“E Uiga i le Tusi a Mamona,” Tala o le Tusi a Mamona (2023)
E Uiga i le Tusi a Mamona
O Iesu Keriso ma Lona nuu i le atu Amerika
O le Tusi a Mamona o se tusitusiga paia. O loo aoao mai ai i tatou e uiga i le Alii o Iesu Keriso ma Lana asiasiga i le atu Amerika i aso ua leva. Mai le Tusi a Mamona, e mafai ona tatou aoao ai e uiga i le talalelei a Iesu. Ua aoao mai ai i tatou i le ala e maua ai le filemu i le taimi nei ma le auala e mafai ai ona tatou toe nonofo faatasi ma le Atua ma Iesu i se aso.
O le itulau autu o le Tusi a Mamona; faatomuaga i le Tusi a Mamona; 3 Nifae 11
O le Tusi a Mamona na tusia e perofeta a le Atua. Sa latou tusitusi i luga o itulau uamea e ta’ua o papatusi. O a latou tala ma molimau e fesoasoani tatou te maua ai le faatuatua ia Iesu. Sa latou tusitusi e uiga i le tele o vaega o tagata o e sa nonofo i Amerika i aso ua leva.
Itulau autu o le Tusi a Mamona; faatomuaga o le Tusi a Mamona
O le tasi vaega na o mai mai Ierusalema i le atu Amerika pe tusa ma le 600 tausaga a o le’i soifua mai Iesu. Na avea i latou ma malo e lua na ta’ua o sa Lamana ma sa Nifae.
Faatomuaga i le Tusi a Mamona; 1 Nifae 1:4
I se taimi na muamua mamao atu, sa o mai ai se isi vaega mai le Olo o Papelu i le atu Amerika. Sa ta’ua i latou o sa Iareto.
Faatomuaga i le Tusi a Mamona; Eteru 1:33–43
Na aoao atu perofeta a le Atua i tagata. Ina ua faalogo ma tausia e tagata poloaga a le Atua, sa Ia fesoasoani ia i latou. Na aoao mai perofeta e uiga ia Iesu ma faapea mai o le a soifua mai o Ia i Ierusalema. Na iloa e sa Nifae ma sa Lamana o le a asiasi atu Iesu ia i latou pe a mavae Lona maliu.
2 Nifae 1:20; 25:12–14; 26:1, 3, 9; Mosaea 3:5–11; Alema 7:9–13; Helamana 3
Na afio mai Iesu e pei lava ona fai mai ai perofeta. Ina ua mavae le maliu o Iesu ma toetu mai, sa Ia asiasi i tagata. Sa Ia tuu atu i tagata taitoatasi e tagotago i tulaga o fao i Ona aao. Sa latou iloa o Iesu o le Alo o le Atua. Sa Ia aoao atu Lana talalelei, ma sa tusia i lalo e tagata. Sa latou talanoa e uiga i le asiasiga a Iesu mo le tele o tausaga.
3 Nifae 11:7–15, 31–41; 16:4; 4 Nifae 1:1–6, 13–22
O Mamona o se perofeta sa soifua i ni nai selau tausaga ina ua mavae le asiasiga a Iesu. I le taimi o le soifuaga o Mamona, sa le toe mulimuli tagata i le Alii. Sa i ai ia Mamona tusitusiga a perofeta o e na soifua muamua atu ia te ia. Sa ia tuuina le tele o a latou tusitusiga i se seti se tasi o papatusi. O nei papatusi na avea o le Tusi a Mamona.
Faatomuaga i le Tusi a Mamona; Upu a Mamona 1:2–9; Mamona 1:2–4, 13–17
A o le’i maliu Mamona, na ia tuuina atu papatusi i lona atalii o Moronae. I le taimi o le olaga o Moronae, sa faia e tagata ni mea leaga tele. Sa latou mananao e fasiotia soo se tasi e talitonu ia Iesu. Sa manao Moronae e fesoasoani i tagata i le lumanai, o lea sa ia tusitusi atili ai i luga o papatusi ma tanumia ina ia saogalemu.
Faatomuaga i le Tusi a Mamona; Upu a Mamona 1:1–2; Mamona 8:1–4, 14–16; Moronae 1
I le tele o tausaga mulimuli ane, i le 1823, na sau ai Moronae o se agelu i le Iosefa Samita. Na ta’u atu e Moronae ia Iosefa le mea e maua ai papatusi. Faatasi ai ma le fesoasoani a le Atua, na faaliliu ai e Iosefa mea na tusia i luga o papatusi.
Faatomuaga i le Tusi a Mamona; Iosefa Samita—Talafaasolopito 1
E auina mai e le Atua le Agaga Paia e fesoasoani ia te oe ia iloa se mea ua moni. A e faitau i le Tusi a Mamona, e mafai ona e tatalo ma ole atu i le Atua pe moni. I lea lava ala e tasi, e mafai ona e iloa ai o Iesu o lou Faaola ma e alofa o Ia ia te oe.