Iakopo 5–6

O Laau Olive

O le alofa o le Atua mo Lona nuu

O Iakopo o se perofeta a le Atua. Sa manao o ia e aoao sa Nifae e uiga i le tele o le alofa o le Atua i Lona nuu. Sa faamatala atu e Iakopo ia i latou se tala e uiga i se tovine o laau olive. Sa galulue faatasi le Alii o le togaolive ma Lana auauna e tausi le tovine.

Iakopo 5:1–4, 7; 6:4–5

Sa i ai i le Alii se laau olive faapitoa na tupu mai ai ni fua lelei. Fai mai Iakopo o lenei laau sa pei o le nuu o le Atua, po o le aiga o Isaraelu. O le fua sa pei o amio a tagata. Sa tausia lelei e le Alii lenei laau. Sa fesoasoani o Ia ia tupu e ala i le fafagaina o ona aa ma teuteu ona lala. Sa Ia tuuina atu i ai mea e tatau ona ola ai.

Iakopo 5:1–3, 5; 6:1, 7

Ina ua mavae sina taimi, sa amata ona pe Lana laau faapitoa. Sa itiiti ni lala lauusiusi. O lenei mea na faanoanoa ai le Alii. Sa manao o Ia ia tutupu mai pea ni fua lelei.

Iakopo 5:3, 6–8

Ina ia faasaoina lala lauusiusi, sa aveese e le Alii ma faapipii i isi laau. Ona Ia suia lea i lala lauusiusi mai isi laau.

Iakopo 5:7–14

Ua mavae atu se taimi umi. Sa masani ona o mai le Alii ma le auauna i le tovine. Sa la tausia le laau faapitoa a le Alii. Sa la tausia foi lala faapitoa sa salalau solo i laau i le tovine atoa. O le tele o fua na ola sa lelei. O fua lelei na faafiafiaina ai le Alii ma Lana auauna.

Iakopo 5:15–29, 31

Ina ua mavae sina taimi, sa faateleina fua o laau taitasi. Ae o lenei ua leaga uma fua. Sa faanoanoa tele le Alii. Sa le’i manao o Ia e ma’umau Lona tovine po o ona fua! Sa galue malosi o Ia e fesoasoani i Ana laau. Sa mafaufau o Ia po o le a se isi mea e mafai ona Ia faia. Sa talanoa o Ia ma le auauna ma filifili ai e taumafai pea.

Iakopo 5:29–51

Ina ia faasaoina Lona tovine, na fetalai atu ai le Alii e faapotopoto lala na Ia aveesea mai le laau faapitoa. Sa ia fai atu e toe faapipii i le laau faapitoa.

Iakopo 5:51–60

O le taimi mulimuli lenei o le a galue ai le Alii i Lona tovine. Sa Ia valaauina isi auauna e fesoasoani. Sa galulue faatasi tagata uma e faapotopoto ma faapipii ia lala.

Iakopo 5:61–72

Sa latou tausia laau uma. Sa latou aveesea lala leaga ae tuu lala lelei. Ina ua mavae sina taimi, sa toe fua mai foi fua lelei o le laau faapitoa a le Alii. Sa ola a’e foi i isi laau ni fua sa lelei e pei o le fua o le laau faapitoa. Sa fiafia le Alii. Sa faasaoina Ana laau! Sa maua uma mai ai le fua na Ia finagalo latou te maua.

Iakopo 5:73–75

Sa faafetai atu le Alii i auauna. Sa Ia ta’u atu ia i latou sa faamanuiaina i latou i le galulue malosi ma le tausia o Ana poloaiga. Sa Ia faasoa atu le fua ia i latou, ma sa latou fiafia tele ai. Mo se taimi umi lava, sa fiafia le Alii i fua.

Iakopo 5:75–77

Na faauma e Iakopo le tala i laau olive. Sa ia aoao atu i tagata e faapea, e popole le Atua mo i latou e pei lava ona tausia e le Alii o le tovine Ana laau. Sa fai atu Iakopo i tagata uma ia salamo ma faalatalata atili atu i le Atua. Sa Ia aoaoina i latou ia alolofa ma auauna atu i le Atua aua o loo aapa mai pea le Atua e fesoasoani ia i latou.

Iakopo 6:1–5, 7, 11