Sa Tucaketale ko Koya,, mai vei Del Parson

Okosita 5–11: “Na Yavu Levu ni Bula Marau”

Alama 39–42

Ni cakava e dua na cala bibi e dua eda lomana, e rawa ni dredre me kilai na sala ni sausaumi. Dua na vuna e yaga sara kina na Alama 39–42 oya ni vakatakila na sala a tutaka kina o Alama—na tisaipeli i Karisito ka tiko taumada na nona caka cala levu me veivutunitaka—na ituvaki vakaoya. Na luvei Alama o Korianitoni a vakacalai ena veiyacovi, kei Alama, ena nona vulica tu ena buturara ni kaulotu, a vakararavi kina kaukauwa ni vakavuvuli dina me solia vua na luvena na raiyawa tawamudu ka vakauqeta na veivutuni (raica na Alama 4:19; 31:5). Ena veiwase oqo, eda raica na yalodoudou i Alama ni vakacala na valavala ca kei na nona loloma cecekia vei Korianitoni. Ka itinitini, eda vakila na yalodei i Alama ni “na lako vakaidina mai [na iVakabula] me bokoca na ivalavala ca ni vuravura [ka] tukuna na itukutuku rekitaki ni veivakabulai vei ira na nona tamata” (Alama 39:15. Na veivutuni vakaidina i Korianitoni kei na nona lesu tale ki na cakacaka vakalotu (raica na Alama 49:30) sa rawa ni solia vei keda na inuinui ni veivosoti kei na veivueti ni da lomaleqataka tu na noda valavala ca se na valavala ca i koya eda lomana (raica na Alama 42: 29).

Raica talega na “Alma Counsels His Sons” (vidio), Valenivola ni Kosipeli.

Vakasama eso ni Vuli ena iTikotiko kei na Lotu

Alama 39

Au rawa ni levea na caka cala ni veiyacovi.

Na ivakasala i Alama kina luvena o Korianitoni ena Alama 39 sa vakarautaka na madigi levu ni kena vulici na revurevu rerevaki ni caka cala ni veiyacovi, oka kina na yaloyalo vakasisila. De bibi cake, e rawa talega ni vukei iko ni kila vakamatata na dolei ni veivosoti kei na veivakabulai ni iVakabula kivei ira na tamata ka veivutuni. Na taro kei na itaviqaravi eso oqo e rawa ni veivuke:

• Na cala cava so a muataki Korianitoni me voroka na lawa ni tiko savasava? (raica na Alama 39:2–4, 8–9). Na cava so na isau ni ka a vakayacora? (raica na tikina e 5–13). Na vakadinadina cava e tiko vei keda ni sa veivutuni o Korianitoni? (raica na Alama 42:31; 49:30; 48:18). Na cava eda sa vulica baleta na iVakabula mai na ka e sotavi oqo?

• Wilika na tabana 19–20 ni Me iSakisaki ni iTabagone: Ai Dusidusi ni Caka Digidigii. Qai vola na nomu vakamacala vakai iko se cava na yaloyalo vakasisila, na vuna e rerevaki kina, kei na ka o na cakava nio sotava. (Raica talega na Maciu 5:27–28 kei na Vunau kei na Veiyalayalati 63:16.)

• O na vakamacalataka vakacava kina dua na itokani na vuna o digitaka kina mo levea na yaloyalo vakasisila ka bulataka na lawa ni tiko savasava? Na veivakararamataki cava o rawa ni wasea mai na “Sa Ka Tabu na Yagomu” ena Me iSakisaki ni iTabagone (tabana 22–29)?

• Navuca na saravi ni vidio “To Look Upon” (Gospel Library). Tarova na vidio ena gauna ga e a rawa ni caka digidigi duidui kina o Tevita. Era sa tautauvata vakacava na digidigi i Tevita kina digidigi o rawa ni sotava?

Cegu mo tugana. Ni saravi tiko e dua na vidio, se o veivakavulici se vuli tiko vakai iko, tarova vagauna na vidio mo taroga, “Na cava au sa vulica tiko?” Oqo e rawa ni sureta na veivakararamataki mai vua na Yalo Tabu.

Raici Bradley R. Wilcox talega, “Na Bula Kilikili sa Sega ni Cala, Liaona, Nove. 2021, 61–67; “iYaloyalo Vakasisila” ena “Bula Veivuke” ikumuni ni Valenivola ni Kosipeli.

Alama 40–41

Na cava ena yaco niu sa mate oti?

A tiko vei Korianitoni eso na taro me baleta na ka e yaco ni oti na mate. Na nona kauwai a muataki Alama me vakavulica na ivakavuvuli era kune ena Alama 40–41. Nio vulica, cakava e dua na lisi ni dina eso o raica ena veika vaka na vuravura ni yalo, tucake tale, kei na veilewai. Navuca ni wilika na veiwase oqo mai na raiyawa ni dua na tamata ka, vakataki Korianitoni, gadreva tu me veivutuni—ni sa dina taucoko oqo vei keda kece.

Alama 40

Au rawa ni vaqara na isau ni noqu vakatataro ena vakabauti Jisu Karisito.

Eso na gauna eda na nanuma ni ra sa kila na isau ni taro kecega ni kosipeli na parofita. Ia siqema na taro tawasaumi era tiko vei Alama ena wase 40. Na cava a cakava o koya me raica kina na isaunitaro? Na cava e cakava o koya ni sega vua na isaunitaro? E rawa ni vukei iko vakacava na ivakaraitaki i Alama?

Na masu sa dua na sala eda rawa ni kune isaunitaro ni kosipeli kina.

Alama 42

Na Veisorovaki i Jisu Karisito sa rawa kina na veivueti.

A vakabauta o Korianitoni ni sa sega ni dodonu na itotogi ni ivalavala ca (raica na Alama 42:1). Ena Alama 42, a tutaka vakacava o Alama na nona kauwai? O rawa ni tuvalaka na malanivosa eso ena wase oqo ena rua na wasewase: “Sa lewa dodonu na Kalou” kei na “Sa yalololoma na Kalou.” E vakavuna vakacava na Veisorovaki ni iVakabula me rawa kina na lewa dodonu kei na yalololoma? Vakaraica na ikuri ni veivakararamataki eso ena vidio “The Mediator” (Gospel Library).

Raica talega na Serenilotu “Dokai na Vuku kei na Loloma,” Serenilotu, naba 101.

Me baleta na vakasama tale eso, raica na ilavelave ni vula oqo ni Liaona kei na mekasini Me iSakisaki ni iTabagone .

Vakasama eso ni Nodra Vakatavulici na Gone

Alama 39:1, 10–11

Na noqu ivakaraitaki vinaka sa rawa ni muataki ira na tani vei Karisito.

• Na vakasala i Alama vei Korianitoni sa rawa ni vukei ira na luvemu ni kila vakamatata na bibi ni vakaraitaki vinaka tu. Navuca ni wilika vata na Alma 39:1. E a ivakaraitaki vinaka vakacava tu o Sipiloni na taci Korianitoni? Kerea na gone me ra raica na ikuri ni saunitaro ki na taro oqo ena Alama 38:2–4.

• O rawa talega ni vakayacora e dua na qito mo na veivukevuke kina kei ira na luvemu ni veimuri se veivakatotomuri vakai kemuni. Vakayagataka na qito oqo me vakaraitaka na sala e rawa ni vukea kina na tani mera caka digidigi vinaka na noda ivalavala. Lagata vata na “I Am like a Star” (Children’s Songbook, 163), ka vukei ira na luvemu ni vakasamataka na sala eso era rawa ni vakaraitaki vinaka kina.

• Ena dua na cina livaliva se yaloyalo ni matanisiga, sa rawa ni o vakatauvatana na rarama ki na kaukauwa ni vakaraitaki vinaka. Rawa talega ni o raica kei ira na luvemu na yaloyalo kei Jisu ni caka vinaka tiko ka veivosakitaka na ivakaraitaki sa biuta tu vei keda. Na vidio “Shine Your Light So Others May See” kei na “Lessons I Learned as a Boy” sa rawa ni vukei ira na luvemu ni veivosakitaka na sala e rawa ni muataki ira kina na tamata vei Karisito na nodra ivakaraitaki.

Alama 39:9–13

Ena vuku i Jisu Karisito, sa rawa niu veivutuni niu caka cala tu.

• Ena kena sega ni vakamatailalaitaki tu na ituvaki ni nona ivalavala ca, vakamacalataka ni a digidigi cala o Korianitoni. Na cava eda rawa ni kaya me vukei koya? Navuca ni wilika na Alma 39:9 vei ira na luvemu, ka vukei ira ni kila vakamatata na ibalebale ni veivutuni kei na vakanadakuya . Vakadinadinataka ni sa rawa na veivutuni ena vuku i Jisu Karisito kei na Nona Veisorovaki.

• Oqo e dua na lesoni vakaraitaki me vakaraitaka na marautaki ni veivutuni: Solia ki na dua na gone e dua na ka bibi me taura ni o talanoataka e dua ka caka cala ka lomabibi tu. Tukuna vei ira na luvemu ni ka bibi oya e sa vakataka na lomabibi e rawa ni tiko vei keda ni da caka cala tu. Taura na ka bibi mai vua na gone ni o vakadinadinataka ni sa rawa ni kauta tani na Tamada Vakalomalagi kei Jisu Karisito na vakanananu ca, bibi ka vukei keda vakavinaka tu ni da veivutuni.

Alama 40:6–7, 11–14, 21–23

Ni oti noda mate, sa gole na yaloda ki na vuravura ni yalo me yacova na Tucaketale kei na Veilewai.

• Sa matau tu me vakasamataki na ka e yaco vei keda ni oti noda mate. Na cava o rawa ni cakava me vukei ira na luvemu ni raica na isaunitaro veivakauqeti eso? O rawa ni vola na mate, vuravura ni yalo (parataisi kei na valeniveivesu ni yalo, tucake tale, kei na veilewai ena tiki ni pepa duidui eso. Vukei ira na luvemu ni kila vakamatata na ibalebale ni veivosa oqo. Ni o wilika vata na Alama 40:6–7, 11–14, 21–23, sa rawa ni ra biuta na luvemu na vosa ena ituvatuva era yaco kina ena veitikina oqo.

• E rawa ni yaga vei ira na gone qase cake na raici ni saunitaro eso ena vakaraici ni Alama 40:6–7, 11–14, 21–23. Navuca ni tarogi ira na luvemu ena taro eso e rawa ni saumi tu ena veitikina oqo, vaka na “Ena vakacava tu na yagoqu niu sa vakaturi cake tale?” Sureti ira ni vakasaqara na isaunitaro ena tikina veiganiti eso.

  

  Meri kei na Turaga Vakaturi Cake Tale, mai vei Harry Anderson

• Era kila tu na luvemu e dua ka sa mate? De rawa ni o vosa vakalekaleka me baleta na tamata oya. Wasea na nomu ivakadinadina ni dua na siga ena vakaturi cake tale—o koya kei na tamata kecega—ena vuku i Jisu Karisito. Ke gadrevi, vakayagataka na tabana ni taviqaravi ena macawa oqo mo vakamacalataka na ibalebale ni vakaturi cake tale.

Me baleta na vakasama tale eso, raica na ilavelave ni vula oqo ni mekasini Friend .

Oqo na Luvequ, mai vei Elspeth Caitlin Young