Oktubre 21–27: “Wala nay mga Katawhan nga Labaw pa ka Malipayon”

3 Nephi 27–4 Nephi

Ang mga pagtulon-an ni Jesukristo labaw pa gayod sa usa ka matahom nga pilosopiya nga palandongon. Kini gihimo sa pagdasig kanato nga mahimong sama Kaniya. Ang basahon sa 4 Nephi nagpakita lamang kon unsa ka hingpit ang ebanghelyo sa Manluluwas nga makapausab sa mga tawo. Human sa mubo nga pagpangalagad ni Jesus, ang panagbingkil sulod sa mga siglo tali sa mga Nephite ug mga Lamanite natapos. Ang duha ka nasod nga nabantog sa panagbangi ug garbo nahimong “nagkahiusa, mga anak ni Kristo” (4 Nephi 1:17), ug misugod sila nga aduna “sa tanan nga mga butang nga alang kanilang tanan” (4 Nephi 1:3). Ang “gugma sa Dios … anaa sa mga kasingkasing sa mga katawhan,” ug “wala nay mga katawhan nga labaw pa ka malipayon tali sa tanan nga mga katawhan nga gilalang sa kamot sa Dios” (4 Nephi 1:15–16). Ingon niini kon giunsa sa mga pagtulon-an sa Manluluwas pag-usab ang mga Nephite ug ang mga Lamanite. Giunsa niini pag-usab kanimo?

Mga Ideya alang sa Pagkat-on diha sa Panimalay ug sa Simbahan

3 Nephi 27:1–12

Ang Simbahan ni Jesukristo gitawag sa Iyang ngalan.

Samtang ang mga disipulo sa Manluluwas misugod sa pagtukod sa Iyang Simbahan sa tibuok kayutaan, mitumaw ang usa ka pangutana nga, alang sa ubang mga tawo, tingali dili importante nga punto—kinahanglan unsa ang ngalan sa Simbahan? (tan-awa diha sa 3 Nephi 27:1–3). Unsay imong nakat-onan mahitungod sa kaimportante niini nga ngalan gikan sa tubag sa Manluluwas diha sa 3 Nephi 27:4–12?

Ang Manluluwas mipadayag sa ngalan sa Iyang Simbahan karon diha sa Doktrina ug mga Pakigsaad 115:4. Pamalandongi ang matag pulong niana nga ngalan. Sa unsang paagi kini nga mga pulong nagtabang kanato nga mahibalo kon kinsa kita, unsay atong gituohan, ug sa unsang paagi kita molihok?

Tan-awa usab sa Russell M. Nelson, “Ang Sakto nga Ngalan sa Simbahan,” Liahona, Nob. 2018, 87–89; “Si Jesukristo Mipahibalo sa Ngalan sa Iyang Simbahan ug sa Iyang Doktrina” (bidyo), Librarya sa Ebangheyo.

Si Jesukristo Mipahibalo sa Ngalan sa Iyang Simbahan ug sa Iyang Doktrina | 3 Nephi 27

Si Jesus mitubag sa pag-ampo ni propeta Nephi ug mipakita kaniya ug sa ubang disipulo sa Karaang Amerika. Ang Ginoo misulti kang Nephi nga ang Iyang Simbahan mailhan pinaagi sa Iyang ngalan, sama nga ang Iyang mga sumusunod nailhan sa Iyang ngalan.

3 Nephi 27:10–22

Ang Simbahan ni Jesukristo gitukod diha sa Iyang ebanghelyo.

Human ipasabot nga ang Iyang Simbahan kinahanglan nga “natukod diha sa [Iyang] ebanghelyo” (3 Nephi 27:10), ang Manluluwas mihulagway kon unsa ang Iyang ebanghelyo. Unsaon nimo sa pag-summarize ang unsay Iyang gisulti diha sa 3 Nephi 27: 13–22? Base niini nga kahulogan, unsa ang buot ipasabot niini alang sa Simbahan—ug alang kanimo—nga natukod diha sa Iyang ebanghelyo?

Irekord ang unsay imong nakat-onan. Timan-i ang unsay gitudlo sa Manluluwas sa Iyang mga disipulo diha sa 3 Nephi 27:23–26. Nganong importante ang pagtipig og usa ka rekord sa espirituhanon nga mga kasinatian? Unsay gibati nimo nga nadasig nga irekord samtang gitun-an nimo ang pangalagad sa Manluluwas diha sa 3 Nephi?

3 Nephi 28:1–11

“Unsa ang inyong tinguha kanako?”

Unsay imong isulti kon ang Manluluwas mangutana kanimo, sama sa Iyang gipangutana sa Iyang mga disipulo, “Unsa ang inyong tinguha kanako?” (3 Nephi 28:1). Hunahunaa kini samtang basahon nimo ang 3 Nephi 28:1–11. Unsa ang imong nakat-onan mahitungod sa mga tinguha sa mga kasingkasing sa mga disipulo gikan sa ilang mga tubag ngadto sa Iyang pangutana? Sa unsang paagi ang imong mga tinguha nagkausab samtang imong gisunod ang ebanghelyo ni Jesukristo?

Ang mga himno sa kasagaran nagpahayag og kinasingkasing nga mga tinguha—ang “Dugang Kabalaan Hatagi Ako” usa ka maayo nga ehemplo (Mga Himno, nu. 77). Ikonsiderar ang pagpangita og himno nga nagpakita sa imong mga tinguha.

3 Nephi 29–30

Ang Basahon ni Mormon usa ka timailhan nga ang gimbuhaton sa Dios sa ulahing mga adlaw nangatuman na.

Paghunahuna bahin sa mga timailhan nga magpahibalo nimo nga adunay mahitabo. Sama pananglit, giunsa nimo pagkahibalo nga umaabot ang ulan o ang mga panahon nag-usab-usab? Sumala sa 3 Nephi 29:1–3, unsaon nimo pagkahibalo nga ang buhat sa Dios sa pagpundok sa Iyang katawhan “nagsugod na sa pagkatuman”? (tan-awa usab sa 3 Nephi 21:1–7). Mahimo usab nimong timan-an, diha sa 3 Nephi 29:4–9, ang mga butang nga ilimod sa mga tawo sa atong panahon. Sa unsang paagi nga ang Basahon ni Mormon nakapalig-on sa imong hugot nga pagtuo niini nga mga butang?

4 Nephi 1:1–18

Ang pagsunod sa mga pagtulun-an ni Jesukristo mosangpot sa panaghiusa ug kalipay.

Sama sa unsa kaha ang magpuyo sa mga katuigan human sa pagbisita sa Manluluwas? Samtang imong tun-an ang 4 Nephi 1:1–18, ikonsiderar ang paglista sa mga panalangin nga nadawat sa mga tawo. Mahimo usab nimong markahan o isulat ang mga pagpili nga ilang gihimo nga nakatabang sa pagpahinabo niining bulahan nga kinabuhi. Unsa ang gitudlo ni Jesus ngadto kanila nga mahimong nakadasig sa ilang matarong nga mga pagpili? Ania ang pipila ka mga ehemplo, apan mahimong makakita ka og uban pa: 3 Nephi 11:28–30; 12:8–9, 21–24, 40–44; 13:19–21, 28–33; 14:12; 18:22–25.

Pamalandongi kon unsay imong mahimo nga makatabang sa imong pamilya, ward, o komunidad nga magpuyo og mas dakong panaghiusa ug kalipay. Unsa ang imong mahimo aron makatabang sa pagbuntog sa mga panagbahin-bahin ug tinud-anay nga mahimong “usa” uban sa ubang mga anak sa Dios? Unsa nga mga pagtulon-an ni Jesukristo ang makatabang kanimo sa pagtuman niini nga tumong?

Subo lang, ang katilingban nga Zion nga gihulagway diha sa 4 Nephi sa kataposan nahulog ngadto sa pagkadaotan. Samtang basahon nimo ang 4 Nephi 1:19–49, tan-awa ang mga batasan ug mga kinaiya nga mitapos sa ilang kalipay ug panaghiusa. Unsa ang imong mahimo aron sa pagwagtang niini nga mga kinaiya o mga pamatasan?

Tan-awa usab sa Moises 7:18; D. Todd Christofferson, “Maalimahon nga mga Katilingban,” Liahona, Nob. 2020, 32–35; Reyna I. Aburto, “Magkahiusa,” Liahona, Mayo 2018, 78–80.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

3 Nephi 27:3–8

Nahisakop ako sa Simbahan ni Jesukristo.

• Ipaila ang kaimportante sa ngalan sa Simbahan ni Jesus, hisgoti uban sa inyong mga anak ang kabahin sa ilang kaugalingon nga mga ngalan. Nganong importante man ang atong mga ngalan? Dayon mahimo ninyong basahon og dungan ang 3 Nephi 27:3, mangita sa pangutana nga aduna ang mga disipulo ni Jesus. Tabangi ang inyong mga anak sa pagpangita sa tubag sa 3 Nephi 27:5–8. Nganong importante ang ngalan sa Simbahan?

• Matabangan usab ninyo ang inyong mga anak sa paghunahuna og lainlaing mga grupo nga nahisakop sila, sama sa usa ka pamilya o klase sa Primary. Pangutan-a sila kon unsa ang ilang ganahan mahitungod sa pagkasakop sa matag grupo. Dayon mahimo kamong magdungan sa pagkanta sa “Ang Simbahan ni Jesukristo” (Songbook sa mga Bata, 48) ug maghisgot kon nganong mapasalamaton ka nga nahisakop sa Simbahan sa Manluluwas.

3 Nephi 27:13–16

Ang Simbahan ni Jesukristo gitukod diha sa Iyang ebanghelyo.

• Gisaysay sa Manluluwas ang Iyang ebanghelyo sa minubo nga paagi diha sa 3 Nephi 27. Mahimong ipasabot nimo sa inyong mga anak nga ang pulong nga ebanghelyo nangahulogan og “maayong balita.” Unsa ang maayo nga balita ang atong makaplagan diha sa 3 Nephi 27:13–16? Gamita ang pahina sa kalihokan niining semanaha aron sa pagtudlo nga ang Simbahan sa Manluluwas natukod diha sa Iyang ebanghelyo.

3 Nephi 27:30–31

Ang Langitnong Amahan malipay kon ang iyang mga anak makabalik ngadto Kaniya.

• Ikonsiderar ang pagdula og usa ka game diin ang usa ka tawo motago ug ang uban mosulay sa pagpangita kaniya. Mahimong mosangpot kini ngadto sa usa ka panag-istoryahanay mahitungod sa hingpit nga kalipay nga atong bation kon ang usa ka tawo kinsa nga nahisalaag makaplagan. Human sa pagbasa sa 3 Nephi 27:30–31, mahimo kang maghisgot mahitungod unsaon sa pagtabang sa usag usa nga magpabiling duol sa Langitnong Amahan aron “walay … [m]awala.”

4 Nephi

Ang pagsunod kang Jesukristo maghatag kanako og hingpit nga kalipay.

• Aron sa pagtabang sa inyong mga anak nga makakat-on mahitungod sa kalipay sa mga tawo nga gihulagway diha sa 4 Nephi, mahimong makapakita kamo nila og mga hulagway sa malipayon nga mga tawo. Dayon, samtang magkauban ninyong basahon ang mga bersikulo 2–3 ug 15–17 (o “Kapitulo 48: Kalinaw Sa Amerika,” Mga Sugilanon sa ang Basahon ni Mormon, 136–37), mahimo silang motudlo ngadto sa mga hulagway kon maabot ka sa usa ka butang diha sa istorya nga magdala og kalipay.

• Aron matabangan ang inyong mga anak sa pagbansay sa unsay gitudlo diha sa 4 Nephi 1:15–16, hatagi sila og mga sitwasyon diin ang mga tawo naglagot sa usag usa. Dapita sila sa pagdrama-drama kon unsa kaha sama ang sitwasyon kon kita adunay “gugma sa Dios” sa atong mga kasingkasing.

Alang sa dugang nga mga ideya, tan-awa ang isyu karong bulana sa Higala nga magasin.

Christ with Three Nephite Disciples [Si Kristo uban sa Tulo ka Disipulo nga mga Nephite], ni Gary L. Kapp.