“O Le Laau o le Ola,” Tala o le Tusi a Mamona (2023)
“O Le Laau o le Ola,” Tala o le Tusi a Mamona
O Le Laau o le Ola
O le miti musuia a Liae
I se tasi po, sa fai ai se miti a Liae mai le Alii. Sa ia ta‘u atu i lona aiga e uiga i le miti.
I lana miti, na vaai ai Liae i se tamaloa sa ofu i se ofu talaloa paepae. Sa ta’u atu e le tamaloa ia Liae e mulimuli atu ia te ia.
Na vaai Liae o loo i ai o ia i se nofoaga pogisa ma gaogao. Sa savali o ia mo le tele o itula. Ae sa lei alu ese le pogisa. Mulimuli lava, sa tatalo Liae mo se fesoasoani.
Ina ua uma ona tatalo Liae, sa ia vaaia se fanua tele. I lena fanua sa i ai se laau ma ni fua papae. Sa manatu Liae o le a faafiafiaina o ia e le fua, o lea sa ia ai ai. Na faatumulia lona loto i le olioli.
E sili atu le tofo o le fua nai lo se isi lava fua. Sa suamalie ma manaia. Ua manao Liae e faasoa atu i lona aiga. Sa ia iloa o le a latou fiafia ai foi. Na vaai Liae ia Sarai, Sama, ma Nifae o tutu i tafatafa o se vaitafe. Sa foliga le mautonu i latou. Sa valaau atu Liae ia i latou i se leo tele. Sa ia fai atu ia i latou e o mai ma aai i le fua.
Na o mai Sarai, Sama, ma Nifae i le laau ma aai i le fua. Sa vaavaai Liae mo Lamana ma Lemuelu. Sa manao o ia ia la olioli foi i le fua. Ae la te le’i o mai e aai i le fua.
Ona vaai lea o Liae i se auala ma se ai u’amea lea na tau atu i le laau. Sa ia vaaia le toatele o tagata o savavali i luga o le ala. Na faafuasei lava, ona oo mai se pogisa mafiafia. O le pogisa na faigata ai ona vaai. Na pau lava le auala e alu ai i le laau o le pipiimau lea i le ai uamea.
O nisi tagata na tuua le ala ma ua leiloloa. O isi sa taofi mau i le ai uamea ma agai i luma.
Ina ua latou taunuu i le laau, sa latou aai i le fua.
Sa tepa a’e Liae i luga ma vaaia ai se fale tele na faatumulia i le toatele o tagata. Sa latou taufaalili i tagata o e na aai i le fua. O nisi sa aai i le fua sa lagona le faanoanoa ina ua taliē atu isi ia i latou, o lea na latou tuua ai le laau. Sa latou fesēa’i ma leiloloa ai.
I lana miti, na vaai ai Liae i nisi tagata o e sa pipiimau i le ai uamea. Sa latou agai i luma i lea laa ma lea laa seia oo ina latou o mai i le laau. Ona latou tootutuli lea i le laau ma aai i le fua. Latou te le’i faalogo i tagata i totonu o le fale. Sa latou filifili e nonofo i le laau.
Ina ua ala a’e Liae, sa popole o ia ia Lamana ma Lemuelu. La te le’i aai i le fua i lana miti. Sa alofa Liae ia Lamana ma Lemuelu. Sa faamoemoe o ia o le a la latalata pea i le Alii. Sa ia valaaulia i la’ua e tausi poloaiga a le Atua.