“Nobiyembre 11–17: ‘Mogisi Niana nga Tabil sa Pagkawalay Pagtuo.’ Ether 1–5,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Nobiyembre 11–17. Ether 1–5,” Dali, Sunod Kanako—Alang sa Panimalay ug sa Simbahan: 2024 (2024)
The Jaredites Leaving Babel [Ang mga Jaredite Namiya sa Babel], ni Albin Veselka
Nobiyembre 11–17: “Mogisi Niana nga Tabil sa Pagkawalay Pagtuo”
Ether 1–5
Samtang kini tinuod nga ang mga pamaagi sa Dios mas labaw kay sa ato ug kinahanglan kitang kanunay nga motugyan ngadto sa Iyang kabubut-on, Siya usab nagdasig kanato sa paghunahuna ug paglihok alang sa atong kaugalingon. Usa kana ka leksiyon nga nakat-onan ni Jared ug sa iyang igsoong lalaki. Sama pananglit, ang ideya nga mobiyahe ngadto sa bag-ong yuta nga “pinili labaw sa tanan nga yuta” daw nagsugod ni Jared, ug gitugotan sa Ginoo ang hangyo, nag-ingon ngadto sa igsoon nga lalaki ni Jared, “Sa ingon Ako mohimo nganha kanimo tungod niining taas nga panahon nga ikaw nangamuyo ngari kanako” (tan-awa sa Ether 1:38–43). Ug sa dihang ang igsoon nga lalaki ni Jared nagkinahanglan og kahayag sulod sa mga sakayan nga modala kanila ngadto sa gisaad nga yuta, ang Ginoo nangutana sa unsay atong kasagaran nga ipangutana Kaniya: “Unsa ang buot nimo nga Ako kinahanglan mobuhat?” (Ether 2:23). Gusto siya nga makadungog sa atong mga hunahuna ug mga ideya, ug Siya mopatalinghog ug mohatag sa Iyang pag-uyon o kon dili motambag kanato. Usahay ang bugtong nga butang nga nagbulag kanato gikan sa mga panalangin nga atong gitinguha mao ang atong kaugalingong “tabil sa pagkawalay pagtuo,” ug kon kita “mogisi niana nga tabil” (Ether 4:15), tingali masorpresa kita sa unsay andam ang Ginoo sa pagbuhat alang kanato.
Tan-awa usab sa “The Lord Appears to the Brother of Jared [Ang Ginoo Nagpakita ngadto sa Igsoon nga Lalaki ni Jared]” (bidyo), Librarya sa Ebangheyo.
Ang Ginoo Mipakita ngadto sa Igsoon ni Jared | Ether 1-6; 12-13
Gihisgotan ni Moroni ang mahitungod sa mga Jaredita, usa ka pundok sa katawhan nga miadto usab sa Gisaad nga Yuta.
Mga Ideya alang sa Pagkat-on diha sa Panimalay ug sa Simbahan
Samtang ako nangamuyo ngadto sa Ginoo, Siya mohatag og kaluoy ngari kanako.
Ang Ether 1:33–43 naghisgot og tulo ka pag-ampo sa igsoon nga lalaki ni Jared. Unsay imong makat-onan gikan sa tubag sa Ginoo sa matag pag-ampo? Paghunahuna og usa ka panahon sa dihang nasinati nimo ang kaluoy sa Ginoo samtang ikaw nangamuyo ngadto Kaniya diha sa pag-ampo. Mahimong gusto nimong irekord kini nga kasinatian ug ipakigbahin kini ngadto sa usa ka tawo kinsa tingali nagkinahanglan nga makadungog sa imong pagpamatuod.
Tan-awa usab sa “Hilom nga Pag-ampo,” Hymns, nu. 86.
Makadawat ako og pagpadayag alang sa akong kinabuhi.
Miingon si Presidente Russell M. Nelson: “Mohangyo ko kaninyo sa pagpalambo sa inyong espirituhanong kapasidad sa pagdawat og pagpadayag. … Pilia ang paghimo sa espiritwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96).
Samtang ikaw magtuon sa Ether 2; 3:1–6; 4:7–15, unsa ang imong makat-onan mahitungod “sa espiritwal nga buhat” nga gihisgotan ni Presidente Nelson? Mahimo nimong markahan sa usa ka kolor ang mga pangutana o mga kabalaka nga ang igsoong lalaki ni Jared aduna ug unsa ang iyang gihimo bahin niini, ug sa laing kolor mahimo nimong markahan kon giunsa sa Ginoo pagtabang kaniya ug pagpahibalo sa Iyang kabubut-on.
Aniay pipila ka pangutana nga pamalandongan samtang ikaw magtuon:
-
Unsay nakapadani nimo bahin sa paagi nga ang Ginoo mitubag sa mga pangutana sa igsoon nga lalaki ni Jared diha sa Ether 2:18–25?
-
Unsaon kaha nimo paggamit ang Ether 3:1–5 sa pagtabang sa usa ka tawo nga nagkat-on unsaon sa pag-ampo?
-
Unsa kahay makapugong kanimo sa pagkadawat og pagpadayag gikan sa Ginoo (tan-awa sa Ether 4:8–10). Unsaon nimo nga mas makanunayong makadawat og pagpadayag gikan Kaniya? (tan-awa sa Ether 4:7, 11–15).
-
Unsa kaha sa imong hunahuna ang gipasabot sa “mogisi [sa] tabil sa pagkawalay pagtuo” sa imong kinabuhi”(Ether 4:15).
Unsa pa ang imong makat-onan gikan sa igsoon nga lalaki ni Jared mahitungod sa personal nga pagpadayag?
Si Elder Dale G. Renlund mitudlo mahitungod sa “Usa ka Sistema sa mga Lagda alang sa Personal nga Pagpadayag” (Liahona, Nob. 2022, 16–19). Ikonsiderar ang pagdrowing og picture frame ug isulat ang upat ka elemento sa sistema diha sa matag kilid. Sa unsang paagi kini nga sistema makatabang kanimo sa “pagdugang sa imong kapasidad sa pagdawat og pagpadayag”?
Pinaagi sa Iyang pagpanton, ang Ginoo nagdapit kanako sa paghinulsol ug pagduol ngadto Kaniya.
Bisan ang usa ka bantogan nga propeta nga sama sa igsoong lalaki ni Jared kinahanglan nga pantonon sa Ginoo. Unsay imong makat-onan gikan sa Ether 2:14–15 mahitungod sa pagpanton sa Ginoo? Hunahunaa kon sa unsang paagi nga ang pagpanton sa Ginoo ug ang pagdawat sa igsoong lalaki ni Jared tingali nakatabang aron maandam siya alang sa iyang mga kasinatian diha sa Ether 3:1–20.
Ang Ginoo moandam kanako sa pagtabok sa akong “dako nga lawod.”
Usahay, ang pagtabok sa “dakong lawod” mao lamang ang paagi nga matuman ang kabubut-on sa Dios alang kanato. Makita ba nimo ang mga pagkasusama sa imong kinabuhi diha sa Ether 2:16–25? Sa unsang paagi ang Ginoo miandam kanimo alang sa imong mga hagit? Unsa ang Iyang gihangyo nga imong buhaton karon aron maandam alang sa unsay Iyang gikinahanglan nimo nga buhaton sa umaabot?
Tan-awa usab sa L. Todd Budge, “Makanunayon ug Lig-on nga Pagsalig,” Liahona, Nob. 2019, 47–49.
Gamita ang unsay imong makat-onan. Ang pagtuon sa ebanghelyo kinahanglang modasig kanato sa pag-usab sa atong mga kinabuhi. Human mabasa ang Ether 4:11–12, mahimo nimong ilista ang pipila sa mga impluwensiya sa imong kinabuhi ug hunahunaon kon kini ba nag-agni nimo sa pagbuhat og maayo. Unsa nga mga kausaban ang imong gibati nga nadasig nga himoon?
Ang mga saksi nagpamatuod sa kamatuoran sa Basahon ni Mormon.
Samtang basahon nimo ang panagna ni Moroni diha sa Ether 5, pamalandongi ang katuyoan sa Ginoo sa pag-andam og daghang saksi sa Basahon ni Mormon. Unsa nga mga saksi ang nakadasig nimo nga motuo nga ang Basahon ni Mormon mao ang pulong sa Dios? Sa unsang paagi ang Basahon ni Mormon nagpakita kanimo sa “gahom sa Dios ug usab sa iyang pulong”? (Ether 5:4).
Mga Ideya sa Pagtudlo sa mga Anak
Ang Langitnong Amahan maminaw ug motubag sa akong mga pag-ampo.
-
Kon nakahibalo kamo og usa ka pinulongan nga wala mahibaloi sa inyong mga anak, hatagi sila og pipila ka yano nga mga direksiyon niana nga pinulongan (o pagpatukar og rekording sa laing pinulongan). Mahimo nimong gamiton kini sa pagpasabot kon nganong nag-ampo ang igsoon nga lalaki ni Jared alang sa tabang diha sa Ether 1:33–37. Hatagi og gibug-aton kon sa unsang paagi mibati ang Ginoo mahitungod niini nga pag-ampo ug giunsa Niya sa pagtubag (tan-awa usab sa “Kapitulo 50: Ang mga Jaredite Mibiya sa Babel,” Mga Sugilanon sa ang Basahon ni Mormon, 143–44).
-
Ang inyong mga anak mahimong kunohay maghimo og usa ka kasko sama sa imong mabasa diha sa Ether 2:16–17. Dayon kamo ug ang inyong mga anak mahimong mobasa mahitungod sa mga problema sa mga Jaredite bahin sa ilang mga kasko (tan-awa sa Ether 2:19) ug sa lainlaing paagi ang Ginoo mitubag sa mga pag-ampo sa igsoon nga lalaki ni Jared (tan-awa sa Ether 2:19–25; 3:1–6). Ang hulagway ug pahina sa kalihokan sa kataposan niini nga latid makatabang kaninyo ug sa inyong mga anak sa pagsugilon sa istorya. Unsay atong makat-onan gikan sa igsoon nga lalaki ni Jared mahitungod sa pag-ampo? Ikonsiderar ang pagpakigbahin og usa ka kasinatian diin ikaw nag-ampo alang sa panabang ug ang Ginoo mitabang kanimo.
Ako gilalang pinaagi sa hitsura sa Dios.
-
Samtang sila magdako, ang inyong mga anak makasugat og daghang sayop nga mga mensahe mahitungod sa Dios, sa ilang mga kaugalingon, ug sa ilang pisikal nga mga lawas. Tingali mahimo nimo silang hangyoon sa pagpangita og mga kamatuoran mahitungod niini nga mga hilisgotan diha sa Ether 3:6–16. Aron sa paghatag og gibug-aton sa kamatuoran nga gitudlo diha sa Ether 3:13, 15, mahimo ninyong magkauban nga tan-awon ang usa ka hulagway sa Manluluwas ug dapita ang inyong mga anak sa pagtudlo ngadto sa lainlaing parte sa Iyang lawas. Dayon makatudlo dayon sila ngadto sa samang parte sa ilang kaugalingong mga lawas. Mahimo usab kamo nga magdungan sa pagpanganta sa usa ka awit nga may kalabotan sa atong mga lawas, sama sa “Ang Ginoo Naghatag Kanako og Templo” (Songbook sa mga Bata, 73). Kamo ug ang inyong mga anak mahimong maghisgot kon nganong mapasalamaton kamo alang sa inyong mga lawas.
Kita gilalang sa hitsura sa Dios
Tulo ka saksi ang nagpamatuod sa Basahon ni Mormon.
-
Si Moroni nanagna nga ang Tulo ka mga Saksi motabang sa pag-establisar sa kamatuoran sa Basahon ni Mormon. Sa pagtudlo kon unsa ang usa ka saksi, mahimo nimong hangyoon ang inyong mga anak sa paghulagway og usa ka butang nga ilang nakita o nasinati nga wala nakita o nasinati sa uban. Dayon samtang basahon ninyo ang Ether 5 og dungan, mahimo kamo nga maghisgot kon ngano nga ang Ginoo naggamit og mga saksi sa Iyang buhat. Mahimo usab kamong mopakigbahin sa usag usa kon giunsa ninyo pagkahibalo nga tinuod ang Basahon ni Mormon ug sa unsang paagi ninyo mapakigbahin ang inyong pagsaksi ngadto sa uban.
Alang sa dugang nga mga ideya, tan-awa ang isyu karong bulana sa Higala nga magasin.
Sawest Thou More Than This? [Nakakita Ba Ikaw ug Labaw Pa Niini?], ni Marcus Alan Vincent