“O Aneti-Nifae-Liae,” Tala o le Tusi a Mamona (2023)
O Aneti-Nifae-Liae
O tagata na filifili e alolofa i o latou fili
E toatele sa Lamana na aoao e uiga i le Atua mai ia Amona ma ona uso. O nei sa Lamana sa i ai le faatuatua malosi i le Alii ma mulimuli i poloaiga a le Atua. Sa latou mananao i se igoa fou, o lea na latou faaigoa ai i latou lava o Aneti-Nifae-Liae nai lo sa Lamana.
Na suia Aneti-Nifae-Liae ona o lo latou faatuatua i le Atua. Sa latou salamo i mea leaga sa masani ona latou faia. Sa latou iloa e alofa le Atua ia i latou ma faamagalo i latou.
Sa feitai sa Lamana ma ua sauni e osofaia ia Aneti-Nifae-Liae. Nai lo le tau, sa faia e Aneti-Nifae-Liae se folafolaga i le Atua. Sa latou fai mai o le a latou le toe faatiga lava i tagata. Ina ia faaalia lenei mea, sa latou tanumia a latou auupega. Sa latou filifili e alolofa i o latou fili nai lo le faatiga po o le fasiotia o i latou.
O sa Lamana o e sa le talitonu i le Atua na osofaia aneti-Nifae-Liae.
Sa faatuatua Aneti-Nifae-Liae afai e fasiotia i latou, o le a latou nonofo faatasi ma le Atua. Sa latou tausia la latou folafolaga i le Atua ma sa latou le tau ma sa Lamana.
Nai lo le fetauai, sa tatalo Aneti-Nifae-Liae. Ina ua vaai atu sa Lamana i lenei mea, e toatele i latou sa le toe osofai atu. Sa latou lagona le leaga o le fasiotia o tagata. Na filifili foi na sa Lamana e le toe faatiga lava i tagata. Sa latou auai faatasi ma Aneti-Nifae-Liae.
A o faagasolo pea le taimi, sa toatele tagata na osofai mai. Sa faanoanoa Amona ma ona uso i mafatiaga o Aneti-Nifae-Liae. Sa latou fai atu i le tupu e ave lona nuu e nonofo faatasi ma sa Nifae. Na fai mai le tupu o le a latou o pe afai e finagalo i ai le Alii ia i latou. Sa tatalo Amona Na fetalai mai le Alii e tatau ona latou o ma o le a Ia tausia i latou ia saogalemu.
Na tuuina atu e sa Nifae le laueleele o Aneti-Nifae-Liae e nonofo ai ma puipuia i latou. O le taui, na avatu ai e Aneti-Nifae-Liae meaai ia sa Nifae. Sa i ai i Aneti-Nifae-Liae le faatuatua tele ma le alofa i le Atua. Sa latou faamaoni i tagata uma ma tausia la latou folafolaga ia aua lava nei tau. Sa latou faamaoni i o latou olaga atoa.