I Am the Light of the World [Ako ang Kahayag sa Kalibotan], ni James Fullmer

Septiyembre 23–29: “Tindog ug Duol Kamo ngari Kanako”

3 Nephi 8–11

“Tan-awa, Ako mao si Jesukristo, kinsa gipamatud-an sa mga propeta nga moanhi sa kalibotan” (3 Nephi 11:10). Pinaagi niini nga mga pulong, ang nabanhaw nga Manluluwas mipaila sa Iyang kaugalingon, mituman sa kapin sa 600 ka tuig nga mga panagna sa Basahon ni Mormon. “Kana nga pagpakita ug kana nga pamahayag,” misulat si Elder Jeffrey R. Holland, “milangkob sa sentro nga punto, sa labing taas nga higayon, diha sa tibuok kasaysayan sa Basahon ni Mormon. Usa kadto ka pagpakita ug lagda nga mipahibalo ug midasig sa matag propeta nga Nephite. … Ang tanan naghisgot bahin kaniya; nanganta bahin kaniya, nangandoy bahin kaniya, ug nag-ampo alang sa iyang pagpakita—apan siya dinhi gayod sa pagkatinuod. Ang labing nindot nga mga panahon! Ang Dios kinsa mihimo sa tanang ngitngit nga kagabhion ngadto sa mahayag nga kabuntagon miabot na” (Christ and the New Covenant: The Messianic Message of the Book of Mormon [1997], 250–51).

Tan-awa usab sa “Si Jesukristo Mipakita didto sa Karaang Amerika” (bidyo), Librarya sa Ebanghelyo.

Si Jesukristo Mipakita didto sa Karaang Amerika | 3 Nephi 8–11

Tulo ka adlaw sa wala pa si Jesukristo mopakita sa katawhan sa Karaang Amerika, nag-antos sila og grabing mga katalagman—mga linog, mga unos ug kalayo nga mikutlo og daghang kinabuhi ug miguba sa tibuok siyudad. Tulo ka adlawng kangitngit nagsugod.

Mga Ideya alang sa Pagkat-on diha sa Panimalay ug sa Simbahan

3 Nephi 8–11

Si Jesukristo mao ang Kahayag sa Kalibotan.

Tingali mabantayan nimo nga ang mga tema kalabot ngadto sa kangitngit ug kahayag gibalik-balik sa tibuok 3 Nephi 8–11. Unsa ang imong makat-onan gikan niini nga mga kapitulo mahitungod sa espirituhanon nga kangitngit ug kahayag? (tan-awa sama pananglit sa, 3 Nephi 8:19–23; 9:18; 10:9–13). Unsay magdala og kangitngit nganha sa imong kinabuhi? Unsay magdala og kahayag? Ngano kaha nga ang Manluluwas mipaila sa Iyang Kaugalingon isip “ang kahayag ug ang kinabuhi sa kalibotan”? (3 Nephi 9:18; 11:11).

Ang mga panghitabo nga gihulagway diha sa 3 Nephi 9–11 usa sa labing sagrado diha sa Basahon ni Mormon. Basaha kini og hinay, ug pamalandongi sa mainampingon nga paagi. Ania ang pipila ka pangutana aron sa pagtabang kanimo. Ikonsiderar ang pagrekord sa mga impresyon nga moabot kanimo.

• Unsa kaha ang akong bation kon ako anaa taliwala niini nga mga tawo?

• Unsa ang nakapadani kanako mahitungod sa Manluluwas niini nga mga kapitulo?

• Unsaon nako pagkahibalo nga si Jesukristo ang akong Manluluwas?

• Sa unsang paagi Siya nahimong usa ka kahayag sa akong kinabuhi?

Tan-awa usab diha sa Sharon Eubank, “Kristo: Ang Kahayag nga Nagdan-ag taliwala sa Kangitngit,” Liahona, Mayo 2019, 73–76.

Irekord ang mga impresyon. Kon imong isulat ang espirituhanon nga mga impresyon nga imong madawat, mas lagmit ka nga makadawat og dugang.

3 Nephi 9–10

Si Jesukristo matinguhaon nga mopasaylo.

Si Elder Neil L. Andersen mipahayag, “Ako mopamatuod nga ang Manluluwas makahimo ug andam nga mopasaylo sa atong mga sala” (“Paghinulsol … Aron Ako Moayo Kaninyo,” Liahona, Nob. 2009, 41). Siksika ang 3 Nephi 9–10 alang sa ebidensiya sa kamatinguhaon ni Kristo nga mopasaylo. Unsay imong makaplagan diha sa 3 Nephi 9:13–22; 10:1–6 nga nagtabang nimo nga mobati sa Iyang gugma ug kaluoy? Kanus-a nimo nabati Siya nga “mitigom” ug “miamuma” kanimo (tan-awa sa 3 Nephi 10:4).

3 Nephi 9:19–22

Ang Ginoo nagkinahanglan sa “masulub-on nga kasingkasing ug mahinulsolon nga espiritu.”

Sa wala pa ang pag-anhi sa Manluluwas, ang hayop nga mga sakripisyo mga simbolo sa sakripisyo ni Jesukristo (tan-awa sa Moises 5:5–8). Unsa ang bag-o nga sugo nga gihatag sa Manluluwas diha sa 3 Nephi 9:20–22? Sa unsa nga paagi nga kini mipunting kanato paingon ngadto Kaniya ug sa Iyang sakripisyo?

Unsa ang gipasabot alang kanimo sa paghalad og sakripisyo sa usa ka masulub-on nga kasingkasing ug mahinulsolon nga espiritu? Nganong mibati ka nga ang Manluluwas gusto niini nga sakripisyo gikan kanimo?

3 Nephi 11:1–8

Makakat-on ako sa pagpamati ug pagsabot sa tingog sa Dios.

Unsaon nimo sa pagkahibalo kon ang Dios nakigsulti kanimo? Tingali ang kasinatian sa mga tawo diha sa 3 Nephi 11:1–8 makatabang kanimo sa pagsabot sa pipila ka baroganan kabahin sa pagpaminaw ug pagsabot sa tingog sa Dios. Tingali matiman-an nimo ang mga kinaiya sa tingog sa Dios nga nadungog sa katawhan ug unsay ilang gihimo aron mas maayo nga makasabot niini.

Mahimong makatabang usab ang pagsuhid sa uban nga mga kasulatan nga naghulagway sa tingog sa Dios o sa impluwensiya sa Iyang Espiritu. Ania ang pipila. Tingali, human sa pagbasa niini, makasulat ka og pipila ka sumbanan alang sa pag-ila sa pagpadayag: 1 Mga Hari 19:11–12; Mga Taga-Galacia 5:22–23; Alma 32:27–28, 35; Helaman 10:2–4; Ether 4:11–12; Doktrina ug mga Pakigsaad 9:7–9; 11:11–14.

Makabenepisyo usab ka sa pagpaminaw sa mga propeta, apostoles, ug ubang mga lider sa Simbahan karon nga adunay kasinatian sa pagpaminaw ug pagsunod sa tingog sa Dios. Pipila kanila nagpakigbahin sa ilang mga kasinatian diha sa “Paminaw Kaniya!” nga koleksiyon sa bidyo diha sa Librarya sa Ebanghelyo. Ikonsiderar ang pagtan-aw og usa o dugang pa.

Unsaon nimo sa paggamit ang unsay imong nakat-onan sa mas klaro nga pagpaminaw ug pag-ila sa tingog sa Dios?

Tan-awa usab sa Russell M. Nelson, “Paminaw Kaniya,” Liahona, May 2020, 88–92; “Mipadala sa Bugtong Anak,” Songbook sa mga Bata, 20; Mga Hilisgotan sa Ebanghelyo, “Personal nga Pgpadayag,” Librarya sa Ebanghelyo.

One by One [Tagsa-tagsa], ni Walter Rane

3 Nephi 11:8–17

Si Jesukristo nagdapit kanako sa pag-angkon og personal nga pagpamatuod Kaniya.

Nagpundok ang mga 2,500 ka tawo didto sa templo sa Bountiful sa dihang mipakita si Jesukristo (tan-awa sa 3 Nephi 17:25). Bisan niining dako nga gidaghanon, ang Manluluwas midapit kanila sa “tagsa-tagsa” sa pagbati sa mga agi sa mga lansang diha sa Iyang mga kamot ug mga tiil (3 Nephi 11:14–15). Samtang ikaw magbasa, handurawa kon sama sa unsa kaha ang maatua didto. Sa unsang mga paagi ang Manluluwas nagdapit kanimo sa “[pag]tindog ug [pag]duol ngadto” Kaniya? (3 Nephi 11:14).

Samtang ikaw naghunahuna kon unsa kaha ang magkat-on gikan sa nabanhaw nga Manluluwas sa dihang Siya nagtudlo sa Amerika, ikonsiderar ang pagsusi niining inter-aktibo nga kasinatian.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Tungod kay karong Dominggo mao ang Ikalima nga Dominggo sa bulan, ang mga magtutudlo sa Primary giawhag sa paggamit sa mga kalihokan sa pagkat-on diha sa “Apendiks B: Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi.”

3 Nephi 8–9

Kon anaa ako sa kangitngit, si Jesukristo mahimo nga akong kahayag.

• Sa pagtabang sa inyong mga anak nga makasabot sa mga kasinatian nga gihulagway diha sa 3 Nephi 8–9, makaistorya ka og balik o makapaminaw sa mga bahin sa usa ka rekording niini nga mga kapitulo diha sa usa ka ngitngit nga lawak. Hisgoti kon sama kaha sa unsa ang maanaa sa kangitngit sulod sa tulo ka adlaw. Dayon mahimo kang maghisgot mahitungod kon nganong si Jesukristo mitawag sa Iyang Kaugalingon nga Kahayag sa Kalibotan” (tan-awa sa 3 Nephi 9:18). Unsa may gidapit ni Jesus nga buhaton sa mga tawo, ug nato, aron mahimo Siya nga atong kahayag? (tan-awa sa 3 Nephi 9:20–22).

3 Nephi 10:4–6

Si Jesus manalipod sa Iyang katawhan sama nga ang himongaan manalipod sa iyang mga piso.

• Ang hulagway sa usa ka himongaan nga nagpundok sa iyang mga piso makahimo og gamhanang himan sa pagtudlo sa pagtabang sa mga bata sa pagsabot sa kinaiya ug misyon sa Manluluwas. Mahimo nimong basahon ang 3 Nephi 10:4–6 samtang ang imong pamilya magtan-aw sa usa ka hulagway sa usa ka himongaan ug sa mga piso. Nganong kinahanglan nga pundokon sa usa ka himongaan ang iyang mga piso? Nganong ang Manluluwas gusto nga mopundok kanato paduol ngadto Kaniya? Unsaon nato pagduol ngadto Kaniya alang sa kahilwasan [safety]?

3 Nephi 11:1–15

Si Jesukristo nagdapit kanako sa pagduol ngadto Kaniya.

• Unsaon nimo sa pagtabang sa inyong mga anak nga mobati sa Espiritu samtang magkauban kamo nga mobasa sa 3 Nephi 11:1–15? Tingali makapangutana ka kanila sa pagsulti kanimo kon sila makakita og usa ka butang niini nga mga bersikulo nga makatabang nila aron mobati sa gugma sa Dios. Makabuhat ka sa susama uban ang mga hulagway niini nga latid o sa bidyo nga “Si Jesukristo Nagpakita sa Templo” (Librarya sa Ebangheyo). Sultihi ang inyong mga anak unsa ang imong gibati sa dihang imong gibasa ug gipamalandongan kini nga mga hitabo. Tugoti sila nga mopakigbahin usab sa ilang mga pagbati.

  Si Jesukristo Nagpakita sa Templo | 3 Nephi 11:1–17

  Ang katawhan sa Karaang Amerika miadto sa Bountiful ug nagpundok. Ilang nadungog ang tingog sa Dios nga Amahan nga nagpaila sa Iyang Anak. Sila nakasaksi sa pagpaubos ni Jesus gikan sa langit ug nagpamatuod nga Siya ang Manluluwas sa kalibotan.

3 Nephi 11:1–8

Ang Dios mamulong kanako sa usa ka malumo, gamay nga tingog.

• Tingali makahimo ka sa pagbasa sa pipila niini nga mga bersikulo sa hinay, “gamay nga tingog” (3 Nephi 11:3). O mahimo nimong ipatukar ang usa ka rekording sa usa ka awit sama sa “Mipadala sa Bugtong Anak” (Songbook sa mga Bata, 20) nga malumo kaayo nga lisod kining paminawon. Unsay gikinahanglang buhaton sa mga tawo aron makasabot sa tingog gikan sa langit? (tan-awa sa mga bersikulo 5–7). Unsa ang atong makat-onan gikan sa ilang kasinatian?

3 Nephi 11:21–26

Gusto ni Jesukristo nga mabunyagan ako.

• Samtang imong basahon ang 3 Nephi 11:21–26, mahimo nimong dapiton ang imong mga bata sa pagtindog sa matag higayon nga madungog nila ang pulong nga bunyag. Unsa ang gitudlo ni Jesus mahitungod sa bunyag? Kon ang inyong mga anak nakakita na og bunyag kaniadto, hangyoa sila sa paghulagway kon unsay ilang nakita. Nganong gusto ni Jesus nga mabunyagan kita?

Alang sa dugang nga mga ideya, tan-awa ang isyu karong bulana sa Higala nga magasin.

One Shepherd [Usa ka Magbalantay sa Karnero], ni Howard Lyon.