mea masani ia e mafai ona fesoasoani i tamaiti ia malamalama ai i mataupu faavae faapitoa e pei o le faatuatua ma molimau. Tuu atu i lau fanau e uu se fatu ao e faitauina le Alema 32:28. Ona mafai lea ona e fai atu ia i latou e fesoasoani ia te oe e mafaufau i ni auala e pei ai le totoina o se molimau ia Iesu Keriso e pei o le totoina ma le faafaileleina o se fatu (tagai “Mataupu 29: Ua Aoao Atu Alema e uiga i le Faatuatua ma le Afioga a le Atua,” Tala o le Tusi a Mamona, 81). Atonu e mafai ona e totoina lau fatu ma talanoa e uiga i mea e manaomia e fesoasoani ai i se fatu—po o se molimau—ia tuputupu ae.

• O se ata o se laau i lenei otootoga; atonu e te faaaogaina e faamamafa atu ai upu a Alema o loo i le Alema 32:28–43. Pe e mafai foi ona tou ō e savalivali e su’e ni laau i o latou tulaga eseese o le tuputupu a’e ma faitau ia fuaiupu mai le Alema 32 o loo faatusa ai se laau o loo tuputupu a’e i lo tatou faatuatua. Pe atonu e mafai e lau fanau ona tusi se laau i luga o le laupapa ma faaopoopo se laulaau po o se fua i taimi uma latou te mafaufau ai i se mea e mafai ona latou faia e fesoasoani ai ia latou molimau ia Iesu Keriso ia tuputupu ae.

• E mafai ona e tuu atu i lau fanau e taumafai e tulei se fatu (e faatusa i le afioga a le Atua) i totonu o se maa (e faatusa i se loto faamaualuga) ma i se eleele malū (e faatusa i se lotomaualalo). Faitau faatasi le Alema 32:27–28. Talanoa e uiga i le “tuu ane o se avanoa” (fuaiupu 27) mo le afioga a le Atua i o tatou loto.

Tusi ni ata. O nisi tagata e sili atu le aoaoina pe a latou tusia se ata o mea o loo latou aoaoina. Atonu e fiafia lau fanau e tusi se ata o se fatu ua tupu a’e o se laau a o latou suesue i le Alema 32.

Alema 33:2–11; 34:17–27

E mafai ona ou tatalo i le Tama Faalelagi i soo se taimi, e uiga i soo se mea.

• Fesoasoani i lau fanau e sue fuaitau e faamatala ai nofoaga e mafai ona tatou tatalo ai (i le Alema 33:4–11) ma mea e mafai ona tatou tatalo ai (i le Alema 34:17–27). Atonu e mafai ona latou tusi ni ata o i latou lava o tatalo i na nofoaga. Faasoa atu i le tasi ma le isi aafiaga ina ua faafofogaina e le Tama Faalelagi au tatalo. E mafai foi ona outou usuina faatasi se pese e faatatau i le tatalo, e pei o le “O Le Tatalo A Le Tamaitiiti” (Tusipese a Tamaiti, 6–7).

Mo nisi manatu, tagai i le lomiga o lenei masina o le mekasini o le Uo .

“Ona o lou filiga ma lou faatuatua ma lou onosai i le afioga i lona tausiga, … faauta, e lata le aso o le a e tauina ai lona fua, lea ua sili ona pele” (Alema 32:42).