“Eteru le Perofeta,” Tala o le Tusi a Mamona (2023)
Eteru le Perofeta
O le lapataiga a le Alii i se nuu
Na aumaia e le Alii le uso o Iareto ma lona aiga i le nuu folafolaina. Sa latou lotomaualalalo ma tausi poloaiga a le Atua. Sa tuputupu ae le latou vaega mo le tele o tausaga, ma sa latou mananao i se tupu e taitaia i latou. Sa lapataia i latou e le uso o Iareto o le i ai o se tupu e mafai ona taitai atu ai i faalavelave, ae sa ia tuu atu ia i latou e filifili se tupu.
Mo le faitau selau o tausaga, sa nonofo ai sa Iareto i le nuu folafolaina. O nisi taimi na taitai atu ai i latou e o latou tupu e fai mea lelei, ae o isi taimi latou te lei faia. O perofeta a le Atua o le a lapataia tagata ia salamo. Ina ua latou faalogo ma tausia poloaga a le Atua, sa Ia faamanuiaina i latou. O le perofeta mulimuli o sa Iareto sa igoa ia Eteru.
Eteru 7:23–27; 9:26–30; 10:16–17, 28; 11:1–8, 12–13, 20–22; 12:2
Sa lei usitai tagata i le Atua. Ae sa ia Eteru le Agaga o le Alii. Sa ia aoaoina i latou mai le taeao seia oo i le po. Sa ia fai atu ia talitonu i le Atua ma salamo a le o lea o le a faaumatiaina i latou. Afai latou te faatuatua, e mafai ona latou faamoemoe e toe nonofo faatasi ma le Atua ma maua le malosi e faia ai mea lelei. Sa le’i talitonu tagata.
Sa matau e Eteru mea na faia e tagata. Sa lafi o ia i se ana i le ao ma tusi i lalo mea sa ia vaaia. Sa lei salamo tagata ma amata ona tau le tasi ma le isi.
Na vaai Eteru o le tupu o sa Iareto, o Korianetuma, sa tatau ona tau ma le toatele o tagata o e sa mananao e avea ma tupu. Sa faaaoga e Korianetuma lana autau e puipuia ai o ia lava.
I se tasi aso, na ta’u atu ai e le Alii ia Eteru e lapatai Korianetuma ma lona nuu ia salamo. Afai latou te faia, o le a fesoasoani le Alii i tagata ma o le a tuu atu ia Korianetuma e faatumauina lona malo. Afai e leai, o le a faaumatia e tagata le tasi ma le isi. O le a lava le umi e ola ai Korianetuma e vaai ai i le moni o afioga a le Alii. Ona oti ai foi lea o ia.
Sa lei salamo Korianetuma ma lona nuu. Sa taumafai le nuu e fasioti Eteru, ae sa sola atu Eteru i lana ana. Sa tau se tagata e igoa ia Sesa ma Korianetuma. Sa filifili tagata e auai faatasi ma le autau a Sesa po o le autau a Korianetuma. Sa tele taua a autau e lua. E toatele tagata na maliliu.
Eteru 13:22–25; 14:17–20; 15:2
Na manatua e Korianetuma le tala a Eteru. Sa faanoanoa o ia ona o le toatele o ona tagata ua maliliu. Sa ia manatua na lapataia e perofeta uma lenei mea o le a tupu. Sa amata ona ia salamo ma auina atu se tusi ia Sesa. Sa ia fai atu o le a ia lafoai le malo pe afai e mafai ona faaolaina lona nuu. Ae sa manao Sesa e tau.
Sa feita le nuu o Korianetuma ma sa mananao e tau. Sa feita foi le nuu o Sesa ma sa mananao e tau. E leai se tasi na manao e salamo. Na vaai Eteru o tagata taitoatasi uma na o e tau. E toatele isi tagata na maliliu.
Sa manao Korianetuma e taofi le taua. Sa ia fai atu ia Sesa e ave le malo ma aua nei faatiga i lona nuu. Ae sa feitai tagata uma. Latou te le maua le Agaga o le Alii. Na vaai Eteru o loo tau pea tagata uma seia oo ina na o Korianetuma le isi sa Iareto o ola. Ona matapogia lea o Korianetuma.
Na vaai Eteru o mea uma na fetalai mai ai le Alii na moni. Na faauma ona tusitusi e Eteru i lalo mea na tutupu. Ona ia faamautinoa lea o le a mafai e tagata ona maua ana tusitusiga pe a maliu o ia. Sa faatuatuaina e Eteru le Atua ma sa tulimatai atu e faatasi ma Ia i se aso.