Okosita 26–Sepiteba 1: “Na Uluvatu ni Noda Dauveivueti”

Ilamani 1–6

E toqai ruarua ena iVola i Ilamani na qaqa kei na leqa levu era sotava na Nifaiti kei na Leimanaiti. E tekivu ena “dua na dredre levu ena kedra maliwa na tamata i Nifaiti” (Ilamani 1:1), ka sa basika tikoga na dredre ena itukutuku taucoko oya. Eda wilika eke na ivadi ca vakapolitiki, ilawalawa daubutako, nodra cati na parofita, vakakina na dokadoka kei na tawa vakabauta ena vanua taucoko. Ia eda raica talega na ivakaraitaki vakataki Nifai kei Liai kei “na wase levu ni tamata yalomalumalumu,” ka ra sega walega ni vakabulai ia era sa tubu cake vakayalo (Ilamani 3:34). Era a cakava vakacava? Era a vaqaqacotaki tu vakacava ni sa tekivu malumalumu ka kasura mai na nodra ivakarau ni bula torocake? Na sala vata ga e vaqaqacotaki tu kina e dua vei keda ena “cava kaukauwa” e tala mai na tevoro me “dreti [keda] sobu”—ena taraicake ni noda bula “ena uluvatu ni noda Dauveivueti, o Karisito, na luve ni Kalou, … na yavudei kevaka sa tara cake [kina] na tamata ena sega sara ni bale rawa” (Ilamani 5:12).

Vakasama eso ni Vuli ena iTikotiko kei na Lotu

Ilamani 1–6

Na dokadoka sa tawasei au mai na Yalotabu kei na kaukauwa ni Kalou.

Nio wilika na Ilamani 1–6, o na rawa ni siqema e dua na iwalewale ena nodra itovo na Nifaiti. Ni ra caka dodonu tu, sa vakalougatataki ira na Kalou, ka ra tiko sautu. Oti e dua na gauna, sa yaco mera yalodokadoka ka caka ca, ena digidigi eso e muataki ira ki na veivakarusai kei na rarawa. Era sa qai yalomalumalumu ka vakauqeti mera veivutuni, ka sa vakalougatataki ira tale tu na Kalou. Sa vakayacori wasoma tu na iwalewale oqo e vakatoka kina eso na “wirini ni dokadoka.”

Na ”wirini ni dokadoka.”

Vakaraica na ivakaraitaki ni wirini oqo ni ko wilika na Ilamani 1–6. Oqo eso na taro me vukei iko ni kila vakamatata na iwalewale oqo:

• Na vakadinadina cava ni dokadoka o raica tu vei ira na Nifaiti? (raica, me ivakaraitaki na , Ilamani 3:33–34; 4:11–13). O raica tu na vakadinadina vataga ni dokadoka kivei iko?

• Na cava so na isau ni dokadoka kei na caka ca? (raica na Ilamani 4:23–26). Na cava so na isau ni yalomalumalumu kei na veivutuni? (raica na Ilamani 3:27–30, 35; 4:14–16).

• Na cava so e vinakata o Ilamani me ratou nanuma na luvena? (raica na Ilamani 5:4–12 Na sala cava so e rawa ni vukei iko kina na nanumi ni veika dina oqo mo levea kina na yalodokadoka?

Raica talega na “Wase 18: Qarauna na Dokadoka,” Nodra iVakavuvuli na Peresitedi ni Lotu : Ezra Taft Benson (2014), 229–40; “Au Rai Vei Kemuni,” Sere ni Lotu, naba 51.

Ilamani 3:24–35

Na vakabauti Karisito sa vakasinaita na yaloqu ena reki.

Ena Ilamani 3, sa vakamacalataka o Momani e dua na gauna ni marau ni kena vakalougatataki tu na Lotu ka ra kurabui sara kina na iliuliu. Yavutaki ena ka o wilika ena tikina e 24–32, na cava o nanuma e vakavurea na ituvaki marautaki oya? Ia, era sega ni marautaka taucoko na lewenilotu. Raica na kedra duidui na tamata e vakamacalataki tiko ena tikina e 33–35. Na cava o vulica mai na nodra ivakaraitaki?

Vakaraica na veika tutaki vakai iko. A vakayagataka na parofita o Momani na malanivosa “eda sa raica” me vakadreta na veika dina bibi ni vakasotara vata tu na iVola i Momani. Me ivakaraitaki, na cava e vinakata o koya meda raica ena Ilamani 3:27–30? Ni o vulica na ivolanikalou, o rawa ni cegu vagauna mo vakacavara na malanivosa “ia eda sa raica” me baleta na ka o sa wilika.

Ilamani 5:6–7

Au rawa ni rokova na yaca ni iVakabula.

Na wiliki ni Ilamani 5:6–7 e rawa ni vakauqeti iko ni navuca na yaca era sa soli vei iko, oka kina na yaca ni matavuvale. Na cava era vakaibalebaletaka vei iko na yaca oqo? O rawa vakacava ni rokovi ira? Ka bibi sara, vakasamataka na cava na ibalebale ni taura na yaca ni iVakabula (raica na Moronai 4:3). O rokova tu vakacava na yaca tabu oya?

Ilamani 5:12–52

Ke sa noqu yatu tu o Jisu Karisito, au na sega lutu.

Na cava na kena ibalebale vei iko mo “tara na nomu yavu” ena uluvatu ni noda Dauveivueti? Ilamani 5:12 O sa taqomaki tu vakacava mai na cava ni bula vei Jisu Karisito? Ni o wilika na Ilamani 5:12–52, dikeva na sala a vakalougatataki kina o Nifai kei Liai ena tarai cake ni nodrau vakabauta ena uluvatu ni nodrau Dauveivueti.

E raica eso na tamata ni veivuke tu mera raitayaloyalotaka na ka era vulica tiko. Me vakatakarakarataki na Ilamani 5:12, rawa ni o tara e dua na vale lailai ena veimataqali yavu duidui. Rawa ni o vakavurea tu e dua na “cava kaukauwa” ena kena sipereitaki kina na wai ka vakayagataka na iri mo vakavure cagi kina. Na veivakararamataki cava e solia vei iko na ka oqo me baleta na tarai cake ni nomu yavu vei Jisu Karisito? Na cava tale o sa vulica mai na vidio “A Secure Anchor”? (Valenivola ni Kosipeli)

Tikina e 50 e tukuna “na levu ni vakadinadina” era sa ciqoma na Leimanaiti. Na wiliki ni Ilamani 5:12–52 sa rawa ni o vakasamataka kina na vakadinadina eso sa solia vei iko na Kalou. Me ivakaraitaki, rairai na “vakasolokakana” ni Yalotabu esa vaqaqacotaka na nomu vakabauta na iVakabula (Ilamani 5:30; raica talega na Vunau kei na Veiyalayalati 88:66). Se o rairai tiko ena butobuto ka tagica tu na Kalou ena vakabauta levu cake (raica na Ilamani 5:40–47). Na ka sotavi cava so tale esa vukei iko ni tara cake na nomu yavu vei Jisu Karisito?

Raici Russell M. Nelson talega, “Na Valetabu kei na Nomu Yavu Vakayalo,” Liaona, Nove. 2021, 93–96; Sean Douglas, “Sotavi ni Noda Cagilaba Vakayalo ena Vakabauti Karisito,” Liaona, Nove. 2021, 109–11; Ulutaga ni Kosipeli, “Vakabauti Jisu Karisito,” Valenivola ni Kosipeli.

Me baleta na vakasama tale eso, raica na ilavelave ni vula oqo ni mekasini Liaona kei na Me iSakisaki ni iTabagone .

Vakasama eso ni Nodra Vakataviulici na Gonelalai

Ilamani 3:24, 33–34; 4:11–15

E vinakata na Tamada Vakalomalagi meu yalomalumalumu.

• Navuca ni sureta na luvemu me ra droinitaka na ka era kila me baleta na “wirini ni dokadoka,” e yavutaki ena droini e cake. Oti, ni o wilika vata na Ilamani 3:24, 33–34 kei na 4:11–15, rawa ni ra dusia na veitiki ni wirini e vakamacalataka na veitikina oqo. E rawa vakacava ni da digitaka meda yalomalumalumu—ka vaka tu kina?

Ilamani 5:12

Au na tara na noqu yavu vei Jisu Karisito.

• Navuca na vakayagataki ni yaloyalo ni valetabu me tekivutaka na veivosakitaki ni vuna era gadreva kina na vale na yavu kaukauwa. Se rawa ni o raica na yavu ni nomu vale se Valenilotu. Me vakadreti na qaqaco ni dua na yavu vatu-kaukauwa, sa rawa ni tovolea na luvemu mera tosoya e dua na vatu ena nodra uvuca tu. Ni o wilika vata na Ilamani 5:12, tarogi ira na luvemu cava na vuna esa “yavu tudei” kina o Jisu Karisito ki na noda bula. E rawa vakacava ni da tara na noda bula ki Vua? (raica na Ilamani 3:27–29, 35 kei na Yavu ni Vakabauta 1:4).

• Sureta na luvemu mera tara e dua na valecere ena vakayagataki ni buloko se yaya tale eso ena veimataqali yavu (vaka na polo vauvau se vatu rabaraba). E tautauvata vakacava kei Jisu Karisito na yavu kaukauwa? Era rawa ni vakuria e dua na buloko ki na vale ena vakasama yadua era wasea me baleta na ka era rawa ni cakava ni muri Koya tu.

Ilamani 5:21–52

Sa vakasolokakana tu na Yalo Tabu ena domo malua, lailai.

• Na domo e vakamacalataki ena Ilamani 5:29–30, 45–47 sa vakavulica vei keda e dua na sala e vosa kina vei keda na Yalo Tabu. Me vukei ira na luvemu ni kila vakamatata na dina oqo, navuca ni wilika na “Wase 37: Nifai kei Liai ena Valeniveivesu” (Talanoa ni iVola i Momani, 99–102). Ni ko tukuna na domo era a rogoca na tamata, vosa ena domo malumu. Tukuna vakavica na italanoa, ka sureta na gone mera vakasolokakana kei iko. Vukei ira ni vakasamataka na sala tale eso e rawa ni vosa kina vei keda na Yalo Tabu. Me vakadeitaki na ivakavuvuli oqo, rawa mo ni lagata vata “The Still Small Voice” (Children’s Songbook, 106–7).

Ilamani 5:20–52

Na veivutuni sa sosomitaka na butobuto vakayalo ena rarama.

• Me vakadreti na ka e vakavulica na Ilamani 5:20–41 baleta na butobuto kei na rarama, saga ni wilika se vakalekataka na veitikina oqo ena butobuto, ena vakayagataki ga ni cina livaliva me rarama. Sa rawa ni ra vakarorogo na luvemuni ki na ka era gadreva tu ni cakava na tamata me na vagalalataki kina na butobuto. Qai waqaca na cina, ka wilika vata na tikina e 42–48 . Na cava e vakatavulica vei keda na veitikina oqo me baleta na veivutuni?

Me baleta na vakasama tale eso, raica na ilavelave ni vula oqo ni mekasini Friend .

Ena valeniveivesu mada ga, a taqomaki tu o Nifai kei Liai ena kaukauwa ni Kalou.

© Na iVola i Momani mera Wilaka Gone, Wavoliti Tu o Nifai kei Liai ena Duru Bukawaqa, mai vei Briana Shawcroft; e sega ni rawa ni lavetaki