Moroni Writing on Gold Plates [Moroni Nagsulat diha sa Bulawan nga mga Palid], ni Dale Kilborn

Nobiyembre 4–10: “Ako Namulong nganha Kaninyo Ingon og Kamo Ania”

Mormon 7–9

Nahibalo si Moroni kon unsay gibati nga mag-inusara diha sa usa ka daotan nga kalibotan—ilabi na human sa pagkamatay sa iyang amahan diha sa gubat ug ang mga Nephite nalaglag. “Ako gani nahibilin nga nag-inusara,” misulat siya. “Ako wala nay mga higala ni dapit nga kapaingnan” (Mormon 8:3, 5). Ang mga butang daw wala nay paglaom, apan si Moroni nakakita og paglaom diha ni Jesukristo ug sa iyang pagpamatuod nga “ang walay kataposan nga mga katuyoan sa Ginoo mopadayon” (Mormon 8:22). Ug nahibalo si Moroni nga ang mahinungdanong bahin niadtong mahangtorong mga katuyoan mao ang Basahon ni Mormon—ang rekord nga makugihon niyang gihuman karon, ang rekord nga sa umaabot nga adlaw modala sa daghang katawhan “ngadto sa kasayoran ni Kristo” (Mormon 8:16; 9:36). Ang hugot nga pagtuo ni Moroni niini nga mga saad naghimo niining posible alang kaniya sa pagpahayag ngadto sa umaabot nga mga tigbasa niini nga basahon, “ako namulong nganha kaninyo ingon og kamo ania,” ug “ako nasayod nga kamo makabaton sa akong mga pulong” (Mormon 8:35; 9:30). Karon kita aduna gayod sa iyang mga pulong, ug ang buhat sa Ginoo nagpadayon, sa usa ka bahin tungod kay si Mormon ug si Moroni mipabilin nga matinud-anon sa ilang misyon, bisan og sila nag-inusara.

Mga Ideya alang sa Pagkat-on diha sa Panimalay ug sa Simbahan

Mormon 7

“Motuo diha kang Jesukristo ug “paghupot sa [Iyang] ebanghelyo.”

Human nagpamubo sa rekord sa iyang katawhan, si Mormon mihatag sa iyang panapos nga mensahe diha sa Mormon 7. Sa imong hunahuna ngano kaha nga gipili niya kini nga mensahe? Unsa kaha ang gipasabot kanimo sa “paghupot sa ebanghelyo ni Kristo”? (Mormon 7:8).

Tan-awa usab sa: “Nagtuo Ako Kang Kristo,” Mga Himno, nu. 78.

Mormon 7:8–10; 8:12–16; 9:31–37

Ang Basahon ni Mormon may dako kaayong bili.

Nangutana si Presidente Russell M. Nelson: “Kon tanyagan kamo og mga diamante o mga ruby o Basahon ni Mormon, hain ang inyong pilion? Sa tinuod lang, hain man ang mas dako og bili nganha kaninyo?” (“Ang Basahon ni Mormon: Unsa Kaha ang Imong Kinabuhi Kon wala Kini?,” Liahona, Nob. 2017, 61).

Unsay imong makit-an sa Mormon 7:8–10; 8:12–22; ug 9:31–37 nga makatabang kanimo nga makasabot kon nganong bililhon ang Basahon ni Mormon sa atong panahon? Nganong bililhon man kini kanimo? Mahimo kang makakaplag og dugang nga mga panabot diha sa 1 Nephi 13:38–41; 2 Nephi 3:11–12; ug Doktrina ug mga Pakigsaad 33:16; 42:12–13.

Ang mga sinulat sa mga propeta sa Basahon ni Mormon magamit kanato

Mormon 8:1–11

Ako makatuman sa mga sugo bisan kon ang uban dili.

Sa pipila ka higayon mahimong mobati ka nga nag-inusara sa imong mga paningkamot sa pagtuman sa mga sugo. Unsa ang imong makat-onan gikan sa ehemplo ni Moroni nga makatabang? (tan-awa sa Mormon 8:1–11). Kon imong mapangutana si Moroni kon giunsa niya pagpabilin nga matinud-anon, unsa kaha sa inyong hunahuna ang iyang isulti?

Tan-awa usab sa “Ang Tanan Makahibalo sa Kamatuoran: Saad ni Moroni” (bidyo), Librarya sa Ebangheyo.

Mormon 8:26–41; 9:1–30

Ang Basahon ni Mormon gisulat alang sa atong panahon.

Gipakita ni Jesukristo si Moroni unsay mahitabo kon motungha ang Basahon ni Mormon (tan-awa sa Mormon 8:34–35), nga migiya kaniya sa paghatag og maisogon nga mga pasidaan alang sa atong panahon. Samtang ikaw nagbasa sa Mormon 8:26–41 ug 9:1–30, pamalandongi kon sa unsang paagi ang iyang mga pulong mahimong magamit nganha kanimo. Sama pananglit, niini nga mga bersikulo si Moroni nangutana og 24 ka pangutana. Unsa nga ebidensiya ang imong nakita niini nga mga pangutana nga nakita ni Moroni sa atong panahon? Sa unsang paagi ang Basahon ni Mormon makatabang sa mga hagit nga nakita nang daan ni Moroni?

Paminaw ngadto sa Espiritu. Hatagi og pagtagad ang imong mga hunahuna ug mga pagbati, bisan og kini daw walay kalabotan sa imong gibasa. Kini nga mga pag-aghat mahimo nga mao ang unsay gusto sa imong Langitnong Amahan nga imong makat-onan. Sama pananglit, unsa nga mga impresyon nga aduna ka human mamalandong sa mga gipangutana ni Moroni diha sa Mormon 9:1–30?

Mormon 9:1–25

Si Jesukristo usa ka Dios sa mga milagro.

Gitapos ni Moroni ang mga sinulat sa iyang amahan uban sa usa ka gamhanan nga mensahe alang sa mga tawo sa atong panahon nga dili motuo sa mga milagro (tan-awa sa Mormon 8:26; 9:1, 10–11). Ngano mang gibati nimo nga gikinahanglan karon ang usa ka pagtuo sa mga milagro? Siksika ang Mormon 9:9–11, 15–27 ug ang Moroni 7:27–29 ug pamalandongi ang mga pangutana sama sa:

• Unsay akong makat-onan mahitungod sa Manluluwas gikan niini nga mga bersikulo?

• Unsay akong makat-onan bahin sa mga milagro, sa miagi ug sa kasamtangan?

• Unsa ang mga kaayohan sa pagtuo nga si Jesukristo usa ka Dios sa mga milagro? Unsa ang mga sangpotanan sa dili pagtuo niini?

• Unsa nga mga milagro—dagko ug gamay—ang gipahinabo sa Manluluwas dinhi sa akong kinabuhi? Unsa ang gitudlo niini nga mga milagro mahitungod Kaniya?

Si Presidente Russell M. Nelson mitudlo: “Ang atong Manluluwas ug Manunubos, si Jesukristo, mohimo sa uban Niyang labing gamhanan nga mga buhat karon ug sa higayon nga Siya mobalik na pag-usab. Makakita kita og milagrosong [mga] timailhan nga ang Dios Amahan ug ang Iyang Anak, [si Jesukristo] magdumala [niini nga Simbahan] sa kahalangdon ug himaya” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96). Unsa kaha sa imong pamati ang pipila niini nga mga milagro? Unsay imong mabuhat aron sa pagtabang sa Manluluwas nga matuman kini?

Unsay imong makat-onan mahitungod sa hugot nga pagtuo ug mga milagro gikan sa mga kasinatian sa Mga Santos sa Samoa, Tonga, Fiji, ug Tahiti sa dihang si Presidente ug si Sister Nelson mibista kanila? (tan-awa sa Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 101–4).

Tan-awa usab sa Ronald A. Rasband, “Tan-awa! Ako Mao ang usa ka Dios sa mga Milagro”,” Liahona, Mayo 2021, 109–12.

Mga Ideya sa Pagtudlo sa mga Anak

Mormon 7:8–10

Ang Basahon ni Mormon ug ang Biblia nagpamatuod kang Jesukristo.

• Aron sa paghatag og gibug-aton sa relasyon tali sa Biblia ug sa Basahon ni Mormon, sama sa gibuhat ni Moroni, mahimo kang makigdula og sama niini uban sa inyong mga anak: Hangyoa sila sa pagsulti “Daang Tugon, Bag-ong Tugon” kon imong ipataas ang usa ka kopya sa Biblia ug “Lain nga Tugon” kon imong ipataas ang usa ka kopya sa Basahon ni Mormon. Makapili usab kamo og pipila ka hitabo nga parehong gipamatud-an sa Biblia ug sa Basahon ni Mormon—sama sa pagkatawo, pagkamatay, ug Pagkabanhaw ni Jesus—ug dapita ang inyong mga anak sa pagpangita og mga litrato niini nga mga hitabo (sama pananglit, diha sa Libro sa mga Hulagway sa Ebanghelyo).

• Aron matabangan ang inyong mga anak nga makat-on sa ikawalo nga artikulo sa hugot nga pagtuo, mahimo nimong isulat ang matag pulong sa laing mga piraso sa papel. Dapita ang inyong mga anak nga magtinabangay sa pagbutang sa mga pulongan sa husto nga pagkahan-ay ug sa pagbalik niini sa pipila ka higayon.

Mormon 8:1–7

Makatuman ko sa kasugoan bisan kon mobati nga nag-inusara ako.

• Ang ehemplo ni Moroni mahimong makadasig sa inyong mga anak sa pagsunod sa kasugoan sa Dios bisan kon mobati sila nga nag-inusara. Human nimo mabasa ang Mormon 8:1–7 ngadto kanila, mahimo silang mopakigbahin kon unsa kaha ang ilang bation kon nakauban nila si Moroni. Diha sa mga bersikulo 1, 3, ug 4, unsa ang gisugo nga buhaton ni Moroni, ug giunsa niya sa pagsunod? Sa unsang paagi kita mahimong mas mahisama kang Moroni?

• Tingali ikaw ug ang inyong mga anak mahimong maghisgot bahin sa mga sitwasyon diin kinahanglan silang mopili tali sa husto ug sayop sa dihang walay tawo nga nagtan-aw. Sa unsang paagi nga ang pagbaton og hugot nga pagtuo diha ni Jesukristo makatabang kanato niini nga mga sitwasyon? Ang usa ka awit sama sa “Barogan ang Kamatuoran” (Songbook sa mga Bata, 81) mahimong makadugang niini nga panaghisgot.

Mormon 8:24–26; 9:7–26

Si Jesukristo “usa ka Dios sa mga milagro.”

• Mahimong gusto ninyong ipasabot ngadto sa inyong mga anak nga ang milagro usa ka butang nga buhaton sa Dios aron sa pagpakita sa Iyang gahom ug sa pagpanalangin sa atong mga kinabuhi. Dayon mahimo ninyong basahon ang mga hugpong sa mga pulong gikan sa Mormon 9:11–13, 17 nga naghulagway sa pipila sa mga milagro sa Dios, ug ang inyong mga anak mahimong makahunahuna og ubang mga milagro (ang mga hulagway gikan sa Libro sa mga Hulagway sa Ebanghelyo, sama sa mga nu. 26, 40, 41, ug 83, makatabang). Paghisgot mahitungod sa mga milagro nga nabuhat sa Dios sa imong kinabuhi.

• Ipakita sa inyong mga anak ang usa ka resipe, ug hisgoti kon unsay mahitabo kon dili nimo malista ang usa ka mahinungdanon kaayo nga sangkap. Basaha og dungan ang Mormon 8:24 ug 9:20–21 aron sa pagpangita sa mga “sangkap” nga mahimong mosangpot ngadto sa mga milagro gikan sa Dios.

Alang sa dugang nga mga ideya, tan-awa ang isyu karong bulana sa Higala nga magasin.

Moroni Overlooking the Destruction of the Nephites [Moroni Naglantaw sa Kalaglagan sa mga Nephite], ni Joseph Brickey