Marama, mai vei Jen Tolman, sega ni rawa ni lavetaki

Julai 29–Okosita 4: “Rai Yani Vua na Kalou mo Bula Kina”

Alama 36–38

Ni raica o Alama na itovo vakasisila e wavoliti koya, esa bikai ena “yaluma,” kei na “rarawa levu ni yalo” (Alama 8:14). “Na caka ca ena kedra maliwa na tamata oqo,” a kaya baleti ira na Soramaiti, “sa vakamosia na yaloqu” (Alama 31:30). A vakila o koya e dua na ka vata oqo ni sa lesu mai na kaulotu vei ira na Soramaiti—a raica na yalodra e vuqa na Nifaiti sa “tekivu kaukauwa mai, ka sa tekivu me ra cudruvaka ni sa tukuni vakadodonu vei ira na vosa”, ka vakavuna me “rarawa vakalevu sara” kina na lomana (Alama 35:15). Na cava e cakava o Alama me baleta na ka a raica ka vakila? E sega ni vakayalolailaitaki se vakadonui koya tu me baleta na ituvaki ni vuravura. Ia, “sa vakarota me ra vakasoqoni vata mai na luvena tagane” ka vakatavulici ira ena “ka sa dodonu” (Alama 35:16). A vakavulica vei ira ni “sa sega ni rawa me dua tale na sala me rawa kina na veivakabulai, ena vukui Karisito duadua ga. … Raica, sai koya na vosa ni dina kei na yalododonu” (Alama 38:9).

Vakasama eso ni Veivakatavulici ena iTikotiko kei na Lotu

Alama 36; 38:5–6

Au rawa ni sucu va-Kalou.

E vica vei keda na sotava na veika mareqeti me vaka na saumaki i Alama. Ia na tamata kece me na “sucu va-Kalou,” dina ga ni dau yaco vakamalua (Alama 36:23; 38:6). Nio wilika na Alama 36, vakasamataka na ibalebale ni sucu va-Kalou. Me vakataka, ena ivakarau ni sucu tu va-Kalou, cava na nomu nanuma baleta na ivalavala ca? baleti Jisu Karisito? E rawa vakacava na ka o cakava na sucu tu va-Kalou ena sausaumi ni nomu cala vakai iko? Na veisau cava tale eso e yaco ki na nomu vakabauta kei na cakacaka? Vakasamataka vagumatua na sala o sa sotava tiko kina na veisau oqo.

Raica talega na Mosaia 5:7; 27:25–26; Alama 5:14; 22:15; Ilamani 3:35; “Alma the Younger Is Converted unto the Lord” (vidio), Valenivola ni Kosipeli.

Alama 36:12–24; 38:8–9

Sa sosomitaka o Jisu Karisito na rarawa ena reki.

Eso na gauna sa rere na tamata me ra veivutuni baleta ni ra raica na veivutuni me itotogi mosimosi ni ivalavala ca. Na cava o nanuma ena kaya o Alama ena ka oya? Me kilai, rawa nio veidutaitaka na ituvaki ni bula i Alama ni se bera ni veivutuni (raica na Alama 36:6–17) ki na nona vakamacala baleti koya ni sa veivutuni oti (raica na tikina e 18–27). Ena Alama 36:17–18, a ciqoma vakacava o Alama na veivosoti oqo?

Raici Matthew S. Holland talega, “Na iSolisoli Vakasakiti ni Luvena,” Liaona, Nove. 2020, 45–47.

Alama 37

Era sa maroroi tu na ivolanikalou “ena dua na inaki vuku.”

Vakasamataka na cakamana kei na veivakalougatataki ni kena tiko nikua na ivolanikalou! Nio wilika na Alama 37, vakaraica na veivakalougatataki era basika ena kena tiko na ivolanikalou (raica, me ivakaraitaki, tikina e 7–10, 18–19, 44–45).

Ena Alama 37: 38 – 47, sa vakatauvatana kina o Alama “na vosa i Karisito” ki na Liaona. Nio vakasamataka na ivakatautauvata oqo, taleva na sala eso o sa sotava kina na cakamana kei na kaukauwa ni ivakavuvuli i Karisito “ena veisiga yadua” (Alama 37: 40).

Raici D. Todd Christofferson talega, “Na Veivakalougatataki ni iVolanikalou,” Liaona, Me 2010, 32–35; “Niu Qara na iVolatabu,” Sere ni Lotu, naba 169; “Alma Testifies to His Son Helaman” (vidio), Valenivola ni Kosipeli.

Sa vakatavulici keda na ivolanikalou ena ivakarau ni muria na Kalou.

Alama 37:1–14

“Ena dau rawa na veika lelevu mai na veika lalai ka rawarawa.”

Eda rawa ni vakila ena so na gauna ni sa rui levu ka drakidrakita na noda leqa ka na levu ka drakidrakita talega na kena iwali. Ia oya e sega ni sala tu ni Turaga. Nio wilika na Alama 37:1–14, vakasamataka na ka e vakauqeti iko ena ivakarau e cakava kina o Koya na Nona cakacaka. Qai vakasamataka ka vola tu na sala eso o sa raica kina na ivakavuvuli oqo ena nomu bula.

Kevaka o na vakavulica tu na ivakavuvuli oqo kivua e dua, na ivakaraitaki cava so ni veika bula se bula ni veisiga o na vakayagataka mo vakatakila kina? O rawa ni raica eso ena itukutuku i Peresitedi Dallin H. Oaks “Veika Lalai ka Rawarawa,” (Liaona, Me 2018, 89–92).

Na cava eso na ka lalai ka rawarawa e kauti iko vakavoleka vua na Tamada Vakalomalagi kei Jisu Karisito?

Vakavuqa, na kena vakavu duidui vakalevu ki na noda bula na digidigi “lalai ka rawarawa”. Navuca ni digitaka e dua na ulutaga mai Me iSakisaki ni iTabagone: Ai Dusidusi ni Caka Digidigi ka tarogi iko ena taro eso vakaoqo: Ena rawai au vakacava kei ira na tamata wavoliti au tu na noqu digidigi ena ka oqo? Na veisau lalai ka rawarawa cava au rawa ni cakava ena muataki tu ki na vakacegu kei na marau levu sara?

Raici Michael A. Dunn talega, “E Dua na Pasede Vinaka Cake,” Liaona, Nove. 2021, 106–8; Ulutaga ni Kosipeli “Digidigi,” Valenivola ni Kosipeli.

Vakayagataka na veika lalai ka rawarawa. Me vaka e vuqa tale na ka ni bula, sa rawa ni vakayacori na vakatavulici kei na vulici ni kosipeli mai na veika lalai ka rawarawa. Me ivakaraitaki, e rawa vakacava ni vakayagataki vakalailai na masima se isi me vakatavulica na kaukauwa ni veika lalai ka rawarawa? (raica na Maciu 5:13; 13:33).

Alama 37:35–37

“Veivosaki kei na Turaga.”

Ena Alama 37:35–37, vakaraica na veisureti i Alama kivua na luvena o Ilamani. O cei vei ira na veisureti oqo o sa vakauqeti tu mo cakacakataka? Me ivakaraitaki, o na vakasamataka beka na ibalebale ni “veivosaki kei na Turaga” (tikina e 37). O sa saga vakacava mo cakava oqo? E sa dusimaki iko vakacava o Koya mo vinaka?

Alama 38

Na wasei ni noqu ivakadinadina i Jisu Karisito sa rawa ni vakaukauwataki ira na tamata au lomana.

Na vosa i Alama vei Sipiloni na luvena sa ivakaraitaki vinaka ni sala meda vakauqeti ira kina na tamata eda lomana ena bulataki ni kosipeli. Na vulici ni Alama 38 sa rawa ni soli vakasama vei iko ena vukei ni lewe ni matavuvale kei na itokani mera rawa kaukauwa tu vei Jisu Karisito. Vola na ka o raica.

Me baleta na vakasama tale eso, raica na ilavelave ni vula oqo ni Liaona kei na mekasini Me iSakisaki ni iTabagone .

Vakasama eso ena Vakatavulici ni Gonelalai

Alama 36:6–24

Sa vakavu reki vei au na veivutuni vei Jisu Karisito.

• Me vukei ira na luvemu ni kila vakamatata ni sa vakavu reki na veivutuni, sa rawa nio solia vei ira e dua na tiki ni pepa ka me mata mamarau e dua na yasana ka mata rarawa na yasana kadua. Kerea me ra vakarorogo nio wilika se vakalekalekataka na Alama 36:13, 17–20 ka taura cake e dua na mata me vakaraitaka na veika a vakila tu o Alama. E rawa ni ra vola na gone qase cake na vosa se malanivosa eso e vakamacalataka na veika a vakila. Na cava a vakararawataki Alama, kei na cava a vakavu reki vua? O rawa ni qai tukuna vei ira na reki o vakila nio veivutuni.

Alama 37:6–7

“Ena dau rawa na veika lelevu mai na veika lalai ka rawarawa.”

• Sa rawa ni ra marautaka na luvemu na raici ni yaya lalai eso e vakavuna tu na veika lelevu. Sa rawa ni ivakaraitaki na iyaya eso vaka na batiri, ki ni motoka, se dua mada ga na vakatatalo e vakacegui ira. Ni rawa ni qai wilika vata na Alama 37:6–7 ka vakasamataka eso na ka lalai se rawarawa e vinakata na Kalou meda cakava. Na ka levu cava so e rawa ni yaco ni da talairawarawa tu kina vunau lalai se rawarawa oqo?

• Rawa ni ra tovolea talega na luvemuni e dua na ka vakaoqo: tekivu vakatawana e dua na bilo wai, me turu vakayadua. E semati vakacava oqo kina Alama 37:6–7? O rawa ni qai veivosakitaka na sala era sa vakataka kina na turu ni wai ena bilo na “veika lalai ka rawarawa” ni Turaga, vaka na wiliki ni volanikalou ena veisiga.

• Vukea na luvemu me ra vakasamataka na sala eso era sa vakavure ka lelevu kina e vale, koronivuli, se valenilotu. Na sere “‘Give,’ Said the Little Stream” (Children’s Songbook, 236) e vakamacalataka talega na ivakavuvuli oqo.

Alama 37:38–47

Sa rawa ni vukei au ena veisiga na ivolanikalou.

• O na vukei ira vakacava na luvemu mera taleitaka tu na vosa ni Kalou, me vakataki Alama kivei Ilamani? Navuca ni vakaraitaka vei ira na yaloyalo ni Liaona (vaka na iVola ni Yaloyalo va-Kosipeli, na. 68) se sureti ira mera droinitaka e dua ni ra wasea na ka era kila tu kina (raica na Alama 37:38–47; 1 Nifai 16:10, 28–29). Era sa tautauvata vakacava kei na Liaona na ivolanikalou?

Me baleta na vakasama tale eso, raica na ilavelave ni vula oqo ni mekasini Friend .

Basika tu na Agilosi vei Alama kei Iratou na Luvei Mosaia, mai vei Clark Kelley Price