“Ua Tuua e Liae ma Sarai Ierusalema,” Tala o le Tusi a Mamona (2023)
“Ua Tuua e Liae ma Sarai Ierusalema,” Tala o le Tusi a Mamona
Ua tuua e Liae ma Sarai Ierusalema
O le lapataiga a le Alii i se aiga
Sa nonofo Liae ma Sarai i Ierusalema ma le la fanau. Na vaai Liae i se faaaliga mai le Alii. Sa ia vaaia o le a afio mai se Faaola i le lalolagi i se aso. Sa faaali atu foi e le Alii ia te ia o le a faaumatia Ierusalema.
Sa ta’u atu e Liae i tagata e uiga i lana faaaliga vaaia. Sa ia ta’u atu ia i latou o le a afio mai Iesu Keriso i se aso e laveai le lalolagi.
Sa ta’u atu foi e Liae i tagata o le a faaumatia Ierusalema. Sa ia valaaulia i latou ia salamo.
Sa feita tagata. Sa toe fetalai atu le Alii ia Liae i se miti. Na iloa e Liae o le a le saogalemu o ia ma lona aiga i Ierusalema. Sa tatau ona latou o ese.
Sa usitai Liae ma Sarai i le Alii. Sa la tuua le aai ma lo laua aiga. E toafa atalii o Liae ma Sarai na igoa ia Lamana, Lemuelu, Sama, ma Nifae. Sa tatau ona latou tuua lo latou fale ma a latou mea mananaia.
Sa malaga le aiga i le vao i talaane o le Sami Ulaula. Sa faafetai atu Liae i le Alii mo le faamanuiaina o lona aiga. Sa ia aoaoina lona aiga e mulimuli i le Alii ma tausi Ana poloaiga.
Na muimui Lamana ma Lemuelu. Sa la misia lo latou fale ma mea uma na latou tuua. Sa la le malamalama pe aisea na poloaiina ai i latou e le Alii e o ese. La te le’i talitonu e mafai ona faaumatia se aai tele e pei o Ierusalema.
Sa manatu Lamana ma Lemuelu sa faatupu fua e Liae ana faaaliga. Ae faapefea pe afai e leiloloa lo latou aiga i le vao e faavavau?
Na manao Nifae ia iloa e ia lava e moni mea na fai mai ai Liae. Na ia tatalo ma fesili atu i le Alii.
Na auina mai e le Alii le Agaga Paia e fesoasoani ia Nifae e talitonu i upu a lona tama. Sa talitonu Nifae i le Alii ma faasoa atu mea sa ia aoaoina i ona uso. Sa faalogo Sama ia Nifae ma talitonu ia te ia, ae sa le’i faalogo Lamana ma Lemuelu.