“Amona,” Tala o le Tusi a Mamona (2023)
Amona
O se auauna lotomaualalo
Sa mananao Amona ma ona uso e aoao sa Lamana e uiga i le Alii. Sa latou o atu i le laueleele sa nonofo ai sa Lamana. A o latou agai atu, sa latou anapopogi ma tatalo e ole atu i le Alii mo se fesoasoani. Sa faamafanafanaina i latou e le Alii. Sa Ia ta’u atu ia i latou ia onosai ma ia avea ma faataitaiga lelei. Sa taitasi i latou ma o i nofoaga eseese e aoao atu ai.
Na alu Amona i se nuu na ta’ua o Isamaeli. Sa noanoa o ia e tagata iina ma avatu o ia i le Tupu o Lamonae. Sa ta’u atu e Amona ia Lamonae e manao o ia e nonofo faatasi ma sa Lamana. Sa fiafia Lamonae ia Amona ma faasaoloto o ia. Sa manao o ia ia faaipoipo Amona i se tasi o ona afafine, ae na filifili Amona e avea ma auauna a Lamonae.
Sa ta’u atu e Lamonae ia Amona e tausi ana manu. I se tasi aso, na ave ai e Amona ma nisi o auauna ia manu e feinu. A o feinu ia manu, sa o mai faomea ma faasegisegi i latou. Sa fefefe isi auauna o le a faasalaina i latou i le leiloloa ai o manu a Lamonae.
Na iloa e Amona o se avanoa lenei e faaali atu ai le mana o le Alii. Sa ia ta’u atu i isi auauna e aua le popole ma fesoasoani ia i latou e su’e manu na leiloloa.
Sa toe foi mai le au faomea e toe faasegisegi i manu. Ae o le taimi lea, na fai atu ai Amona i isi auauna e nonofo ma taofi manu mai le sosola ese.
Sa alu Amona e taofi le au faomea mai le faasesegina o mamoe. Sa lei fefefe le au faomea ia Amona. Sa latou manatu e sili atu lo latou malosi nai lo ia. Ae latou te lei iloa sa fesoasoani le Alii ia Amona.
Sa tauai e Amona maa i le au faomea i lana maata. Sa feoti nisi o i latou. O lenei mea na feitai ai isi au faomea, ma sa latou mananao e fasioti Amona. Sa faateia i latou ona sa le mafai ona latou taia Amona i a latou lava maa. Latou te lei faamoemoeina o ia ina ia malosi tele.
Sa taumafai le au faomea e taia Amona i a latou uatogi. Ae o taimi uma lava latou te taumafai ai, e tipi ese ai e Amona o latou lima i lana pelu ina ia le mafai ai ona latou tau. E lei umi, ae latou fefefe tele e tau ma sosola ese.
Sa ta’u atu e auauna ia Lamonae le ala na faasaoina ai e Amona ia manu. Sa maofa Lamonae. Sa ia manatu o Amona o le Agaga Silisili, o lē e i ai le mana tele ma na te silafia mea uma.
Sa manao Lamonae e talanoa ia Amona, ae sa popole foi o ia.
Sa alu Amona e vaai Lamonae, ae sa lei iloa e Lamonae le tala e fai atu. Sa fesoasoani le Alii ia Amona ia iloa mafaufauga o Lamonae. Sa fai atu Amona e le o ia o le Agaga Silisili. Sa ia ta’u atu ia Lamonae o le Agaga Silisili o le Atua. Sa manao Lamonae e aoao atili e uiga i le Atua.
Na fai atu Amona na faia e le Atua le lalolagi ma tagata uma o i ai. Ona ta’u atu lea e Amona ia Lamonae o loo i ai i le Atua se fuafuaga o le faaolataga. O se vaega o lena fuafuaga, o le a afio mai Iesu Keriso. Sa talitonu Lamonae i le tala a Amona. Sa tatalo Lamonae ma ole atu i le Atua ia alofa mutimutivale ia te ia ma lona nuu.