“Alema, Amoleka, ma Seseroma,” Tala o le Tusi a Mamona (2023)
Alema, Amoleka, ma Seseroma
Filifili e talitonu ma usitai i le Atua
Na vaai Alema e toatele tagata o le Ekalesia sa le’i usiusitai i poloaiga a le Atua. O lea na alu atu ai Alema mai lea aai i lea aai ma aoao atu le afioga a le Atua. E toatele tagata na salamo. Ona oo atu lea o Alema i se aai e igoa o Amonaea. Sa le’i faalogo tagata iina ia te ia. Sa latou tuufeanu ia te ia ma tuli ese o ia mai le aai.
Sa lagona e Alema le faanoanoa a o ia tuua le aai. Sa popole o ia mo tagata. Ona oo mai lea o se agelu ia te ia. Na fai mai le agelu e mafai ona fiafia Alema ona sa ia usitai i le Atua. Na ta’u atu e le agelu ia Alema e toe foi i le aai ma lapatai tagata. Afai latou te le salamo, o le a faaumatia i latou. Sa vave ona toe foi Alema.
Ina ua oo Alema i le aai, sa matuai fiaai lava o ia. Sa anapogi o ia mo le tele o aso. Sa fesili atu Alema i se tamaloa e igoa ia Amoleka mo se meaai.
Sa ta’u atu e Amoleka ia Alema e uiga i se faaaliga na ia vaaia. I le faaaliga, sa ta’u atu e se agelu ia Amoleka o Alema o se perofeta a le Atua. Sa manao Amoleka e fesoasoani ia Alema.
Sa ave e Amoleka Alema i le fale ma avatu ia te ia ni meaai e ai. Sa nofo Alema i le fale o Amoleka mo le tele o aso. Sa faamanuia e le Atua Amoleka ma lona aiga. Mulimuli ane, sa ta’u atu e le Atua ia Alema ma Amoleka e ta’u atu i tagata o le aai ia salamo. Sa usitai Alema ma Amoleka. Na tuuina atu e le Atua ia i la’ua Lona mana e fesoasoani ia i la’ua e aoao atu.
O se tasi o tagata na faalogo ia i la’ua o aoao atu sa igoa ia Seseroma. Sa atamai tele o ia ma sa manao e faasee Alema ma Amoleka. Sa ta’u atu e Seseroma ia Amoleka o le a ia tuuina atu ia te ia le tele o tupe pe afai e fai mai o ia e le moni le Atua. Sa manao o ia ia pepelo Amoleka ina ia le talitonu tagata i mea na aoao atu e Amoleka ma Alema.
Alema 10:29–32; 11:21–25; 12:4–6
Ae o le a le pepelo Amoleka e uiga i le Atua. Sa ia fai atu e moni le Atua. Na iloa e Amoleka ma Alema mafaufauga o Seseroma. Sa ofo Seseroma ma fai atu ia i laua le tele o fesili. Sa laua aoaoina Seseroma o loo i ai se fuafuaga a le Atua mo tagata uma. Sa talitonu Seseroma i mea na aoao atu e Alema ma Amoleka e uiga i le Atua ma Iesu Keriso.
Alema 11:23–46; 12:1–18, 24–34; 14:6–7; 15:6–7
Sa faanoanoa tele Seseroma ona o mea leaga sa ia faia. Na oo ina ma’i o ia. Sa asiasi atu Alema ma Amoleka ia te ia. Na fai atu Alema e mafai ona faamaloloina Seseroma ona o le faatuatua o Seseroma ia Iesu. Sa ole atu Alema i le Atua e faamalolo o ia. Sa tu a’e Seseroma i ona vae. Na faamaloloina o ia! Sa papatisoina o ia ma aoaoina tagata i aso na totoe o lona ola.