Amona ma le Tupu o Lamonae, saunia e Scott M. Snow

1–7 Iulai: “O Le a Ou Faia Outou o se Mea Faigaluega”

Alema 17–22

Mafaufau i mafuaaga uma e ono aumai e tagata mo le le faasoaina atu o le talalelei: “E le lava so’u iloa” po o le “Ou te le o mautinoa pe o le a fia faalogo mai” pe atonu o le “Ou te fefe ne’i teenaina au.” Atonu e i ai taimi e te mafaufau ai oe lava i mea faapena. Sa i ai ia sa Nifae se mafuaaga faaopoopo mo le le faasoaina atu o le talalelei ia sa Lamana: sa faamatalaina i latou “o ni tagata aivao ma lotoma’a’a ma feai; o ni tagata sa fiafia i le fasioti o sa Nifae” (Alema 17:14; tagai foi Alema 26:23–25). Peitai o atalii o Mosaea na i ai se mafuaaga e malosi atu na pogai ai ona latou lagonaina e tatau ona latou faasoa atu le talalelei ia sa Lamana: “Sa latou mananao ia talai atu le olataga i tagata uma, ona sa le mafai ona latou talitalia le fano o le agaga o soo se tagata” (Mosaea 28:3). O lea alofa sa musuia ai Amona ma ona uso e mafai foi ona musuia ai oe e faasoa atu le talalelei i lou aiga, uo, ma paaga—e oo lava ia i latou o e atonu e le foliga mai e taliaina.

Manatu mo le Aoaoina i le Aiga ma i le Ekalesia

Alema 17:1–4

O faatinoga faigofie ma faifai pea o le tuuto atu ia Keriso e fesoasoani ou te maua ai Lona mana.

O le a se mea ua e aoaoina mai le Alema 17:1–4 e uiga i le ala e tausia ai lau molimau ma le tautinoga ia Iesu Keriso ia malosi? O a mea na fai e atalii o Mosaea, ma na faapefea ona faamanuiaina i latou e le Alii?

A o e faitau e uiga i aafiaga o atalii o Mosaea i le Alema 17–22, matau le ala na aafia ai la latou auaunaga i sa Lamana ona o a latou sauniuniga faaleagaga (mo se faataitaiga, tagai Alema 18:10–18, 34–36; 20:2–5; 22:12–16). O le a se mea ua musuia oe e fai e mulimuli ai i a latou faataitaiga?

Alema 17:6–12; 19:16–36

E mafai ona avea a’u o se meafaigaluega i aao o le Atua.

O tala o liuaga tatou te faitau e uiga i ai i tusitusiga paia e tele ina aofia ai ni mea maoae e tutupu, ae i lo latou totonugalemu e masani ona tatou maua ai tagata taitoatasi sa i ai le lototoa e tautala atu ai ma faasoa atu lo latou faatuatua ia Iesu Keriso. Mafaufau i lenei mea a o e faitau e uiga ia Apiso ma atalii o Mosaea i lenei vaiaso.

O le a sou manatu i le uiga o le avea ma meafaigaluega i aao o le Atua? Atonu e fesoasoani le mafaufau i meafaigaluega po o isi mea e mafai ona e faaaogaina i lou olaga i aso taitasi. I le Alema 17:6–12, vaavaai mo mea na fai e atalii o Mosaea ina ia mafai ai ona avea ma meafaigaluega i aao o le Atua. E mafai faapefea ona avea oe ma se meafaigaluega e sili atu ona aoga e fesoasoani ai i isi ia o mai ia Keriso?

O le a se mea ua faagaeetia ai oe e uiga ia Apiso i le Alema 19:16–36? O le a se mea ua e aoao mai ia te ia e uiga i le fesoasoani atu i isi e fausia le faatuatua ia Keriso? Mo se faataitaiga, o a ni mea e te lagona o le a fesoasoani i tagata e te alofa i ai ia “talitonu i le mana o le Atua”? (Alema 19:17).

E mafai foi ona e faatusatusa le aafiaga o Apiso ma mataupu faavae na aoao mai e Elder Dieter F. Uchtdorf i le “Galuega Faafaifeautalai: Faasoaina Atu o Mea o Loo i Totonu o Lou Loto” (Liahona, Me 2019, 15–18). Na faapefea ona faaalia e Apiso “Fautuaga Faigofie e Lima” a Elder Uchtdorf? Taumafai e tusi i lalo nisi o mea e mafai ona e fai atu ai e uiga ia Iesu Keriso. Mo se faataitaiga, “Mo a’u, o Iesu Keriso …” po o le “E fesoasoani mai le Faaola ia te au …”

Tagai foi i le Gospel Topics, “Ministering as the Savior Does,” Gospel Library; “Brightly Beams Our Father’s Mercy,” Hymns, no. 335; “Come and See,” “Come and Help,” “Come and Belong” (vitio), Gospel Library.

Come and See

People like being included. They just need to be invited. (Asia Area)

Come and Help

People naturally want to help. They just need to be invited. (Asia Area)

Come and Belong

Elder Uchtdorf extends an invitation to all to come and belong in the Lord's Church.

Faaaoga lesona faatino. Soo se taimi lava e mafai ai e tagata ona vaai pe pa’i atu i se mea e faatatau i mea o loo latou aoaoina, atonu o le a umi atu ona latou manatuaina. Afai o loo e aoao atu e uiga i le Alema 17:11, mo se faataitaiga, mafaufau e faaali atu ni mea faimusika po o ni meafaigaluega tusitusi e fesoasoani e musuia ai se talanoaga e uiga i le avea ma se meafaigaluega i aao o le Atua.

Alema 17–19

Pe a tatou faaalia le alofa mo isi, e mafai ona tatou fesoasoani ia i latou ia maua le talalelei a Iesu Keriso.

Vaai mo fuaiupu i le Alema 17–19 o loo faaalia ai le ala na musuia ai e le alofa o Amona mo sa Lamana ana taumafaiga e faasoa atu le talalelei a Iesu Keriso. O a isi upumoni e uiga i le faasoa atu o le talalelei ua tatou aoao mai lana faataitaiga?

Tagai foi “Ua Auauna Atu ma Aoao e Amona le Tupu o Lamonae” (vitio), Gospel Library.

Ua Auauna Atu Amona ma Aoao le Tupu o Lamonae | Alema 17--19

Ua aoao e Amona ma atalii o Mosaea sa Lamana i le afioga a le Atua. Ua avea Amona ma auauna a le Tupu o Lamonae ma faasao ana mamoe. Ua aoao e Amona ia Lamonae e uiga i le Atua, Iesu Keriso, ma le ata o le faaolataga.

Minerva Teichert (1888–1976), Ua Faasaoina e Amona le Lafu a le Tupu, 1949–1951, suauu i luga o le laupapa, 35 15/16 × 48 inisi. Falemataaga mo Faatufugaga a le Iunvesite a Polika Iaga, 1969.

Alema 19:36

O le a fesoasoani mai le Alii ia te au ia salamo.

Ina ua uma ona faamatalaina le liua o Lamonae ma lona nuu, sa aotele e Mamona le tala i se matauga e uiga ia Iesu Keriso. O le a se mea o aoao mai e le Alema 19:36 ia te oe e faatatau i uiga o le Alii? O le a se isi mea o aoao mai e le tala i le Alema 19:16–36 ia te oe e uiga ia te Ia? O anafea na e lagonaina ai le faaloaloa mai o le aao o le Alii ia te oe?

Alema 20:23; 22:15–18

O le iloaina o le Atua ua tatau i ai soo se osigataulaga.

Faatusatusa le mea na naunau le tamā o Lamonae e lafoai ina ia faasaoina ai lona ola (tagai Alema 20:23) i le mea sa ia naunau mulimuli ane e lafoai ina ia maua ai le olioli o le talalelei ma ia iloa ai le Atua (tagai Alema 22:15, 18). Mafaufau loloto i mea ua e naunau e ositaulaga ina ia iloa atili ai le Atua.

Mo nisi manatu, tagai i lomiga o lenei masina o mekasini Liahona ma le Mo le Malosi o le Autalavou .

Fautuaga mo le Aoaoina o Tamaiti

Alema 17:2–3

E tuputupu ae laʻu molimau ia Iesu Keriso pe a ou faitau i tusitusiga paia, tatalo, ma anapogi.

• E mafai faapefea e atalii o Mosaea ona fesoasoani i lau fanau e fausia a latou molimau ia Iesu Keriso? E mafai ona e fesoasoani i lau fanau ia sue mea na faia e atalii o Mosaea e fausia ai lo latou malosi faaleagaga i le Alema 17:2–3. Ona mafai lea ona latou tusia ni ata pe su’e ni mea faitino e faatusa i nei mea. Fesoasoani ia i latou e fuafua mea o le a latou faia e faamalolosia ai a latou molimau e uiga i le Faaola.

Alema 17–19

E mafai ona ou faasoa atu le talalelei a Iesu Keriso i isi.

• Ina ia aoao e uiga i le avea ma se meafaigaluega i aao o le Atua, e pei ona sa i ai atalii o Mosaea, e mafai e oe ma lau fanau ona tilotilo i se masini po o se meafaigaluega ma talanoa e uiga i mea o loo faaaoga ai. Ona mafai lea ona e faitauina le Alema 17:11 ma talanoa e uiga i le avea ma meafaigaluega a le Tama Faalelagi e fesoasoani ai i tagata e aoao e uiga ia Iesu Keriso.

• O le itulau o gaoioiga o lenei vaiaso o loo i ai ata e faatusa i upumoni na aoao atu e Amona i le Tupu o Lamonae. E mafai ona e fesoasoani i lau fanau ia maua nei upumoni i le Alema 18:24–40. E mafai ona faafoliga lau fanau i ni faifeautalai ma faasoa atu mea latou te iloa e uiga i nei upumoni.

• A uma ona outou faitau ma lau fanau e uiga ia Apiso (tagai Alema 19:16–20, 28–29), e mafai ona latou faafoliga e pei o Apiso e ala i le tamoe solo, tu’itu’i i faitotoa, ma faamatala le mea na tupu i le Alema 19:1–17. E mafai faapefea ona tatou pei o Apiso ma faasoa atu mea ua tatou iloa e uiga ia Iesu Keriso ma Lana talalelei? E mafai e lau fanau ona tusi ni ata o i latou lava o faasoa atu le talalelei i se tasi pe usuina faatasi se pese e uiga i le faasoaina atu o le talalelei, e pei o le “Tofia e Auauna” (Tusipese a Tamaiti, 156).

Alema 17:21–25; 20:8–27; 22:1–3

E mafai ona ou fesoasoani i isi e o mai ia Keriso e ala i le faaalia o loʻu alofa mo i latou.

• I le taimi muamua, sa maa’a loto o le Tupu o Lamonae ma lona tamā i le talalelei. Mulimuli ane, sa faamaluluina o la loto, ma sa la talitonu ia Iesu Keriso. Na faapefea ona tupu lenei mea? Fesoasoani i lau fanau ia iloa tali i lenei fesili a o e iloiloina faatasi ma i latou aafiaga o Amona. E mafai ona latou faatinoina le “Mataupu 23: O Amona: O Se Auauna Sili” ma le “Mataupu 24: Ua Feiloai Amona ma le Tamā o le Tupu o Lamonae” (Tala o le Tusi a Mamona, 64–68, 69–70). Pe atonu foi e mananao lau fanau e tusi ata o vaega eseese o le tala ma faaaoga ata e faamatala ai tala. O le a le mea na faia e Amona e fesoasoani ai ia Lamonae ma lona tamā e tatala o la loto i le talalelei a Iesu Keriso? (tagai Alema 17:21–25; 20:8–27; 22:1–3).

  Chapter 23: Ammon: A Great Servant

  Chapter 24: Ammon Meets King Lamoni’s Father

• Atonu e mafai e oe ma lau fanau ona mafaufau i se tasi e manaomia ona iloa e uiga ia Iesu Keriso. Fesoasoani ia i latou e mafaufau i ni auala e mafai ai ona avea i latou ma faataitaiga lelei ma faaali atu le alofa i lena tagata, e pei ona sa faia e Amona mo Lamonae ma lona tamā.

Mo nisi manatu, tagai i le lomiga o lenei masina o le mekasini o le Uo .

O se atatusi o Apiso, na saunia e Dilleen Marsh