“Faailoga o le Fanau Mai o Iesu,” Tala o le Tusi a Mamona (2023)
Faailoga o le Fanau Mai o Iesu
Faatuatua i aoaoga a se perofeta
Pe tusa ma le lima tausaga talu ona aoao atu Samuelu le perofeta e uiga i faailoga o le fanau mai o Iesu Keriso. E toatele tagata sa talitonu ma vaavaai mo faailoga. Sa fai mai isi tagata ua sese Samuelu ma ua pasi le taimi mo faailoga. Sa latou tauemu i e talitonu ma fai mai o le a le afio mai Iesu.
Helamana 14:2–7; 3 Nifae 1:4–6
Sa popole le au talitonu, ae sa i ai lo latou faatuatua. Sa latou vaavaai pea mo faailoga. O se tasi o faailoga o se po o le a le pogisa ai. O le a malamalama e pei o le ao e oo lava i le mavae ai o le goto ifo o le la. O le po e aunoa ma le pogisa o le a avea ma faailoga o le a fanau mai Iesu i le aso e sosoo ai i se isi laueleele.
Helamana 14:2–4; 3 Nifae 1:7–8
![ua fefefe le aiga a o feei atu i ai [tagata]](https://assets.churchofjesuschrist.org/d2/14/d214b9519f8e11ee83e9eeeeac1e43b97bd56fbb/book_of_mormon_stories_signs_of_jesus_birth.jpeg)
O tagata o e sa le talitonu na faia se fuafuaga. Sa latou filifilia se aso ma fai mai afai e le tupu le faailoga i lena aso, o le a fasiotia tagata talitonu.
O se tagata e igoa ia Nifae o se perofeta i le taimi lea. Sa faanoanoa tele o ia ona sa mananao nisi tagata e fasiotia e na talitonu.
Sa punou Nifae i lalo i le eleele ma tatalo i le Atua mo tagata talitonu o e o le a maliliu ona o lo latou faatuatua. Sa tatalo o ia i le aso atoa.
I le tali mai i lana tatalo, na faalogo ai Nifae i le siufofoga o Iesu. Na fetalai mai Iesu o le a tupu le faailoga i lena po ona fanau mai ai lea o Ia i le aso e sosoo ai.
O lena po sa leai se pogisa e ui lava ina goto ifo le la. O tagata o e sa lei talitonu i upu a Samuelu sa matua faateia lava na latou pauu ai i le eleele. Sa latou fefefe ona sa latou le talitonu. O tagata na talitonu sa lei fasiotia.
O le aso na sosoo ai, na toe oso a’e ai le la ma sa tumau pea le malamalama o le lagi. Na iloa e tagata uma o le aso lenei o le a fanau mai ai Iesu.
Sa vaaia e tagata se isi faailoga. Na faaali mai se fetu fou i le lagi. O faailoga uma na tautala i ai Samuelu na moni. E toatele isi tagata sa talitonu ia Iesu ma sa papatisoina.