Eteru 1–4; 6

O Iareto ma Lona Aiga

O se malaga na taitaia e le Alii

Sa nonofo Iareto ma lona aiga i Papelu i le faitau afe o tausaga a o le’i fanau mai Iesu Keriso. Na latou usitai i le Alii. Ae o le toatele o tagata i Papelu sa le’i usiusitai i le Alii. Sa amata ona fausia e na tagata se olo e taumafai ai e oo atu i le lagi. Na suia e le Alii le gagana a tagata ina ia le mafai ona malamalama le tasi i le isi.

Kenese 11:4–9; Eteru 1:33

Sa i ai se uso o Iareto. Sa faatuatuaina e le Alii le uso o Iareto. Sa talosaga atu Iareto i lona uso e tatalo i le Alii mo se fesoasoani. I lana tatalo, sa talosaga atu ai le uso o Iareto i le Alii e aua nei suia le gagana a lona aiga ma uo. O le ala lena e mafai ai lava ona latou malamalama le tasi i le isi.

Eteru 1:33–36

Sa alofa ma agalelei le Alii. Na te lei suia le gagana a le aiga ma uo a Iareto. Mulimuli ane, na ta’u atu e le Alii i le uso o Iareto ua Ia saunia se laueleele faapitoa mo i latou. Na fetalai mai le Alii o le a Ia taitaiina i latou iina.

Eteru 1:35–42

Sa faapotopoto e Iareto ma lona uso o latou aiga ma uo. Sa latou aoina mai foi a latou manu ma ituaiga uma o fatu. Ona latou tuua lea o o latou fale ma malaga atu i le vao. Sa taialaina i latou e le Alii e ala i le talanoa atu ia i latou mai se ao.

Eteru 1:40–43; 2:1–6

Ina ua mavae se malaga umi, na latou oo atu i se sami. Sa latou nonofo i le matafaga mo le fa tausaga. Mo se taimi umi lava, sa le’i tatalo ai le uso o Iareto i le Alii.

Eteru 2:13–14

Na fetalai atu le Alii i le uso o Iareto e toe tatalo. Sa salamo le uso o Iareto ma tatalo atu i le Alii. Na faamagaloina o ia e le Alii.

Eteru 2:14–15

Na aoao e le Alii le uso o Iareto e fausia ni vaa e ta’ua o vaa. E mafai e aiga ona tietie i vaa i le isi itu o le sami e agai atu i le laueleele folafolaina.

Eteru 2:15–17

Sa fausia e le uso o Iareto ma lona aiga ia vaa. Sa ia vaaia e leai se malamalama i totonu o vaa. Sa ia ole atu i le Alii pe tatau ona latou malaga i le isi itu o le sami i le pogisa. Na fetalai atu le Alii i le uso o Iareto e mafaufau i se auala e maua ai e vaa le malamalama.

Eteru 2:16–19, 22–25

Sa faia e le uso o Iareto ni maa laiti, manino se 16. Sa ia ole atu i le Alii e pai atu ia i latou ma faia ia susulu atu. Sa faaloloa mai e le Alii lona aao ma sa pa’i atu i maa taitasi i lona tamatamaiaao. Sa mafai ona vaai le uso o Iareto i le tamatamaiaao o le Alii. Sa faateia o ia ona sa i ai se tino o le Alii e pei o ia.

Eteru 3:1–8

Sa fetalai le Alii o iai i le uso o Iareto se faatuatua maoa’e. Ona faaali mai lea o le Alii ma faaali atu Lona tino agaga i le uso o Iareto. Na fetalai mai le Alii, “O A’u o Iesu Keriso.” Sa ia fai mai ua filifilia o Ia e avea ma Faaola. Sa ia aoaoina le uso o Iareto i le tele o isi mea.

Eteru 3:9–20, 25–27

Na toe foi atu le uso o Iareto i lona aiga ma uo. Sa ia tusia i lalo mea sa ia aoaoina a o faatasi o ia ma le Alii. Sa ia tuuina foi maa i totonu o vaa. Ua latou maua nei le malamalama mo la latou malaga.

Eteru 4:1; 6:2–3

Sa o atu aiga i totonu o vaa e sopoia ai le sami. Sa latou faatuatuaina le Alii e tausia i latou. Sa tele afa ma galu. E iai taimi e ufitia atoa ai vaa i le vai. Ae sa latou tatalo, ma sa toe aumai i latou e le Alii i luga o le vai. Sa latou usuina le tele o pese faafetai i le Alii.

Eteru 6:4–10

Ina ua toeitiiti atoa le tausaga, sa latou taunuu i le laueleele lea na folafola atu e le Alii ia i latou. Sa latou fetagisi ma le olioli ma faafetai atu ia te Ia.

Eteru 6:11–12