“2–8 septiembre: “Chijultiko’q eere li Qaawa’.” Helaman 7–12,” Kim, Taaqehin—Choq’ re li ochoch ut li iglees: Lix Hu laj Mormon 2024 (2023)
“2–8 septiembre. Helaman 7–12,” Kim, Taaqehin—Choq’ re li ochoch ut li iglees: 2024 (2023)
Xjalam-uuch laj Nefi sa’ jun najt xteramil kab’l, xb’aan laj Jerry Thompson
2–8 septiembre: “Chijultiko’q eere li Qaawa’”
Helaman 7–12
Lix yuwa’ laj Nefi, laj Helaman, kixye reheb’ li ralal: “chijultikoʼq, chijultikoʼq eere.” Kiraj naq te’jultiko’q reheb’ lix xe’toonil, li raatineb’ li profeet, ut q’axal wi’chik naq taajultiko’q reheb’ “aj Tojol qix, a’an li Kristo” (chi’ilmanq Helaman 5:5–14). Saqen ru naq laj Nefi kijultiko’ re, xb’aan naq a’an ajwi’ li esil kixch’olob’ moqon chiruheb’ li tenamit chi “ink’a’ nalub’” (Helaman 10:4). “Chan put ru kiru chi sachk sa’ eech’ool lee Dios?” chan reheb’ (Helaman 7:20). Chixjunil lix k’anjel laj Nefi—li jutikank aatin, li tijok, xb’aanunkileb’ li sachb’a-ch’oolej, ut xpatz’b’al re li Dios naq taawanq li we’ej—a’an re xtenq’ankileb’ li tenamit chi sutq’iik rik’in li Dios ut chixjultikankil. Q’axal nim chik li ch’a’ajkilal naq nasach sa’ qach’ool li Dios chiru naq maji’ naqanaw ru a’an. Ut ink’a’ ch’a’aj naq taasachq a’an sa’ qach’ool naq jalb’ehinb’il qak’a’uxl xb’aan “li jo’maajo’il k’a’aq re ru re li ruchich’och’ a’in” ut naq moyb’il ru xb’aan li maak (Helaman 7:21; chi’ilmanq ajwi’ Helaman 12:2). A’b’anan, jo’ k’utb’il sa’ lix k’anjel laj Nefi, maajun wa numenaq li hoonal re “sutq’iik rik’in lee Dios” (Helaman 7:17).
Li na’leb’ re tzolok sa’ li ochoch ut sa’ li iglees
Eb’ li profeet neke’xk’utb’esi li rajom li Dios chiruheb’ li tenamit.
Jwal chaab’il Helaman 7–11 re tzolok chirix lix k’anjeleb’ li profeet. Naq yooqat chirilb’aleb’ li ch’ol a’in, k’e reetaleb’ lix b’aanuhom ut lix k’oxlahom laj Nefi ut chan ru na’aatinak rik’in li Qaawa’. Chan ru nakatxtenq’a lix k’anjel laj Nefi chixtawb’al ru lix k’anjeleb’ li profeet? Wahe’ junjunq li na’leb’ re aatenq’ankil. K’a’ chik ru nakataw?
-
Helaman 7:17–22: Eb’ li profeet neke’xyaab’asi li jalb’a-k’a’uxlej ut neke’xye resil li k’a’ru nak’ulman xb’aan li maakob’k.
Rik’in li k’a’ru xawil, chan raj ru taach’olob’ k’a’ru jun li profeet ut k’a’ru lix k’anjel? Naru nakatz’iib’a a’an. Chirix a’an, k’e reetal k’a’ chik ru taatz’iib’a raj chirix naq taawil “Profeet” sa’ li K’utul Raqal reheb’ li Loq’laj Hu (Biblioteca del Evangelio) malaj “Seguir al Profeta Viviente” (Enseñanzas de los Presidentes de la Iglesia: Ezra Taft Benson [2014], 159–167).
Ma xak’e reetal xkawilal xch’ool laj Nefi sa’ Helaman 7:11–29? K’a’ut naq wan naq eb’ li profeet tento te’aatinaq rik’in kawilal, jo’ kixb’aanu laj Nefi? K’oxla xsik’b’aleb’ xsumenkil a’an sa’ li raqal “Misach aach’ool” sa’ li raatin li Elder Neil L. Andersen, “Lix profeet li Dios” (Jolomil ch’utub’aj-ib’ re abril 2018).
Chi wankeb’ li na’leb’ a’in sa’ laa k’a’uxl, k’oxla chan ru naq li Qaawa’ ak xatrosob’tesi rik’in lix k’anjeleb’ lix profeet. K’a’ru toje’ xk’ut chawu rik’in xtz’uumal re li qayo’yookil profeet? K’a’ru yookat chixb’aanunkil re rab’inkil ut xtaaqenkil lix b’eresihom li Qaawa’?
Chi’ilmanq ajwi’ Temas del Evangelio, “Profetas,” Biblioteca del Evangelio.
Aajel ru naq lin paab’aal chirix li Jesukristo ink’a’ ka’ajwi’ k’ojk’o sa’ xb’eeneb’ li eetalil ut li sachb’a-ch’oolej.
Wi ta tz’aqaleb’ li eetalil ut sachb’a-ch’oolej re xjalb’al xch’ool anihaq, ke’jale’ raj xch’ool chixjunileb’ laj Nefita xb’aan li xninqal ru eetalil kixk’e laj Nefi sa’ Helaman 9. A’b’an moko kik’ulman ta a’an. K’e reetal chan ru naq li kristiaan ke’xk’uleb’ li sachb’a-ch’oolej sa’ Helaman 9–10. Qayehaq, naru nakajuntaq’eeta li ke’xb’aanu li oob’ chi winq rik’in li ke’xb’aanu li xbʼeenilebʼ aj raqol aatin sa’ Helaman 9:1–20 (chi’ilmanq ajwi’ Helaman 9:39–41; 10:12–15). K’a’ru nakatzol rik’in li seraq’ a’an chirix xnimob’resinkil laa paab’aal chirix li Jesukristo?
Chi’ilmanq ajwi’ 3 Nefi 1:22; 2:1–2.
Li Qaawa’ naxk’e wankilal reheb’ li neke’xsik’ ru xb’aanunkil li rajom a’an ut neke’xyal xq’e chi ab’ink chiruheb’ lix taqlahom.
Naq yooqat chirilb’al Helaman 10:1–12, k’e reetal li kixb’aanu laj Nefi re xsahob’resinkil xch’ool li Qaawa’. Chan ru kixk’ut naq naxsik’ li rajom li Qaawa’ ruuchil li rajom xjunes rib’? K’a’ru nakatxmusiq’a lix numsihom laj Nefi chixb’aanunkil?
Xk’oxlankil sa’ qach’ool li raatin li Dios naxb’oq li musiq’anb’il na’leb’.
Naq nakaweeka’ naq raahob’tesinb’ilat, naq yoo laa k’a’uxl, malaj naq sachso laa ch’ool, maare taatzol jun aajel ruhil na’leb’ rik’in li kixb’aanu laj Nefi sa’ Helaman 10:2–4. K’a’ru kixb’aanu a’an naq kireek’a “xtawajik xch’ool”? (raqal 3).
Li Awa’b’ej Henry B. Eyring kixye: “Naq nokok’oxlak sa’ qach’ool, naqab’oq lix k’utb’esihom li Musiq’ej” (“Presten servicio con el Espíritu,” Liahona, noviembre 2010, 60). Chan ru naru taak’aytesi aawib’ chi k’oxlak sa’ aach’ool chi kok’ aj xsa’?
Li Qaawa’ naraj naq taajultiko’q a’an we.
Chan ru naq neke’jultiko’ aawe li na’leb’ aajeleb’ ru—jo’eb’ lix kutankil xyo’lajikeb’ laa junkab’al malaj li na’leb’ choq’ re jun li examen? Chan ru naq a’in chanchan li yalok q’e na’ajman ru re “taajultiko’q qe li Qaawa’”? (Helaman 12:5). Chan ru naq jalan?
Sa’ Helaman 12 tz’iib’anb’il wiib’ oxib’ li na’leb’ li neke’xk’eheb’ li kristiaan chi sachk sa’ xch’ooleb’ li Qaawa’. Naru nakatz’iib’aheb’ ut nakak’oxla ma yookeb’ chajalb’ehinkil chiru li Qaawa’. K’a’ru nakatxtenq’a chixjultikankil li Jesukristo? K’a’ru musiq’anb’ilat chixb’aanunkil a’ yaal li xatzol?
Chi’ilmanq ajwi’ Tzol’leb’ ut Sumwank 20:77, 79; “Chi tuulan, ut chi tuqtu,” Eb’ li B’ich, 110.
Oksiheb’ li k’anjeleb’aal sa’ li k’utuk. Li Kolonel kixjuntaq’eeta chi kok’ aj xsa’ li na’leb’ re li evangelio rik’in li k’a’aq re ru re li yu’amej neke’xnaw ru li kristiaan. Naq yooqat chirilb’al malaj chixk’utb’al Helaman 12:1–6, naru nakajuntaq’eeta “chan ru [naq] naʼeekʼasiman xchʼoolebʼ … li winq” rik’in li naqeek’a naq nokoxaqli chiru jun ajwi’ li qa’. Chan ru naru toowanq chi ink’a’ taa’eek’asiiq qach’ool sa’ musiq’ej?
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Li Qaawa’ naraj naq tinjultika a’an.
-
Re tex’ok chi aatinak chirix xjultikankil li Qaawa’, naru nakaseraq’i reheb’ laa kok’al jun hoonal naq kiwan k’a’ru kisach sa’ aach’ool. Kanab’eb’ chixyeeb’al ajwi’ resil k’a’ruhaq xsach sa’ xch’ooleb’. Chirix a’an naru nekeril Helaman 7:20–21, ut naru nakapatz’ reheb’ laa kok’al k’a’ru naraj naxye naq nasach li Dios sa’ xch’ooleb’. Laa kok’al naru neke’xyiib’ xjalam-uuch li k’a’ru naru naxk’e chi sachk li Qaawa’ sa’ qach’ool, ut k’a’ru naraj naxye naq sachenaq li Dios sa’ qach’ool. Chirix a’an naru neke’xk’oxla li k’a’ru nokoxtenq’a chixjultikankil. Naq yooqeb’ chixwotzb’al lix na’leb’eb’, naru neke’risiheb’ li jalam-uuch toj reetal naq lix jalam-uuch li Kolonel taakanaaq chi kutankil.
Eb’ li profeet neke’xch’olob’ xyaalal li Jesukristo.
-
Tenq’aheb’ laa kok’al chirilb’al Helaman 8:13–23 re te’xtaw xk’ab’a’eb’ li profeet li ke’k’utuk chirix li Jesukristo. Naru neke’xnumsi jun xjalam-uuch li Jesus chirib’ileb’ rib’ rajlal sut naq te’xtaw jun k’ab’a’ej. K’a’ru naxk’ut li qayo’yookil profeet chirix li Kolonel?
-
Naru ajwi’ nekeb’icha jun li b’ich chirixeb’ li profeet, maare “Jun li profeet” (B’ichleb’aal choq’ reheb’ li Kok’al, 58–59). Naru nekesik’ ru jun ch’ol aatin aajel ru sa’ li b’ich, ut teetz’iib’aheb’ li junjunq chi aatin wan sa’ li ch’ol chiruheb’ xjalam-uuch li oqej setb’ileb’ chiru hu. Toja’ naq teek’eheb’ lix jalam-uuch li oqej chiru li tz’ak li te’wulaq toj chiru jun xjalam-uuch li Kolonel, ut eb’ laa kok’al naru te’xtaaqeheb’ li oqej toj sa’ xjayal li jalam-uuch. Chan ru naq xtaaqenkil li profeet ak xooxb’eresi rik’in li Jesukristo?
Xk’oxlankil sa’ qach’ool li raatin li Dios naxb’oq li musiq’anb’il na’leb’.
-
Re xtenq’aankileb’ laa kok’al chixtawb’al ru li naraj naxye k’oxlank sa’ ch’oolej, naru nekeril “K’oxlank sa’ ch’oolej” sa’ li K’utul Raqal reheb’ li Loq’laj Hu (Biblioteca del Evangelio). K’a’ruheb’ chik li aatin li chanchaneb’ tz’ilok-ix malaj k’oxlank sa’ ch’oolej? Naru nekeril Helaman 10:1–3 ut teeyeheb’ li aatin a’an sa’ xna’aj li aatin tz’ilok-ix malaj k’oxlank sa’ ch’oolej. K’ut chiruheb’ laa kok’al chan ru naq te’xk’oxlaheb’ sa’ xch’ooleb’ li loq’laj hu naq neke’rileb’.
Tin’ab’inq chiru lin Choxahil Yuwa’.
-
Laj Nefi ki’ab’in chiru li qaChoxahil Yuwa’ us ta ch’a’aj a’an. Re rilb’al reetalil a’in, naru nekeril Helaman 10:2, 11–12. Laa kok’al naru neke’xk’utb’esi li kixb’aanu laj Nefi—b’eek chixjunpak’al li kab’l (chanchan ta wi’ naq yooqeb’ chi xik sa’ li rochocheb’), xaqliik, xb’alq’usinkil rib’, ut xik sa’ xjunpak’alil chik li kab’l (chanchan ta wi’ naq yookeb’ chi q’ajk re xtzolb’aleb’ li tenamit). B’ar wan junjunq li k’a’aq re ru li naraj li qaChoxahil Yuwa’ naq taqab’aanu?
Re xtawb’al xkomon chik li na’leb’, chi’ilmanq li hu Amigos re li po a’in.
Rik’in li maatan re profeetil aatin, laj Nefi kixnaw ani kikamsink re li xb’eenil aj raqol aatin.
© The Book of Mormon for Young Readers, Laj Seantum—Tawb’il laj kamsinel, xb’aan li xBriana Shawcroft; maawisi reetalil