“Septiyembre 9–15: ‘Malipayon nga mga Balita sa Dako nga Kalipay.’ Helaman 13–16,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Septiyembre 9–15. Helaman 13–16,” Dali, Sunod Kanako—Alang sa Panimalay ug sa Simbahan: 2024 (2024)
Samuel the Lamanite on the Wall [Samuel nga Lamanite sa Ibabaw sa Paril], ni Arnold Friberg
Septiyembre 9–15: “Malipayon nga mga Balita sa Dako nga Kalipay”
Helaman 13–16
Sa unang higayon nga gisulayan ni Samuel nga Lamanite ang pagpakigbahin sa “malipayon nga mga balita” sa Zarahemla (Helaman 13:7), siya gisalikway ug gipalayas sa tig-a og kasingkasing nga mga Nephite. Mahimong moingon ka nga ingon og mitukod sila og usa ka dili masudlan nga paril libot sa ilang mga kasingkasing nga mipugong kanila gikan sa pagdawat sa mensahe ni Samuel. Nasabtan ni Samuel ang kaimportante sa mensahe nga iyang gidala ug gipakita ang hugot nga pagtuo pinaagi sa pagsunod sa sugo sa Dios “nga kinahanglan mobalik siya pag-usab, ug managna” (Helaman 13:3). Sama ni Samuel, tanan kita makasugat og mga paril samtang kita “[mo]andam sa agianan sa Ginoo” (Helaman 14:9) ug maningkamot sa pagsunod sa Iyang mga propeta. Ug sama ni Samuel, kita usab magpamatuod kang Jesukristo, “nga sa pagkatinuod moanhi gayod,” ug modapit sa tanan nga “motuo sa iyang ngalan” (Helaman 13:6; 14:13). Dili tanan maminaw, ug ang uban mahimong aktibo nga mosupak kanato. Apan kadtong motuo niini nga mensahe nga adunay hugot nga pagtuo kang Kristo makakita nga sa pagkatinuod kini usa ka mensahe sa “malipayon nga mga balita sa dako nga kalipay” (Helaman 16:14).
Si Samuel nga Lamanita Nanagna mahitungod ni Jesukristo | Helaman 13 – 16; 3 Nephi 1
Si Samuel nga Lamanita nanagna mahitungod sa pag-anhi ni Kristo, nga nakapasuko sa mga Nephita. Dihang ang mga Nephita mitira og mga pana ug milabay og mga bato kang Samuel, gipanalipdan siya sa Ginoo ug ang tanang pana ug bato wala makaigo kaniya.
Mga Ideya alang sa Pagkat-on diha sa Panimalay ug sa Simbahan
Ang Ginoo naghatag og mga pasidaan pinaagi sa Iyang mga propeta.
Diha sa mga kasulatan, ang mga propeta usahay gitandi ngadto sa mga tigbantay sa paril o tore kinsa nagpasidaan sa peligro (tan-awa sa Isaias 62:6; Ezequiel 33:1–7). Samtang imong tun-an ang mga pulong ni Samuel diha sa Helaman 13, hunahunaa kon sa unsang paagi siya sama sa usa ka tigbantay alang kanimo. Unsa ang iyang gisulti nga ingon og mahinungdanon sa atong panahon? (tan-awa ilabi na sa mga bersikulo 8, 21–22, 26–29, 31, ug 38). Sama pananglit, unsa ang gitudlo ni Samuel mahitungod sa paghinulsol? mahitungod sa pagpaubos ug sa katigayonan? mahitungod sa pagtinguha og kalipay “sa pagbuhat sa kadaotan”?
Mahimo usab ka nga mosiksik sa bag-ohay nga mga mensahe sa komperensiya alang sa susama nga mga pasidaan nga gihatag sa Ginoo pinaagi sa mga propeta sa modernong panahon. Unsa ang imong gibati nga nadasig nga buhaton mahitungod niini nga mga pasidaan?
Pangita og mga sundanan. Ang usa ka sundanan mao ang usa ka plano o modelo nga mahimong gamiton isip usa ka giya alang sa katumanan sa usa ka buluhaton. Diha sa mga kasulatan, makakita kita og mga sundanan nga nagpakita kon giunsa pagtuman sa Ginoo ang Iyang buhat, sama sa pagpadala sa Iyang mga sulugoon alang sa pagpasidaan sa katawhan.
Samtang kita naminaw sa mga propeta, sila motudlo ngadto ni Jesukristo
Ang Dios nagdapit kanako sa paghinulsol.
Ang mga pasidaan ni Samuel bahin sa mga paghukom sa Dios makanunayong naglakip og maluluy-on nga pagdapit nga maghinulsol. Pangitaa kini nga mga pagdapit diha sa tibuok Helaman 13–15 (tan-awa ilabi na ang Helaman 13:6–11; 14:15–19; 15:7–8). Unsa ang imong nakat-onan gikan niini nga mga bersikulo mahitungod sa paghinulsol? Ang ubang mga tawo nagtan-aw sa paghinulsol isip usa ka grabe nga silot—usa ka butang nga likayan. Sa imong opinyon, sa unsang paagi gusto ni Samuel nga makita sa mga Nephite ang paghinulsol?
Aron mapalawman ang imong pagtuon, mahimo nimong basahon ang mensahe ni Presidente Russell M. Nelson nga “Kita Makabuhat og Mas Maayo pa ug Mahimong mas Maayo” (Liahona, Mayo 2019, 67). Sa unsang paagi niya gihatagan og kahulogan ang paghinulsol? Unsa nga mga panalangin bahin sa sinsero nga paghinulsol ang imong makapalagan niini nga mensahe? Mahimong mangita usab ka og piho nga mga butang nga gidapit kita sa propeta sa pag-usab. Unsa ang gisulti sa Espiritu Santo nga kinahanglan nimong usbon? Ikonsiderar ang pagsulat sa personal nga pagdayag nga imong madawat.
Sa unsang paagi ang paghinulsol lahi kay sa pag-usab sa imong batasan lamang? Nganong importante nga modawat sa pagdapit sa Dios nga maghinulsol? Samtang mamalandong ka niini, ikonsiderar ang pagkanta o pagpaminaw sa usa ka himno nga nagpahayag niini nga pagdapit, sama sa “Unsa Kalumo ang Sugo sa Dios” (Mga Himno, nu. 71).
Tan-awa usab sa “Si Jesukristo Motabang Kaninyo,” Alang sa Kalig-on sa mga Kabatan-onan: Usa ka Giya sa Paghimo og mga Pagpili, 6–9.
Si Samuel nga Lamanita Nanagna mahitungod ni Jesukristo | Helaman 13 – 16; 3 Nephi 1
Si Samuel nga Lamanita nanagna mahitungod sa pag-anhi ni Kristo, nga nakapasuko sa mga Nephita. Dihang ang mga Nephita mitira og mga pana ug milabay og mga bato kang Samuel, gipanalipdan siya sa Ginoo ug ang tanang pana ug bato wala makaigo kaniya.
Ang Dios mipadala og mga timailhan ug mga katingalahan aron sa pagpamatuod sa pagkatawo ug kamatayon sa Manluluwas.
Diha sa Helaman 14, gipasabot ni Samuel nga ang Ginoo mihatag og mga timailhan kabahin sa pagkatawo o kamatayon sa Manluluwas aron ang katawhan “unta masayod sa … iyang pag-anhi” ug motuo sa iyang ngalan” (Helaman 14:12). Samtang ikaw magtuon sa Helaman 14, timan-i ang mga timailhan sa pagkatawo sa Manluluwas diha sa mga bersikulo 1–8 ug ang mga timailhan sa Iyang kamatayon diha sa mga bersikulo 20–28. Ngano kaha nga kini nga mga timailhan mahimong epektibo nga mga paagi sa pagpaila sa pagkatawo ug kamatayon ni Jesukristo?
Ang ubang mas personal ug dili kaayo mahinuklugong mga timailhan makatabang kanimo nga “motuo sa ngalan [sa Manluluwas].” Unsa ang Iyang gibuhat aron sa pagpalig-on sa imong pagtuo Kaniya?
Unsa nga pahimangno ang gihatag mahitungod sa mga timailhan diha sa Helaman 16:13–23? Sa unsang paagi ikaw makalikay sa kinaiya sa mga tawo nga gihulagway dinhi niini nga mga bersikulo?
Tan-awa usab diha sa Alma 30:43–52; Ronald A. Rasband, “Pinaagi sa Balaan nga Plano,” Liahona, Nob. 2017, 55–57.
Ang pagpanton gikan sa Ginoo usa ka timailhan sa Iyang gugma.
Ang mga pulong ni Samuel naglangkob og grabe nga mga pagpanton, apan ang Helaman 15:3 naghatag kanato og talagsaong panglantaw kabahin sa pagpanton gikan sa Ginoo. Sa unsang paagi nga ang pagpanton gikan sa Ginoo usa ka timailhan sa Iyang gugma? Unsa nga ebidensiya ang imong nakita bahin sa gugma ug kaluoy sa Ginoo diha sa mga panagna ug mga pasidaan ni Samuel?
Ikonsiderar ang pagtuon sa mensahe ni Elder D. Todd Christofferson nga “Ako Nagabadlong ug Nagapanton sa Akong Gihigugma” (Liahona, Mayo 2011, 97–100), mangita alang sa tulo ka katuyoan sa balaanon nga pagpanton. Kanus-a nimo nakita ang Dios nga naglihok niini nga mga paagi sa imong kinabuhi?
Ang mga propeta nagpunting kanako kang Jesukristo.
Diha sa Helaman 16, unsa ang imong nakat-onan gikan niadtong kinsa midawat sa mga pagtulon-an ni Samuel? Unsa ang imong nakat-onan gikan niadtong kinsa misalikway kaniya? Hunahunaa kon sa unsang paagi ang pagsunod sa buhi nga mga propeta nakatabang kanimo nga mas magpaduol ngadto ni Jesukristo.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Ang Dios mahimong makig-istorya kanako diha sa akong kasingkasing.
-
Unsaon nimo pagtudlo ang inyong mga anak nga ang Dios mahimong makig-istorya sa atong kasingkasing, sama sa Iyang gibuhat alang kang Samuel? Tingali mahimo kang mohangyo kanila sa pagpakita kanimo sa lainlaing paagi sa komunikasyon nga walay mga pulong (sama sa mga lihok o mga ekspresyon sa nawong). Mahimong mosangpot kini sa usa ka panaghisgot mahitungod sa lainlaing paagi nga ang Langitnong Amahan makig-istorya kanato. Isip kabahin niini nga panaghisgot, ikaw ug ang inyong mga anak mahimong motan-aw sa usa ka hulagway ni Samuel ang Lamanite (kini nga latid adunay duha) ug mobasa sa Helaman 13:2–5 samtang ang inyong mga anak maminaw kon sa unsang paagi ang Dios miingon kang Samuel kon unsay isulti.
-
Daghan kanato—ilabi na ang mga bata—nagkinahanglan og tabang sa pagkat-on kon unsaon sa pag-ila sa paagi ug kanus-a ang Dios nakig-istorya kanato. Mahimong sultihan nimo ang inyong mga anak bahin sa panahon sa dihang ang Espiritu Santo mitabang kanimo nga masayod sa imong kasingkasing kon unsay gusto sa Dios nga imong buhaton o isulti. Ipasabot kon sa unsang paagi nimo nahibaloan nga ang Dios nakig-istorya kanimo. Tingali ang inyong mga anak makapakigbahin usab og bisan unsang susama nga mga kasinatian nga ilang nasinati.
Ang mga propeta nagtudlo mahitungod ni Jesukristo.
-
Ang pagpanganta og dungan sa “Pag-adto ni Jose sa Bethlehem” (Songbook sa mga Bata, 22) mahimong usa ka maayo nga paagi sa pagtudlo sa inyong mga anak sa unsay gitudlo ni Samuel mahitungod ni Jesukristo. Ang pagpapakigbahin sa “Kapitulo 40: Si Samuel ang Lamanite Nagsulti Mahitungod ni Jesukristo” (Mga Sugilanon sa ang Basahon ni Mormon, 111–13) lain sab nga paagi. Unsay gitudlo ni Samuel mahitungod sa Manluluwas? Tingali mahimo kang mopakigbahin usab sa unsay gitudlo sa mga propeta sa modernong panahon mahitungod Kaniya. Sa unsang paagi ang ilang mga pulong mopalig-on sa atong hugot nga pagtuo Kaniya?
Ako mapanalanginan samtang mosunod ko sa propeta.
-
Mapalig-on nimo ang pagsalig sa inyong mga anak diha sa propeta pinaagi sa pagpakita nila og mga ehemplo sa mga tawo nga matinud-anon. Ang pipila niini makita sa Helaman 16:1, 5. Samtang imong basahon, ang inyong mga anak mahimong mobarog kon makadungog sila og usa ka butang nga gibuhat sa mga tawo sa dihang sila mituo sa mga pulong ni Samuel. Dayon, samtang inyong basahon ang mga bersikulo 2 ug 6, ang inyong mga anak mahimong molingkod kon makadungog sila og usa ka butang nga gihimo sa mga tawo sa dihang wala sila motuo. Unsaon nato pagpakita nga nagtuo kita sa mga pulong sa buhing propeta? Sultihi ang mga bata kon sa unsang paagi nga ikaw napanalanginan samtang imong gisunod ang tambag sa Ginoo pinaagi sa Iyang mga propeta.
Alang sa dugang nga mga ideya, tan-awa ang isyu karong bulana sa Higala nga magasin.
Samuel the Lamanite [Samuel nga Lamanite], ni Lester Yocum.