Mosaea 25–28; Alema 36

Alema le Itiiti

O se suiga tele

Na tuuina atu e le Tupu o Mosaea ia Alema le pule e taitai ai le Ekalesia i Sara’emila. Na aoao e Alema tagata ia salamo ma ia faatuatua i le Alii.

Mosaea 25:19–24; 26

Sa i ai se atalii o Alema o lē sa igoa foi ia Alema. Sa le’i talitonu Alema le Itiiti i mea na aoao atu e lona tamā.

Mosaea 27:8

Sa i ai atalii o Mosaea sa le’i talitonu foi i le Alii. Sa latou uo ma Alema le Itiiti. Sa mananao i latou uma e o ese tagata mai le Ekalesia. Na taitai atu e Alema ma atalii o Mosaea le toatele o tagata e faia mea e faasagatau i poloaiga a le Atua.

Mosaea 27:9–10; Alema 36:6

I se tasi aso, na auina mai ai e le Alii se agelu e taofi i latou. Na ta’u atu e le agelu ia i latou e tuu le taumafai e faaumatia le Ekalesia a le Atua. Sa matua fefefe Alema ma atalii o Mosaea ua latou pauu ai i le eleele.

Mosaea 27:11–18; Alema 36:6–9

Sa le mafai e Alema ona tautala pe minoi mo aso e tolu ma po e tolu. Sa ia lagona le faanoanoa tele ona o mea sese uma sa ia faia. Sa popole foi o ia ona sa ia taitaieseina le toatele o tagata mai le Alii.

Mosaea 27:19; Alema 36:10–16

Sa lagona e Alema le tiga tele ona o ana agasala. Ona ia manatua lea o lona tamā o talanoa e uiga ia Iesu Keriso, le Alo o le Atua.

Alema 36:17

Sa tatalo Alema ia faamagalo o ia e Iesu. Ina ua uma ona ia tatalo, sa le mafai ona ia manatuaina lona tiga. Sa ia iloa ua faamagaloina o ia e le Alii. Na te le’i toe lagonaina le faanoanoa e uiga i ana agasala. Nai lo lena, sa lagona e Alema le fiafia tele.

Mosaea 27:24, 28–29; Alema 36:18–22

Na toe maua e Alema lona malosi. Sa tonu ia te ia ma atalii o Mosaea e salamo ma taumafai e faaleleia tiga uma na latou faia. Sa latou auauna atu i le Alii mai lena taimi agai i luma e ala i le fesoasoani atu i isi ia salamo. Sa latou faimalaga atu i le laueleele na pulea e Mosaea ma aoao atu tagata e uiga ia Iesu.

Mosaea 27:20–24, 32–37; Alema 36:23–26

Na mananao Alema ma atalii o Mosaea e faasoa atu le fiafia na aumaia e aoaoga a Iesu i o latou olaga. Sa latou galulue malosi e auauna atu i le Alii ma tagata. Na filifili atalii o Mosaea e o ma aoao atu sa Lamanā e uiga ia Iesu. Na filifili Alema e nofo ma aoao pea sa Nifaē.

Mosaea 27:32–37; 28:1–10; 29:42–43