“Agosto 5–11: ‘Ang Mahinungdanon nga Plano sa Kalipay.’ Alma 39–42,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Agosto 5–11. Alma 39-42,” Dali, Sunod Kanako—Alang sa Panimalay ug sa Simbahan: 2024 (2024)
He Is Risen [Siya Nabanhaw], ni Del Parson
Agosto 5–11: “Ang Mahinungdanon nga Plano sa Kalipay”
Alma 39–42
Kon ang usa ka tawo nga atong gimahal nakahimo og seryosong sayop, mahimong lisod nga mahibalo kon unsaon sa pagresponde. Ang usa ka bahin nga naghimo sa Alma 39–42 nga hilabihan ka bililhon mao nga kini nagpadayag kon giunsa ni Alma—usa ka disipulo ni Kristo kinsa makausa adunay iyang kaugalingon nga grabing mga sala nga pagahinulsolan—sa pagdumala niana nga sitwasyon. Ang anak nga lalaki ni Alma nga si Corianton nakalapas sa sekswal nga kasal-anan, ug si Alma, ingon nga iyang nakat-onan nga buhaton diha sa iyang pagpangalagad, misalig sa gahom sa tinuod nga doktrina sa paghatag sa iyang anak nga lalaki og mahangtorong panglantaw ug pag-awhag sa paghinulsol (tan-awa diha sa Alma 4:19; 31:5). Niini nga mga kapitulo, atong maobserbahan ang kaisog ni Alma sa pagpanghimaraot sa sala ug sa iyang kalumo ug gugma alang ni Corianton. Ug sa kataposan, atong mapamati ang pagsalig ni Alma nga ang Manluluwas “moanhi aron sa pagkuha sa mga sala sa kalibotan [ug] pagpahayag sa malipayon nga mga balita sa kaluwasan ngadto sa iyang mga katawhan” (Alma 39:15). Ang katinuod nga si Corianton mihinulsol ug sa kataposan mibalik ngadto sa buhat sa pagpangalagad (tan-awa diha sa Alma 49:30) makahatag kanato og paglaom alang sa kapasayloan ug katubsanan kon kita nahasol mahitungod sa atong kaugalingong mga sala o sa mga sala sa usa ka tawo nga atong gimahal (tan-awa diha sa Alma 42:29).
Tan-awa usab sa “Si Alma Nagtambag sa Iyang Anak nga mga Lalaki” (bidyo), Gospel Library.
Si Alma Nagtambag sa Iyang Anak nga mga Lalaki | Alma 36–42
Si Alma nga Batan-on nagtambag sa iyang anak nga mga lalaki. Gidapit niya si Helaman sa pagtipig og rekord sa katawhan. Gidayeg niya si Shiblon sa iyang pagkamatarung. Gisugo niya si Corianton sa paghinulsol.
Mga Ideya alang sa Pagkat-on diha sa Panimalay ug sa Simbahan
Makalikay ko sa sekswal nga sala.
Ang tambag ni Alma ngadto sa iyang anak nga lalaki nga si Corianton diha sa Alma 39 maghatag og dako nga kahigayonan mahitungod sa makalaglag nga mga epekto sa sekswal nga sala, lakip sa pornograpiya. Tingali mas importante, kini makatabang usab kanimo sa pagsabot sa tanyag nga kapasayloan ug pagkaayo pinaagi sa Manluluwas ngadto sa mga tawo nga maghinulsol. Kini nga mga pangutana ug mga kalihokan makatabang:
-
Unsa nga mga sayop ang midala ni Corianton sa paglapas sa balaod sa kaputli? (tan-awa sa Alma 39:2–4, 8–9). Unsa man ang mga sangpotanan sa iyang mga aksiyon? (tan-awa sa mga bersikulo 5–13). Unsa ang atong ebidensiya nga naghinulsol si Corianton? (tan-awa sa Alma 42:31; 49:30; 48:18). Unsay imong makat-onan mahitungod sa Manluluwas gikan niini nga kasinatian?
-
Basaha ang mga pahina 19–20 sa Alang sa Kalig-on sa mga Kabatan-onan: Usa ka Giya sa Paghimo og mga Pagpili. Dayon isulat ang imong kaugalingon nga pagpasabot kon unsa ang pornograpiya, nganong peligroso kini; ug unsay imong buhaton kon makasugat ka niini. (Tan-awa usab sa Mateo 5:27–28 ug Doktrina ug mga Pakigsaad 63:16.)
-
Unsaon nimo pagpasabot ngadto sa usa ka higala nganong gipili nimo nga maglikay sa pornograpiya ug mosunod sa balaod sa kaputli? Unsa nga mga panabot ang imong mapakigbahin gikan sa “Ang Inyong Lawas Sagrado” sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (mga pahina 22–29)?
Tan-awa usab sa Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 61–67; “Pornograpiya” diha sa “Tabang sa Kinabuhi” nga koleksiyon sa Gospel Library.
Unsay mahitabo human ako mamatay?
Si Corianton adunay pipila ka pangutana mahitungod sa unsa ang mahitabo kanato human sa kamatayon. Ang iyang mga kabalaka midala kang Alma sa pagtudlo sa mga baroganan nga makita sa Alma 40–41. Samtang ikaw magtuon, paghimo og usa ka lista sa mga kamatuoran nga imong makaplagan mahitungod sa mga butang sama sa kalibotan sa espiritu, pagkabanhaw, ug paghukom. Hunahunaa ang pagbasa niini nga mga kapitulo gikan sa panglantaw sa usa ka tawo kinsa, sama ni Corianton, nagkinahanglan nga maghinulsol––kay human sa tanan, kana tinuod alang kanatong tanan.
Makapangita ako og mga tubag sa akong mga pangutana uban sa hugot nga pagtuo diha ni Jesukristo.
Usahay magtuo kita nga ang mga propeta nakahibalo sa tubag ngadto sa matag pangutana kabahin sa ebanghelyo. Apan bantayi ang wala matubag nga mga pangutana nga aduna si Alma diha sa kapitulo 40. Unsay iyang gihimo aron makakaplag og mga tubag? Unsay iyang gihimo sa dihang siya walay mga tubag? Sa unsang paagi ang ehemplo ni Alma makatabang nimo?
Ang pag-ampo usa ka paagi nga makakaplag kita og mga tubag sa mga pangutana kabahin sa ebanghelyo
Ang Pag-ula ni Jesukristo naghimo sa katubsanan nga posible.
Nagtuo si Corianton nga ang silot sa mga sala dili makiangayon (tan-awa diha sa Alma 42:1). Diha sa Alma 42, giunsa pagtubag ni Alma ang iyang kabalaka? Mahimo nimong ihan-ay ang mga tudling niini nga kapitulo sa duha ka grupo: “Ang Dios makiangayon” ug “Ang Dios maluluy-on.” Sa unsang paagi ang pag-ula sa Manluluwas naghimo sa kaangayan ug sa kaluoy nga posible?
Tan-awa usab sa “Unsa Kadako sa Kaalam ug sa Gugma,” Mga Himno, 116.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Ang akong maayo nga ehemplo makagiya sa uban ngadto ni Kristo.
-
Ang tambag ni Alma ngadto ni Corianton makatabang sa inyong mga anak nga makasabot sa kamahinungdanon sa pagkahimong usa ka maayo nga ehemplo. Ikonsiderar ang pagbasa og dungan sa Alma 39:1. Sa unsang paagi ang igsoon ni Corianton nga si Shiblon nahimong usa ka maayo nga ehemplo? Ang inyong mga anak mahimong mangita og dugang nga mga tubag niini nga pangutana diha sa Alma 38:2–4.
-
Makadula usab kamo diin ikaw ug ang inyong mga anak magpuli-puli sa pagsunod o pagsuon-suon sa usag usa. Gamita kini nga dula sa paghulagway kon sa unsang paagi ang atong mga aksiyon makatabang sa uban sa paghimo og maayo nga mga pagpili. Kantaha og dungan ang “Sama Ko sa Usa ka Bitoon” (Songbook sa mga Bata, 84), ug tabangi ang inyong mga anak sa paghunahuna og mga paagi nga mahimo silang usa ka maayo nga ehemplo.
-
Gamit ang usa ka flashlight o hulagway sa adlaw, mahimo nimong itandi ang kahayag ngadto sa gahom sa usa ka maayo nga ehemplo. Ikaw ug ang inyong mga anak mahimong motan-aw usab sa mga hulagway ni Jesus nga naghimo og maayo nga mga butang ug maghisgot mahitungod sa ehemplo nga Iyang gipakita kanato.
Tungod ni Jesukristo, ako makahinulsol kon ako makahimo og mga sayop.
-
Sa walay paghisgot sa matang sa iyang mga sala, ipasabot nga si Corianton nakahimo og sayop nga pagpili. Unsa kaha ang atong ikasulti aron sa pagtabang kaniya? Ikonsiderar ang pagbasa sa Alma 39:9 ngadto sa inyong mga anak, ug tabangi sila sa pagsabot kon unsa ang gipasabot sa mohinulsol ug mobiya. Ipamatuod nga ang paghinulsol posible pinaagi ni Jesukristo ug sa Iyang Pag-ula.
-
Aniay usa ka leksiyon nga naghulagway sa hingpit nga kalipay sa paghinulsol: Hatagi ang usa ka bata og usa ka butang nga bug-at nga iyang kuptan samtang ikaw mag-istorya mahitungod sa usa ka tawo kinsa nakabuhat og sayop ug dili maayo ang gibati. Sultihi ang inyong mga anak nga ang butang sama ra sa dili maayong mga pagbati nga atong bation sa panahon nga kita makahimo og sayop. Kuhaa ang bug-at nga butang gikan sa bata samtang ikaw mopamatuod nga ang Langitnong Amahan ug si Jesukristo makakuha sa bug-at, dili maayo nga mga pagbati ug motabang kanato nga mahimong mas maayo kon kita maghinulsol.
Human sa kamatayon, ang atong mga espiritu moadto sa kalibotan sa mga espiritu hangtod moabot ang Pagkabanhaw ug Paghukom.
-
Natural lang nga maghunahuna kung unsa ang mahitabo kanato human kita mamatay. Unsay inyong mahimo aron matabangan ang inyong mga anak nga mangita og dinasig nga mga tubag? Mahimo kang mosulat og kamatayon, kalibotan sa espiritu (paraiso ug bilanggoan sa espiritu), pagkabanhaw, ug paghukom diha sa lainlain nga mga piraso sa papel. Tabangi ang inyong mga anak nga makasabot kon unsa ang gipasabot niini nga mga pulong. Samtang mag-uban kamo sa pagbasa sa Alma 40:6–7, 11–14, 21–23, mahimong ihan-ay sa inyong mga anak ang mga pulong sa pagkasunod dinhi niini nga mga bersikulo.
-
Ang mas magulang nga mga bata mahimong makabenepisyo sa pagpangita og mga tubag sa mga pangutana pinaagi sa pagsiksik sa Alma 40:6–7, 11–14, 21–23. Ikonsiderar ang pagpangutana sa inyong mga anak og mga pangutana nga mahimong matubag niini nga mga bersikulo, sama sa “Unsa man sama ang akong lawas kon ako mabanhaw?” Dapita sila sa pagpangita og mga tubag diha sa tukma nga mga bersikulo.
Mary and the Resurrected Lord [Si Maria ug ang Nabanhaw nga Ginoo], ni Harry Anderson
-
Aduna bay nailhan ang inyong mga anak nga usa ka tawo nga namatay? Tingali mahimo kamong maghisgot og kadiyot mahitungod niana nga tawo. Ipakigbahin ang imong pagpamatuod nga sa umaabot nga adlaw siya—ug ang tanan—mabanhaw tungod ni Jesukristo. Kon gikinahanglan, gamita ang pahina sa kalihokan niini nga semana aron ipasabot kon unsa ang kahulogan nga mahimong mabanhaw.
Alang sa dugang nga mga ideya, tan-awa ang isyu karong bulana sa Higala nga magasin.
This My Son [Kini Akong Anak nga Lalaki], ni Elspeth Caitlin Young