The Light of His Countenance Did Shine upon Them [Ang Kahayag sa Iyang Panagway Misanag diha Kanila], ni Gary L. Kapp

Oktubre 7–13: “Tan-awa, Ang Akong Hingpit nga Kalipay Nabug-os”

3 Nephi 17–19

Bag-o lamang nahuman ang adlaw ni Jesukristo sa pagpangalagad diha sa yuta sa Bountiful, nagtudlo sa Iyang ebanghelyo, nagtugot sa mga tawo nga makakita ug makabati sa mga marka diha sa Iyang nabanhaw nga lawas, ug sa pagpamatuod nga Siya mao ang gisaad nga Manluluwas. Karon panahon na nga mobiya. “Ang akong panahon miabot na,” Siya miingon (3 Nephi 17:1). Mobalik na unta Siya ngadto sa Iyang Amahan, ug nahibalo Siya nga ang mga tawo nagkinahanglan og panahon aron makapamalandong sa unsay Iyang gitudlo. Busa, nagsaad nga mobalik sa sunod adlaw, gipapauli Niya ang pundok sa katawhan ngadto sa ilang mga panimalay. Apan walay usa nga mibiya. Wala silay gisulti kon unsay ilang gibati, apan nakamatikod si Jesus niini: sila nanghinaot nga Siya “[m]agpabilin og diyutay pa nga panahon uban kanila” (3 Nephi 17:5). May uban pa Siyang importanteng butang nga buhaton, apan ang pagpakita og kapuangod alang sa mga anak sa Dios kanunay nga usa ka taas nga prayoridad alang Kaniya. Mao nga si Jesus mipabilin og diyutay pa nga panahon. Unsa ang misunod tingali mao ang labing malumo nga ehemplo sa pagpangalagad nga narekord diha sa kasulatan. Kadtong kinsa anaa didto makasulti lamang nga kini dili mahulagway (tan-awa diha sa 3 Nephi 17:16–17). Si Jesus Mismo misumada sa wala giplano nga espirituhanong pagbubo pinaagi niining yano nga mga pulong: “Karon tan-awa, ang akong hingpit nga kalipay nabug-os” (3 Nephi 17:20).

Mga Ideya alang sa Pagkat-on diha sa Panimalay ug sa Simbahan

3 Nephi 17; 18:24–25, 30–32

Ang Manluluwas mao ang akong hingpit nga ehemplo sa pagpangalagad.

Mga 2,500 ka tawo ang anaa sa dihang mipakita ang Manluluwas, apan nakakita Siya og paagi sa pagpangalagad kanila tagsa-tagsa. Unsay imong nabantayan mahitungod sa paagi nga Siya nangalagad diha sa 3 Nephi 17; 18:24–25, 28–32? Unsa nga mga panginahanglan ang Iyang gipangalagaran? Unsa nga mga kinaiya ang mihimo sa Iyang pagpangalagad nga epektibo? Mahimo usab kang maghunahuna mahitungod sa paagi nga Siya nangalagad kanimo. Sa unsang paagi ikaw makasunod sa Iyang ehemplo? (Tan-awa usab sa 3 Nephi 18:24–25 ug 28–32.)

Tan-awa usab sa “Si Jesukristo Adunay Kaluoy ug Miayo sa Katawhan” (bidyo), Librarya sa Ebangheyo.

Si Jesukristo Adunay Kalooy ug Miayo sa Katawhan | 3 Nephi 17:1–10

Nakita ni Jesus ang kahuyang sa mga tawo ug nangandam nga mobiya apan mitanyag sa Iyang kalooy ug makaayo nga gahom diha kanila. Gihangyo Niya ang tanan nga masakiton ug nag-antos sa pagduol, ug miayo kanila.

3 Nephi 17:13–22; 18:15–25; 19:6–9, 15–36

Ang Manluluwas mitudlo kanako kon unsaon sa pag-ampo.

Hunahunaa kon sama sa unsa kaha nga makadungog sa Manluluwas nga nag-ampo alang kanimo. Sa unsa nga paagi nga ang mao nga kasinatian makaapekto sa paagi nga ikaw mag-ampo? Pamalandongi kini samtang imong tun-an ang 3 Nephi 17:13–22; 18:15–25; ug 19:6–9, 15–36. Unsay imong makat-onan gikan sa ehemplo ug mga pagtulon-an ni Jesukristo mahitungod sa pag-ampo? Ikonsiderar ang pagpangita og mga panabot kabahin sa unsaon, kanus-a, asa, para ni kinsa, ug ngano nga mag-ampo. Unsa ang uban nga mga panabot nga imong maangkon gikan niini nga mga bersikulo?

Tan-awa usab sa Doktrina ug mga Pakigsaad 10:5.

3 Nephi 18:1–12

Mapuno ako sa Espiritu kon ako moambit sa sakramento.

Kon kanunay kita mobuhat og usa ka butang, pwede kini mahimong naandan o kaswal. Usahay sa kataposan mobuhat kita niini nga wala gani maghunahuna. Unsaon nimo sa pagpugong niana nga mahitabo sa sinemana nga ordinansa sa sakramento? Samtang imong basahon ang 3 Nephi 18:1–12, pamalandongi kon unsaon nimo nga mahimong “nabusog” sa espirituhanon nga paagi sa matag higayon nga moambit ka sa sakramento (tan-awa usab sa 3 Nephi 20:1–9). Sumala sa mga bersikulo 5–7, 11, unsa ang uban nga mga butang nga kinahanglan nga “kanunay” nga buhaton? Mahimo usab ka nga mamalandong kon nganong gihatag ni Jesus kanato ang ordinansa sa sakramento—ug kon ang sakramento ba nagtuman sa Iyang mga katuyoan sa imong kinabuhi. Nganong sagrado alang kanimo ang sakramento?

Sa iyang mensahe nga “Kanunay Mohinumdom Kaniya” (Liahona, Peb. 2018, 4–6), Si Presidente Henry B. Eyring mihatag og “tulo ka sugyot mahitungod kon unsay inyong mahinumduman kada semana kon moambit kamo sa sagradong mga simbolo sa sakramento.” Unsa ang labing importante kanimo mahitungod sa iyang mga sugyot? Unsa ang imong mabuhat aron sa pagpalambo sa imong pagsimba atol sa sakramento ug sa tibuok semana?

Unsa pa ang imong mabuhat aron mas makahulaganon nga mosimba? Mahimo kang mangutana sa imong kaugalingon og sama niini: “Sa unsang paagi ang sakripisyo sa Manluluwas nag-impluwensiya sa akong inadlaw nga kinabuhi?” “Unsa man ang akong maayo nga gibuhat isip Iyang disipulo, ug unsa ang akong mapalambo?”

Tan-awa usab sa Mateo 26:26–28; Jeffrey R. Holland, “Tan-awa ang Kordero sa Dios,” Liahona, Mayo 2019, 44–46; “Karon sa Atong Pag-ambit sa Sakramento,” Mga Himno, nu. 98; “Si Jesukristo Mipaila sa Sakramento” (bidyo), Librarya sa Ebangheyo.

Si Jesukristo Mipaila sa Sakramento | 3 Nephi 18

Si Jesus miestablisar sa Iyang sakramento didto sa katawhan sa Karaang Amerika. Ang Ginoo mipanalangin sa pan ug bino ug nangalagad sa sakramento agig paghinumdom sa Iyang lawas ug sa iyang dugo, nga gipaagas alang sa tanang katawhan.

Paghatag og panahon sa pagpamalandong. Usahay, ang pagtuon sa mga kasulatan mahimong usa ka pagsagol sa pagbasa, pag-ampo, ug pagpamalandong. Kon ikaw mohatag og hilom nga panahon sa pagpamalandong ug pagpakig-istorya sa Dios mahitungod sa unsay imong nakat-onan, ikaw makadugang sa gahom sa Iyang pulong diha sa imong kinabuhi.

3 Nephi 18:22–25

Mahimo nakong “ipakita” ang kahayag ni Jesukristo.

Kintahay aduna kay usa ka higala nga walay nahibaloan mahitungod ni Jesukristo gawas nga ikaw usa sa Iyang mga sumusunod. Unsa man ang maingon sa imong higala mahitungod Kaniya, base sa imong mga buhat? Unsa man ang kahulogan niini para nimo nga “ipakita ninyo ang inyong kahayag aron kini moiwag sa kalibotan”? (3 Nephi 18:24). Unsa ang uban nga mga imbitasyon nga gihatag sa Manluluwas diha sa 3 Nephi 18:22–25 nga makatabang kanimo sa pagpakita niana nga kahnayag?

Tan-awa usab sa Bonnie H. Cordon, “Aron Sila Makakita,” Liahona, Mayo 2020, 78–80.

3 Nephi 18:36–37; 19:6–22

Ang mga disipulo ni Jesukristo magtinguha sa gasa sa Espiritu Santo.

Paghunahuna mahitungod sa imong bag-ohay nga mga pag-ampo. Unsay gitudlo sa imong mga pag-ampo diha kanimo mahitungod sa imong kinasingkasing nga mga tinguha? Human makagahin og usa ka adlaw diha sa presensya sa Manluluwas, ang pundok sa katawhan “nag-ampo alang niana diin sila labing nagtinguha”—ang gasa sa Espiritu Santo (3 Nephi 19:9). Ngano nga ang gasa sa Espiritu Santo gitinguha pag-ayo? Samtang basahon nimo kini nga mga tudling, palandonga ang imong kaugalingon nga tinguha alang sa pakig-uban sa Espiritu Santo. Unsaon nimo nga makugihon nga magtinguha niana nga pakig-uban?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

3 Nephi 17:7, 20–25

Gihigugma sa Manluluwas ang matag anak sa Langitnong Amahan.

• Makagamit ka og hulagway sama niadtong anaa niini nga latid o ang bidyo “Si Jesukristo Nag-ampo ug ang mga Anghel Nangalagad sa mga Bata” (Librarya sa Ebangheyo) aron sa pagtabang sa inyong mga anak sa paghanduraw sa asoy diha sa 3 Nephi 17. Ikonsiderar ang pagbasa sa mga hugpong sa mga pulong o mga bersikulo gikan sa 3 Nephi 17 nga naghatag og gibug-aton sa gugma sa Manluluwas alang sa mga katawhan (sama sa mga bersikulo 7 ug 20–25). Ang inyong mga anak makadrowing dayon og hulagway sa ilang kaugalingon uban ni Jesus. Samtang nagbuhat sila niini, tabangi sila sa paghunahuna og mga paagi nga gipakita ni Jesus ang Iyang gugma alang kanila.

Si Jesukristo Nag-ampo ug ang mga Anghel Nangalagad sa mga Bata | 3 Nephi 17:11–25

Hut-ong sa imahe nga nagpakita sa mga bata nga puno sa kalipay sa mahigugmaong presensiya sa Manluluwas. Nag-ampo Siya sa milagrosong paagi alang sa katawhan sa karaang Amerika. Ang mga anghel mikunsad gikan sa langit ug nakig-uban sa mga bulahan.

Behold Your Little Ones [Tan-awa ang Inyong Gagmayng mga Bata], ni Gary L. Kapp

3 Nephi 18:1–12

Makahunahuna ko mahitungod ni Jesus kon moambit ko sa sakramento.

• Tingali imong madapit ang inyong mga anak sa pagsulti kanimo kon unsay mahitabo atol sa sakramento. Dayon mahimo ninyong basahon ang 3 Nephi 18:1–12 ug hangyoa ang inyong mga anak sa pag-isa og kamot kon makadungog sila og butang nga susama sa unsay gibuhat nato karon. Unsa ang gusto ni Jesukristo nga atong hinumdoman o hunahunaon atol sa sakramento? (tan-awa sa 3 Nephi 18:7, 11).

3 Nephi 18:15–24; 19:6–9, 15–36

Si Jesus nagtudlo kanako unsaon sa pag-ampo.

• Ang pagkanta og dungan sa usa ka awit mahitungod sa pag-ampo, sama sa “Ampo sa Usa ka Bata” (Songbook sa mga Bata, 6–7), usa ka maayo nga paagi sa pagtabang sa inyong mga anak sa paghunahuna mahitungod nganong mag-ampo kita. Ikaw ug ang inyong mga anak makabasa dayon sa 3 Nephi 18:18–21 ug maghisgot mahitungod sa unsay gitudlo ni Jesus mahitungod sa pag-ampo. Ang pagdapit sa inyong mga anak sa pagsulti kanimo kon unsa ang ilang gibati kon mag-ampo sila mahimong makatabang kanila sa pagpakigbahin sa ilang pagpamatuod bahin sa pag-ampo.

• Mahimong makalingaw alang sa mga bata nga mangita sa pipila sa bililhon nga mga panalangin sa pag-ampo. Mahimo nimong isulat ang mosunod nga mga pakisayran sa kasulatan diha sa mga piraso nga papel ug itago kini: 3 Nephi 18:15; 3 Nephi 18:20; 3 Nephi 18:21; 3 Nephi 19: 9; ug 3 Nephi 19:23. Ang inyong mga anak makapangita dayon sa mga papel ug basahon ang mga bersikulo, mangita sa mga butang nga gitudlo ni Jesukristo o sa Iyang mga disipulo mahitungod sa pag-ampo.

Alang sa dugang nga mga ideya, tan-awa ang isyu karong bulana sa Higala nga magasin.

Angels Ministered unto Them [Mga Anghel Nangalagad ngadto Kanila], ni Walter Rane.