“O Se Vaa e Sopoia ai le Sami,” Tala o le Tusi a Mamona (2023)
“O Se Vaa e Sopoia ai le Sami,” Tala o le Tusi a Mamona
O Se Vaa e Sopoia ai le Sami
Sauniuni e o i le nuu folafolaina
O Nuumau o se laueleele na tumu i fualaau aina ma le meli. O se nofoaga sili ona lelei e nofo ai. Sa nonofo le aiga o Liae ma Sarai i tafatafa o le sami ma sa latou maua mea uma sa latou manaomia.
Ina ua mavae aso e tele, sa ta’u atu e le Alii ia Nifae e alu i se mauga e tatalo ai. O iina, na ta’u atu ai e le Alii ia te ia e fau se vaa e ave ai lona aiga e sopoia le sami.
Sa faaali atu e le Alii ia Nifae le ala e fausia ai le vaa. Ae sa le’i iloa e Nifae po o fea e maua ai le uamea e fai ai ni meafaigaluega. Sa faaali atu e le Alii ia Nifae le mea e sue i ai uamea.
Mulimuli ane, sa faia e Nifae se afi e fai ai meafaigaluega. Sa vaavaai atu Lamana ma Lemuelu i lo la uso o Nifae. La te le’i mananao e fesoasoani ia te ia e fau le vaa. Sa la manatu o se manatu leaga le taumafai e sopoia le sami.
Sa le’i talitonu Lamana ma Lemuelu e faapea na ta’u atu e le Alii ia Nifae e fau se vaa. Na fesili atu Nifae ia i la’ua pe aisea na leai ai lava so la faatuatua i le Alii. Sa ia faamanatu atu i ona uso sa la vaai i se agelu ma iloa le mana o le Alii. Sa oo ina matua feita Lamana ma Lemuelu ma sa la mananao e fasioti Nifae.
Ae sa faatumulia Nifae i le mana o le Atua. Ua lapatai e Nifae Lamana ma Lemuelu e aua nei pa’i atu ia te ia. Sa la fefefe ma sa le’i lototetele e pa’i atu ia Nifae mo aso e tele. Ona ta’u atu lea e le Alii ia Nifae e aapa atu lona lima i ona uso. Ina ua aapa atu Nifae ia i la’ua, sa la lagonaina le gatete i le mana o le Alii.
Sa tapuai Lamana ma Lemuelu i le Alii ma fesoasoani e fau le vaa. Sa tatalo Nifae i le Alii i le tele o taimi mo se fesoasoani. O le vaa na fausia e le aiga o Nifae sa matagofie. Ina ua mavae aso e tele, sa mae’a le vaa, ma sa latou vaaia ua lelei. Na iloa e le aiga o Nifae na fesoasoani le Alii ia i latou.