“Agosto 12–18: ‘Magmakanunayon diha sa Hugot nga Pagtuo kang Kristo.’ Alma 43–52,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Agosto 12–18. Alma 43–52,” Dali, Sunod Kanako—Alang sa Panimalay ug sa Simbahan: 2024 (2024)
For the Blessings of Liberty [Alang sa mga Panalangin sa Kalingkawasan], ni Scott M. Snow
Agosto 12–18: “Magmakanunayon diha sa Hugot nga Pagtuo kang Kristo”
Alma 43–52
Kon atong basahon kini nga mga pulong diha sa sinugdanan sa Alma kapitulo 43—“Ug karon ako mobalik sa asoy sa mga gubat tali sa mga Nephite ug sa mga Lamanite”—natural nga mahibulong kon nganong gilakip ni Mormon kini nga mga istorya sa gubat nga limitado ang iyang luna diha sa mga palid (tan-awa diha sa Mga Pulong ni Mormon 1:5). Tinuod nga daghan kita og mga nasinati nga mga gubat sa ulahing mga adlaw, apan adunay bili ang iyang mga pulong nga lapas sa mga paghulagway sa estratehiya ug trahedya sa gubat. Ang iyang mga pulong nag-andam usab kanato alang sa gubat diin “gitawag kitang tanan” (Mga Himno, nu. 154), ang gubat nga kita nakigbatok sa matag adlaw batok sa mga pwersa sa daotan. Kini nga gubat tinuod kaayo, ug ang sangpotanan nag-apekto sa atong mahangtoron nga mga kinabuhi. Sama sa mga Nephite, kita nadasig pinaagi sa usa ka balaan nga katuyoan—“sa atong Dios, sa atong tinuohan, ug kagawasan, ug sa atong kalinaw, sa atong mga asawa, ug sa atong mga anak”—sa unsay gitawag ni Moroni nga “ang kalihokan sa mga Kristiyanos” (Alma 46:12, 16).
Mga Ideya alang sa Pagkat-on diha sa Panimalay ug sa Simbahan
Si Jesukristo makatabang kanako sa akong espirituhanon nga mga gubat.
Samtang ikaw magbasa sa Alma 43–52, tan-awa kon unsay gihimo sa mga Nephite nga mihimo kanila nga malamposon (o dili malamposon). Dayon pamalandongi kon unsaon nimo sa paggamit ang unsay imong nakat-onan sa pagtabang kanimo sa pagdaog sa imong espirituhanong mga gubat. Irekord ang imong mga hunahuna sa ubos:
-
Alma 43:19: Ang mga Nephite nangandam og mga taming. (Makapaningkamot ako nga maandam ang akong kaugalingon sa espirituhanong taming.)
-
Alma 43:23–24: Gitinguha nila ang giya sa propeta.
Usab, tan-awa kon unsay imong makat-onan gikan sa mga paningkamot sa mga kaaway sa mga Nephite. Pamalandongi kon sa unsang paagi si Satanas mahimong moatake kanimo sa samang mga paagi:
-
Alma 43:8: Nagtinguha si Zerahemnah sa paghimo sa iyang katawhan nga masuko aron siya adunay gahom batok kanila. (Si Satanas mahimong motintal kanako sa paglihok diha sa kasuko.)
Tan-awa usab sa Russell M. Nelson, “Hangopon ang Umaabot uban sa Hugot nga Pagtuo,” Liahona, Nob. 2020, 73–76; “Kutang Malig-on ang Atong Dios,” Mga Himno, nu. 34.
Minerva Teichert (1888–1976), Defense of a Nephite City [Depensa sa usa ka Siyudad sa Nephite], 1949–1951, oil on masonite, 36 × 48 ka pulgada. Brigham Young University Museum of Art, 1969.
“Magmakanunayon diha sa hugot nga pagtuo kang Kristo.”
Gusto ba nimo nga mamenosan ang gahom sa kaaway diha sa imong kinabuhi? Ang usa ka paagi mao ang pagsunod sa pahimangno diha sa Alma 48:17 nga mao ang pagkahimong “sama ngadto kang Moroni.” Ikonsiderar ang paghimo og lista sa mga pulong nga naghulagway ni Moroni samtang imong basahon ang Alma 46:11–28; 48:7–17. Unsa ang imong makat-onan gikan ni Moroni mahitungod sa “[p]agmakanunayon diha sa hugot nga pagtuo kang Kristo”? (Alma 46:27).
Mahimo usab nimong tun-an kon giunsa ni Moroni sa pagdasig ang uban diha sa “kalihokan sa mga Kristiyanos” (tan-awa sa Alma 46:11–22). Unsaon nimo paghulagway niana nga kalihokan? Unsay imong mabuhat aron sa pag-apil niini? Unsaon nimo pagdasig ang uban nga moapil usab?
Usa ka butang nga gibuhat ni Moroni sa pagdasig sa uban mao ang paghimo sa bandila sa kalingkawasan, nga mihatag og gibug-aton sa mga baroganan sa pagdasig sa mga Nephite (tan-awa sa bersikulo 12). Unsa nga mga baroganan ang gihatagan og gibug-aton sa atong mga lider sa Simbahan karon? Mahimo kang mangita niini diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022), “Ang Pamilya: Usa ka Pamahayag ngadto sa Kalibotan,” sa mga tema sa Young Women ug sa Korum sa Aaronic nga Pagkapari, o sa labing bag-o nga mga mensahe sa kinatibuk-ang komperensiya. Mahimo nimong i-summarize kon unsay gitudlo niini ngadto sa pipila ka yano nga mga pamahayag aron sa paghimo sa imong kaugalingon nga bandila sa kalingkawasan—usa ka butang nga magpahinumdom kanimo nga magmatinuoron ngadto sa Manluluwas ug sa Iyang ebanghelyo.
Si Moroni Miisa sa Bandila sa Kalingkawasan | Alma 46
Gidasig ni Kapitan Moroni ang mga Nephita sa pagtuman sa ilang mga sugo ug makig-away alang sa ilang kagawasan pinaagi sa pagpataas sa Bandila sa Kalingkawasan.
Si Satanas hinay-hinay nga motintal ug molingla.
Nasayod si Satanas nga ikaw dili lagmit mobuhat og dagko nga mga sala o motuo og klaro nga mga bakak. Busa, mogamit siya og malipoton nga mga bakak ug gagmay nga mga tintasyon—ingon ka daghan nga siya naghunahuna nga imong dawaton—aron sa pagpalayo kanimo gikan sa kahilwasan sa matarong nga pagpuyo.
Pangitaa kini nga sundanan diha sa Alma 47, ug pamalandongi kon unsaon kaha ni Satanas sa pagsulay sa paglingla kanimo. Hunahunaa kini nga mga panabot gikan ni Elder Robert D. Hales:
“Ang mabudhion nga si Amalickiah miawhag ni Lehonti sa ‘pagkanaog’ ug makigkita niya sa walog. Apan dihang si Lehonti mibiya sa bungtod, gihiloan siya ‘sa hinay-hinay’ hangtod nga siya namatay ug ang iyang kasundalohan naadto sa mga kamot ni Amalickiah (tan-awa sa Alma 47). Pinaagi sa mga argumento ug mga akusasyon, ang ubang mga tawo molansis kanato sa pagbiya sa taas nga lugar. Sa taas nga lugar anaa diha ang kahayag. … Mao kini ang luwas nga lugar” (“Kristohanong Kaisog: Ang Bugti sa Pagkadisipulo,” Liahona, Nob. 2008, 74).
Tan-awa usab sa Nehemias 6:3; 2 Nephi 26:22; 28:21–22.
Ang panaghiusa magdala og kaluwasan.
Bisan sa taming ug mga pagpalig-on sa mga Nephite, ang mga Lamanite sa wala madugay nakabihag sa daghan sa ilang mga siyudad (tan-awa sa Alma 51:26–27). Giunsa kana pagkahitabo? Pangitaa ang mga tubag samtang ikaw nagbasa niini nga mga kapitulo (tan-awa ilabi na sa Alma 51:1–12). Pamalandongi kon unsa nga mga pasidaan ang aduna niini nga istorya alang kanimo ug sa imong pamilya.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Alma 43:17–21; 48:7–8; 49:1–5; 50:1–6
Ako makakaplag og espirituhanon nga panalipod diha sa ebanghelyo ni Jesukristo.
-
Ikonsiderar ang paggamit sa “Kapitulo 31: Si Kapitan Moroni Mibuntog ni Zerahemnah” (Mga Sugilanon sa ang Basahon ni Mormon, 85–88) sa pagsugilon sa inyong mga anak mahitungod sa gubat tali sa mga Nephite ug sa mga Lamanite. Samtang imong basahon ang mahitungod sa taming sa mga Nephite diha sa Alma 43:19, mahimo nimong itandi ang taming nga nagpanalipod sa atong mga lawas sa mga butang nga gihatag sa Dios kanato aron sa pagpanalipod sa atong mga espiritu. Tingali ikaw ug ang inyong mga anak makadrowing og hulagway sa usa ka bata ug makadugang og usa ka piraso sa taming ngadto sa hulagway alang sa tanan nga mahinganlan sa inyong mga anak nga espirituhanon nga mopanalipod kanato.
-
Kini nga mga bersikulo naghulagway sa mga pagpalig-on nga gitukod sa mga Nephite: Alma 48:7–9; 49:1–9; 50:1–6. Human magdungan sa pagbasa niini nga mga bersikulo, ang inyong mga anak mahimong malingaw sa pagtukod og kuta gamit ang mga butang nga sama sa mga lingkoranan ug mga habol.
Alma 46:11–16; 48:11–13, 16–17
Ako mahimong “malig-on diha sa hugot nga pagtuo kang Kristo” sama ni Kapitan Moroni.
-
Ang inyong mga anak mahimong motan-aw sa mga hulagway niini nga latid aron sa pagsugilon sa istorya sa bandila sa kalingkawasan (tan-awa sa Alma 46:11–16; “Kapitulo 32: Si Kapitan Moroni ug ang Bandila Sa Kalingkawasan,” Mga Sugilanon sa ang Basahon ni Mormon, 89–90). Unsa ang gusto ni Moroni nga mahinumdoman sa mga tawo? (tan-awa sa bersikulo 12)? Unsay gusto sa Langitnong Amahan nga mahinumdoman nato? Tingali ang inyong mga anak makadesinyo sa ilang kaugalingon nga “mga bandila sa kalingkawasan” nga adunay mga pulongan o mga hulagway nga makatabang kanila sa paghinumdom niini nga mga butang.
-
Aron sa pagtudlo sa inyong mga anak mahitungod sa pagkahimong “malig-on diha sa hugot nga pagtuo kang Kristo” sama ni Moroni (tan-awa sa Alma 48:13), makatabang ka nila sa pagpangita ug paghikap og usa ka butang nga lig-on. Unsa ang buot ipasabot nga mahimong “lig-on” ang hugot nga pagtuo? Magkauban nga basaha ang Alma 48:11–12 aron sa pagkahibalo kon unsay nakapalig-on ni Moroni diha sa iyang hugot nga pagtuo ni Kristo. Mahimo kamong magkauban nga manganta sa usa ka awit sama sa “Magmaisogon Ko” (Songbook sa mga Bata, 85). Unsa ang atong mabuhat aron mahimong “malig-on diha sa hugot nga pagtuo kang Kristo”?
Si Satanas hinay-hinay nga motintal ug molingla kanato.
Mag-uban sa pagbasa sa gipili nga mga bersikulo gikan sa Alma 47:4–19. Unsa man kaha unta ang mahitabo kon gisultihan pang daan ni Amalickiah si Lehonti unsay iyang giplano nga buhaton sukad pa sa sinugdanan? Unsa ang gitudlo kanato niini nga mga bersikulo mahitungod sa unsa nga paagi nga si Satanas naningkamot sa paglingla kanato?
Tabangi ang inyong mga anak sa pag-ugmad og pagsalig sa kaugalingon. Ang ubang mga bata tingali walay pagsalig nga makakat-on sa ebanghelyo sa ilang kaugalingon. Usa ka paagi sa pagpalig-on sa ilang pagsalig mao ang pagdayeg kanila kon moapil sila sa pagkat-on. Asa kaha nimo magamit kini nga sugyot sa mga kalihokan dinhi niini nga latid?
Alang sa dugang nga mga ideya, tan-awa ang isyu karong bulana sa Higala nga magasin.
Title of Liberty [Bandila sa Kalingkawasan], ni Larry Conrad Winborg.
© 2018 ni Larry Conrad Winborg