Dua na Siga, Dua na Bogi, ka Dua na Siga, mai vei Jorge Cocco

Sepiteba 16–22: “Mo Laveta Cake Na Ulumu ka Marau Tu.”

3 Nifai 1–7

Ena so na gauna, esa dau mareqeti tu meda dua na dauvakabauti Jisu Karisito. Era sa vakayacori tu na parofisai—sa vakaraitaka na vakatakilakila kei na caka mana eso vei ira na tamata ni sa na vakarau sucu na iVakabula. Ena yasana kadua, esa gauna namaki talega vei ira na tamata vakabauta baleta, mai na caka mana taucoko sara, era tukuna tikoga na tawavakabauta “ni sa oti na gauna” me sucu kina na iVakabula (3 Nifai 1:5). Ira oqo sa vakavuna “e dua na yavavala levu ena vanua taucoko” (3 Nifai 1:7) ka virikotora e dua na siga me ra vakamatei kina na tamata vakabauta taucoko ke sega ni yaco na vakatakilakila a parofisaitaka o Samuela na Leimanaiti—na bogi ka sega ni butobuto.

Ena ituvaki veivakatovolei oqo, a “masu vakaukauwa vua na nona Kalou ena vukudra na nona tamata” na parofita o Nifai (3 Nifai 1:11). Na sausaumi ni Turaga sa veivakauqeti vei ira kecega e sotava na veivakacacani se vakatitiqa ka gadreva tu me kila ni na ulabaleta na butobuto na rarama: “Mo laveta cake na ulumu ka marau tu; … [Au] na vakayacora taucoko sara na veika au a vakarota me ra tukuna na noqu parofita tabu” (3 Nifai 1:13).

Vakasama eso ni Vuli ena iTikotiko kei na Lotu

3 Nifai 1–7

Na saumaki mai kina kosipeli i Jisu Karisito sa gadreva tu na vosota kei na sasaga.

Na3 Nifai 1–7 e vakamacalataki ira na tamata ka sa saumaki tu vua na Turaga kei ira ka sega. Na cava e vakavu duidui vei rau na ilawalawa oqo? Na jati vaka na kena oqo sa rawa ni vukei iko ni tuvalaka na veika o nanuma:

	Na veika e vakamalumutaka na saumaki	Na veika e vaqaqacotaka na saumaki
3 Nifai 1:5–11	Sega ni vakabauta tu na vosa ni parofita ka veiwalitaki ira na tamata yalododonu	Vakabauta tu na vosa ni parofita ka masuta na veivuke
3 Nifai 1:29–30
3 Nifai 2:1–3
3 Nifai 3:12–16
3 Nifai 4:8–10, 30–33.
3 Nifai 6:13–18
3 Nifai 7:15–22

Taroga nomu taro eso ni ko vuli. Me ivakaraitaki, ni vakacavari tu na jati oqo, o rawa ni taroga na taro eso vaka “Na cava na lesoni me baleti au eke?” Oqo ena veivakauqeti tu mai na Yalo Tabu.

3 Nifai 1:1–23

Ena vuku i Jisu Karisito, au rawa “ni marau tu.”

Sa kila tu na Tamamu Vakalomalagi ni na dredre na gauna eso ni nomu bula, ka vakarerevaki talega. Ia sa vinakata talega o Koya mo sotava na reki. Wilika na 3 Nifai 1:1–23 mo vulica na vuna era a rere kina na Nifaiti yalodina. Na vuna cava a vakayacora kina na Turaga me ra “marau tu”?

Sa vakayagataka na iVakabula na malanivosa “marau tu” ena vica na gauna—me ivakaraitaki, ena Maciu 14:24–27; Joni 16:33; Vunau kei na Veiyalayalati 61:36; 78:17–19. Na cava e vakauqeti iko ena veisureti eso oqo? O rawa ni wilika na tikina veimaliwai eso mo kila vakamatata na ituvaki a tukuna kina na iVakabula na veivosa oqo. Vakayadua, na vuna cava a cakava o Koya me vukei ira kina na tamata ni sotava na nodra rere? E sa cakava vakacava vei iko o Koya na ka oqo?

Navuca ni vulica na vosa i Peresitedi Russell M. Nelson “Reki kei na Bula Vakayalo” (Liaona, Nove. 2016, 81–84). Na cava e vakatavulici iko kina o Peresitedi Nelson me baleta na kune reki ena ituvaki cava ga? Siqema na levu ni gauna e vakayagataka kina o Peresitedi Nelson na vosa vakanamata. Rawa ni o vakatauvatana na vakanamatataki ni dua na itaba se iloilo tale eso ki na vakanamata tu vei Jisu Karisito. O na vakanamata vakalevu Vua vakacava?

Raica talega na “Yaluma,” “iNuinui,” “iTuvaki ni Bula ni Vakasama,” se ulutaga tale eso ena tabana ni “Bula Veivuke” ni Valenivola ni Kosipeli.

3 Nifai 1:4–21; 5:1–3

Ena vakayacora na Turaga na Nona vosa kecega ena Nona gauna.

Wilika na 3 Nifai 1:4–7 ka vakasamataka na ka o rairai vakila tu ke o dua vei ira na vakabauta. Na cava era cakava me qaqaco tu kina na nodra vakabauta? (raica na 3 Nifai 1:4–21 kei na 5:1–3). Era a vakayacori vakacava na vosa i Samuela? (raica na 3 Nifai 1:19–21). E sa vakayacora vakacava na Turaga na Nona vosa ki na nomu bula?

3 Nifai 1:4–15; 5:12–26; 6:10–15; 7:15–26

Koi au e dua na tisaipeli i Jisu Karisito.

A cauraka o Momani, “Raica, koi au e dua na tisaipeli i Jisu Karisito” (3 Nifai 5:13 Na cava na ibalebale ni malanivosa oqo vei iko? Navuca ni vaqara na 3 Nifai 1:4–15; 5:12–26; 6:10–15; kei na 7:15–26, ka vakaraica na nodra ivakarau, vakabauta, kei na cakacaka na tisaipeli i Karisito.

Raica talega na “I’m Trying to Be like Jesus,” Children’s Songbook, 78.

3 Nifai 2:11–12; 3:1–26

Niu cakacakataka na vakabauti Jisu Karisito, e sega ni dodonu meu rere.

Na ka era sotava na Nifaiti vei ira na ilawalawa daubutako sa umani tu ena lesoni era rawa ni vukei iko ena veika rerevaki vakayalo o sotava. Vakaraica na veilesoni oqo ena 3 Nifai 2:11–12 kei na 3:1–26. Me ivakaraitaki, o rawa ni raica na vosa i Kitianai ena 3 Nifai 3:2–10 ka veidutaitaki ira ki na sala eso e rawa ni lawakitaki iko kina o Setani. Na cava o sa vulica mai na ivakaraitaki i Lakoniasi?

Me baleta na vakasama tale eso, raica na ilavelave ni vula oqo ni Liaona kei na mekasini Me iSakisaki ni iTabagone .

Vakasama eso ni Nodra Vakatavulici na Gonelalai

3 Nifai 1:4–15, 19–21

A rairai mai e dua na kalokalo vou ni sa sucu o Jisu Karisito.

• Na tabana ni taviqaravi ena macawa oqo sa rawa ni vukea na luvemu me ra vulica na caka mana eso era a vakadinadinataka na Nifaiti ni sa sucu o Jisu. O rawa talega ni vakayagataka na “Wase 41: Na iVakatakilakila ni Sucu i Karisito” (iTalanoa ni iVola i Momani, 114–16) mo vakavulica vei ira na italanoa oqo—se me vukei ira ni tukuna vei iko.

3 Nifai 1:4–21

Na nodra vosa na parofita sa na dau vakayacori ga.

• Ni o wilika kei ira na luvemuni na 3 Nifai 1:4–10, sureta me ra veivosakitaka se na bau vakacava tu mera dua na dauvakabauta ka bula voli ena gauna oya. Oti, ni ra wilika na vo ni talanoa ena tikina e 11–15, sa rawa ni ra vakatura na sala eso me vakacavari kina na yatuvosa oqo: “Na lesoni ni talanoa oqo kivei au oya”

• Sa rawa ni ra vukei iko na luvemu ni vakasamataka na gauna tale eso a vakayacora kina na Kalou na Nona yalayala ka solia na Nona parofita. Era na vinakata tu ni raica na yaloyalo ni talanoa eso oqo ena iVola Yaloyalo ni Kosipeli (raica, me ivakaraitaki, naba 7–8 kei na 81). Me ra qai wasea na ka era kila tu me baleta na italanoa eso oqo, oka kina na sala a vakayacori kina na yalayala ni Kalou. Wilika vata na 3 Nifai 1:20, ka wasea na nomu vakadinadina ena veika dina oqo.

3 Nifai 2:11–12; 3:13–14, 24–26

Eda sa kaukauwa tu ni da vakasoqoni vata.

• Vukea na luvemu mera raica na vuna era a soqoni vata kina na Nifaiti kei na veivakalougatataki era rawata ena 3 Nifai 2:11–12 kei na 3:13–14, 24–26. Cava na vuna bibi meda soqoni tu kina nikua ena noda matavuvale vakakina e valenilotu?

• O kila li e dua na lesoni vakaraitaki e vakavulica tu na qaqaco ni duavata? Sa rawa ni tovolea na luvemu mera musuka e dua na tabanikau kei na ivesu tabanikau se basuka e dua na tiki ni pepa kei na itaba pepa. Eda sa vakataka vakacava na tabanikau se na pepa eso?

3 Nifai 5:12–26; 6:14; 7:15–26

Ko i au e dua na tisaipeli i Jisu Karisito.

• Ni wiliki oti vata na 3 Nifai 5:13, sureta na luvemu mera tokaruataka na malanivosa “Ko i au e dua na tisaipeli i Jisu Karisito.” Me vulici na ibalebale ni dua na tisaipeli i Jisu Karisito, wilika vata eso na ivakaraitaki oqo: ira na Leimanaiti saumaki tu (raica na 3 Nifai 6:14), Momani (raica na 3 Nifai 5:12–26), kei Nifai (raica na 3 Nifai 7:15–26). O rawa talega ni raica na vakasama eso ena sere vaka na “I’m Trying to Be like Jesus” (Children’s Songbook, 78–79).

• Ena dua na tiki ni pepa, vukea na luvemu mera droinitaka na ligadra ka kotiva na droini. Vola “Ko i au e dua na tisaipeli i Jisu Karisito” ena dua na yasana, ka sureta mera droinitaka e dua na ka era rawa ni cakava mera tisaipeli kina ena yasana kadua.

Me baleta na vakasama tale eso, raica na ilavelave ni vula oqo ni mekasini Friend .

Dua na Siga, dua na Bogi, ka dua na Siga,, mai vei Walter Rane