Alema 53; 56–57

O Se Autau Talavou

O atalii o e na faalagolago i le Atua

Sa tau sa Nifae ma sa Lamana ma sa manaomia le fesoasoani. Sa mananao Aneti-Nifae-Liae e fesoasoani. Ae sa latou faia se folafolaga i le Alii e aua nei tau. E lua afe o o latou atalii laiti e lei faia lena folafolaga. Nai lo lena, na folafola atu atalii e tau e puipui o latou aiga. O nei atalii sa ta’ua o fitafita talavou.

Alema 53:8, 13–18, 22; 56:1–8

Sa filifili e fitafita talavou le perofeta o Helamana e taitaia i latou. O i latou o se vaega toalaiti e faatusatusa i le autau tele a sa Lamana. Ae sa iloa e Helamana o fitafita talavou sa faamaoni, lototoa, ma faatuatua. Faatasi ai ma Helamana na taitaia i latou, sa latou o atu ai e fesoasoani ia sa Nifae.

Alema 53:19–22; 56:9–10, 17, 19

Sa lelavavā fitafita sa Nifae. Ae ina ua o mai fitafita talavou, sa fiafia sa Nifae. Sa tuuina atu e le autau talavou ia i latou le faamoemoe ma le malosi. Sa latou saunia faatasi e tau ma sa Lamana. Sa fesoasoani foi matua o fitafita talavou e ala i le aumaia o meaai ma sapalai ia i latou.

Alema 56:16–17, 19–20, 22, 27

Sa pueina e sa Lamana le tele o aai ma tausia a latou autau i totonu o i latou. Sa mananao taitai sa Nifae e o ese sa Lamana mai se tasi o aai. Sa latou faia se fuafuaga ma fesili atu i fitafita talavou mo se fesoasoani.

Alema 56:18–30

Na faafoliga fitafita talavou o loo aveina atu meaai i sa Nifae o loo nonofo i se aai lata ane. Ina ua vaai atu sa Lamana i le vaega toalaiti, sa latou tuua lo latou aai ma tuliloa atu i fitafita talavou. Sa manatu sa Lamana o le a faigofie ona pueina i latou.

Alema 56:30–36

Sa sosola ese fitafita talavou mai sa Lamana. Ona amata lea ona tuli e se autau a sa Nifae ia sa Lamana. Sa mananao sa Lamana e pue fitafita talavou a o lei taunuu atu sa Nifae ia i latou. Na vaai sa Nifae i fitafita talavou sa i ai se faafitauli ma sa vave ona savavali atu e fesoasoani ia i latou.

Alema 56:36–41

Ina ua mavae sina taimi, sa le mafai e fitafita talavou ona iloa atu sa Lamana. Sa amata ona latou taumanatunatu pe na taunuu sa Nifae i sa Lamana ma o loo tau.

Alema 56:42–43

Sa popole Helamana. Sa ia manatu atonu o loo taumafai sa Lamana e maileia i latou. Sa ia fesili atu i ana fitafita talavou pe latou te o e tau ma sa Lamana.

Alema 56:43–44

Sa manatua e fitafita talavou mea na aoaoina ai i latou e o latou tina. Sa aoaoina i latou e o latou tina ia faalagolago i le Atua ma aua le masalosalo, aua o le a Ia tausia i latou ia saogalemu. Sa talitonu nei atalii i le Atua ma sa mananao e tausia la latou folafolaga e puipui o latou aiga. Sa latou ta’u atu ia Helamana ua latou sauni e o e tau.

Alema 56:46–48

Sa maofa Helamana i lo latou lototele. Sa ia toe taitai atu i latou e tau ma sa Lamana.

Alema 56:45, 49

Sa vaaia e fitafita talavou sa tau sa Lamana ma sa Nifae. Sa lelavava sa Nifae. Na toetoe a latou faiaina ae o mai loa fitafita talavou.

Alema 56:49–52

Sa tau fitafita talavou ma le malosi o le Atua. Sa fefefe sa Lamana ia i latou ma taofia ai le tau. Sa fesoasoani fitafita talavou e manumalo i le taua!

Alema 56:52–54, 56

I le taua, e toatele sa Nifae ma sa Lamana na maliliu. Sa popole Helamana nei maliliu foi nisi o ana fitafita talavou. Ae ina ua uma le taua, sa faitauina e Helamana tagata uma. Sa fiafia tele o ia e vaai e leai se tasi o fitafita talavou na fasiotia. Sa puipuia i latou e le Atua.

Alema 56:55–56

Na toatele atu atalii na auai faatasi ma fitafita talavou. Sa latou fesoasoani pea ia sa Nifae e tau. I isi taua, na tiga uma ai fitafita talavou, ae leai se tasi o i latou na maliu. Sa latou manatua mea na aoaoina ai i latou e o latou tina. Sa latou faalagolago i le Atua, ma sa Ia puipuia i latou.

Alema 57:6, 19–27; 58:39–40