Rua na Udolu na Bati Gone,, mai vei Arnold Friberg

Okosita 19–25: “Maroroi Tu ena Nona Kaukauwa Vakasakiti”

Alama 53–63

Ni vakatauvatani kei na mataivalu ni Leimanaiti, e sega ni dodonu me rawaka tu na “mataivalu lailai” i Ilamani (Alama 56:33. Mai na nodra lewe lailai tu, era se “gone kece sara,” na sotia i Ilamani ka ra “se sega mada ni bau vala vakadua” (Alama 56: 46–47). Eso na gauna, ena rairai vakataki keda tu na nodra ituvaki ka nanuma ni da sa lewe lailai ka vakadrukai tu ena noda ivalu ni gauna oqo kei Setani kei na ilawalawa ca ni vuravura.

Ia eso na ka era vinaka cake kina na mataivalu i Ilamani vei ira na Leimanaiti ka sega ni vu mai na iwiliwili se na kila vakaivalu. Era sa digitaki Ilamani, e dua na parofita, me liutaki ira (raica na Alama 53:19); “era sa vakavulici mai vei ira na tinadra, ni kevaka era sega ni vakatitiqa, ena vakabulai ira na Kalou” (Alama 56: 47; ka sa “vuabale sara na nodra vakabauta na veika era sa vakavulici kina.” Na vuana, era sa taqomaki tu ena “kaukauwa mana ni Kalou” (Alama 57:26). Ni sotavi tu na ivalu ni bula, e rawa nida yaloqaqa. Sa vakavulica vei keda na mataivalu i Ilamani ni “sa dua [tiko] na Kalou dodonu, ia ko koya yadua [e] sega ni vakatitiqataka, [ena] maroroi ena nona kaukauwa vakasakiti“ (Alama 57:26).

Vakasama eso ni Vuli e Vale kei na Lotu

Alama 53:10–22; 56:43–48, 55–56; 57:20–27; 58: 39–40

Noqu vakabauta na Kalou sa vukea na ulabaleti ni rere.

Ke ra a sega ni vakabauta tu, sa rawa ni vakavuna oqo mera yalorere na sotia gone i Ilamani. Ia ena vuku ni nodra vakabauta, e sa levu tu na vuna mera yaloqaqa kina. Nio wilika ira tu ena Alama 53–58, vakaraica na veika e vukei iko ni sotava na rere ena vakabauti Karisito. Navuca mo raica matua na veitikina oqo: Alama 53:10–22; 56:43–49, 55–56; 57:20–27; kei na 58:39–40. Sa rawa ni vukei iko na ituvatuva oqo mo vola na ka o raica.

Veika era kilai tani kina na sotia gone i Ilamani:
Na vuna levu e kaukauwa tu kina na nodra vakabauti Karisito:
Na ka era cakava me cakacakataki kina na nodra vakabauti Karisito:
Na sala a vakalougatataki ira kina na Kalou:

Meda qaqa ena noda ivalu vakayalo, sa gadrevi talega na kaukauwa i Jisu Karisito. O na rawata vakacava na Nona kaukauwa? Vakaraica na kena isau ena itukutuku i Peresitedi Russell M. Nelson “Vagoleya Mai na Kaukauwa i Jisu Karisito Ki na Noda Bula” (Liaona, Me 2017, 39–42). O rawa ni vakatauvatana na nona vakasala ki na veika era cakava na sotia i Ilamani.

Ni vulici oti na veika oqo, vakasamataka na nomu ivalu vakayalo vakai iko. Vola na ka o vakauqeti tu mo cakava mo cakacakataka kina na nomu vakabauti Jisu Karisito.

Raici Neil L. Andersen talega, “Mavoa Tu,” Liaona, Nove. 2018, 83–86; “Dinata na Vakabauta,“ Sere ni Lotu, naba 154; “Drawing upon the Power of God in Our Lives” (vidio), Gospel Library; Ulutaga ni Kosipeli, “Vakabauti Jisu Karisito,” Valenivola ni Kosipeli.

Era Sega ni Vakatitiqa, mai vei Joseph Brickey

Alama 58:1–12, 31–37; 61

Era sega ni dau vakacudrui vakarawarawa na imuri i Jisu Karisito.

Sa tiko na vuna eso me rau vakacudrui kina o Ilamani kei Paorani. A sega ni rawata tiko o Ilamani na veitokoni me baleta na nona mataivalu, ka beitaki Paorani vakailasu o Moronai ni tarova tu na veitokoni ya (raica na Alama 58:4–9, 31–32; 60). Na cava e uqeti iko me baleta na nodra imoimoi ena Alama 58:1–12, 31–37 kei na Alama 61? Cava na vuna o nanuma era sausaumi kina vakaoqo?

A dusi Paorani o Elder David A. Bednar me ivakaraitaki ni yalomalua ka vakatavulica ni “ivakaraitaki cecere ka vakaibalebale duadua ni yalomalua e kune ena nona bula na iVakabula Vakai Koya” (“Yalomalua ka Yalomalumalumu,” Liaona, Me 2018, 32). Vakasamataka vagumatua na sala a vakaraitaka kina na iVakabula na yalomalua. Raica, me ivakaraitaki, Maciu 27:11–26; Luke 22:41–42; Joni 13:4–17. O na rawa ni muria vakacava na Nona ivakaraitaki?

Alama 60:7–14

Sa noqu itavi meu laveti ira na tamata ka wavoliti au.

A vola o Moronai ni na saumi taro o Paorani vua na Kalou ke vakawalena deivaki tu na gagadre ni mataivalu ni Nifaiti. Na cava o vulica mai na Alama 60:7–14 ena nodra vukei na vakaleqai tu? Na cava o rawa ni cakava mo kidava ka sotava vakalevu kina na gagadre ni tani?

Alama 62:39–51

Keu sa yalomalumalumu, na bolebole ni bula eso sa rawa ni vagolea na yaloqu kivua na Kalou.

Biuta e dua na yaloka droka kei na pateta ena wai bue me vukei iko ni vakasamataka na sala o rawa ni digitaka kina mo “vakamalumalumutaki” se “vakaukauwataki” ena nomu veivakatovolei eso. Ni sa saqa tiko na yaloka kei na pateta, vulica na Alama 62:39–51, ka siqema na sala era a raimuria tu kina na tamata na ilesilesi i Ilamani ni oti na nodra veivaluvaluti balavu kei ira na Leimanaiti. Mo qai vakatauvatana oqo ki na sala era a raimuria tu kina na nona vunau ena 13 na yabaki eliu (raica na Alama 45:20–24). A duidui vakacava na nodra rawai na Nifaiti ena veivakararawataki vata ga? Ni sa saqa taucoko na yaloka kei na pateta, vakaca na yaloka ka musuka na pateta. E duidui vakacava na kena rawai rau na wai bue? Na cava o sa vulica tiko me baleta na sala eda rawa ni digitaka kina ni raimuria na veivakararawataki? O rawa vakacava ni gole vua na Kalou ena gauna ni nomu vakararawataki?

Tautauri ena veika e sotavi e vale. Kevaka o vakavulica e dua na kalasi ni Lotu, kerea na lewe ni kalasi me ra wasea na ka era sa vulica mai vale. Me vakaoqo, dikeva na ka era sa vulica me baleta na veivakararawataki kei na yalomalumalumu mai na yaloka kei na pateta boela.

Me baleta na vakasama tale eso, raica na ilavelave ni vula oqo ni Liaona kei na mekasini Me iSakisaki ni iTabagone .

Vakasama eso ni Nodra Vakatavulici na Gonelalai

Alama 53:20–21; 56:47–48

Au rawa ni yalodina tu vua na Kalou vakataki ira na sotia gone i Ilamani.

• O rawa ni vakayagataka e vuqa na ivurevure mo wasei kina na kedra italanoa na sotia i Ilamani, oka kina na yaloyalo eso ena ituvatuva oqo kei na “Wase 34: Ilamani kei na Bati Gone 2,000” (iTalanoa ni iVola i Momani, 93–94). Na tabana ni taviqaravi ena macawa oqo sa rawa ni vukei ira na luvemu ni vakasamataka na sala eso era rawa ni vakataka kina na mataivalu i Ilamani. Navuca ni wasea eso na ivalavala tudei ni sotia gone ena Alama 53:20–21 me ra tekivu kina. Ni lagata vata talega na “We’ll Bring the World His Truth” (Children’s Songbook, 172–73).

Alama 56:45–48; 57:21

Au rawa ni yalodina tu kina ka erau vakatavulica na noqu itubutubu ena buladodonu.

• Era a raica matua na sotia gone i Ilamani na vakabauta ni tinadra ni ra sa sotava tu e dua na bolebole levu. De rawa ni o wilika kei ira na luvemu na Alama 56:46–48 ka sureta mera rogoca na ka a vakatavulica vei ira na tinadra na cauravou oqo me baleta na vakabauta. O rawa ni tarogi ira ena ka era sa vulica mai vei ira na nodra itubutubu—se uabula yalodina tale eso—me baleta na iVakabula. Cava na vuna e bibi kina me da talairawarawa ”vakaoti sara”? (Alma 57:21).

• O rawa vakacava—vakataki ira na tinadra na sotia cauravou—ni vakadeitaka ni ra sa kila na luvemu na nomu vakabauta na Kalou? Dua na sala oya mo wasea na ivakarau esa ra-wa kina na nomu bula na nomu vakabauta. Me ivakaraitaki, e sa “sereki” iko vakacava o Koya ni o “sega ni vakatitiqa”?

Sorenikau ni Vakabauta,, mai vei Jay Ward

Alama 53:10–18

Au rawa ni maroroya na noqu veiyalayalati kei na Tamada Vakalomalagi.

• Era rawa ni talanoataka na luvemu na gauna a cakava ka maroroya kina e dua na nona yalayala vata kei ira. Na cava era vakila ni maroroi tu na yalayala oya? O rawa ni wilika na Alama 53:10–18 ka sureta na luvemu me ra vakaraica na sala a cakava ka maroroya kina o Ilamani, ira na tamata i Amoni, kei na luvedra tagane na tamata i Amoni na nodra yalayala, se veiyalayalati. O rawa ni wasea na sala e dau vakalougatataki iko kina na Tamada Vakalomalagi ni ko maroroya na nomu veiyalayalati.

Alama 61:3–14

Au rawa ni digitaka meu kakua ni cudru.

Navuca ni sureta na luvemu mera vakasamataka na gauna era a beitaki kina ni cakava e dua na ka era sega ni vakayacora. Tukuna vei ira na sala a yaco kina oqo vei Paorani (raica na Alama 60–61; raica talega na “Wase 35: Kavetani Moronai kei Paorani,” iTalanoa ni iVola i Momani, 95–97). Me vulici na iwalewale ni nona raimuri o Paorani, ni veivukevuke ni wilika na tikina eso mai na Alama 61:3–14. Na cava e cakava o Paorani ni sa beitaki koya o Moronai? (raica na Alama 61:2–3, 8–9). Na cava eda vulica me baleta na veivosoti mai na ivakaraitaki ni iVakabula? (raica na Luke 23:34).

Me baleta na vakasama tale eso, raica na ilavelave ni vula oqo ni mekasini Friend .

It’s True, Sir, All Present and Accounted For,, mai vei Clark Kelley Price