“Alema ma Amoleka i le Falepuipui,” Tala o le Tusi a Mamona (2023)
Alema ma Amoleka i le Falepuipui
Faatuatua i le Alii i taimi faigata
Na aoao atu e Alema ma Amoleka le talalelei i le aai o Amonaea. O nisi tagata sa talitonu i le Alii ma salamo. Ae e toatele isi tagata sa feitai ia Alema ma Amoleka ma mananao e faaumatia i laua. Sa saisai e tagata feita ia Alema ma Amoleka ma ave atu alii e toalua i le faamasino sili o le aai.
Sa lei talitonu le faamasino sili e manaomia e lona nuu ona salamo. Sa feitai tagata ia Alema ma Amoleka. Sa latou faia ia tuua le aai e tagata na talitonu i mea na aoao atu e Alema ma Amoleka. Ona latou tauai atu lea o fafine ma tamaiti o e sa talitonu i le Alii i se afi.
Sa faanoanoa tele Amoleka ina ua ia vaai atu i tagata o tiga. Sa ia fai atu ia Alema e faaaoga le mana o le Atua e laveai ai i latou. Ae na fai atu Alema o le a le faatagaina o ia e le Agaga o le Atua. Sa ia ta’u atu ia Amoleka o le a faatasi tamaitai ma tamaiti ma le Alii. O le a faamasinoina e le Alii tagata na fasiotia i latou.
Sa tauemu le faamasino sili ia Alema ma Amoleka ona sa lei puipuia e le Alii ia tamaitai ma tamaiti. Sa ia auina atu Alema ma Amoleka i le falepuipui.
Ina ua mavae aso e tolu, sa alu atu le faamasino sili i le falepuipui faatasi ma ana faitaulaga pepelo. Sa latou fai atu le tele o fesili. Ae sa le tali atu Alema ma Amoleka ia i latou.
Sa faia e le faamasino sili ma ana faitaulaga ni mea faatiga ia Alema ma Amoleka. Latou te lei tuuina atu foi ia Alema ma Amoleka ni meaai po o se vai. Ma sa latou tauemu i mea na aoao atu e Alema ma Amoleka.
Na puapuagatia Alema ma Amoleka mo aso e tele. Sa toe o mai le faamasino sili ma ana faitaulaga. Sa ia ta’u atu ia Alema ma Amoleka afai e ia i laua le mana o le Atua, e tatau ona la motusia maea na saisai ai i laua. Ona ia talitonu lea ia i laua.
Na lagona e Alema ma Amoleka le mana o le Atua. Na la tutu i luga. Sa faatuatua Alema i le Alii ma ole atu mo le mana e motusi ai maea.
Na motusi e Alema ma Amoleka maea. Sa fefefe le faamasino sili ma ana faitaulaga. Sa latou taumafai e sosola ese, ae sa amata ona gatete le eleele.
Sa pauu puipui o le falepuipui i luga o le faamasino sili ma ana faitaulaga, ma sa feoti ai i latou. Ae sa tausia e le Alii ia Alema ma Amoleka ia saogalemu. Ina ua faalogo tagata i le pa’o, sa latou taufetuli atu e vaai po o le a le mea o loo tupu. Sa na o Alema ma Amoleka na savavali ese mai le falepuipui. Sa matuai fefefe tagata ia Alema ma Amoleka ma sa latou sosola ese ai.