“Agosto 26–Septiyembre 1: ‘Ang Lig-on nga Sukaranan sa Atong Manunubos.’ Helaman 1–6,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
Agosto 26–Septiyembre 1. Helaman 1–6,” Dali, Sunod Kanako—Alang sa Panimalay ug sa Simbahan: 2024 (2024)
Agosto 26–Septiyembre 1: “Ang Lig-on nga Sukaranan sa Atong Manunubos”
Helaman 1–6
Ang basahon ni Helaman nagrekord sa mga kadaogan ug mga trahedya tali sa mga Nephite ug sa mga Lamanite. Nagsugod kini sa “usa ka makuyaw nga kalisdanan taliwala sa mga katawhan sa mga Nephite.” (Helaman 1:1), ug ang mga kalisdanan padayon nga nagsingabot sa tibuok nga rekord. Dinhi atong mabasa ang mahitungod sa politikanhong intriga, mga pundok sa mga tulisan, pagsalikway sa mga propeta, ug garbo ug kawalay pagtuo diha sa tibuok yuta. Apan nakita usab nato ang mga ehemplo sama ni Nephi ug ni Lehi ug “sa ubay-ubay nga mapainubsanon nga bahin sa mga katawhan,” kinsa wala lamang makasugakod apan espirituhanon nga milahutay (Helaman 3:34). Giunsa nila kini sa paghimo? Giunsa nila sa pagpabiling malig-on samtang misugod sa pagkunhod ug pagkabulag-bulag ang ilang sibilisasyon? Sa samang paagi ang bisan kinsa kanato nga magpabilin nga lig-on diha sa “mapintas nga unos” nga ipadala sa yawa nga “mohampak [dinhi kanato]”—pinaagi sa pagpalig-on sa atong kinabuhi “diha sa lig-on nga sukaranan sa atong Manunubos, nga mao si Kristo, ang Anak sa Dios … usa ka tukoranan diin kon ang mga tawo magtukod dili sila mapukan.” (Helaman 5:12).
Si Nephi ug Lehi Nagpamatuod kang Jesukristo | Helaman 5-7
Si Nephi ug Lehi gidakop sa mga Lamanita tungod sa ilang pagpanudlo bahin sa Ginoo. Dihang gisulayan sila og patay sa mga Lamanita, gipanalipdan sila sa Ginoo pinaagi sa liyok sa kalayo, ug mga anghel nanaog gikan sa kalangitan.
Mga Ideya alang sa Pagkat-on diha sa Panimalay ug sa Simbahan
Ang garbo mobulag kanako gikan sa Espiritu ug sa kalig-on sa Dios.
Samtang imong basahon ang Helaman 1–6, mahimong mamatikdan nimo ang usa ka sundanan sa kinaiya sa mga Nephite. Kon sila matarong, ang Dios mopanalangin kanila, ug sila mouswag. Paglabay sa panahon, nahimo silang mapagarbohon ug daotan, naghimo og mga pagpili nga misangpot sa pagkalaglag ug pag-antos. Dayon sila napaubos ug nadasig sa paghinulsol, ug ang Dios mopanalangin kanila pag-usab. Ang sundanan kanunayng nagbalik-balik gayod nga ang pipila motawag niini nga ang “liyok sa garbo.”
Ang “liyok sa garbo.”
Pangita og mga ehemplo niini nga liyok samtang ikaw nagbasa sa Helaman 1–6. Ania ang pipila ka pangutana sa pagtabang nimo sa pagsabot niini nga sundanan:
-
Unsa nga ebidensiya sa garbo ang imong nakita taliwala sa mga Nephite? (tan-awa, pananglitan diha sa, Helaman 3:33–34; 4:11–13). Nakita ba nimo ang susamang mga ebidensiya sa garbo diha sa imong kaugalingon?
-
Unsa ang mga sangputanan sa garbo ug kadaotan? (tan-awa sa Helaman 4:23–26). Unsa ang mga sangpotanan sa pagpaubos ug paghinulsol? (tan-awa sa Helaman 3:27–30, 35; 4:14–16).
-
Unsa nga mga butang ang gusto ni Helaman nga mahinumdoman sa iyang mga anak nga lalaki? (tan-awa sa Helaman 5:4–12). Sa unsang mga paagi ang paghinumdom niini nga mga kamatuoran makatabang kanimo sa paglikay sa pagkamahimong mapagarbohon?
Tan-awa usab sa “Kapitulo 18: Maglikay sa Garbo,” Mga Pagtulon-an sa mga Presidente sa Simbahan: Ezra Taft Benson (2014), 277–90; “Nagkinahanglan Ko Nimo sa Matag Takna,” Mga Himno, nu. 54.
Ang hugot nga pagtuo kang Kristo nagpuno sa akong kalag og hingpit nga kalipay.
Diha sa Helaman 3, gihulagway ni Mormon ang usa ka panahon sa pagmaya sa dihang ang Simbahan gipanalanginan og maayo nga gani ang mga lider nangahibulong. Base sa unsay imong mabasa sa mga bersikulo 24–32, unsa kaha sa imong hunahuna ang nakaingon niadtong malipayon nga kahimtang? Hinuon, dili tanang miyembro nagpadayon sa kalipay. Timan-i ang kalainan tali sa mga katawhan nga gihulagway sa mga bersikulo 33–35. Unsay imong nakat-onan gikan sa ilang ehemplo?
Tinoa og personal nga paggamit. Si propeta Mormon migamit sa pulong “sa ingon kita nakakita” aron sa paghatag og gibug-aton sa importante nga mga kamatuoran samtang iyang giminubo ang Basahon ni Mormon. Sama pananglit, unsa ang gusto niya nga atong makaplagan diha sa Helaman 3:27–30? Samtang magtuon ka sa mga kasulatan, mahimo kang mohunong og panagsa sa pagkompleto sa hugpong sa mga pulong nga “ug sa ingon kita makakita” kalabot sa unsay imong nabasa.
Makapasidungog ko sa ngalan sa Manluluwas.
Ang pagbasa sa Helaman 5:6–7 mahimong makadasig kanimo sa paghunahuna sa mga ngalan nga gihatag kanimo, lakip sa mga apelyido. Unsa man ang gipasabot niini nga mga ngalan para nimo? Unsaon nimo nga makapasidungog niini? Gani mas importante, hunahunaa kon unsay gipasabot sa pagdala sa ngalan sa Manluluwas (tan-awa sa Moroni 4:3). Unsaon nimo sa pagpasidungog nianang sagrado nga ngalan?
Kon himoon nako si Jesukristo nga akong tukoranan, dili ko mapukan.
Unsa ang kahulogan niini nganha kanimo nga “motukod sa inyong tukoranan” diha sa “sukaranan sa atong Manunubos”? (Helaman 5:12). Giunsa nimo pagkaplag og kahilwasan diha ni Jesukristo gikan sa mga unos sa kinabuhi? Samtang basahon nimo ang Helaman 5:12–52, tinoa kon sa unsang paagi nga si Nephi ug si Lehi napanalanginan tungod sa paglig-on sa ilang hugot nga pagtuo diha sa sukaranan sa ilang Manunubos.
Makatabang sa ubang tawo ang paghanduraw sa unsay ilang gitun-an. Sa paghulagway sa Helaman 5:12, mahimo kang magtukod og gamay nga estruktura diha sa lainlaing matang sa pundasyon. Makahimo dayon ka og “mapintas nga unos” pinaagi sa pagsablig og tubig diha niini ug sa paggamit og bentilador [fan] sa pagmugna og hangin. Unsa nga mga panabot ang mahatag niini kanimo mahitungod sa pagtukod sa imong pundasyon diha ni Jesukristo?
Ang bersikulo 50 naghisgot “sa ka dako sa mga kamatuoran” nga nadawat sa mga Lamanite. Ang pagbasa sa Helaman 5:12–52 mahimong mopahinumdom sa imong hunahuna sa mga ebidensiya nga gihatag sa Dios kanimo. Sama pananglitan, tingali ang “usa ka hunghong” gikan sa Espiritu Santo nakapalig-on sa imong hugot nga pagtuo diha sa Manluluwas (Helaman 5:30; tan-awa usab diha sa Doktrina ug mga Pakigsaad 88:66). O tingali ikaw anaa sa kangitngit ug nangamuyo ngadto sa Dios alang sa mas dako nga hugot nga pagtuo (tan-awa sa Helaman 5:40–47). Unsa ang ubang mga kasinatian ang nakatabang kanimo sa pagtukod sa imong sukaranan diha ni Jesukristo?
Tan-awa usab sa Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 93–96; Sean Douglas, “Pag-atubang sa Atong Espirituwal nga mga Bagyo pinaagi sa Pagtuo kang Kristo,” Liahona, Nob. 2021, 109–11.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Gusto sa Langitnong Amahan nga magmapainubsanon ko.
-
Ikonsiderar ang pagdapit sa inyong mga anak sa pagdrowing sa ilang kaugalingon nga bersiyon sa “liyok sa garbo,” base sa diagram sa ibabaw. Dayon, samtang mag-uban kamo sa pagbasa sa Helaman 3:24, 33–34 ug 4:11–15, mahimo nilang itudlo ang mga bahin sa liyok nga gihulagway niini nga mga bersikulo. Sa unsang paagi kita makapili nga magmapainubsanon—ug magpabilin niana nga paagi?
Akong tukoron ang akong pundasyon diha kang Jesukristo.
-
Ikonsiderar ang paggamit og usa ka hulagway sa usa ka templo aron sa pagsugod og panag-istoryahanay mahitungod kon nganong ang mga bilding nagkinahanglan og lig-on nga mga pundasyon. O mahimo nimong tan-awon ang pundasyon sa imong panimalay o bilding sa Simbahan. Aron sa paghatag og gibug-aton sa kalig-on sa usa ka solido kaayo nga pundasyon, ang inyong mga anak makasulay sa pag-irog og usa ka bato pinaagi sa paghuyop niini. Samtang magkauban ninyong basahon ang Helaman 5:12, pangutan-a ang inyong mga anak kon nganong si Jesukristo mao “ang tinuod nga tukoranan” alang sa atong mga kinabuhi. Sa unsang paagi atong matukod ang atong mga kinabuhi diha Kaniya? (tan-awa sa Helaman 3:27–29, 35 ug Mga Artikulo sa Hugot nga Pagtuo 1:4).
-
Dapita ang inyong mga anak sa pagtukod og tore gamit ang mga bloke o ubang mga materyales diha sa nagkalainlaing matang sa mga pundasyon (sama sa binola nga mga gapas o sa usa ka sapya nga bato). Sa unsang paagi ang solido nga pundasyon sama ni Jesukristo? Mahimo silang modugang og usa ka bloke ngadto sa estruktura alang sa matag ideya nga ilang ipakigbahin mahitungod sa unsay ilang mabuhat aron sa pagsunod Kaniya.
Ang Espiritu Santo mohunghong sa usa ka hinay, hinagawhaw nga tingog.
-
Ang tingog nga gihulagway diha sa Helaman 5:29–30, 45–47 nagtudlo kanato og usa ka paagi nga ang Espiritu Santo mamulong kanato. Aron sa pagtabang sa inyong mga anak nga makasabot niini nga kamatuoran, ikonsiderar ang pagbasa sa “Kapitulo 37: Si Nephi ug si Lehi sa Bilanggoan” (Mga Sugilanon sa Ang Basahon ni Mormon, 99–102). Kon maghisgot ka bahin sa tingog nga nadungog sa mga tawo, pagsulti gamit ang malumo nga tingog. Balik-balika ang istorya sa pipila ka higayon, ug dapita ang mga bata sa paghunghong uban kanimo. Tabangi sila nga maghunahuna og ubang mga paagi nga ang Espiritu Santo makapamulong kanato. Aron sa pagpalig-on niini nga baroganan, mahimo kamong manganta og dungan sa “Ang Malinawon nga Gamay nga Tingog” (Songbook sa mga Bata, 141).
Pinaagi sa paghinulsol ang espirituhanon nga kangitngit mapulihan og kahayag.
-
Aron sa paghatag og gibug-aton sa unsay gitudlo sa Helaman 5:20–41 mahitungod sa kangitngit ug kahayag, sulayi ang pagbasa o pag-summarize niini nga mga bersikulo diha sa kangitngit, gamit lamang ang usa ka flashlight alang sa kahayag. Ang inyong mga anak mahimong maminaw alang sa unsay gikinahanglan nga buhaton sa mga tawo aron ang kangitngit matangtang. Dayon pasigaa ang mga suga, ug magkauban nga basaha ang mga bersikulo 42–48. Unsa ang gitudlo niini nga mga bersikulo kanato mahitungod sa paghinulsol?
Alang sa dugang nga mga ideya, tan-awa ang isyu karong bulana sa Higala nga magasin.
Bisan diha sa bilanggoan, si Nephi ug si Lehi napanalipdan pinaagi sa gahom sa Dios.
© Ang Basahon ni Mormon alang sa mga Batan-ong mga Tigbasa, Nephi and Lehi Encircled by a Pillar of Fire [Si Nephi ug Lehi nga Giliyokan sa daw Haligi sa Kalayo], ni Briana Shawcroft; dili mahimong kopyahon