“Septiyembre 30–Oktubre 6: ‘Ako mao ang Balaod, ug ang Kahayag.’ 3 Nephi 12–16,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Septiyembre 30–Oktubre 6. 3 Nephi 12–16,” Dali, Sunod Kanako—Alang sa Panimalay ug sa Simbahan: 2024 (2024)
Third Nephi: These Twelve Whom I Have Chosen [Ikatulong Nephi: Kining Napulog Duha Kinsa Akong Napili], ni Gary L. Kapp
Septiyembre 30–Oktubre 6: “Ako Mao ang Balaod, ug ang Kahayag”
3 Nephi 12–16
Sama sa mga disipulo ni Jesus kinsa mipundok sa pagpaminaw sa Wali sa Bungtod sa Galilea, ang mga tawo kinsa mipundok diha sa templo sa Bountiful mipuyo sa balaod ni Moises. Gisunod nila kini tungod kay nagpunting kini sa ilang mga kalag ngadto ni Kristo (tan-awa sa Jacob 4:5), ug karon si Kristo mibarog sa ilang atubangan, nagpahayag og mas taas nga balaod. Apan bisan kadtong uban kanato nga wala gayod mipuyo sa balaod ni Moises makaila nga ang sumbanan nga gitakda ni Jesus alang sa Iyang mga disipulo usa ka taas nga sumbanan. “Ako manghinaot nga kamo mahimo nga hingpit,” mipahayag Siya (3 Nephi 12:48). Kon kini naghimo kanimo sa pagbati og kakulang, hinumdomi nga miingon usab si Jesus, “Bulahan ang mga kabos sa espiritu kinsa moduol kanako, kay ila ang gingharian sa langit” (3 Nephi 12:3). Kining mas taas nga balaod usa ka pagdapit—laing paagi sa pagsulti nga “Duol ngari kanako aron kamo maluwas” (3 Nephi 12:20). Sama sa balaod ni Moises, kini nga balaod nagtudlo kanato ngadto kang Kristo—ang mao lamang Usa kinsa makaluwas ug makahingpit kanato. “Tan-awa,” miingon Siya, “Ako mao ang balaod, ug ang kahayag. Tan-aw ngari kanako, ug lahutay hangtod sa kataposan, ug ikaw mabuhi” (3 Nephi 15:9).
Mga Ideya alang sa Pagkat-on diha sa Panimalay ug sa Simbahan
Ako mamahimong usa ka tinuod nga disipulo ni Jesukristo.
Aniay usa ka paagi sa pagtuon ug paggamit sa unsay gitudlo sa Manluluwas diha sa 3 Nephi 12–14: Pagpili og usa ka grupo sa mga bersikulo, ug tan-awa kon ikaw maka-summarize ba sa usa ka kapahayag nga magsugod og “Ang tinuod nga mga disipulo ni Jesukristo …” Sama pananglitan, ang usa ka summary sa 3 Nephi 13:1–8 mahimo nga “Ang tinuod nga mga disipulo ni Jesukristo dili magtinguha og pagdayeg diha sa publiko tungod sa pagbuhat og maayo.” Sulayi kini uban niini nga mga tudling:
Human sa pagbasa niini nga mga bersikulo, unsa ang imong gibati nga nadasig nga buhaton aron sa pagsunod ni Jesukristo?
Ang sugo diha sa 3 Nephi 12:48 mahimong makapaluya—gani imposible. Unsa ang imong makat-onan gikan sa mensahe ni Elder Jeffrey R. Holland nga “Busa, Kamo Kinahanglan Magmahingpit—sa Kataposan” (Liahona, Nob. 2017, 40–42) nga makatabang kanimo sa pagsabot sa mga pulong sa Manluluwas dinhi niini nga bersikulo? Sumala sa Moroni 10:32–33, unsay makapahimong posible nga mahimong hingpit sama sa Manluluwas?
Tan-awa usab sa “Sundon Ko Ikaw Ginoo,” Mga Himno, nu. 133; “Si Jesukristo Mitudlo Unsaon sa Pagsunod ang Mas Taas nga Balaod” (bidyo), Librarya sa Ebangheyo.
Si Jesukristo Mitudlo Unsaon sa Pagsunod ang Mas Taas nga Balaod | 3 Nephi 12–14
Si Jesukristo nagpadayon sa Iyang mga pagtudlo atol sa Iyang pagbisita sa katawhan sa Karaang Amerika. Ang mga pulong ni Jesus makita sa Wali sa Bukid ug sa Kabulahanan nga makita sa Ebanghelyo sa Mateo 5 – 7.
Gamit og mga leksiyon nga naggamit og butang. Ang Manluluwas mitudlo og halawom nga mga kamatuoran pinaagi sa paggamit og pamilyar nga mga butang. Makahimo ka sa pagbuhat og susama nga butang samtang magtuon o magtudlo mahitungod sa 3 Nephi 12. Magtan-aw og maggunit og gamayng asin, usa ka kandila, o usa ka kupo mahimong makapalambo og panaghisgotan mahitungod sa mahangtoron nga mga kamatuoran nga gitudlo sa Manluluwas.
3 Nephi 12:1–2; 15:23–24; 16:1–6
Bulahan kadtong kinsa nagtuo nga wala makakita.
Diyutay ra kaayo sa mga anak sa Dios ang nakakita sa Manluluwas ug nakadungog sa Iyang tingog, sama sa mga tawo sa Bountiful. Kadaghanan kanato mga susama sa mga tawo nga gihulagway diha sa 3 Nephi 12:2; 15:23; ug sa 16:4–6. Unsa nga mga saad ang gihimo alang sa ingon niana nga mga tawo dinhi niini nga mga bersikulo? Sa unsang paagi nga kini nga mga saad natuman diha sa imong kinabuhi?
Tan-awa usab sa Juan 20:26–29; 2 Nephi 26:12–13; Alma 32:16–18.
3 Nephi 12:21–30; 13:1–8, 16–18; 14:21–23
Makapaningkamot ako sa pagputli sa mga tinguha sa akong kasingkasing.
Usa ka tema nga tingali imong mamatikdan dinhi niini nga mga kapitulo mao ang pagdapit sa Manluluwas sa pagpuyo og mas taas nga balaod—ang mahimong matarong dili lamang sa atong mga lihok apan usab sulod sa atong mga kasingkasing. Pangitaa kini nga tema sa dihang ang Manluluwas nagsulti mahitungod sa panagbingkil (3 Nephi 12:21–26), imoralidad (3 Nephi 12:27–30), pag-ampo (3 Nephi 13:5–8), ug pagpuasa (3 Nephi 13:16–18). Unsa ang ubang mga ehemplo ang imong makit-an? Unsa ang imong mahimo aron sa pagputli sa mga tinguha sa imong kasingkasing?
Ang Langitnong Amahan mohatag kanako og maayong mga butang kon ako mangayo, mangita, ug manuktok.
Samtang ikaw magbasa sa pagdapit sa Manluluwas diha sa 3 Nephi 14:7–11 sa pagpangayo, pagpangita, ug pagpanuktok, pamalandongi kon unsang “mga maayo nga butang” ang gusto Niya nga imong pangayoon. Ang mosunod nga dugang nga mga kasulatan mahimong motabang kanimo sa pagsabot kon unsaon sa pagpangayo, pagpangita, ug pagpanuktok. Kini motabang usab sa pagpasabot nganong ang ubang mga pag-ampo wala gitubag sa paagi nga imong gilaoman: Isaias 55:8–9; Helaman 10:4–5; Moroni 7:26–27, 33, 37; ug Doktrina ug mga Pakigsaad 9:7–9; 88:64. Sa unsa nga paagi kaha kini nga mga tudling makaapekto sa paagi nga ikaw mangayo, mangita, ug manuktok?
Tan-awa usab sa Milton Camargo, “Pangayo, Pangita, ug Panuktok,” Liahona, Nob. 2020, 106–8.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Mahimo akong maayong ehemplo pinaagi sa pagsunod ni Jesus.
-
Usahay ang mga bata dili makaamgo kon unsa ka dakong panalangin ang mahimo sa ilang mga ehemplo ngadto sa uban. Gamita ang 3 Nephi 12:14–16 sa pagdasig kanila sa pagpadan-ag sa ilang kahayag. Sama pananglit, kon imong basahon ang “kaninyo” o “inyong” dinhi niini nga mga bersikulo, hangyoa ang inyong mga anak sa pagtudlo sa ilang kaugalingon. Sultihi ang mga bata mahitungod sa kahayag nga imong nakita diha kanila sa dihang sila mosunod ni Jesukristo ug kon sa unsa nga paagi kini nakapadasig kanimo sa pagsunod usab Kaniya. Mahimong manganta usab kamo og dungan og usa ka awit nga makadasig sa mga bata nga mosanag sama sa usa ka kahayag sama sa “Sama Ko sa usa ka Bitoon” (Songbook sa mga Bata, 84).
-
Aron sa pag-awhag sa inyong mga anak nga dili itago ang ilang kahayag (tan-awa sa 3 Nephi 12:15), papuli-puliha sila sa pagtago o pagtabon sa usa ka lampara o laing suga. Mahimo nilang kuhaan og tabon ang suga sa matag higayon nga mohingalan sila og usa ka butang nga ilang mabuhat aron mahimong usa ka maayo nga ehemplo sa uban.
“Pagtigom alang sa inyong mga kaugalingon og mga bahandi didto sa langit.”
-
Ang pagbasa niini nga mga bersikulo makaaghat og panaghisgot mahitungod sa mga butang nga atong gibahandi. Tingali ikaw makagiya sa inyong mga anak sa usa ka pagpangita og bahandi [treasure hunt] aron sa pagpangita og mga butang nga magpahinumdom kanila sa mga bahandi nga adunay mahangtoron nga bili.
Ang Langitnong Amahan motubag sa akong mga pag-ampo.
-
Samtang imong basahon ang 3 Nephi 14:7, ang inyong mga anak mahimong mobuhat og mga aksiyon nga magrepresentar sa matag usa sa mga pagdapit sa Manluluwas dinhi niini nga bersikulo. Sama pananglit, mahimong iisa nila ang ilang mga kamot (mangayo), magporma og binoculars sa ilang mga kamot (mangita), o magpakaaron-ingnon nga nanuktok sa pultahan (manuktok). Tabangi ang inyong mga anak sa paghunahuna sa mga butang nga ilang masulti ug mapangutana sa ilang mga pag-ampo.
-
Ang inyong mga anak mahimong malingaw sa usa ka dula diin mangayo sila og usa ka butang ug makadawat og butang nga lahi kaayo. Sa 3 Nephi 14:7–11, unsa ang gusto sa Manluluwas nga atong mahibaloan mahitungod sa atong Amahan sa Langit?
Gusto sa Manluluwas nga maminaw ko ug mobuhat kon unsa ang Iyang gitudlo.
-
Paghunahuna og mga paagi diin ikaw makatabang sa inyong mga anak sa paghanduraw sa sambingay dinhi niini nga mga bersikulo. Tingali makadrowing sila og mga hulagway, makahimo og mga aksiyon, o makatukod og mga butang diha sa bantok ug balason nga mga sukaranan. Mahimo usab nilang ipuli ang ilang mga ngalan sa “maalamon nga tawo” samtang sila mobasa sa 3 Nephi 14:24–27 o mokanta sa “Ang Tawong Maalam ug ang Tawong Walay Kaalam” (Songbook sa mga Bata, 132). O mahimo silang mobarog sa matag higayon nga ilang madungog ang pulong nga “nagbuhat” diha sa 3 Nephi 14:21–27 ug 15:1.
-
Aniay usa ka leksiyon nga naggamit og butang nga imong masulayan: hangyoa ang inyong mga anak sa paghanduraw nga usa sa ilang mga bitiis nagrepresentar sa pagpaminaw sa mga pulong sa Manluluwas ug ang laing bitiis nagrepresentar sa pagbuhat sa unsay gitudlo sa Manluluwas. Dapita ang inyong mga anak nga mosulay sa pagbalanse lamang diha sa ilang “pagpaminaw” nga bitiis. Unsa ang mahitabo kon adunay kusog nga hangin nga mohuros sa lawak? Dayon ikaw ug ang inyong mga anak mahimong mangita og piho nga mga butang nga gitudlo sa Manluluwas nga atong buhaton: tan-awa sa 3 Nephi 12:3–12, 21–26; 13:5–8.
Alang sa dugang nga mga ideya, tan-awa ang isyu karong bulana sa Higala nga magasin.
The Savior’s Visit to the People in America [Ang Pagbisita sa Manluluwas ngadto sa Katawhan sa Amerika], ni Glen S. Hopkinson.