Jun kutan, jun q’ojyin, ut jun kutan, xb’aan laj Jorge Cocco

16–22 septiembre: “Taqsi aajolom ut chiwanq xsahil aach’ool”

3 Nefi 1–7

Chi junpak’al, a’an chaq jun chaab’il hoonal re wank choq’ aj paab’anel chirix li Jesukristo. Yookeb’ chi tz’aqob’resiik ru k’iila profeetil aatin—eb’ li xninqal ru eetalil ut sachb’a-ch’oolej sa’ xyanqeb’ li tenamit ke’reetali naq moko najt ta chik xyo’lajik li Kolonel. A’b’anan chi junpak’al chik, a’an ajwi’ jun ch’a’ajkil kutan choq’ reheb’ laj paab’anel, xb’aan naq us ta ke’wan k’iila sachb’a-ch’oolej, eb’ li ink’a’ ke’paab’an yookeb’ chixyeeb’al naq “ak numenaq li kutan” re taayo’laaq li Kolonel (3 Nefi 1:5). Eb’ li kristiaan a’an “ke’xwaklesi nimla choqink chiru li ch’och’” (3 Nefi 1:7) ut ke’xxaqab’ ajwi’ jun kutan te’kamsiiq wi’ chixjunileb’ laj paab’anel wi ink’a’ taak’utmanq li eetalil yeeb’il jo’ profeet xb’aan laj Samuel aj Lamanita—naq taawanq jun q’ojyin maak’a’aq wi’ li aak’ab’.

Sa’ li ch’a’ajkil kutan a’an, li profeet aj Nefi “ki’elajin chi anchal xmetz’ew chiru li Dios choq’ re lix tenamit” (3 Nefi 1:11). Lix sumehom li Qaawa’ naxwaklesi xch’ool yalaq ani narahob’tesiik malaj nawiib’an xch’ool ut naraj ru xnawab’al naq li saqen tixq’ax ru li q’ojyin: “Taqsi aajolom ut chiwanq xsahil aach’ool; … tintz’aqob’resi ru chixjunil li xintaqla chi yeemank rik’in xtz’uumaleb’ re lin santil profeet” (3 Nefi 1:13).

Li na’leb’ re tzolok sa’ li ochoch ut sa’ li iglees

3 Nefi 1–7

Re taajalaaq qach’ool rik’in lix evangelio li Jesukristo, taa’ajmanq qakuyum ut xyalb’al qaq’e.

Sa’ 3 Nefi 1–7 wan resil li ani ke’jale’ xch’ool chirix li Qaawa’ ut li ani ink’a’. K’a’ru lix jalanileb’ li wiib’ chi ch’uut a’in? Jun li eetalil jo’ li tusb’il arin naru nakatxtenq’a chixtuqub’ankil li yookat chixk’oxlankil:

	Li k’a’ru naxq’unob’resi lix jalajik li ch’oolej	Li k’a’ru naxkawob’resi lix jalajik li ch’oolej
3 Nefi 1:5–11	Ink’a’ xpaab’ankil li raatineb’ li profeet ut xse’enkileb’ li tiikeb’ xch’ool	Xpaab’ankil li raatineb’ li profeet ut tijok re xk’ulb’al tenq’
3 Nefi 1:29–30
3 Nefi 2:1–3
3 Nefi 3:12–16
3 Nefi 4:8–10, 30–33
3 Nefi 6:13–18
3 Nefi 7:15–22

Oksiheb’ li patz’om naq yookat chi tzolok. Qayehaq, naq yooqat chixtz’iib’ankil aana’leb’ arin, naru nakapatz’ “K’a’ru li tento tintzol arin?” A’an tixb’oq aamusiq’ankil xb’aan li Santil Musiq’ej.

3 Nefi 1:1–23

Sa’ xk’ab’a’ li Jesukristo, naru “nawan xsahil inch’ool.”

Laa Choxahil Yuwa’ naxnaw naq te’wulaq hoonal li ch’a’ajeb’ ut xiwxiweb’ sa’ laa yu’am. A’b’an naraj ajwi’ naq taasaho’q aach’ool. Il 3 Nefi 1:1–23 re xtzolb’al k’a’ut naq ke’xuwak laj Nefita li tiikeb’ chi paab’ank. K’a’ut naq li Qaawa’ kixye reheb’ naq “taawanq xsahileb’ xch’ool”?

Li Kolonel kiroksi li aatin “chiwanq xsahil aach’ool” naab’al sut—jo’ eetalil, sa’ Mateo 14:24–27; Jwan 16:33; Tzol’leb’ ut Sumwank 61:36; 78:17–19. K’a’ru nawulak chawu chirixeb’ li b’oqok a’in? Naru nakawileb’ li raqal neke’chal rub’elaj ut chirixeb’ a’an re xtawb’al ru k’a’ru yoo chi k’ulmank naq li Kolonel kixyeheb’ li aatin a’an. Sa’ li junjunq chi hoonal, k’aru kixye li kitenq’ank reheb’ li kristiaan chixq’axb’al ru lix xiw? Chan ru xb’aanuhom a’in choq’ aawe?

Naru nakawil li raatin li Awa’b’ej Russell M. Nelson, “Li sahil ch’oolejil ut kole’k sa’ musiq’ejil,” (Jolomil ch’utub’aj-ib’ re octubre 2016). K’a’ru naxk’ut li Awa’b’ej Nelson chirix xtawb’al xsahil aach’ool yalaq ta b’ar wankat? K’e reetal jarub’ sut naq li Awa’b’ej Nelson naxye li aatin jayalink. Naru nakajuntaq’eeta li xjayalinkil jun li camara malaj jalan chik li ilob’aal rik’in li xjayalinkil aawib’ rik’in li Jesukristo. Chan ru naq mas wi’chik taajayali aawib’ rik’in a’an?

Chi’ilmanq ajwi’ “Salud Mental,” malaj jalan chik li na’leb’ sa’ li perel “Ayuda para la vida” sa’ li Bilioteca del Evangelio.

3 Nefi 1:4–21; 5:1–3

Li Qaawa’ tixtz’aqob’resi ru chixjunil li raatin sa’ xhoonalil a’an.

Il 3 Nefi 1:4–7 ut k’oxla k’a’ raj ru kaweek’a wi ta xatwan sa’ xyanqeb’ laj paab’anel a’an. K’a’ru ke’xb’aanu re naq taakanaaq chi kaw lix paab’aaleb’? (chi’ilmanq 3 Nefi 1:4–21 ut 5:1–3). Chan ru naq kitz’aqlok ru li raatin laj Samuel? (chi’ilmanq 3 Nefi 1:19–21). Chan ru naq li Qaawa’ ak xtz’aqob’resi ru li raatin sa’ laa yu’am?

3 Nefi 1:4–15; 5:12–26; 6:10–15; 7:15–26

Laa’in jun xtzolom li Jesukristo.

Laj Mormon kixye, “K’ehomaq reetal, laa’in jun xtzolom li Jesukristo” (3 Nefi 5:13). K’a’ru naraj naxye li aatin a’an choq’ aawe? Naru nakatsik’ok sa’ 3 Nefi 1:4–15; 5:12–26; 6:10–15; ut 7:15–26 re xtawb’al chan ru lix ch’ooleb’, lix paab’aaleb’, ut lix b’aanuhomeb’ lix tzolom li Kristo.

Chi’ilmanq ajwi’ “Chinwanq raj jo’ li Jesus,” B’ichleb’aal choq’ reheb’ li kok’al, 40–41.

3 Nefi 22:11–12; 3:1–26

Naq nink’anjela lin paab’aal chirix li Jesukristo, ink’a’ tento tinxuwaq.

Li ke’xk’ul laj Nefita rikineb’ laj elq’ naru naxk’e aana’leb’ li tatxtenq’a rik’in li k’a’ru xiwxiw sa’ musiq’ej. Sik’eb’ li na’leb’ a’in sa’ 3 Nefi 2:11–12 ut 3:1–26. Qayehaq, naru nakawil li raatin laj Giddianhi sa’ 3 Nefi 3:2–10 ut taajuntaq’eeta rik’in chan ru naq laj Satanas naxyal aab’alaq’inkil. K’a’ru nakatzol rik’in li kixb’aanu laj Lajoneus?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

3 Nefi 1:4–15, 19–21

Kik’utun chaq jun ak’ chahim naq kiyo’la li Jesukristo.

• Li perel re kok’ k’anjel re li xamaan a’in naru naxtenq’aheb’ laa kok’al chi tzolok chirix li sachb’a-ch’oolej ke’ril laj Nefita naq kiyo’la li Jesus. Naru ajwi’ nakawoksi “Ch’ol 41: Eb’ li reetalil lix yo’lajik li Kristo” (Eb’ li Esilal sa’ lix Hu laj Mormon, 114–116) re xk’utb’al li seraq’ a’in chiruheb’—malaj re xtenq’ankileb’ a’an chixseraq’inkil aawe.

3 Nefi 1:4–21

Li neke’xye li profeet junelik natz’aqlok ru.

• Naq nekeril 3 Nefi 1:4–10, patz’ reheb’ laa kok’al naq te’xye k’a’ raj ru te’reek’a wi ta ke’wan sa’ xyanqeb’ laj paab’anel sa’ li kutan a’an. Naq neke’ril lix raqik li seraq’ sa’eb’ li raqal 11−15 naru neke’xye chan ru naru xtz’aqob’resinkil ru li ch’ol aatin a’in: “Li na’leb’ sa’ li seraq’ a’in, a’an …”

• Maare laa kok’al naru nakate’xtenq’a chixk’oxlankil jalan chik hoonal naq li Dios kixtz’aqob’resi ru li kixyeechi’i rik’in xtz’uumal re lix profeet. Maare taawulaq chiruheb’ xsik’b’aleb’ xjalam-uucheb’ li seraq’ a’in sa’ li Hu reheb’ li Jalam-uuch re li Evangelio (chi’ilmanq, jo’ eetalil, 7–8 ut 81). Kanab’eb’ chixwotzb’al k’a’ru neke’xnaw chirixeb’ li seraq’ a’an, jo’ ajwi’ chan ru naq ke’tz’aqlok ru lix yeechi’ihom li Dios. Ilomaq 3 Nefi 1:20, ut wotz lix nawom aach’ool chirixeb’ li na’leb’ a’in.

3 Nefi 2:11–12; 3:13–14, 24–26

Jwal kawo wi’chik naq naqach’utub’ qib’.

• Tenq’aheb’ laa kok’al chixtawb’al ru k’a’ut naq ke’xch’utub’ rib’ laj Nefita, jo’ ajwi’ eb’ li osob’tesihom ke’xk’ul sa’ 3 Nefi 2:11–12 ut 3:13–14, 24–26. K’a’ut naq aajel ru naq laa’o taqach’utub’ qib’ sa’eb’ li qajunkab’al ut sa’ li iglees?

• Ma wankeb’ li k’a’aq re ru naru nakawoksi re xk’utb’al lix kawilal li junajil? Laa kok’al naru neke’xyal xtoqb’al jun li che’ ut chirix a’an jun ch’uut li che’, malaj xpejb’al jun perel li hu ut chirix a’an jun ch’uut li hu. Chan ru naq chanchano li che’ malaj li perel hu?

3 Nefi 5:12–26; 6:14; 7:15–26

Laa’in jun xtzolom li Jesukristo.

• Chirix rilb’al 3 Nefi 5:13, patz’ reheb’ laa kok’al naq te’xka’suti li ch’ol aatin “Laa’in jun xtzolom li Jesukristo.” Re xtzolb’al k’a’ru na’ajman re wank jo’ xtzolom li Jesukristo, ilomaq junjunq reheb’ li seraq’ a’in: eb’ laj Lamanita li jalb’ileb’ xch’ool (chi’ilmanq 3 Nefi 6:14), laj Mormon (chi’ilmanq 3 Nefi 5:12–26), ut laj Nefi (chi’ilmanq 3 Nefi 7:15–26). Naru ajwi’ nakataw li na’leb’ sa’ jun li b’ich jo’ “Chinwanq raj joʼ li Jesus” (B’ichleb’aal choq’ reheb’ li Kok’al, 40–41).

• Tenq’aheb’ laa kok’al chixyiib’ankil xjalam-uucheb’ li ruq’ chiru jun perel li hu ut chixsetb’al. Tz’iib’a “Laa’in jun xtzolom li Jesukristo” chiru li hu, ut patz’ reheb’ naq te’xyiib’ junpak’al chik xjalam-uuch li naru neke’xb’aanu re wank jo’ tzolom.

Re xtawb’al xkomon chik li na’leb’, chi’ilmanq li hu Amigos re li po a’in.

Jun kutan, jun q’ojyin, ut jun kutan, xb’aan laj Walter Rane