Two Thousand Young Warriors [Duha ka Libo nga Batan-ong mga Manggugubat], ni Arnold Friberg

Agosto 19–25: “Mapanalipdan pinaagi sa Iyang Kahibulongan nga Gahom”

Alma 53–63

Kon itandi sa mga sundalong Lamanite, ang “gamay nga kasundalohan” ni Helaman (Alma 56:33) nga batan-ong mga lalaki walay purohan nga molampos. Gawas sa pagkadiyutay sa gidaghanon, ang mga sundalo ni Helaman “tanan mga batan-on kaayo,” ug “sila sukad wala pa makig-away” (Alma 56:46–47). Sa ubang mga paagi, ang ilang sitwasyon ingon og pamilyar kanato kinsa usahay mobati nga nalupig sa gidaghanon ug nabug-atan sa atong ulahing adlaw nga pakiggubat batok ni Satanas ug sa mga pwersa sa daotan dinhi sa kalibotan.

Apan ang sundalo ni Helaman adunay pipila ka mga bentaha batok sa mga Lamanite nga wala magkinahanglan og gidaghanon o kahanas nga militar. Sila mipili ni Helaman, usa ka propeta, sa pagpangulo kanila (tan-awa diha sa Alma 53:19); “sila gitudloan sa ilang mga inahan, nga kon sila dili magduhaduha, ang Dios moluwas kanila” (Alma 56:47); ug sila adunay “hilabihan ka hugot nga pagtuo diha niana diin sila gitudloan.” Isip resulta, gipanalipdan sila pinaagi “sa milagroso nga gahom sa Dios” (Alma 57:26). Mao nga kon mag-atubang sa mga pagsulay sa kinabuhi, kita mahimong magmaisogon. Ang mga sundalo ni Helaman nagtudlo kanato nga “adunay makiangayon nga Dios, ug si kinsa ang dili magduhaduha, … mapanalipdan pinaagi sa iyang kahibulongan nga gahom.” (Alma 57:26).

Ang mga Batan-ong Sundalo ni Helaman Nakig-away alang sa Kagawasan | Alma 53-58

Gidasig ni Kapitan Moroni ang mga Nephita sa pagtuman sa ilang mga sugo ug makig-away alang sa ilang kagawasan pinaagi sa pagpataas sa Bandila sa Kalingkawasan.

Mga Ideya alang sa Pagkat-on diha sa Panimalay ug sa Simbahan

Alma 53:10–22; 56:43–49, 55–56; 57:20–27; 58:39–40

Ang pagbaton og hugot nga pagtuo sa Dios makatabang kanako nga makabuntog sa kahadlok.

Kon dili pa tungod sa ilang hugot nga pagtuo, ang batan-on nga mga sundalo ni Helaman aduna untay maayo nga rason nga mahadlok. Apan tungod sa ilang hugot nga pagtuo, sila adunay dugang nga rason nga magmaisogon. Samtang ikaw magbasa mahitungod nila diha sa Alma 53–58, pangita og mga butang nga makatabang kanimo sa pagsagubang sa imong mga kahadlok uban ang hugot nga pagtuo ni Kristo. Ikonsiderar ang pagtutok sa mosunod nga mga bersikulo: Alma 53:10–22; 56:43–49, 55–56; 57:20–27; ug 58:39–40. Kini nga talaan makatabang kanimo sa pagrekord sa unsay imong makita.

Mga kinaiya sa batan-ong mga sundalo ni Helaman:
Posible nga mga rason nga ang ilang hugot nga pagtuo ni Kristo lig-on kaayo:
Unsa ang ilang gibuhat sa pagpakita og hugot nga pagtuo kang Kristo:
Sa unsang paagi ang Dios mipanalangin kanila:

Aron makadaog sa atong espirituhanon nga mga gubat, nagkinahanglan usab kita sa gahom ni Jesukristo. Sa unsang paagi ikaw makagamit sa Iyang gahom? Pangita og mga tubag diha sa mensahe ni Presidente Russell M. Nelson nga “Pagdawat sa Gahom ni Jesukristo diha sa Atong Kinabuhi,” (Liahona,Mayo 2017, 39–42). Mahimong itandi nimo ang iyang tambag ngadto sa mga butang nga gibuhat sa mga sundalo ni Helaman.

Human sa pagtuon niini nga mga butang, hunahunaa ang imong kaugalingon nga espirituhanon nga mga gubat. Isulat ang gibati nimo nga nadasig nga buhaton sa pagpakita sa imong hugot nga pagtuo diha ni Jesukristo.

Tan-awa usab sa Neil L. Andersen, “Nasamdan,” Liahona, Nob. 2018, 83–86; “Matinud-anon sa Tinuohan,” Mga Himno, nu. 157.

They Did Not Doubt [Wala Sila Magduhaduha], ni Joseph Brickey

Alma 58:1–12, 31–37; 61

Ang mga sumusunod ni Jesukristo dili dali nga masilo.

Si Helaman ug si Pahoran adunay mga rason nga masilo. Si Helaman wala magdawat og suporta alang sa iyang kasundalohan, ug si Pahoran gipasanginlan ni Moroni sa pagpugong niana nga suporta (tan-awa sa Alma 58:4–9, 31–32; 60). Unsay nakapadani kanimo mahitungod sa ilang mga reaksiyon diha sa Alma 58:1–12, 31–37 ug sa Alma 61? Ngano kaha nga ingon man niini ang ilang reaksiyon?

Si Elder David A. Bednar mipasabot ni Pahoran isip ehemplo sa pagkamaaghop ug mitudlo nga “ang labing talagsaon ug makahuloganon nga mga panig-ingnan sa kaaghop makita sa kinabuhi sa Manluluwas Mismo” (Maaghop ug Mapaubsanon sa Kasingkasing,” Liahona, Mayo 2018, 32). Pamalandongi kon sa unsang paagi ang Manluluwas mipakita og kaaghop. Tan-awa, sama pananglit sa, Mateo 27:11–26; Lucas 22:41–42; Juan 13:4–17. Sa unsang paagi ikaw makasunod sa Iyang ehemplo?

Alma 60:7–14

Aduna kitay responsibilidad sa pagdasig sa mga tawo nga naglibot kanako.

Si Moroni misulat nga ang Dios mohimo ni Pahoran nga may tulubagon kon gituyo niya ang pagpabaya sa panginahanglan sa mga kasundalohan nga Nephite. Unsay imong makat-onan gikan sa Alma 60:7–14 mahitungod sa pag-atiman sa mga tawo nga nanginahanglan? Unsa ang imong mabuhat aron mas makabantay ug makatubag sa mga panginahanglan sa uban?

Alma 62:39–51

Kon ako mapainubsanon, ang mga hagit sa kinabuhi makapabalik sa akong kasingkasing ngadto sa Ginoo.

Ibutang ang usa ka hilaw nga itlog ug ang usa ka patatas diha sa nagbukal nga tubig aron sa pagtabang kanimo nga makahunahuna mahitungod kon sa unsang paagi nga ikaw makapili nga mahimong “mahumok” o “magahi” sa imong mga pagsulay. Samtang giluto ang itlog ug patatas, tun-i ang Alma 62:39–51, ug bantayi kon sa unsang paagi ang mga tawo mitubag sa pangalagad ni Helaman human sa ilang taas nga gubat sa mga Lamanite. Ikaw dayon makatandi niini ngadto sa paagi nga sila mitubag ngadto sa iyang pagsangyaw sa nahaunang 13 ka tuig (tan-awa sa Alma 45:20–24). Sa unsang paagi ang mga Nephite naapektohan sa lahi nga paagi sa sama nga mga kasakit? Sa dihang naluto na gayod ang itlog ug ang patatas, buaka ang itlog ug hiwaa ang patatas. Sa unsang paagi ang nagbukal nga tubig nakaapekto kanila sa lahi nga paagi? Unsa ang imong nakat-onan mahitungod sa unsang paagi kita makapili sa pagtubag sa kasakit? Unsaon nimo sa pagdangop sa Dios atol sa imong mga kasakit?

Mokuha og mga kasinatian gikan sa panimalay. Kon magtudlo ka og klase sa Simbahan, hangyoa ang mga sakop sa klase sa pagpakigbahin sa unsay ilang nakat-onan sa panimalay. Sama panaglit, sutaa kon unsay ilang nakat-onan mahitungod sa mga kasakit ug sa pagkamapainubsanon gikan sa pagpabukal og mga itlog ug mga patatas.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Alma 53:20–21; 56:47–48

Makahimo ko nga magmatinud-anon ngadto sa Dios sama sa batan-ong mga sundalo ni Helaman.

• Makagamit ka og daghang kapanguhaan aron sa pagpakigbahin sa istorya sa mga sundalo ni Helaman, lakip sa mga hulagway niini nga latid ug sa “Kapitulo 34: Si Helaman ug ang 2,000 nga Batan-on nga mga Mangugubat” (Mga Sugilanon sa ang Basahon ni Mormon, 93–94). Ang pahina sa kalihokan niini nga semana makatabang sa inyong mga anak nga maghunahuna og mga paagi nga sila mahimong sama sa kasundalohan ni Helaman. Ikonsiderar ang pagpakigbahin sa pipila sa mga kinaiya sa batan-on nga mga sundalo gikan sa Alma 53:20–21 aron sa pagpasugod kanila. Mahimong manganta usab kamo og dungan sa “Among Dad-on sa Kalibotan ang Iyang Kamatuoran” (Songbook sa mga Bata, 92–93).

Alma 56:45–48; 57:21

Mahimo akong magmatinud-anon sa unsay matarong nga gitudlo sa akong mga ginikanan.

• Ang batan-on nga mga sundalo ni Helaman mikuha og kusog sa hugot nga pagtuo sa ilang mga inahan sa dihang sila nag-atubang og dako nga hagit. Tingali mahimo nimong basahon ang Alma 56:46–48 ngadto sa inyong mga anak ug dapita sila sa pagpaminaw kon unsa ang gitudlo sa mga inahan niining batan-ong mga lalaki mahitungod sa hugot nga pagtuo. Mahimong mangutana ka nila kon unsay ilang nakat-onan gikan sa ilang mga ginikanan—o ubang matinud-anon nga mga hamtong—mahitungod sa Manluluwas. Nganong importante man nga motuman “nga walay pagkasayop”? (Alma 57:21).

• Sa unsang paagi nga ikaw—sama sa mga inahan sa batan-ong kasundalohan—makaseguro nga ang inyong mga anak makahibalo sa imong hugot nga pagtuo sa Dios? Usa ka paagi mao ang pagpakigbahin kon sa unsang paagi ang imong hugot nga pagtuo makaapekto sa imong kinabuhi. Sama pananglit, sa unsang paagi Siya “miluwas” kanimo sa dihang ikaw “[wala] magduhaduha”?

Seed of Faith [Binhi sa Hugot nga Pagtuo], ni Jay Ward

Alma 53:10–18

Ako makatuman sa akong mga pakigsaad sa Langitnong Amahan.

• Ang inyong mga anak mahimong makahisgot mahitungod sa usa ka panahon sa dihang ang usa ka tawo mihimo ug mituman sa usa ka saad ngadto kanila. Unsay ilang gibati sa dihang gituman ang saad? Mahimo ninyong basahon ang Alma 53:10–18 ug dapita ang inyong mga anak sa pagpangita kon giunsa ni Helaman, sa katawhan ni Ammon, ug sa anak nga mga lalaki sa katawhan ni Ammon paghimo ug pagtuman sa ilang mga saad, o mga pakigsaad. Mahimo nimong ipakigbahin kon sa unsang paagi ang Langitnong Amahan mopanalangin kanimo samtang ikaw motuman sa imong mga pakigsaad.

Alma 61:3–14

Mahimong pilion nako nga dili masuko.

Ikonsiderar ang pagdapit sa inyong mga anak sa paghunahuna mahitungod sa usa ka panahon nga giakusahan sila nga nagbuhat sa usa ka butang nga wala nila buhata. Sultihi sila kon sa unsang paagi kini nahitabo ngadto ni Pahoran (tan-awa sa Alma 60–61; tan-awa usab sa “Kapitulo 35: Si Kapitan Moroni ug si Pahoran,” Mga Sugilanon sa ang Basahon ni Mormon, 95–97). Aron masayod kon unsa ang reaksiyon ni Pahoran, pagpulipuli og basa sa mga bersikulo gikan sa Alma 61:3–14. Unsa ang gibuhat ni Pahoran sa dihang giakusahan siya ni Moroni? (tan-awa sa Alma 61:2–3, 8–9). Unsay atong makat-onan mahitungod sa pagpasaylo gikan sa ehemplo sa Manluluwas? (tan-awa sa Lucas 23:34).

Alang sa dugang nga mga ideya, tan-awa ang isyu karong bulana sa Higala nga magasin.

It’s True, Sir, All Present and Accounted For [Tinuod Kini, Sir, Ang Tanan Anaa ug Naihap], ni Clark Kelley Price.