“Alema i le Vai o Mamona,” Tala o le Tusi a Mamona (2023)
Alema i le Vai o Mamona
Avea ma tagata o le Atua
Sa avea muamua Alema ma se faitaulaga mo se tupu e igoa ia Noa. Sa taumafai Alema e laveai Apinati, o se perofeta a le Atua, mai le fasiotia e Noa. Ae sa ita Noa ia Alema ma sa manao foi e fasioti Alema. Na sola ese Alema mai ia Noa ina ia tumau ai i le saogalemu. I le aluga o le aso, na lafi ai Alema i talaane o se nofoaga e ta’ua o Vai o Mamona.
Sa talitonu Alema i mea na aoao atu e Apinati e uiga ia Iesu Keriso. Sa ia ole atu i le Atua e faamagalo o ia i ana agasala ma mea sese.
Sa feiloai faalilolilo Alema ma tagata ma aoao i latou e uiga ia Iesu. Sa ia aoaoina tagata uma o le a faalogo.
E toatele tagata na talitonu ia Alema. Sa latou o atu i le Vai o Mamona e faalogologo ia Alema o aoao atu.
Sa mananao le au talitonu e ta’ua i latou o le nuu o le Atua, fesoasoani i isi e manaomia le fesoasoani, ma ta’u atu i tagata e uiga i le Atua. O lea na valaaulia ai i latou e Alema ina ia papatisoina. O le papatisoina, o le a latou osia ai se feagaiga, po o se folafolaga, faatasi ma le Atua e auauna atu ia te Ia ma tausi Ana poloaiga. O le taui, o le a faamanuiaina i latou e le Atua i Lona Agaga.
Sa matua fiafia tagata. Sa pati o latou lima ma fai mai ua mananao e papatiso. Na papatiso i latou taitoatasi e Alema i le Vai o Mamona. Sa faatumulia i latou uma i le Agaga o le Atua ma lagonaina le alofa o le Atua mo i latou. Na avea i latou ma tagata o le Ekalesia a Keriso.
![Ua ita le Tupu o Noa ma tusi atu [lona lima]](https://assets.churchofjesuschrist.org/19/be/19be36c3685111eeaafeeeeeac1efe3883bf82c6/book_of_mormon_stories_alma_at_the_waters_of_mormon.jpeg)
Na vaai Noa o nisi o ona tagata ua tuua lona laueleele. Na ia auina atu auauna e vaavaaia i latou. Na vaai auauna i tagata o o atu i le laueleele o Mamona e faalogo i aoaoga a Alema. Sa ita tele Noa. Sa ia auina atu lana autau e fasioti Alema ma tagata na aoaoina e Alema.
Na lapataia Alema e le Atua e uiga i le autau. Faatasi ai ma le fesoasoani a le Atua, na tuua ai ma le saogalemu e Alema ma lona nuu le laueleele. Sa le mafai e le autau ona maua i latou. Sa latou savavali mo aso e valu i le vao ma o mai i se laueleele matagofie. Sa latou faia ni fale fou iina. Na aoao e Alema tagata, ma sa latou tausia la latou folafolaga i le Atua.