Mormon Abridging the Plates [Si Mormon Nagpamubo sa mga Palid], ni Tom Lovell

Oktubre 28–Nobiyembre 3: “Ako Manghinaot nga Madani Kamong Tanan … sa Paghinulsol”

Mormon 1–6

Gitipigan ni Mormon ang Talaan

Gisultihan ni Ammaron si Mormon bahin sa sagradong talaan. Gitultolan niya kon asa kini gitagoan ug gitun-an ang kasaysayan sa katawhan. Nagdumili si Mormon sa pagpangulo sa mga Nephita diha sa pagkadaotan.

Gilikay kanato ni Mormon ang “hingpit nga asoy” sa “makahahadlok nga talan-awon” sa kadaotan ug pagpaagas sa dugo nga iyang nakita taliwala sa mga Nephite (Mormon 2:18; 5:8). Apan unsay iyang girekord diha sa Mormon 1–6 igo na sa pagpahinumdom kanato kon hangtod asa ang mga tawo nga kanhi matarong mahisalaag. Taliwala sa ingon nianang nagkaylap nga kadaotan, walay usa nga makabasol ni Mormon nga maluya ug gani mawad-an sa kadasig. Bisan pa sa tanan nga iyang nakita ug nasinati, wala gayod mawala kaniya ang pagbati sa dakong kaluoy sa Dios ug sa iyang lig-on nga pagtuo nga ang paghinulsol mao ang paagi sa pagdawat niini. Ug bisan ang kaugalingong katawhan ni Mormon misalikway sa iyang nagpakiluoy nga mga pagdapit sa paghinulsol, nasayod siya nga siya adunay mas daghang katawhan nga angay danihon. “Tan-awa,” mipahayag siya, “ako mosulat ngadto sa tanan nga mga lumulupyo sa yuta.” Sa laing pagkasulti, misulat siya kanimo (tan-awa diha sa Mormon 3:17–20). Ug ang iyang mensahe nganha kanimo, karon, mao ang samang mensahe nga makaluwas unta sa mga Nephite sa ilang panahon: “Motuo sa ebanghelyo ni Jesukristo. … Paghinulsol ug sa pag-andam aron mobarog sa atubangan sa hukmanan ni Kristo” (Mormon 3:21–22).

Mga Ideya alang sa Pagkat-on diha sa Panimalay ug sa Simbahan

Mormon 1–6

Makasunod ako ni Jesukristo dili igsapayan sa unsay buhaton sa ubang mga tawo.

Sa panahon nga siya mga 10 anyos lamang, si Mormon lahi gayod sa mga tawo palibot kaniya. Samtang imong basahon ang Mormon 1–6, pangita og mga paagi nga ang hugot nga pagtuo ni Mormon kang Jesukristo mihimo niya nga talagsaon ug mihatag niya og mga oportunidad sa pagserbisyo ug pagpanalangin sa uban. Ang mosunod nga mga bersikulo makapasugod kanimo:

Mormon 1:2–3, 13–17.Unsa nga mga kalainan ang inyong nabantayan tali ni Mormon ug sa iyang katawhan? Unsa ang mga kinaiya nga naa niya nga nakatabang niya nga magpabilin nga espirituhanong lig-on atol sa ingon ka lisod nga panahon?

Mormon 2:18–19.Unsa nga mga pulong ang gigamit ni Mormon sa paghulagway sa kalibotan nga iyang gipuy-an? Giunsa niya sa pagbaton og paglaom bisan pa sa iyang mga palibot?

Mormon 3:12.Unsay gibati ni Mormon mahitungod sa mga tawo sa iyang palibot? Unsay imong mabuhat sa pagpalambo og matang sa gugma nga siya aduna?

Unsa ang ubang mga bersikulo diha sa Mormon 1–6 nga nagpakita gayod sa hugot nga pagtuo ni Mormon diha ni Jesukristo? Unsa ang mga kahigayonan nga gihatag kaniya tungod mipili siya nga magpabilin nga matinud-anon?

Ikonsiderar ang pagtuon sa mensahe ni Presidente Thomas S. Monson “Pagpakita og Ehemplo ug Kahayag” (Liahona, Nob. 2015, 86–88), mangita og mga rason kon nganong importante sa mga sumusunod ni Jesukristo nga mahimong talagsaon o mahimong lahi. Unsaon nimo sa pagkompleto ang mga kapahayag sama niini? “Si usa ka ehemplo kanako sa dihang siya . Nakatabang kini kanako nga gustong .”

Tingali nabati ni Mormon nga ang iyang ehemplo wala makahimo og kalainan ngadto sa iyang katawhan. Kon ikaw adunay kahigayonan nga makig-istorya ni Mormon, unsa ang imong isulti kaniya kon sa unsang paagi ang iyang ehemplo mihimo og kalainan alang kanimo?

Tan-awa usab sa David A. Bednar, “Dali nga Makaobserbar,” Liahona, Dis. 2006, 14–20.

Tabangi ang uban nga mopakigbahin sa unsay ilang nakat-onan. Kon ang mga tawo mopakigbahin sa unsay ilang nakat-onan, ilang mapalig-on ang ilang kaugalingon nga pagtuo ug ang pagtuo sa uban (tan-awa sa Doktrina ug mga Pakigsaad 88:122). Sulayi ang pagpangutana sa imong pamilya o klase kon unsa ang ilang mga kasinatian samtang gitun-an nila ang pulong sa Dios.

Gubat, ni Jorge Cocco

Mormon 2:10–15

Ang diosnong kasubo modala kanako ngadto ni Kristo ug sa malungtaron nga kausaban.

Sa dihang nakita ni Mormon ang kasub-anan sa iyang katawhan, nanghinaot siya nga sila maghinulsol. Apan ang “ilang kasubo dili ngadto sa paghinulsol” (Mormon 2:13)—dili kini diosnong kasubo apan kalibotanon nga kasubo. Aron masabtan ang kalainan, ikonsiderar ang pagrekord sa unsay imong nakat-onan gikan sa Mormon 2:10–15 diha sa usa ka tsart nga sama niini:

Diosnon nga Kasubo	Kalibotanon nga Kasubo
Moduol ngadto ni Jesus (bersikulo 14)	Mitunglo sa Dios (bersikulo 14)

Unsaon nimo pagkahibalo kon ang imong kasubo diosnon o kalibotanon? Kon ikaw nakasinati og kalibotanon nga kasubo, unsaon nimo sa pag-usab niini ngadto sa diosnon nga kasubo?

Tan-awa usab sa 2 Mga Taga-Corinto 7:8–11; Michelle D. Craig, “Balaan nga Pagkawala Matagbaw,” Liahona, Nob. 2018, 52–55.

Mormon 3:3, 9

“Sila wala makaamgo nga ang Ginoo mao ang miluwas kanila.”

Si Mormon nakaobserbar nga ang mga Nephite wala miila sa mga paagi nga ang Ginoo mipanalangin kanila. Samtang imong basahon ang Mormon 3:3, 9, tingali ikaw mamalandong kon sa unsang paagi ikaw nag-ila sa impluwensiya sa Dios diha sa imong kinabuhi. Unsa nga mga panalangin ang moabot kon imong ilhon ang Iyang impluwensiya? Unsa ang mga sangputanan sa dili pag-ila Kaniya? (tan-awa sa Mormon 2:26; Doktrina ug Mga Pakigsaad 59:21).

Tan-awa usab sa Henry B. Eyring, “O Hinumdomi, Hinumdomi,” Liahona, Nob. 2007, 66-69.

Mormon 5:8–24; 6:16–22

Si Jesukristo nagbarog nga bukas ang mga bukton sa pagdawat kanako.

Kon ikaw mobati nga nawad-an og kadasig bahin sa imong kaugalingon nga mga sala, ang paghulagway ni Mormon sa Manluluwas nga nagbarog “uban sa bukas nga mga bukton sa pagdawat kaninyo” mahimong makahatag og kasegurohan. Samtang imong basahon ang Mormon 5:8–24 ug 6:16–22, unsa ang imong makat-onan mahitungod sa mga pagbati sa Langitnong Amahan ug ni Jesus kanimo, bisan kon ikaw makasala? Sa unsang paagi gibati nimo si Jesukristo nga nagtabang kanimo uban sa bukas nga mga bukton? Unsa ang imong gibati nga nadasig nga buhaton isip usa ka resulta?

Tan-awa usab sa “Duol Kang Jesus,” Mga Himno, nu. 66.

Mga Ideya sa Pagtudlo sa mga Anak

Mormon 1:1–3; 2:1, 23–24; 3:1–3, 12, 17–22

Sama ni Mormon, ako makasunod ni Jesukristo.

• Tungod kay si Mormon batan-on pa gayod sa dihang siya mipalambo sa iyang hugot nga pagtuo kang Kristo, siya mahimong usa ka inspirasyon sa inyong mga anak. Tingali mahimo nimong basahon ang Mormon 1:1–3 ug ang inyong mga anak makapaminaw kon pila ang pangidaron ni Mormon sa dihang gihatagan siya ni Ammaron og espesyal nga misyon. Makatabang usab ka kanila sa pagpangita dinhi niini nga mga bersikulo sa mga kinaiya nga nakita ni Ammaron kang Mormon. Sa unsang paagi nga kini nga mga kinaiya makatabang kanato nga mosunod ni Jesukristo?

  

  Mormon, Edad 10, ni Scott M. Snow

• Tungod kay si Mormon misunod ni Jesukristo, siya gihatagan og mga oportunidad sa pagserbisyo ug pagpanalangin sa uban. Mahimo ninyong dapiton ang inyong mga anak sa pagbasa sa usa o dugang pa sa mosunod nga mga tudling ug tabangan sila sa pagpakigbahin sa unsay ilang nakat-onan mahitungod ni Mormon: Mormon 1:1–3; 2:1, 23–24; ug 3:1–3, 12, 20–22 (tan-awa usab sa “Kapitulo 49: Si Mormon ug ang Iyang mga Pagtulon-an,” Mga Sugilanon sa ang Basahon ni Mormon, 138–42). Giunsa niya pagsunod si Jesukristo? Sa unsang paagi ang iyang hugot nga pagtuo diha kang Jesukristo nakatabang o nakapanalangin sa uban? Sa unsa nga paagi nga ang atong hugot nga pagtuo makatabang sa mga tawo nga atong nailhan?

Mormon 2:8–15

Ang diosnong kasubo modala kanako ngadto ni Kristo ug sa malungtaron nga kausaban.

• Tingali makahimo kamo og usa ka tsart sama sa usa diha sa “Mga Ideya alang sa Pagkat-on diha sa Panimalay ug sa Simbahan” aron sa pagtabang sa inyong mga anak nga makasabot sa kalainan tali sa kalibotanon ug diosnon nga kasubo samtang ilang basahon ang Mormon 2:8, 10–15. Dayon makasiksik usab sila sa Mormon 2:12 aron sa pagpangita og mga hinungdan ngano nga ang paghinulsol kinahanglan nga mohimo sa atong “[mga] kasingkasing … sa paglipay.” Unsaon nato sa pagseguro nga ang kasubo nga atong gibati alang sa atong mga sala mogiya kanato sa pagtinguha sa tabang sa Dios aron mag-usab?

Mormon 3:3, 9

Ang Langitnong Amahan naghatag kanato og daghan nga mga panalangin.

• Ang pagdapit sa inyong mga anak sa paglista sa (o pagdrowing og mga litrato sa) pipila ka butang nga sila mapasalamaton mahimong usa ka maayo nga paagi sa pagtabang nila nga mobati og kamapasalamaton alang sa Dios. Human sila nakahimo og lista, mahimo nimong basahon ang Mormon 3:3, 9 ug ipasabot nga ang Langitnong Amahan mipanalangin usab sa mga Nephite, apan sila wala makaila niini. Unsa ang mahimo natong buhaton aron mapakita nga mapasalamaton kita ngadto sa Langitnong Amahan alang sa atong mga panalangin?

Mormon 3:12

Gusto sa Langitnong Amahan nga higugmaon nako ang tanan.

• Bisan tuod daotan ang mga Nephite, si Mormon wala mihunong sa paghigugma nila. Tabangi ang inyong mga anak sa pagpangita sa mga pulong “nahigugma” ug “gugma” diha sa Mormon 3:12. Mahimo usab kamong manganta og usa ka awit bahin sa paghigugma sa uban, sama sa “Si Jesus Miingon Higugmaa ang Tanan” (Songbook sa mga Bata, 39), samtang ipakita ang mga hulagway sa mga bata gikan sa tibuok kalibotan. Pagpamatuod bahin sa gugma sa Dios alang sa tanan Niyang mga anak.

Alang sa dugang nga mga ideya, tan-awa ang isyu karong bulana sa Higala nga magasin.

Ang Basahon ni Mormon gisulat “nga kamo mahimo nga motuo sa ebanghelyo ni Jesukristo” (Mormon 3:21).